1. Ano, eia kekahi, ia Moroni i loaa mai ai keia episetole, ua nui ae kona huhu, no ka mea, ike iho la oia he ike paka ko Amorona no kona hoopunipuni; he oiaio, ua akaka ia ia ua ike o Amarona aole he kumu pololei ka i hooeu ae ia ia e kaua mai i ko Nepai poe.

2. A i ae la oia, Aia hoi, aole au e haawi aku a e haawi mai i na pio me Amorona, ke hooki ole oia i kona manao kaua, me aʻu i i aku ai ma koʻu episetole; no ka mea, aole au e ae aku e loaa ia ia ka mana e oi ana mamua o kona i loaa ai.

3. Aia hoi, ua ike au i ka wahi a ko Lamana poe i kiai iho ai i koʻu poe kanaka, ka poe a lakou i lawe pio ai; a me Amorona i ae ole mai ai iaʻu ma koʻu episetole, aia hoi e haawi aku no au ia ia e like me kaʻu mau olelo; he oiaio, e imi aku no au i ka make mawaena o lakou, a hiki i ka wa e noi mai ai lakou no ka malu.

4. Ano, eia kekahi, ia Moroni i olelo ae ai i keia mau olelo, kena ae la oia e huli aku mawaena o kona poe kanaka, i loaa mai ai paha ia ia kekahi kanaka he mamo a Lamana mawaena o lakou.

5. A eia kekahi, loaa iho la ia lakou kekahi, o Lamana kona inoa; a oia no kekahi o ka poe kauwa a ke alii i pepehi ia ai e Amalikia.

6. Ano, kauoha ae la o Moroni ia Lamana a me kekahi poe kanaka he uuku, e hele aku i kahi o ka poe kiai nana e malama ana i ko Nepai poe.

7. Ano, ua kiai ia ae ko Nepai poe ma ka kulanakauhale o Gida; nolaila, wae ae la o Moroni ia Lamana, a kauoha ae la i kekahi poe kanaka he uuku e hele pu me ia.

8. A i ka wa poeleele, hele aku la o Lamana i ka poe kiai, ka poe i kiai maluna iho o ko Nepai poe, a, ike mai la lakou ia ia e hele aku ana, a hea mai la lakou ia ia. Aka, i aku la oia ia lakou, Mai makau; aia hoi, he Lamana no au. Aia hoi, ua pakele mai makou i ko Nepai poe ae, a e hiamoe ana lakou; a, aia hoi, ua lalau aku makou i ko lakou waina, a lawe pu mai me makou.

9. Ano, i ka wa a ko Lamana poe i lohe ai i keia mau olelo, hookipa mai lakou ia ia me ka olioli; a i mai la lakou ia ia, E haawi mai i kou waina ia makou, i inu ai makou; ua hauoli makou no kou lawe pu ana mai i waina, no ka mea, ua luhi makou.

10. Aka, i aku la o Lamana ia lakou, E malama kakou i ko kakou waina a hiki i ka wa e hele aku ai kakou i ko Nepai poe e kaua. Aka, hoonui wale iho la keia olelo i ko lakou makemake e inu i ka waina.

11. No ka mea, wahi a lakou, ua luhi makou; nolaila, e ae mai oe ia makou e inu i ka waina, a e loaa ia makou i waina mahope, ma ka mahele ana o ko makou o, a e hooikaika mai ia mea ia kakou e hele aku e kaua i ko Nepai poe.

12. A i aku la o Lamana, Aia no ia oukou, e hana e like me ko oukou makemake.

13. A eia kekahi, inu nui ae la lakou i ka waina, a ua maikai ia i ko lakou hoao ana; nolaila, inu nui loa aku la lakou ia mea; a ua ikaika no ia, i hoomakaukau ia ai ma kona ikaika.

14. A eia kekahi, inu iho la lakou a ua lealea, a mahope ua ona lakou a pau.

15. Ano, ia Lamana a me kona poe i ike ai ua ona lakou a pau, a e hiamoe loa ana, hoi mai la lakou io Moroni la, a hai ae la ia ia i na mea a pau i hoea mai.

16. Ano, ua like keia mea me ka manao o Moroni. A ua hoomakaukau ae la o Moroni i kona poe kanaka me na mea kaua; a hoouna aku la oia i ke kulanakauhale o Gida, oiai ko Lamana poe e hiamoe loa ana, a ona, a hoolei aku la oia i na mea kaua iloko i ka poe pio, a ua kahiko ia lakou a pau,

17. He oiaio, pela hoi, ka lakou poe wahine, a me ka lakou poe keiki a pau, ka poe i hiki ke hana aku me kekahi mea kaua, i ka wa a Moroni i kahiko ai i kela poe pio a pau me na mea kaua; a ua hana ia aku kela mau mea a pau me ka walaau ole loa.

18. Aka, ina ua hoala ae lakou i ko Lamana poe, aia ua ona lakou, a ua hiki i ko Nepai poe ke pepehi aku ia lakou.

19. Aka hoi, aole o keia ka makemake o Moroni. Aole ona lealea i ka pepehi kanaka ana a i ka hookahe koko ana; aka lealea iho la oia i ka hoola ana i kona poe kanaka mai ka luku ia ana ae; a no keia mea i ole oia e hooili mai maluna iho ona i ka hoohewa ia no ka hana pono ole, aole oia e haule iho maluna o ko Lamana poe, a luku aku ia lakou i ko lakou wa i ona ai.

20. Aka, ua loaa ia ia kona mau makemake; no ka mea, ua kahiko aku oia i ua poe pio la o ko Nepai e noho ana iloko o ka pa o ke kulanakauhale, a ua haawi aku la ia lakou i mana e loaa ai ia mau wahi maloko o na paia;

21. Alaila, kena ae la oia i kona poe kanaka pu me ia, e emi iki mai mai o lakou ae, a e hoopuni ae i na puali o ko Lamana poe.

22. Ano, ua hana ia keia ma ka po, a, i ko Lamana poe i ala ai i kakahiaka, ike mai la lakou ua hoopuni ia ae e ko Nepai poe mawaho, a ua kahiko ia ko lakou poe pio maloko.

23. A pela lakou i ike ai he mana ko ko Nepai poe maluna iho o lakou, a ma keia pilikia ua ike lakou aole ia he mea e pono ai e kaua mai lakou me ko Nepai poe; nolaila, koi ae la ko lakou poe luna nui i na mea kaua o lakou, a lawe mai la lakou ia mau mea, a hoolei mai la ma na wawae o ko Nepai poe, me ka noi mai e aloha ia aku.

24. Ano hoi, oia no ka makemake o Moroni. Lawe aku la oia ia lakou i poe pio kaua, a loaa ke kulanakauhale, a kauoha ae la e hookuu ia aku ka poe pio a pau no ko Nepai; a hui mai la lakou i ka poe koa o Moroni, a he ikaika nui lakou i kona poe koa.

25. A eia kekahi, kena ae la oia i ko Lamana poe ana i lawe pio ai, e hoomaka i ka hooikaika ana i na pakaua a puni ke kulanakauhale o Gida.

26. A eia kekahi, ia ia i hana paa ai i ke kulanakauhale o Gida, e like me kona makemake, kena ae la oia e lawe ia aku kona poe pio i ke kulanakauhale Momona. A kiai iho la oia i kela kulanakauhale me ka poe koa ikaika loa.

27. A eia kekahi, me na hana malu a pau a ko Lamana poe, ua malama aku la a hoomalu nae lakou i ka poe a pau a lakou i hoopio ai, a hoopaa no hoi i ka aina a pau a me ka lanakila a lakou i loaa hou ai.

28. A eia kekahi, hoomaka hou ae la ko Nepai poe e lanakila aku, a e loaa hou na pono o lakou a me na pomaikai o lakou.

29. He nui na manawa a ko Lamana poe i hoao mai ai e hoopuni mai ia lakou ma ka po, aka ma keia mau hoao ana, he nui na pio o lakou i lilo aku.

30. A he nui na manawa a lakou i hoao mai ai e hoohainu mai i ko lakou waina i ko Nepai poe, i hiki ia lakou ke hoomake mai ia lakou nei me ka mea awaawa make, a i ole ia, me ka ona.

31. Aka hoi, aole i lohi ko Nepai poe e hoomanao i ka Haku i ko lakou Akua, i ko lakou mau manawa pilikia. Aole i hiki ia lakou ke hoohei ia iloko o na pahele o lakou la; he oiaio, aole lakou e inu iho i ko lakou la waina, ke ole lakou nei i haawi e aku mamua i kekahi mau mea o ka poe pio o ko Lamana.

32. A ua makaala lakou pela, i ole ai e haawi ia mai kekahi mea make mawaena o lakou; no ka mea, ina e hoomake iho ko lakou waina i ko Lamana, ina e hoomake iho no hoi ia i ko Nepai; a pela lakou i hoao ai i ko lakou mau mea i inu ai a pau.

33. Ano, eia kekahi, he mea e pono ai no Moroni e hoomakaukau ae e hoouka aku i ke kulanakauhale o Morianatona. No ka mea hoi, ua hana ikaika iho ko Lamana poe, ma ka lakou mau hana, i ke kulanakauhale o Morianatona a ua lilo iho la ia i wahi paa loa;

34. A e kai mau ana lakou i na poe koa hou iloko o ua kulanakauhale la, a me ka ai hou no hoi.

35. A pela i pau ai ka makahiki iwakaluakumamaiwa o ke au o na lunakanawai maluna iho o ka poe kanaka o Nepai.