1. A eia kekahi, hele aku la na keiki a Alama mawaena o na kanaka, e hai aku i ka olelo ia lakou. A o Alama no hoi, aole e hiki ia ia ke hoomaha, a hele aku la no hoi oia.

2. Ano, aole makou e olelo hou no ka lakou hai ana, eia wale no, hai aku la lakou i ka olelo, a i ka oiaio, e like me ka Uhane o ka wanana a me ka hoikeana; a hai aku la no lakou mamuli o ka aoao hemolele o ke Akua o lakou i kahea ia mai ai.

3. Ano, ke hoi hou nei au i ka mooolelo o na kaua mawaena o ko Nepai poe a me ko Lamana poe, ma ka makahiki umikumamawalu o ke au o na lunakanawai.

4. No ka mea, eia hoi kekahi, lilo iho la o ko Zorama poe i ko Lamana poe; nolaila, i ka hoomaka ana o ka makahiki umikumamawalu; ike aku la ka poe kanaka o ko Nepai poe e hele mai ana ko Lamana poe maluna iho o lakou; nolaila, hoomakaukau no lakou i na mea no ke kaua; he oiaio, houluulu iho la lakou i ko lakou poe koa iloko o ka aina o Ieresona.

5. A eia kekahi, hele mai la ko Lamana poe me na tausani o lakou; a hele mai la lakou iloko o ka aina o Anationuma, oia no ka aina o ko Zorama poe; a he kanaka o Zerahemana ka inoa, oia no ko lakou alihi kaua.

6. Ano, he poe opuino a puni koko loa ko Amaleki poe mamua o ko Lamana poe, ma ko lakou ano iho, nolaila, hoonoho iho la o Zerahemana i na luna papa nui maluna iho o ko Lamana poe, a o ko Amaleki poe a me ko Zorama poe lakou a pau.

7. Ano, o keia kana i hana ai, e hiki ia ia ke hoomau i ko lakou inaina i ko Nepai poe; e hiki ia ia ke lawe mai ia lakou malalo iho ona, e hooko iho i kona mau manao;

8. No ka mea hoi, o kona mau manao oia ka hookonokono ana i ko Lamana poe e huhu ku e aku i ko Nepai poe; o keia kana i hana ai i hiki ai ia ia ke loaa ka mana nui maluna iho o lakou; i hiki ai no hoi ia ia ke loaa ka mana maluna iho o ko Nepai poe ma ke kai ana ia lakou iloko o ka noho luhi ana, a pela aku.

9. Ano, o ka manao no ia o ko Nepai poe e kokua i na aina o lakou iho, a me na hale o lakou, a me na wahine a lakou, a me na keiki a lakou, e hiki ia lakou ke hoopakele ia lakou la mai na lima o ko lakou poe enemi, eia hoi kekahi, e hiki ia lakou ke hookoe i ko lakou mau mea e pono ai a me ko lakou mau mea e pomaikai ai; he oiaio, a me ko lakou noho kauwa ole ana no hoi, e hiki ia lakou ke hoomana aku i ke Akua e like me ko lakou mau makemake;

10. No ka mea, ike iho la lakou ina e haule iho lakou iloko o na lima o ko Lamana poe, o ka mea nana e hoomana aku i ke Akua, ma ka uhane a ma ka oiaio, i ke Akua oiaio a ola, e pepehi mai ko Lamana ia ia;

11. He oiaio, a ike iho la no hoi lakou i ka inaina nui loa o ko Lamana poe i ko lakou poe hoahanau, i ka poe kanaka o Anati-Nepai-Lehi; o ka poe i kapa ia ka poe kanaka o Amona; a, aole lakou lalau iho i na mea kaua; he oiaio, ua komo iho la lakou iloko o kahi berita, a, aole lakou e uhai ae ia mea; nolaila, ina e haule iho lakou iloko o na lima o ko Lamana poe, e anai ia lakou.

12. Aole nae e ae aku ko Nepai poe e anai ia mai lakou; nolaila, haawi ae la lakou i na aina ia lakou la no ko lakou la hooilina.

13. A haawi mai la ko Amona poe i ko Nepai poe i kekahi mahele nui o ko lakou waiwai, e kokua i ko lakou poe koa; a pela i koi ia ai ko Nepai poe, o lakou wale no, e ku e aku i ko Lamana poe, he huina lakou o ko Lamana a o ko Lemuela, a me na mamo a Isemaela, a o ka poe a pau i haalele mai i ko Nepai poe, o ko Amaleki poe a me ko Zorama poe, a me na mamo a ka poe kahuna a Noa.

14. Ano, ua aneane like ka nui o kela poe mamo, me ko Nepai poe; a pela i koi ia mai ai ko Nepai poe e paio aku me ko lakou poe hoahanau, a hiki aku i ka hookahe ana i ke koko.

15. Eia kekahi, i ka houluulu ana o ka poe koa o ko Lamana poe ma ka aina o Anationuma, aia hoi, ua hoomakaukau ia ka poe koa o ko Nepai poe e halawai pu me lakou ma ka aina o Ieresona.

16. Ano, o ka alihi kaua o ko Nepai poe, oia hoi ke kanaka i hoonoho ia i kapena nui maluna iho o ko Nepai poe; ano na ka luna koa nui e hoomalu i ka poe koa a pau o ko Nepai poe; a o Moroni no kona inoa;

17. A na Moroni ka hoomalu ana a me ka hooponopono ana a pau i na kaua o lakou. A he iwakaluakumamalima wale no ona mau makahiki i ka wa i hoonoho ia mai ai oia i kapena nui maluna iho o ka poe koa o ko Nepai poe.

18. Eia kekahi, halawai aku la oia me ko Lamana poe ma na palena o Ieresona, a ua kahiko ia kona poe kanaka me na pahikaua, a me na pahikaua pokole, a me kela ano keia ano o na mea kaua a pau.

19. A ike iho la ka poe koa o ko Lamana poe i ka poe kanaka o Nepai, ua hoomakaukau ia e Moroni me na pale-umauma, a me na pale-lima; he oiaio, a me na pale no hoi a hoomalu i na poo o lakou; a ua kahiko ia no hoi lakou me ke kapa manoanoa.

20. Ano, aole i hoomakaukau ia ka poe koa o Zerahemana me kekahi mea me neia. Ia lakou wale no na pahikaua a lakou, a me na pahikaua pokole a lakou, na kakaka a lakou a me na pua a lakou, ka lakou mau ala a me na maa a lakou; aka, ua olohelohe lakou, koe wale no he ili i kaei ia a puni ko lakou mau puhaka; he oiaio, ua olohelohe lakou a pau, koe wale no ko Zorama poe a me ko Amaleki poe.

21. Aka aole o lakou kahiko ia me na pale-umauma, aole hoi me na pale-lima; nolaila, ua makau nui iho la lakou i ka puali koa o ko Nepai, no ko lakou nei mau mea i kahiko ia ai, me ka oi loa aku nae o ko lakou la nui mamua o ko Nepai poe.

22. Aia hoi kekahi, aole lakou i aa e hele ku e mai i ko Nepai poe ma na palena o Ieresona; nolaila, haele aku la lakou iwaho o ka aina o Anationuma, iloko o ka waonahele, me ka hele aku a puni ma ka waonahele, ma o ma ke poo o ka muliwai Sidona, e hiki ia lakou ke komo iloko o ka aina o Manati, a e loaa ka aina; no ka mea, aole lakou i manao e ike ka poe koa o Moroni i kahi a lakou i hele aku ai.

23. Aka, i ka wa a lakou i haele aku ai, hoouna aku la o Moroni i na kiu iloko o ka waonahele, e hoomakakiu ia lakou; a e ike ana no hoi o Moroni no na wanana a Alama, hoouna ae la oia i kekahi mau kanaka io na la, e makemake ana i kela e ninau aku i ka Haku i kahi a ka poe koa o ko Nepai poe e hele aku ai, e hoomalu aku ia lakou iho i ko Lamana poe.

24. A eia kekahi, hiki mai la ka olelo a ka Haku ia Alama, a hai aku la o Alama i na elele o Moroni, e hele ana ka poe koa o ko Lamana poe mawaho ma ka waonahele, e hiki ia lakou ke hele mai iloko o ka aina o Manati, e hiki ia lakou ke hoouka mai i ka poe nawaliwali ae o na kanaka. A hele aku la ua mau elele la a hai aku la i ka olelo ia Moroni.

25. Ano, e waiho ana o Moroni i kekahi mahele o kona poe koa ma ka aina o Ieresona, o komo mai kekahi poe o ko Lamana poe iloko o kela aina a e loaa ai ke kulanakauhale, lawe ae la oia i ka mahele i koe o kona poe koa, a hele aku la iloko o ka aina o Manati.

26. A kauoha ae la oia i na kanaka a pau ma kela mokuna o ka aina, e houluulu ia lakou iho e kaua aku i ko Lamana poe, e hoomalu i ko lakou mau aina a me ko lakou aupuni, i ko lakou mau mea e pono ai a me ko lakou kuokoa ana; nolaila, ua hoomakaukau ia lakou no ka wa o ko Lamana poe e hele mai ai.

27. A eia kekahi, kena ae la o Moroni i kona poe koa e pee iloko o ke awawa aia ia e kokoke ana i ke kapa o ka muliwai Sidona, ma ke komohana o ka muliwai Sidona ma ka waonahele.

28. A hoonoho iho la o Moroni i na kiu a puni, e hiki ia ia ke ike i ka wa a ka poe koa o ko Lamana poe e hele mai ai.

29. Ano, ua ike iho o Moroni i ka manao o ko Lamana poe, o ko lakou manao ia e pepehi mai i ko lakou poe hoahanau, a i ole ia, e hoopio mai ia lakou a lawe ia lakou iloko o ka noho luhi ana, e hiki ia lakou ke kukulu i aupuni no lakou iho, maluna iho o ka aina a puni;

30. A ike iho la no hoi oia ua makemake wale no o ko Nepai poe e hookoe i ko lakou mau aina, a me ko lakou kuokoa ana a me ko lakou ekalesia, nolaila, aole oia i manao he hewa kona hoomalu ana ia lakou ma ka hana maalea; nolaila, ike iho la oia, ma o kona poe kiu la, i ke ala a ko Lamana poe e hele aku ai.

31. Nolaila, mahele ae la oia i kona poe koa, a kai ae la i kekahi poe ma o aku iloko o ke awawa, a huna iho la ia lakou ma ka hikina, a ma ka hema o ka puu Ripala;

32. A o ka poe i koe, huna iho la oia iloko o ke awawa komohana, ma ke komohana o ka muliwai Sidona, a pela aku iloko o na palena o ka aina Manati.

33. A pela oia i hoonoho ai i kona poe koa e like me kona makemake, a ua makaukau oia e halawai pu me lakou.

34. A eia kekahi, pii mai la ko Lamana poe ma ka akau o ka puu, ma kahi a kekahi hapa o ka poe koa o Moroni i pee ai.

35. O ka poe koa i pee ma ka hema o ka puu, ua alakai ia e kekahi kanaka o Lehi kona inoa; a i ka wa a ko Lamana poe i maalo ae ai i ka puu Ripala, a komo iloko o ke awawa, a i hoomaka ai e hele aku i kela kapa o ka muliwai Sidona, alakai aku la oia i kona poe koa a hoopuni ae la i ko Lamana poe a puni, ma ka hikina, ma ko lakou hope.

36. A eia kekahi, i ko Lamana poe i ike ai i ko Nepai poe e hele mai ana maluna o lakou ma ko lakou hope, huli ae la lakou, a hoomaka ae la e paio mai me ka poe koa o Lehi;

37. A hoomaka ae la ka hana a ka make, ma na aoao elua; aka ua oi aku ka weliweli ma ka aoao o ko Lamana poe; no ka mea, ua waiho olohelohe ia lakou i ka hahau ikaika ana o ko Nepai poe, me ka lakou mau pahikaua a me ka lakou mau pahikaua pokole, aneane lawe ana i ka make ma kela hahau ana keia hahau ana;

38. Oiai ma keia aoao, he kakaikahi ka haule o kanaka mawaena o ko Nepai poe, ma ka lakou la mau pahikaua, a me ke kahe ana o ke koko; ua pale ia lakou ma na wahi o ke ola i noho nui ai o ke kino, oia hoi, o na wahi o ke ola i noho nui ai ua maluhia mai ka hahau ana ae o ko Lamana poe, ma ko lakou mau pale-umauma, a me ko lakou mau pale-lima, a me ko lakou mau pale-poo; a pela ko Nepai poe i hana ai i ka hana o ka make mawaena o ko Lamana poe.

39. Eia kekahi, makau iho la ko Lamana poe no ka luku mawaena o lakou, a hoomaka ae la lakou e hee aku i ka muliwai o Sidona.

40. A ua alualu ia lakou e Lehi a me kona poe kanaka, a ua hooauhee ia lakou e Lehi iloko o na wai o Sidona; a hele aku la lakou ma kela kapa o na wai o Sidona. A aua iho la o Lehi i kona poe koa ma ke kapa o ka muliwai Sidona, i hele ole ai lakou i kela kapa.

41. A eia kekahi, halawai ae la o Moroni a me kona poe koa me ko Lamana poe ma ke awawa, ma kela kapa o ka muliwai Sidona, a hoomaka ae la e lele maluna o lakou, a e pepehi ia lakou.

42. A hee hou aku la ko Lamana poe imua o lakou, i ka aina o Manati; a ua halawai hou lakou me ka poe koa o Moroni.

43. Ano i keia manawa, kaua nui loa iho la ko Lamana poe; he oiaio, aole i ike e ia mamua ke kaua ana o ko Lamana poe me ka makau ole a me ka ikaika nui loa me neia; aole loa, aole mai kinohi mai;

44. A ua hooeueu ia lakou e ko Zorama poe a me ko Amaleki poe, ko lakou poe luna papa nui a poe kapena, a e Zerahemana, oia no ko lakou luna koa nui, a o ko lakou alihi kaua a mea hoomalu hoi; he oiaio, kaua mai la lakou e like me na deragona; a ua pepehi loa ia kekahi poe o ko Nepai poe ma ko lakou mau lima; he oiaio, no ka mea, hahau mai lakou a moku loa i na pale-poo he nui o lakou; a hou mai la no hoi i na pale-umauma he nui o lakou; a oki mai no hoi lakou i na lima he nui o lakou; a pela ko Lamana poe i hahau mai ai ma ko lakou huhu wela.

45. Aka hoi, ua hooeueu ia ko Nepai poe e ke kumu maikai nui ae; no ka mea, aole lakou e kaua ana no ka noho alii ana, aole hoi no ka mana; aka, e kaua ana lakou no ko lakou mau wahi i noho ai, a me ko lakou kuokoa ana, a me ka lakou poe wahine, a me ka lakou poe keiki, a me ko lakou mau mea a pau loa; he oiaio, no ko lakou mau oihana o ka hoomana, a me ko lakou ekalesia;

46. A e hana ana lakou i ka mea a lakou i manao ai he pono imua o ko lakou Akua; no ka mea, ua i mai ka Haku ia lakou, a i ko lakou poe kupuna no hoi, Ina aole oukou hewa ma ka hihia mua, aole hoi ma ka lua, aole loa oukou e hookuu aku ia oukou iho e pepehi ia mai ma na lima o ko oukou poe enemi.

47. A eia hou, ua i mai ka Haku, Na oukou e hoomalu aku i ko oukou mau ohua, a hiki aku i ka hookahe koko ana; nolaila, no keia mea e paio ana ko Nepai poe me ko Lamana poe, e hoomalu ia lakou iho, a me ko lakou mau ohana, a me ko lakou mau aina, a me ko lakou mau aupuni, a me ko lakou mau mea e pono ai, a me ko lakou hoomana ana.

48. A eia kekahi, i ka wa a ka poe kanaka o Moroni i ike ai i ka ikaika a me ka huhu o ko Lamana poe, anehe lakou e ku emi aku a hee aku mai o lakou la aku. A i ka ike ana o Moroni i ko lakou manao, hoouna ae la oia a hooeueu ae la i ko lakou mau naau me keia mau manao; he oiaio me na manao no ko lakou mau aina, a me ko lakou kuokoa ana, he oiaio, me ko lakou kuokoa ana mai ka noho luhi ana ae.

49. A eia kekahi, huli ae la lakou i ko Lamana poe, a kahea aku la lakou me ka leo hookahi i ka Haku i ko lakou Akua, no ko lakou noho kauwa ole ana, a me ko lakou kuokoa ana mai ka noho luhi ana ae.

50. A hoomaka ae la lakou e ku e i ko Lamana poe me ka mana; a ma kela hora hookahi a lakou i hea aku ai i ka Haku no ko lakou noho kauwa ole ana, hoomaka ae la ko Lamana poe e hee aku imua o lakou; a hee aku la lakou a hiki wale aku i na wai o Sidona.

51. Ano, he nui loa aku ka nui o ko Lamana poe; he oiaio, he nui loa aku mamua o ka palua ana o ka nui o ko Nepai poe; aka, ua hooauhee ia nae lakou a houluulu ia ma kahi hookahi, iloko o ke awawa, ma ke kapa, ma ka muliwai Sidona;

52. Nolaila, hoopuni iho la ka poe koa o Moroni ia lakou a puni; he oiaio, ma na kapa elua o ka muliwai; no ka mea, aia hoi, ma ka hikina ka poe kanaka o Lehi;

53. Nolaila, ia Zerahemana i ike ai i ka poe kanaka o Lehi ma ka hikina o ka muliwai Sidona, a me na poe koa o Moroni ma ke komohana o ka muliwai o Sidona, a ua hoopuni ia lakou a puni e ko Nepai poe, ua pauhia lakou me ka weliweli.

54. Ano, ia Moroni i ike ai i ko lakou weliweli, kena aku la oia i kona poe kanaka e hooki lakou i ko lakou hookahe ana i ke koko.