1. Ano, eia kekahi, ma ka makahiki kanakolu o ke au o na lunakanawai maluna iho o ka poe kanaka o Nepai, mahope iho o ko Moroni loaa ana a me ka heluhelu ana i ko Helamana episetole, ua hauoli nui loa oia no ka pomaikai, he oiaio, no ka pomaikai nui loa i loaa ai ia Helamana, ma ka loaa ana kela mau aina i lilo ai;

2. He oiaio, a hoike aku la oia ia mea i kona poe kanaka a pau, ma ia aina e kokoke ana a puni, kahi ana i noho ai, i hiki no hoi ia lakou ke hauoli pu.

3. A eia kekahi, hoouna koke ae la ia i episetole io Pahorana la, e makemake ana ia ia e kena aku e houluulu ia na kanaka, e hooikaika ae ia Helamana, a i na puali o Helamana, i hiki ai me ka oluolu ia ia ke malama i kela hapa o ka aina, kahi ana i hoopomaikai kupaianaha ia ai ma ka hoopaa ana.

4. A eia kekahi, ia Moroni i hoouna aku ai i ua episetole nei i ka aina o Zarahemela, hoomaka hou iho la oia e kuka i kekahi mea, e hiki ia ia ke loaa ke koena o kela mau aina hooilina a me na kulanakauhale a ko Lamana poe i lawe aku ai mai o lakou aku.

5. A eia kekahi, oiai o Moroni e hoomakaukau ana pela no ka hele ana aku i ko Lamana poe e kaua, aia hoi, o ka poe kanaka o Nepaiha ka poe i houluulu ia ae mai ke kulanakauhale o Moroni mai, a me ke kulanakauhale o Lehi, a me ke kulanakauhale o Morianatona, ua hoouka ia mai e ko Lamana poe.

6. He oiaio, o ka poe i koi ia aku e holo aku mai ka aina o Manati aku, a mai ka aina a puni aku, ua hele mai la a hui pu ae me ko Lamana poe ma keia hapa o ka aina;

7. A pela ua lehulehu loa, he oiaio, a e loaa ana ka ikaika ia la aku ia la aku, ma ke kauoha a Amorona, i hele mai ai lakou me ke ku e i ko Nepaiha, a hoomaka lakou e luku mai ia lakou nei me ka luku nui loa.

8. A no ka nui loa o na puali o lakou, ua koi ia mai ke koena o ko Nepaiha e hee aku imua o lakou la; a hele mai la hoi lakou a hui mai la me ka poe koa o Moroni.

9. Ano ua manao o Moroni e pono ke hoouna ia na kanaka i ke kulanakauhale o Nepaiha, e kokua ae i ua poe la e malama ia kulanakauhale, a e ike ana he mea oluolu loa e malama i ke kulanakauhale mai ka haule ana iloko o na lima o ko Lamana poe, mamua o ka lawe hou ana ia ia mai o lakou mai, ua manao oia e malama oluolu ana lakou me ka pilikia ole i ua kulanakauhale la;

10. Nolaila, hoopaa mai la oia i kona poe a pau e malama i ua mau wahi la ana i loaa hou ai.

11. Ano, ia Moroni i ike ai ua lilo aku la ke kulanakauhale o Nepaiha, ua kaumaha nui loa oia, a hoomaka ae la e kanalua, no ka hewa o kanaka, anoai o haule iho auanei lakou iloko o na lima o ko lakou poe hoahanau.

12. Ano pela no hoi kona poe luna nui a pau. Kanalua iho la lakou a kahaha no hoi, no ka hewa o kanaka; a o keia no ka pomaikai o ko Lamana poe maluna iho o lakou.

13. A eia kekahi, huhu iho la o Moroni i ke aupuni, no ko lakou palaka no ke kuokoa ana o ko lakou aina.