1. Ano, eia na olelo a Amuleka i hai aku ai i ka poe kanaka ma ka aina o Amoniha, i ka i ana:

2. Owau no o Amuleka; a o ke keiki wau a Gidona, oia no ke keiki a Isemaela, oia no kekahi mamo na Aminadi; a ua Aminadi la no nana i hoakaka mai i ke ano o ka palapala ana maluna o ka paia o ka luakini, i kakau ia ai ma ka lima o ke Akua.

3. A he mamo o Aminadi na Nepai, oia no ke keiki a Lehi, ka mea i hele mai mailoko mai o ka aina o Ierusalema, he mamo oia na Manase, ke keiki a Iosepa, ka mea i kuai ia iloko o Aigupita ma na lima o kona poe hoahanau.

4. A, aia hoi, he kanaka kaulana no hoi au mawaena o ka poe a pau i ike mai iaʻu; he oiaio hoi, a ua nui koʻu hanauna a me na makamaka, a ua loaa iaʻu ka waiwai nui ma kaʻu mau hana mau;

5. Aka hoi, me keia nae a pau, aole au i ike nui i na aoao o ka Haku, a me kona mau mea pohihihi a me kona mana kupanaha. Ua i aku au aole au i ike nui i keia mau mea; aka hoi, ua kuhihewa au, no ka mea, ua ike nui au i kona mau mea pohihihi a me kona mana kupanaha; he oiaio, ma ka malama ia ana i ke ola o keia poe kanaka;

6. Ua hoopaakiki nae au i kuu naau, no ka mea, ua hea ia mai au i na manawa he nui, aole au i hoolohe; nolaila, ua ike au no keia mau mea, aole nae au i makemake e ike; nolaila, hele aku la au e kipi ana i ke Akua, ma ka hewa o koʻu naau, a hiki aku i ka la eha o keia malama ehiku nei, oia no iloko o ka makahiki umi o ke au o na lunakanawai.

7. Iaʻu i hele aku ai e ike i kekahi hoahanau pili loa, aia hoi, ikea kekahi anela o ka Haku e au, a i mai la ia, E Amuleka, e hoi aku oe i kou hale iho, no ka mea, e hanai aku oe i kekahi kaula o ka Haku: he oiaio, he kanaka hemolele, oia no he kanaka i wae ia e ke Akua; no ka mea, ua hookeai oia i na la he nui no na hewa o keia poe kanaka, a ua pololi oia, a e hookipa aku oe ia ia iloko o kou hale a e hanai ia ia, a nana e hoopomaikai ia oe a me ko ka hale ou; a e kau mai ka pomaikai o ka Haku maluna ou a me ko ka hale ou.

8. A eia kekahi, hoolohe iho la au i ka leo o ka anela, a hoi aku la i koʻu hale. A iaʻu i hele aku ai ilaila, loaa iho la iaʻu ke kanaka a ka anela i i mai ai iaʻu, e hookipa oe iloko o kou hale; a aia hoi, oia no ua kanaka la nana i olelo ae nei ia oukou no na mea o ke Akua.

9. A i mai la ka anela iaʻu, He kanaka hemolele ia; nolaila, ua ike au he kanaka hemolele no ia, no ka mea, ua olelo ia e kahi anela o ke Akua.

10. A eia hou, ua ike au o na mea ana i hoike mai ai, he oiaio ia mau mea; no ka mea, ke i aku nei au ia oukou, ma ke ola ana o ka Haku, pela oia i hoouna mai ai i kona anela e hoike mai i ua mau mea nei iaʻu; a o keia kana i hana mai ai oiai e noho ana ua Alama nei ma koʻu hale;

11. No ka mea, ua hoopomaikai oia i ko koʻu hale, ua hoopomaikai mai oia iaʻu, i kaʻu mau wahine, a i kaʻu mau keiki, a i koʻu makuakane, a i koʻu poe hanauna; he oiaio, o koʻu poe pilikoko a pau kana i hoopomaikai ai, a ua kau mai ka pomaikai o ka Haku maluna o makou e like me na olelo ana i olelo mai ai.

12. Ano, ia Amuleka i olelo aku ai i keia mau olelo, hoomaka na kanaka e kahaha, i ka ike ana ua nui ae mamua o ka hoike hookahi e hoike ana no na mea i hoohewa ia ai laua, a no na mea hoi e hiki mai ana, e like me ka Uhane o ka wanana iloko o laua.

13. Aka hoi, aia no kekahi poe mawaena o lakou e manao ana e niele ia laua, e hiki ia lakou ma ko lakou mau manao maalea ke hoohihia mai ia laua ma ka laua mau olelo, e hiki ia lakou ke loaa ka mea hoike ku e ia laua, e hiki ia lakou ke haawi aku ia laua i ko lakou mau lunakanawai, e hookolokolo ia laua e like me ke kanawai, a e pepehi ia laua a make, a i ole ia e hoolei ia iloko o ka halepaahao, e like me ka hewa i hiki ia lakou ke hoakaka mai, a e hoike ku e mai ia laua.

14. Ano, o ua poe kanaka la ka poe i imi ai e pepehi ia laua, he poe loio lakou, i hoolimalima ia, a i wae ia e na kanaka e lawelawe i ke kanawai ma ko lakou wa e hookolokolo ai, a ma na hookolokolo o na hewa o na kanaka, imua o na lunakanawai.

15. Ano, ua ao ia ua poe loio nei ma na mea akamai a maalea a pau o na kanaka; a o keia mea e kokua ai ia lakou e hiki ke lilo i poe noiau ma ka lakou oihana.

16. A eia kekahi, hoomaka ae la lakou e niele ia Amuleka, e hiki ia lakou ma ia mea ke hoolilo ia ia i mea ku e i kana olelo iho, a e hoole aku paha i na olelo ana e olelo ai.

17. Ano, aole lakou i ike ua hiki ia Amuleka ke ike i ko lakou mau manao. Aka, ia lakou i hoomaka ai e niele mai ia ia, ike iho la oia i ko lakou mau manao, a i aku la oia ia lakou, Auwe oukou, e ka hanauna ino a kekee; e na loio a me na hookamani; no ka mea, e hoomakaukau ana oukou i na kahua o ke diabolo; no ka mea, e hoomakaukau ana oukou i na pahele a me na hei e pahele ai i na mea hemolele o ke Akua;

18. E hoomakaukau ana oukou i na manao e kapae ae i na aoao o ka poe pono, a e hoohaule mai i ka inaina o ke Akua maluna iho o ko oukou mau poo, a hiki i ka luku loa ia ana o keia poe kanaka;

19. He oiaio, ua pono ka Mosia i olelo mai ai, oia no ko kakou alii hope, ia ia i manao ai e haawi aku i ke aupuni, oiai aohe ana mea e hooili aku ai ia mea, e kauoha ana e hoomalu ia keia poe kanaka e ko lakou mau leo iho; he oiaio, ua pono kana i olelo mai ai, ina e hiki mai ka manawa e koho aku ai ka leo o keia poe kanaka i ka hewa; me neia, ina e hiki mai ka manawa e haule keia poe kanaka iloko o ka hala, alaila, e oo no lakou no ka luku ia ana.

20. Ano, ke i aku nei au ia oukou, ua pono ko ka Haku hookolokolo ana i ko oukou mau hala; ua pono kana kahea ana i kona poe kanaka, me ka leo o kona poe anela, E mihi oukou, e mihi, no ka mea, ua kokoke mai ke aupuni o ka lani.

21. He oiaio, he pono kona hea ana, ma ka leo o kona poe anela, E iho aku au mawaena o koʻu poe kanaka, me ka pololei a me ka hoopai iloko o koʻu mau lima.

22. He oiaio, a ke i aku nei au ia oukou, ina aole no na pule a ka poe pono, e noho la ma ka aina, e hoopai ia oukou ano me ka luku loa ia ana; aole nae ia ma ke kaiakahinalii, e like me na kanaka ma na la o Noa, aka, ma ka wi, ma ke ahulau, a ma ka pahikaua.

23. Aka, ma o na pule la a ka poe pono oukou i hoola ia ai; ano, ina e hoolei mai oukou i ka poe pono maiwaena ae o oukou, alaila, aole e hooki ka Haku i kona lima, aka e hele mai oia ma kona inaina wela e ku e ia oukou; alaila, e hahau ia oukou ma ka wi, a ma ke ahulau, a ma ka pahikaua; a ua kokoke mai ka manawa, ke mihi ole oukou.

24. Ano, eia kekahi, ua huhu nui aku na kanaka ia Amuleka, a kahea mai la lakou me ka i ana: Ke hoino mai nei keia kanaka i ko kakou mau kanawai, a he pololei ia mau mea, a i ko kakou poe loio naauao no hoi a makou i wae ai.

25. Aka, o aku la o Amuleka i kona lima, a kahea ikaika nui ae ia lakou, i ka i ana: E ka hanauna ino a kekee; no ke aha i loaa ai ia Satana ka mana nui me neia maluna o ko oukou mau naau? No ke aha la oukou e hookuu aku ai ia oukou iho i hiki ia ia ke loaa ka mana maluna o oukou, e hoomakapo i ko oukou mau maka, i hoomaopopo ole ai oukou i na olelo i olelo ia ai, e like me ka oiaio o ia mau mea?

26. No ka mea hoi, ua hoike ku e anei au i ko oukou mau kanawai? Ke hoomaopopo ole nei oukou; ke i mai nei oukou ua olelo ku e au i ko oukou kanawai; aka aole pela; aka ua olelo aku au ma ka aoao o ko oukou kanawai, i ko oukou hoohewa ia ana.

27. A, ano hoi, ke i aku nei au ia oukou, e hoomaka ana ke kahua e hookumu ia no ka luku ia ana o keia poe kanaka ma ka pono ole o ko oukou poe loio a me ko oukou poe lunakanawai.

28. Ano, eia kekahi, ia Amuleka i olelo mai ai i keia mau olelo, uwauwa ku e mai la na kanaka ia ia, i ka i ana, Ano, ke ike nei kakou he keiki ua kanaka nei no ke diabolo, no ka mea, ua wahahee mai oia ia kakou; no ka mea, ua olelo ku e mai i ko kakou kanawai; ano, ke i mai nei oia, aole oia i olelo ku e mai ia mea.

29. A eia hou, ua hoino mai oia i ko kakou poe loio, a me ko kakou poe lunakanawai, a ia mea aku ia mea aku.

30. A hookomo aku la na loio ia mea iloko o ko lakou mau naau, i hoomanao ai lakou i ua mau mea nei me ke ku e ia ia.

31. A aia kekahi mea mawaena o lakou o Zezeroma kona inoa. Ano, o ka mea mua oia e hoohewa ai ia Amuleka laua me Alama; oia no kekahi mea akamai loa mawaena o lakou, ia ia ka hana he nui e hana ai mawaena o na kanaka.

32. Ano, o ka makemake o ua poe loio nei oia no e loaa ai ka uku; a loaa no ia lakou ka uku e like me ko lakou hoolimalima.