1. A eia kekahi, hoonoho iho la lakou i na koa kiai maluna iho o ka poe pio o ko Lamana poe, a koi aku la ia lakou e hele aku a e kanu iho i ko lakou poe make; he oiaio, a me ka poe make no hoi o ko Nepai i pepehi ia; a hoonoho iho la o Moroni i na kanaka maluna iho o lakou e kiai iho ia lakou, oiai lakou e hana aku ana i ka lakou mau hana.

2. A hele pu ae la o Moroni a me Lehi i ke kulanakauhale o Muleka, a lawe ae la i ka noho luna ana o ke kulanakauhale, a haawi ae la ia mea ia Lehi. Ano hoi, he kanaka o ua Lehi nei i hele pu me Moroni i ka nui loa o kona mau kaua a pau; a he kanaka ia e like me Moroni; a hauoli iho laua i ka pomaikai o kekahi a me ko kekahi; he oiaio, ua aloha ia laua kekahi e kekahi, a aloha ia no hoi e ka poe kanaka a pau o Nepai.

3. A eia kekahi, mahope iho o ka hoopau ana o ko Lamana poe i ke kanu ana i ko lakou poe make, a me ka poe make o ko Nepai, ua hoohele hou ia aku iloko o ka aina Momona; a koi aku la o Teanakuma, ma o na kauoha la a Moroni, ia lakou e hoomaka i ka eli ana i kahi auwai a puni ka aina, a oia hoi ke kulanakauhale Momona;

4. A kena ae la oia ia lakou e kukulu aku i pakaua o na laau ma ke kae o ka auwai iloko; a hoahua ae la lakou i ka lepo noloko ae o ka auwai i ke alo o ka pakaua laau; a pela lakou i hoohana aku ai i ko Lamana poe, a, hoopuni ia ae la ke kulanakauhale o Momona e lakou me ka pa ikaika o na laau a me ka lepo, a kiekie loa.

5. A lilo iho la ua kulanakauhale nei i wahi paa loa ma ia hope aku; a iloko o ua kulanakauhale nei lakou i kiai ai i ka poe pio o ko Lamana; he oiaio, iloko o kekahi pa a lakou i kena aku ai ia lakou la e kukulu iho me ko lakou la mau lima ponoi. Ano, ua koi ia o Moroni e hoohana aku i ko Lamana poe, no ka mea, he mea paakiki ole e kiai iho ia lakou, oiai ma ka lakou hana; a ua makemake oia i kona poe koa a pau, i ka wa ana e hoouka aku ai i ko Lamana poe.

6. A eia kekahi, pela o Moroni i lanakila ai maluna iho o kekahi o ka poe nui loa o na puali o ko Lamana poe, a ua loaa mai la ke kulanakauhale Muleka, oia no kekahi o na wahi paa loa o ko Lamana poe, ma ka aina o Nepai; a pela no hoi oia i kukulu aku ai i wahi paa e malama ai i kona poe pio.

7. A eia kekahi, aole oia i hoao hou e kaua aku me ko Lamana poe ma kela makahiki, aka, hoohana aku la oia i kona poe kanaka i ka hoomakaukau ana no ke kaua; he oiaio, a i ka hana ana i na pakaua e pale aku ai i ko Lamana poe; he oiaio, a i ka hoopakele ana no hoi i na wahine o lakou a me ka lakou mau keiki mai ka wi ae a me ka popilikia, a i ka hoolako ana i ka ai no na puali o lakou.

8. Ano eia kekahi, o na puali o ko Lamana poe, ma ke kai komohana, ma ka hema, i ka wa a Moroni i kaawale ai, no kekahi hana malu mawaena o ko Nepai poe, i mokuahana ai lakou, ua loaa ia lakou he lanakila maluna iho o ko Nepai poe, he oiaio, a ua loaa ia lakou la he nui o na kulanakauhale o lakou ma ia hapa o ka aina;

9. A pela no ka hana ino mawaena o lakou iho, he oiaio, no na kuee a me ka hana malu mawaena o lakou iho, ua waiho ia lakou ma ka noho pilikia loa ana.

10. Ano hoi, he mau mea kaʻu e olelo aku ai no ka poe kanaka o Amona, o ko Lamana poe lakou, ma kinohou; aka, ua hoohuli ia ae e Amona a me kona mau hoahanau, oia hoi, ma ka mana a me ka olelo a ke Akua, i ka Haku; a ua kai ia mai lakou iloko o ka aina o Zarahemela, a ma ia hope mai ua hoomalu ia aku e ko Nepai poe;

11. A no ko lakou hoohiki, ua hooki ia iho mai ka lalau ana ae i na mea kaua e ku e i ko lakou poe hoahanau; no ka mea, ua hoohiki iho la lakou, aole loa lakou e hookahe hou aku i ke koko; a mamuli o ka lakou hoohiki, e make no lakou; he oiaio, ua hookuu aku lakou ia lakou iho e haule iho iloko o na lima o ko lakou poe hoahanau, ina aole no ka menemene a me ke aloha nui loa o Amona a me kona mau hoahanau i loaa ai no lakou;

12. A no keia mea, ua kai ia mai lakou ilalo iloko o ka aina o Zarahemela; a ua hoomalu mau loa ia lakou e ko Nepai poe.

13. Aka eia kekahi, ia lakou i ike ai i ka weliweli, a me ka nui o na pilikia a me na eha a ko Nepai poe i hoomanawanui ai no lakou, ua hu ae ko lakou aloha, a ua makemake e lalau iho i na mea kaua ma ka hoomalu ana i ko lakou aina.

14. Aka hoi, ia lakou e anehe ana e lalau iho ai i ko lakou mau mea kaua, ua hoopio ia me na olelo ao a Helamana a me kona mau kaikaina, no ka mea, ua aneane lakou e uhai aku i ka hoohiki a lakou i hana ai;

15. A ua hopohopo o Helamana o lilo aku ko lakou poe uhane ma ka lakou hana ana peia; nolaila, ua koi ia ua poe la a pau ka poe i komo aku iloko o ua berita nei, e ike aku i ko lakou poe hoahanau e auhele ana mawaena o ko lakou mau popilikia, a ma ko lakou noho weliweli ana, i keia manawa.

16. Aka, eia hoi kekahi, he nui na keikikane a lakou, i komo ole iloko o ka berita e lalau ole lakou i na mea kaua o lakou no ke pale ana aku ia lakou iho mai ko lakou poe enemi ae; nolaila, houluulu ae la lakou ia lakou iho i keia manawa, o ka poe a pau i hiki ke lawe ae i na mea kaua; a kapa iho la lakou ia lakou iho ko Nepai poe;

17. A komo iho la lakou iloko o ka berita, no ke kaua ana no ke kuokoa ana o ko Nepai poe; he oiaio, no ka hoomalu ana i ka aina a hiki i ka waiho ia ana aku o na ola o lakou; he oiaio, hana berita iho la no hoi lakou, aole loa lakou e haawi aku i ko lakou kuokoa ana, aka, e kaua aku lakou i na manawa a pau e hoopakele aku i ko Nepai poe a me lakou iho hoi mai ka noho hooluhi ana.

18. Ano hoi, he mau tausani elua o ua poe kanaka opiopio la, ka poe i komo iloko o ua berita nei, a lalau aku la i ko lakou mau mea kaua no ka pale ana i ko lakou aina.

19. Ano hoi, me lakou i lilo ole ai i mea keakea i ko Nepai poe mamua, lilo iho la lakou ano i keia manawa i mea kokua nui; no ka mea, lalau aku la lakou i ko lakou mau mea kaua, a ua makemake lakou ia Helamana i luna no lakou.

20. A he poe kanaka ui lakou a pau, a ua koa loa lakou no ka makau ole, a no ka ikaika a me ka eleu no hoi; aka hoi, aole o keia mau mea wale no; he poe kanaka lakou i onipaa i na manawa a pau ma kela mea keia mea a lakou i kauoha ia mai ai;

21. He oiaio, he poe kanaka lakou o ka oiaio a me ke kuoo, no ka mea, ua ao ia lakou e malama i na kauoha a ke Akua, a e hele pololei imua ona.

22. Ano, eia kekahi, hele aku la o Helamana ma ke alo o kona mau tausani koa opiopio elua, e kokua aku i na kanaka ma na palena o ka aina ma ka hema ma ke kai komohana.

23. A pela i pau ai ka makahiki iwakaluakumamawalu o ke au o na lunakanawai maluna iho o ka poe kanaka o Nepai, a pela aku.