1. Ano, eia kekahi, mahope iho o ka hoopau ana o Amuleka i keia mau olelo, haalele iho la laua i ka poe kanaka, a hele ae la iloko o ka aina o Ieresona;

2. He oiaio, a o ka poe hoahanau e ae, mahope iho o ka hai ana i ka olelo i ko Zorama poe, hele ae la no hoi iloko o ka aina o Ieresona.

3. A, eia kekahi, mahope iho o ke kuka pu ana o ka poe hanohano ae o ko Zorama poe no na olelo i hai ia mai ai ia lakou, ua huhu lakou no ka olelo, no ka mea, e hoopau ana ia i ka lakou oihana; nolaila, aole lakou i hoolohe mai i na olelo.

4. A hoouna ae la lakou a houluulu pu ae la mawaena o ka aina a pau, i na kanaka a pau, a kuka pu iho la me lakou no na olelo i olelo ia ai.

5. Ano, aole na luna o lakou, a me na kahuna o lakou, a me na kumu o lakou, i hoike ae i na kanaka no na mea a lakou i makemake ai; nolaila, ike malu iho la lakou i na manao o na kanaka a pau.

6. A eia kekahi, mahope iho o ko lakou loaa ana na manao o na kanaka a pau, o ka poe i makemake i na olelo i olelo ia ai e Alama a me kona mau hoahanau, ua kipaku ia iwaho o ka aina; a he nui loa lakou; a hele mai la no hoi lakou i ka aina o Ieresona.

7. A eia kekahi, lawelawe ae la o Alama a me kona poe hoahanau ia lakou.

8. Ano, ua huhu ko Zorama poe i ka poe kanaka o Amona e noho ana ma Ieresona, a o ka luna nui o ko Zorama poe he kanaka hewa loa ia, hoouna mai la oia i ka poe kanaka la o Amona, e makemake ana ia lakou e kipaku mawaho o ko lakou aina i ka poe a pau i hele mai mai o lakou la ae iloko o ko lakou aina.

9. A ha ae la oia i na olelo hooweliweli he nui wale ia lakou. Ano, aole ka poe kanaka o Amona i makau aku i ka lakou la mau olelo, nolaila, aole lakou i kipaku aku ia lakou, aka, hookipa ae la lakou i ka poe hune a pau o ko Zorama, ka poe i hele mai io lakou la; a hanai ae la ia lakou, a hooaahu ae la ia lakou, a haawi ae la ia lakou i na aina i hooilina no lakou; a kokua ae la lakou ia lakou la e like me ko lakou la nele.

10. Ano, hoonaukiuki keia mea i ko Zorama poe e huhu mai i ka poe kanaka o Amona, a hoomaka iho la lakou e hui pu me ko Lamana poe, a e hookonokono ae i kela poe no hoi e huhu mai ia lakou;

11. A pela i hoomaka ai ko Zorama poe a me ko Lamana poe e hoomakaukau no ke kaua ku e i ka poe kanaka o Amona, a i ka poe kanaka o Nepai.

12. A pela i pau ai ka makahiki umikumamahiku o ke au o na lunakanawai maluna iho o ka poe kanaka o Nepai.

13. A haalele iho la ka poe kanaka o Amona i ka aina o Ieresona, a hele mai la iloko i ka aina o Meleka, a hookaawale ae la i wahi ma ka aina o Ieresona no ka poe koa o ko Nepai poe, e hiki ia lakou ke paio me ka poe koa o ko Lamana poe, a me ka poe koa o ko Zorama poe; a pela i hoomaka ai kekahi kaua mawaena o ko Lamana poe a me ko Nepai poe, ma ka makahiki umikumamawalu o ke au o na lunakanawai; a e haawi ia aku auanei he mooolelo o ko lakou mau kaua.

14. A hoi hou aku la o Alama, a me Amona, a me ko laua mau hoahanau, a me na keikikane elua no hoi a Alama, i ka aina o Zarahemela, mahope iho o ko lakou lilo ana i mau mea paa hana ma na lima o ke Akua i ka lawe ana mai i kekahi poe he nui wale o ko Zorama poe i ka mihi; a o ka poe a pau i lawe ia i ka mihi, ua kipaku ia mai ko lakou aina aku; aka, aia no ia lakou na aina no na hooilina o lakou ma ka aina o Ieresona, a ua lalau aku lakou i na mea kaua e hoomalu ia lakou iho, a me ka lakou poe wahine, a poe keiki, a me ko lakou mau aina.

15. Ano, o Alama, ua ehaeha oia no ka hewa o kona poe kanaka, he oiaio, no na kaua, a no na hookahe koko ana, a me na paio mawaena o lakou; a ua hele no e hai aku i ka olelo, a ua hoouna ia e hai aku i ka olelo mawaena o na kanaka a pau ma kela kulanakauhale keia kulanakauhale; a i ka ike ana e hoomaka ana na naau o na kanaka e mahuahua ma ka paakiki, a e hoomaka ana lakou e hoonaukiuki ia no ka ikaika o ka olelo, ua kaumaha nui loa kona naau;

16. Nolaila, kena ae la oia e houluulu pu ia kana mau keikikane, e hiki ia ia ke haawi pakahi ae ia lakou i kela mea i keia mea i kana kauoha, no na mea e pili ana i ka pono. A he mooolelo ko makou no kana mau kauoha, ana i haawi mai ai ia lakou, e like me kona mooolelo iho.