1. Ano, eia kekahi, ma ka makahiki eono o ke au o na lunakanawai maluna iho o ka poe kanaka o Nepai, aole no na paio aole hoi na kaua ma ka aina o Zarahemela;

2. Aka, ua hoopilikia ia na kanaka, he oiaio, ua hoopilikia nui loa ia no ka poino ana o ko lakou poe hoahanau, a no ka lilo ana aku hoi o na pua a me na ohana holoholona o lakou, a no ka poino ana o na kihapai o ka hua liilii, i hahi ia malalo iho o na wawae a i hoopau ia e ko Lamana poe;

3. A no ka nui o ko lakou popilikia, he kumu ko kela mea keia mea e uwe ai; a manaoio iho la lakou o ka hoopai ana ia o ke Akua i hoouna ia mai maluna o lakou, no ko lakou hewa a me ko lakou mau mea ino; nolaila, ua hoala ia lakou e hoomanao i na mea e pono ia lakou ke hana.

4. A hoomaka ae la lakou e hookupaa nui ae i ka ekalesia; he oiaio, a he nui ka poe i bapetizo ia iloko o na wai o Sidona, a i hoohui ia mai i ka ekalesia o ke Akua; he oiaio, ua bapetizo ia lakou ma ka lima o Alama, ka mea i hoolaa ia i kahuna nui maluna o na kanaka o ka ekalesia, ma ka lima o kona makuakane o Alama.

5. A eia kekahi, ma ka makahiki ehiku o ke au o na lunakanawai, ua aneane ekolu tausani elima haneri mea i hoohui aku ia lakou iho i ka ekalesia o ke Akua, a i bapetizo ia. A pela i pau ai ka makahiki ehiku o ke au o na lunakanawai maluna iho o ka poe kanaka o Nepai; a ua maluhia mau ma ia manawa a pau.

6. A eia kekahi, ma ka makahiki ewalu o ke au o na lunakanawai, hoomaka ae la ka poe kanaka o ka ekalesia e mahuahua aku ma ka haaheo no ko lakou waiwai nui loa, a me ko lakou mau kilika nani, a me ko lakou ie i milo makalii ia, a no ka nui wale o na pua a me na ohana holoholona o lakou, a me ko lakou gula, a me ko lakou kala, a me na mea maikai o na ano a pau a lakou i loaa mai ai ma ka lakou hana mau; a ma ua mau mea nei a pau ua hookiekie ia ae la lakou ma ka haaheo o ko lakou mau maka, no ka mea, hoomaka ae la lakou e komo i ke kapa i nui loa ke kumukuai.

7. Ano, he mea keia e hookaumaha nui ai ia Alama, he oiaio, a i na mea he nui hoi o ka poe kanaka a Alama i hoolaa ai i poe kumu, a i poe kahuna, a i poe lunakahiko, maluna iho o ka ekalesia; he oiaio, he nui wale ka poe o lakou i hoeha nui ia, no ka hewa a lakou i ike ai ua hoomaka mawaena o ko lakou poe kanaka.

8. No ka mea, nana aku la lakou a ike iho la me ke kaumaha nui ua hoomaka ae la ka poe kanaka o ka ekalesia e hookiekie ia ma ka haaheo o ko lakou mau maka, a e kau aku i ko lakou mau naau maluna o ka waiwai a maluna o na mea lapuwale o ko ke ao nei; a hoomaka ae la lakou e haakei, kekahi i kekahi, a hoomaka ae la lakou e hoomaau aku i ka poe i manaoio ole e like me ko lakou makemake iho a oluolu hoi.

9. A pela ma ua makahiki ewalu nei o ke au o na lunakanawai, hoomaka ae la na paio nui mawaena o na kanaka o ka ekalesia; he oiaio, ua nui na paonioni ana, a me ka hakaka, a me ka lokoino, a me ka hoomaau, a me ka haaheo, e oi aku ana mamua o ka haaheo o ka poe i hui ole ia me ka ekalesia o ke Akua.

10. A pela i pau ai ka makahiki ewalu o ke au o na lunakanawai; a o ka hewa o ka ekalesia he mea ia e hina ai i ua poe la i hui ole ia i ka ekalesia; a pela ka ekalesia i hoomaka ai e lohi ma kona holo ana.

11. A eia kekahi, i ka hoomaka ana o ka makahiki eiwa, ike aku la o Alama i ka hewa o ka ekalesia, a ike aku la no hoi oia, e hoomaka ana ka hana a ka ekalesia e alakai aku i ua poe hoomaloka la, mai ia hana hewa aku ia hana hewa aku, pela e lawe mai ana i ka luku ia ana o na kanaka;

12. He oiaio, ike aku la oia ua nui ka like ole mawaena o na kanaka, o kekahi poe e hookiekie ana ia lakou iho iluna me ko lakou haaheo, e hoowahawaha ana i na mea e ae, e huli ana i ko lakou mau kua i ka poe nele, a kapa ole, a i ka poe i pololi, i ka poe i makewai, a i ka poe i mai a i pilikia.

13. Ano, he kumu nui keia e kanikau ai mawaena o na kanaka, oiai na mea e ae e hoohaahaa ana ia lakou iho, e kokua ana i ka poe ku pono ke kokua ia, me neia, e haawi ana i ko lakou waiwai i ka poe hune a me ka poe nele; e hanai ana i ka poe pololi; a e loaa ana kela ano keia ano o na popilikia, no ko Kristo pono, ka mea e hele mai auanei e like me ka Uhane o ka wanana;

14. E nana ana imua i kela la, pela e pau mau ai ke kala ia ana o ko lakou mau hala; i hoopiha ia ai me ka olioli nui, no ke alahou ana o ka poe i make, e like me ka makemake, a me ka mana, a me ka hoopakele ana o Iesu Kristo mai na apo mai o ka make.

15. Ano, eia kekahi, ua ike o Alama i na popilikia o ka poe hahai haahaa i ke Akua, a me na popilikia i hoili ia maluna iho o lakou e ka poe i koe o kona poe kanaka, a e ike ana i ko lakou like ole a pau, hoomaka ae la oia e hookaumaha nui ia; aka hoi, aole i haalele ka Uhane o ka Haku ia ia.

16. A wae aku la oia i kekahi kanaka naauao, aia no mawaena o ka poe lunakahiko o ka ekalesia, a haawi ae la ia ia i mana e like me ka leo o na kanaka, e hiki ia ia ke loaa ka mana e hooholo i na kanawai e like me na kanawai i haawi e ia mai, a e hookau mai e like me na hala a me na hewa nui o ka kanaka.

17. Ano, o Nepaiha ka inoa o keia kanaka, a ua wae ia ae oia i lunakanawai nui; a noho iho la oia ma ka noho hookolokolo, e hookolokolo aku a e hoomalu aku i na kanaka.

18. Ano, aole o Alama i haawi aku ia ia i ka oihana o ke kahuna nui maluna iho o ka ekalesia, aka aua mai la oia i ka oihana o ke kahuna nui ia ia iho; aka, haawi aku la oia i ka noho hookolokolo ia Nepaiha;

19. A o keia kana i hana ai, e hiki ia ia ke hele aku mawaena o kona poe kanaka, a oia hoi mawaena o ka poe kanaka o Nepai, e hiki ia ia ke hai aku i ka olelo a ke Akua ia lakou, e hoeueu aku ia lakou e hoomanao i na mea pono no lakou ke hana, a e hiki ia ia, ma o ka olelo la a ke Akua, ke hoohaahaa i ka haaheo a me ka maalea a pau, a me na paio a pau mawaena o kona poe kanaka, e ike ole ana i kekahi ala e hiki ia ia ke hoola hou ia lakou, ke ole ma ke kaomi ana ma ka hoike pololei ana ia lakou.

20. A pela ma ka hoomaka ana o ka makahiki eiwa o ke au o na lunakanawai maluna iho o ka poe kanaka o Nepai, haawi aku la o Alama i ka noho hookolokolo ia Nepaiha, a e hoopaa loa ana ia ia iho i ka oihana kahuna nui o ka aoao hemolele o ke Akua, i ka hoike ana i ka olelo, e like me ka Uhane o ka hoike ana a me ka wanana.