1. Ano, eia kekahi, ma ka malama umikumamakahi o ka makahiki umikumamaiwa, ma ka la umi o ka malama, ua ikea ka poe koa o ko Lamana poe e nee mai ana i ka aina o Amoniha.

2. Aia hoi, ua kukulu hou ia ke kulanakauhale a ua hoonoho iho o Moroni i kekahi poe koa ma na palena o ke kulanakauhale, a ua hoahua aku lakou i lepo a puni, e paku ia lakou mai na pua mai, a me na pohaku a ko Lamana poe; no ka mea, kaua mai la lakou me na pohaku, a me na pua.

3. Aia hoi, ua i aku au ua kukulu hou ia ke kulanakauhale o Amoniha. Ke i aku nei au ia oukou, he oiaio, ua kukulu hapa ia, a no ka anai e ana o ko Lamana poe ia wahi i kekahi manawa mamua no ka hala o na kanaka, ua manao lakou e lilo hou ia i mea pio oluolu no lakou.

4. Aka hoi, nani wale ka ko lakou kuhihewa; no ka mea, o ko Nepai poe ua kope ae la lakou i puu lepo a puni lakou, a no ke kiekie ua hiki ole i ko Lamana poe ke hoolei mai i ka lakou mau pohaku a me ka lakou mau pua ia lakou nei, e hoeha ia lakou nei, aole hoi i hiki ia lakou ke lele mai maluna o lakou nei, ke ole ma ko lakou nei puka e komo ai.

5. Ano, i keia manawa ua kahaha nui loa ka poe luna nui o ko Lamana poe, no ke akamai o ko Nepai poe i ka hoomakaukau ana i na wahi o lakou e malu ai.

6. Ano, ua manao na luna o ko Lamana poe, no ka lehulehu loa o lakou, he oiaio, ua manao lakou e ae ia aku lakou e lele mai maluna o lakou nei me lakou i hana ai mamua aku; he oiaio, a ua hoomakaukau no hoi lakou ia lakou iho me na pale-lima, a me na pale-umauma; a ua hoomakaukau no hoi lakou ia lakou iho me na aahu ili; he oiaio, na aahu manoanoa loa, e uhi i ko lakou olohelohe.

7. A no ka hoomakaukau ia ana peia, ua manao lakou e lanakila lakou me ka luhi ole a hookauwa iho i ko lakou poe hoahanau i ka auamo hooluhi, a i ole ia e pepehi a e luku mai ia lakou nei e like me ko lakou mea e lealea ai.

8. Aka hoi, me ke kahaha nui loa o lakou, ua hoomakaukau ia lakou nei no lakou, ma ke ano i ike e ole ia mamua mawaena o ka poe mamo a Lehi. Ano, ua hoomakaukau ia lakou no ko Lamana poe, e kaua mamuli o ke ano o na olelo ao a Moroni.

9. A eia kekahi, ua kahaha nui loa iho la ko Lamana poe, a o ko Amalikia poe, ma ke ano o ko lakou hoomakaukau ana, no ke kaua.

10. Ano, ina ua iho mai ke alii o Amalikia mai ka aina mai o Nepai, ma ke alo o kona poe koa, malia paha ua kena ae la oia i ko Lamana poe e hoouka mai i ko Nepai poe ma ke kulanakauhale o Amoniha; no ka mea hoi, aole ona manao i ke koko o kona poe kanaka.

11. Aka hoi, aole i iho mai o Amalikia, oia iho, e kaua. A, aia hoi, aole o kona poe luna nui i aa e hoouka mai i ko Nepai poe ma ke kulanakauhale o Amoniha, no ka mea, ua hoano e o Moroni i ka hooponopono ana o na mea mawaena o ko Nepai poe, a no ia mea, ua loaa ole iho i ko Lamana poe ko lakou mau wahi e pee ai; a, aole e hiki ia lakou ke lele mai maluna iho o lakou nei;

12. Nolaila, hele aku la lakou iloko o ka waonahele, a lawe aku la i ko lakou mau halelewa, a haele ae la i ka aina o Noa, me ka manao o ka wahi maikai e ae ia no lakou e hele ai, e ku e mai i ko Nepai poe;

13. No ka mea, aole lakou i ike ua hooikaika o Moroni a kukulu iho la i na pakaua e malu ai no ko kela kulanakauhale no ko keia kulanakauhale ma ka aina a puni; nolaila, haele ae la lakou i ka aina o Noa, me ka manao paa; he oiaio, hele mai la ko lakou poe luna nui, a hoohiki iho la lakou e anai mai lakou i ko kela kulanakauhale.

14. Aka hoi, me ke kahaha o lakou, o ke kulanakauhale o Noa, he wahi nawaliwali no ia mamua aku, ua lilo iho la ia i keia manawa, ma o Moroni la i wahi ikaika; he oiaio, e oi aku ana mamua o ka ikaika o ke kulanakauhale o Amoniha.

15. Ano hoi, he naauao keia iloko o Moroni; no ka mea, ua manao iho la oia e hoopuiwa ia lakou ma ke kulanakauhale o Amoniha; a o ke kulanakauhale o Noa ka wahi nawaliwali loa ma ka aina mamua aku, nolaila, e hele aku lakou ilaila e kaua; a pela no ia, e like me kona makemake.

16. Aia hoi, ua hoonoho iho la o Moroni ia Lehi i luna nui maluna iho o na kanaka o ia kulanakauhale; a o ua Lehi la no ia, nana i kaua pu me ko Lamana poe ma ke awawa, ma ka hikina o ka muliwai Sidona.

17. A aia hoi kekahi, i ko Lamana poe i ike ai o Lehi no ka luna no ke kulanakauhale, ua hoohoka hou ia lakou, no ka mea, ua hopohopo nui loa iho la lakou ia Lehi; aka hoi, ua hoohiki iho la ko lakou poe luna nui me kahi olelo hoohiki, e hoouka mai i ke kulanakauhale; nolaila, kai mai la lakou i na puali o lakou.

18. Ano hoi, aole e hiki i ko Lamana poe ke komo mai iloko o ko lakou nei mau pakaua e malu ai, ma kekahi ala e, ke ole ma ka puka, no ke kiekie o ka puu i hooahua ia iluna, a me ka hohonu o ka auwaha i eli ia ai a puni, ma ka puka wale no koe.

19. A pela i hoomakaukau ia ai ko Nepai poe e luku aku i na mea a pau e hoao ana e pii iluna e komo mai i ka pakaua ma kekahi ala e ae, ma ka hoolei ana i na pohaku a me na pua ia lakou.

20. Pela lakou i hoomakaukau ia ai; he oiaio, he puali o ko lakou poe kanaka ikaika loa, me ka lakou mau pahikaua a me ka lakou mau maa, e hahau aku i ka poe a pau e hoao mai ana e komo ma ka puka e komo ai, iloko o ko lakou wahi e malu ai; a pela i hoomakaukau ia ai lakou no ka pale ana ia lakou iho mai ko Lamana poe ae.

21. A eia kekahi, kai mai la ka poe luna nui o ko Lamana poe i na puali o lakou imua o ka puka e komo ai, a hoomaka ae la e paio mai me ko Nepai poe, e komo mai iloko o ko lakou nei wahi e malu ai; aka hoi, ua hooauhee ia aku lakou ia manawa aku ia manawa aku, a pepehi nui ia lakou, ma ka luku nui loa.

22. Ano, ia lakou i ike ai ua hiki ole ia lakou ke loaa ka mana maluna iho o ko Nepai poe ma ke ala e komo ai, hoomaka ae la lakou e eli ilalo i ko lakou nei mau puu lepo, e hiki ia lakou ke loaa ae he alahele no na puali o lakou, i loaa ai ia lakou ka pomaikai like e kaua; aka hoi, ma keia mau hoao ana, ua kahili ia aku lakou me na pohaku a me na pua pana i hoolei ia aku ia lakou; a ma kahi o ka hoopiha ia ana i na auwaha ma ka hoohaahaa ana i na puu lepo, ua hoopiha hapa ia me na kino make a eha o lakou.

23. Pela he mana loa ko ko Nepai poe maluna iho o ko lakou poe enemi; a pela ko Lamana poe i hoao ai e luku mai i ko Nepai poe, a pau ae la ko lakou poe luna nui i ka pepehi ia; he oiaio, a ua oi aku mamua o ke tausani hookahi o ko Lamana poe i pepehi ia, a ma kekahi aoao hoi, aole hookahi mea o ko Nepai poe i pepehi ia.

24. Ua kokoke he kanalima i hoeha ia, ka poe i paku ole ia mai na pua pana ae o ko Lamana poe ma kahi e komo ai, aka ua pale ia lakou e na pale-lima, a me ko lakou mau pale-umauma, a me ko lakou mau pale-poo, a no ia mea, ma na wawae ko lakou mau eha; a ua nui loa kekahi o ua mau eha nei.

25. A eia kekahi, i ka wa o ko Lamana i ike ai ua pepehi ia ko lakou poe luna nui a pau, hee aku la lakou iloko o ka waonahele. A eia kekahi, hoi aku la lakou i ka aina o Nepai, e hai aku i ko lakou alii, o Amalikia, he Nepai hoi oia ma ka hanau ana, no ko lakou poho nui.

26. A eia kekahi, huhu nui loa iho la oia i kona poe kanaka, no kona loaa ole ana kona mea i makemake ai maluna iho o ko Nepai poe; ua hookauwa ole oia ia lakou i ka auamo hooluhi;

27. He oiaio, ua ukiuku nui loa oia, a kuamuamu aku la oia i ke Akua, a me Moroni no hoi, a hoohiki ino iho la me kekahi olelo kupaa e inu no ia i kona koko; a o keia no ka malama ana o Moroni i na kauoha a ke Akua i ka hoomakaukau ana no ka maluhia o kona poe kanaka.

28. A eia kekahi, ma keia aoao, ua aloha aku ko Nepai poe i ka Haku, i ko lakou Akua, no kona mana loa i ka hoopakele ana mai ia lakou mai na lima mai o ko lakou poe enemi.

29. A pela i pau ai ka makahiki umikumamaiwa o ke au o na lunakanawai maluna iho o ka poe kanaka o Nepai;

30. He oiaio, a he malu mau mawaena o lakou, a me ka pomaikai nui loa ma ka ekalesia, no ko lakou hoolohe ana a hooikaika ana i ka malama ana i ka olelo a ke Akua, i hai ia aku ai ia lakou e Helamana, a me Sibalona, a me Korianatona, a me Amona, a me kona poe hoahanau, a ia mea ia mea aku; he oiaio, e ka poe a pau i hoolilo ia ai e ka aoao hemolele o ke Akua, i bapetizo ia i ka mihi, a hoouna ia ae la e haiolelo aku mawaena o na kanaka, a pela aku.