1. Ano, eia kekahi, ma ka makamua o ka makahiki iwakaluakumamalima o ke au o na lunakanawai maluna iho o ka poe kanaka o Nepai, ua hookupaa ia ka maluhia e lakou mawaena o ko Lehi a me ko Morianatona, no ko lakou mau aina, a ua hoomaka hoi ka makahiki iwakaluakumamalima me ka maluhia;

2. Aole nae lakou i malama loihi he malu loa ma ka aina, no ka mea, hoomaka ae la he paio mawaena o na kanaka no ka lunakanawai nui, no Pahorana; no ka mea, aia hoi, o kekahi hapa o na kanaka i makemake e hoololi ia ae kekahi mau mea o ke kanawai.

3. Aka hoi, aole no o Pahorana i hoololi ae, aole hoi i ae aku e hoololi ia ae ke kanawai; nolaila, aole oia i hoolohe aku i ka poe i hoouna mai i ko lakou mau leo a me ko lakou mau hoopii, no ka hoololi ia ana o ke kanawai;

4. Nolaila, o ka poe i makemake e hoolilo ia ae ke kanawai, ua huhu ia ia, a makemake ae la e noho hou ole oia i lunakanawai nui maluna iho o ka aina; nolaila, ea ae la he paio wela no keia mea, aka aole nae i ka hookahe koko.

5. A eia kekahi, ua kapa ia ka poe i makemake e kipaku ia mai o Pahorana mai ka noho hookolokolo ae, he poe-makemake-alii, no ka mea, ua makemake lakou e hoololi ia ae ke kanawai ma kekahi ano e hookahuli ae i ke aupuni kuokoa, a e hoonoho iho i alii maluna iho o ka aina.

6. A lawe mai la ka poe i makemake ia Pahorana e noho mau i lunakanawai nui maluna iho o ka aina, i ka inoa poe-kuokoa maluna iho o lakou; a pela iho la ka mokuahana mawaena o lakou; no ka mea, ua hoohiki ka poe-kuokoa, i ole, ua hana berita e malama i na pono o lakou, a me na pomaikai o ko lakou hoomana ana ma kekahi aupuni kuokoa.

7. A eia kekahi, ua hoopau ia keia kumu o ko lakou paio ana ma na leo o na kanaka. A eia kekahi, hiki mai la na leo o na kanaka ma ka aoao o ka poe-kuokoa, a noho iho la o Pahorana ma ka noho hookolokolo, a he mea ia e hauoli nui ai mawaena o ka poe hoahanau o Pahorana, a me na mea he nui wale o ka poe-kuokoa; o lakou hoi ka i hoohamau i ka poe-makemake-alii i aa ole ai lakou e ku e mai, aka, ua koi ia e kokua i ka aoao kuokoa.

8. Ano, o ka poe i makemake i na alii, he poe kiekie lakou ma ka hanau ana; a imi iho la lakou e lilo i poe alii; a ua kokua ia lakou e ka poe i imi i ka mana a me ka noho luna ana maluna iho o na kanaka.

9. Aka hoi, he manawa pilikia keia no na paio me neia mawaena o ka poe kanaka o Nepai; no ka mea hoi, ua hookonokono hou o Amalikia i na naau o ka poe kanaka o Lamana, e ku e mai i ka poe kanaka o Nepai, a e houluulu ana oia i na koa, mai na kihi a pau o kona aina, a e kahiko ana ia lakou, a e hoomakaukau ana ia lakou no ke kaua, me ke akahele loa; no ka mea, ua hoohiki oia e inu iho i ke koko o Moroni.

10. Aka hoi, e ike auanei kakou o kana olelo hoohiki ana i hana ai, ua lapuwale ia; aka, hoomakaukau nae oia ia ia iho a me na puali ona, e hele mai e kaua me ko Nepai poe.

11. Ano, aole lehulehu loa na puali ona e like me ka manawa mamua aku, no ka nui o na tausani i pepehi ia ai ma ka lima o ko Nepai poe; aka me ko lakou lilo nui, ua houluulu ae la nae o Amalikia he poe puali nui loa, no ia mea, aole ona makau e iho mai i ka aina o Zarahemela.

12. He oiaio, iho maoli mai la o Amalikia ma ke alo o ko Lamana poe. A oia ma ka makahiki iwakaluakumamalima o ke au o na lunakanawai; a ma ka manawa hookahi hoi ia a lakou i hoomaka ai e hoopau i na mea o ko lakou mau paio no ka lunakanawai nui, o Pahorana.

13. A eia kekahi, i ka wa a na kanaka, ka poe i kapa ia he poe-makemake-alii, i lohe ai e iho mai ana ko Lamana poe e kaua mai ia lakou, ua hoihoi lakou iloko o ko lakou mau naau, a hoole mai la lakou e lalau iho i na mea kaua; no ka mea, ua ukiuki lakou i ka lunakanawai nui, a i ka poe-kuokoa hoi, aole lakou e lalau iho i na mea kaua e hoomalu aku i ko lakou aupuni.

14. A eia kekahi, ia Moroni i ike ai i keia a i ike ai no hoi e hele mai ana ko Lamana poe iloko o na palena o ka aina, ua huhu nui loa iho la ia, no ka paakiki o ua poe kanaka la, ka poe ana i hana ai me ka ikaika nui no ka hoopakele ana; he oiaio, ua ukiuki nui loa iho la ia; ua hoopiha ia kona naau me ka huhu ia lakou.

15. A eia kekahi, hoouna ae la oia i palapala noi, me na leo o na kanaka, i ke kiaaina o ka aina, e makemake ana ia ia e heluhelu ia mea, a e haawi mai ia ia, (ia Moroni,) i ka mana e koi aku i ua poe kuee la e hoomalu i ko lakou aupuni, a i ole ia, e pepehi aku ia lakou a make;

16. No ka mea, o kona manao mua ia e hoopau aku i na paio, a me na kuee me neia mawaena o na kanaka; no ka mea hoi, oia no ke kumu mamua a hiki wale i keia manawa o ko lakou luku ia ana a pau. A eia kekahi, ua ae ia mai ia mea, e like me ka leo o na kanaka.

17. A eia kekahi, kena aku la o Moroni i kona poe koa e hele ku e aku i ua poe-makemake-alii la, e hoohiolo iho i ko lakou haaheo a me ko lakou ano hanohano, a e hoohaahaa iho ia lakou i ka honua, a i ole ia, e lalau iho lakou i na mea kaua a e kokua i ka aoao kuokoa.

18. A eia kekahi, hele ku e aku la na puali ia lakou; a hoohiolo iho la no lakou i ko lakou la haaheo a me ko lakou la ano hanohano, a ia lakou la i hoaka ai i ko lakou la mau mea kaua e kaua mai i ka poe kanaka o Moroni, ua oki ia iho lakou la ilalo, a hoohaahaa ia iho la i ka honua.

19. A eia kekahi, he mau tausani eha o ua poe kuee la, ka i oki ia ilalo me ka pahikaua; a o na luna o lakou i pepehi ole ia ma ke kaua, ua hopu ia a hahao ia iloko o ka halepaahao, no ka mea, aohe manawa no ka hookolokolo ia ana o lakou i keia wa;

20. A o ke koena o ua poe kuee la, ae mai lakou i ka hae o ke kuokoa ana, e makemake ana ia mea mamua o ka hahau ia ana ilalo i ka honua me ka pahikaua, a ua koi ia lakou e kau ae i ka hoailona o ke kuokoa ana maluna iho o na halekiai o lakou, a ma na kulanakauhale o lakou, a e lalau iho i na mea kaua e hoomalu aku i ko lakou aupuni.

21. A pela o Moroni i hoopau ai i ua poe-makemake-alii la, i ole i ikea kekahi ma ka inoa poe-makemake-alii; a pela oia i hoopau ai i ka paakiki, a me ka haaheo o ua poe kanaka la, ka poe i kaena ae he koko alii ko lakou; aka ua lawe ia lakou e hoohaahaa ia lakou iho e like me ko lakou poe hoahanau, a e kaua makau ole no ko lakou kuokoa ana mai ka noho luhi ana ae.

22. Eia hoi kekahi, oiai o Moroni e wawahi ana i na kaua a me na paio ana mawaena o kona poe kanaka iho, a e lawe ana ia lakou i ka maluhia a me ka noho maikai ana a e hana ana i na mea hooponopono e hoomakaukau ai no ke kaua i ko Lamana poe, aia hoi, ua komo mai la ko Lamana poe iloko o ka aina o Moroni, ma na palena ia ma ke kahakai.

23. A eia kekahi, aole i lawa ka ikaika o ko Nepai poe ma ke kulanakauhale o Moroni; nolaila, hooauhee mai la o Amalikia ia lakou, me ka pepehi ana i na mea he nui. A eia kekahi, loaa iho la ia Amalikia ke kulanakauhale; he oiaio, loaa iho la na pakaua a pau o lakou.

24. A o ka poe i auhee ae la mailoko aku o ke kulanakauhale o Moroni, hele aku la lakou i ke kulanakauhale o Nepaiha; a houluulu iho la ko ke kulanakauhale o Lehi ia lakou iho, a liuliu ae la, ua makaukau no ka apo ana i ko Lamana poe ma ke kaua.

25. Aka, eia kekahi, aole e kuu aku o Amalikia i ko Lamana poe e hele ku e aku i ke kulanakauhale o Nepaiha e kaua, aka, alakai ae la ia lakou ilalo ma kahakai, e hoonoho ana i na kanaka ma kela kulanakauhale keia kulanakauhale e malama a e hoomalu ia wahi;

26. A pela oia i hele ae ai, e loaa ana na kulanakauhale he nui; o ke kulanakauhale o Nepaiha, a me ke kulanakauhale o Lehi, a me ke kulanakauhale o Morianatona, a me ke kulanakauhale o Omonera, a me ke kulanakauhale o Gida, a me ke kulanakauhale o Muleka, o keia mau wahi a pau ma na palena hikina lakou, ma ke kahakai.

27. A pela ko Lamana poe i loaa ai, ma ka maalea o Amalikia, na kulanakauhale he nui, ma o ko lakou mau puali la hiki ole ke helu ia, he mau wahi i hana ikaika nui ia ai lakou a pau, mamuli o ke ano o na pakaua o Moroni; a lilo iho la lakou a pau he mau wahi paa no ko Lamana poe.

28. A eia kekahi, hele mai la lakou i na palena o ka aina Momona, me ka hooauhee ia ana o ko Nepai poe imua o lakou, a me ka pepehi ana i na mea he nui wale.

29. Aka eia kekahi, ua halawai lakou me Teanakuma, nana i pepehi ia Morianatona a make, a i alai ae i kona poe kanaka i kona mahuka ana.

30. A eia kekahi, alai ae la oia ia Amalikia no hoi, a e hele ana oia la me kona poe koa kinikini, i loaa ai ia ia ka aina Momona, a me ka aina akau no hoi.

31. Aka hoi, loaa iho la ia ia ka poho, ma ka hooauhee ia ana e Teanakuma a me kona poe kanaka, no ka mea, he poe koa nui lakou; ua oi aku kela kanaka keia kanaka o Teanakuma mamua o ko Lamana poe ma ko lakou ikaika, a ma ko lakou akamai i ke kaua, a no ia mea, loaa iho la ia lakou ka lanakila maluna iho o ko Lamana poe.

32. A eia kekahi, hoopilikia aku la lakou ia lakou la, a luku aku la ia lakou la a poeleele iho la. A eia kekahi, kukulu iho la o Teanakuma a me kona poe kanaka, i ko lakou mau halelewa ma na palena o ka aina Momona; a kukulu iho la o Amalikia i kona mau halelewa ma na palena ma ke one ma ke kahakai, a mamuli o keia ano lakou i hooauhee ia ai.

33. A eia kekahi, i ka wa i hiki mai ai ka po, nihi malu aku la o Teanakuma a me kana kauwa a hele aku la ma ka po, a hele ae la iloko o kahi a Amalikia i hoomoana ai; aia hoi, pauhia loa iho la lakou i ka hiamoe, no ka luhi nui o lakou, a o ke kumu hoi, ma o na hana la a me ka wela o ka la.

34. A eia kekahi, nihi malu ae la o Teanakuma iloko o ka halelewa o ke alii, a hou aku la i kekahi ihe i kona puuwai; a pepehi koke ae la oia i ke alii, i hoala ole ai oia i kana poe kauwa.

35. A hoi malu hou oia nei i kona wahi iho i hoomoana ai, a, aia hoi, e hiamoe ana kona poe kanaka; a hoala ae la oia ia lakou a hai ae la ia lakou i na mea a pau ana i hana ai.

36. A kauoha ae la oia i na puali ona e ku makaukau, o ala mai ko Lamana poe, a e lele mai maluna iho o lakou.

37. A pela i pau ai ka makahiki iwakaluakumamalima o ke au o na lunakanawai maluna iho o ka poe kanaka o Nepai; a pela i pau ai no hoi na la o Amalikia.