1. E, ina he anela au, a i hiki ke loaa ka makemake o kuu naau, e hiki iaʻu ke hele aku e olelo aku me ka pu o ke Akua, me kahi leo e hoohaalulu ai i ka honua, a e hea aku i ka mihi i kela lahuikanaka i keia lahuikanaka;

2. He oiaio, e hai aku no au i kela uhane keia uhane, me he mea la me ka leo o ka hekili, i ka mihi a me ke kumumanao hoolapanai, e mihi lakou a e hele mai i ko kakou Akua la, i ole ai he kaumaha hou maluna iho o ka ili o ka honua a pau.

3. Aka hoi, he kanaka no au, a ke hana hewa nei au ma kuu makemake ana; no ka mea, he pono noʻu ke oluolu i na mea a ka Haku i haawi mai ai iaʻu.

4. Aole wau e pono e aleale ia ma na makemake oʻu, ma ke kauoha paa o ke Akua pololei, no ka mea, ua ike au e haawi mai ana oia i na kanaka e like me ko lakou makemake, ina paha i ka make, ina paha i ke ola; he oiaio, ua ike au e haawi mai ana oia i na kanaka, e like me ko lakou ake ana; ina paha i ke ola mau loa ua mau ake nei ina paha i ka make mau loa;

5. He oiaio, a ua ike au ua hiki mai ka pono a me ka hewa imua o na kanaka a pau; a o ka mea i ike ole ai i ka pono mai ka hewa aku ua kina ole oia; aka, o ka mea i ike i ka pono a me ka hewa, ia ia i haawi ia mai ai e like me kona mau makemake; ina e makemake ana i ka pono, a i ole ia, i ka hewa paha; i ke ola a i ole ia i ka make paha, i ka olioli a i ole ia i ka walania o ka naau.

6. Ano, i kuu ike ana i ua mau mea nei, no ke aha la au e makemake ai i ka mea nui loa ae mamua o ka hana i kahea ia mai ai au e hana?

7. No ke aha la au i makemake ai he anela au, e hiki iaʻu ke olelo aku i ko na welau a pau o ka honua?

8. No ka mea, aia hoi, ke haawi mai la ka Haku i na lahuikanaka a pau, o ko lakou lahui a olelo iho, e ao aku i kana olelo, ma ka naauao, i na mea a pau ana i manao ai he pono no lakou ke loaa; nolaila, ke ike nei kakou ke ao mai la ka Haku ma ka naauao, e like me ka mea i pono a i oiaio.

9. Ua ike au i ka mea a ka Haku i kauoha mai ai iaʻu, ke kaena nei au ma ia mea; aole au i kaena noʻu iho, aka ke kaena nei au ma ka mea a ka Haku i kauoha mai ai iaʻu; he oiaio, a o keia kaʻu e kaena ai, i lilo ai paha au i mea paa hana ma na lima o ke Akua, e kai mai i kekahi uhane i ka mihi; a o keia no koʻu olioli.

10. A, aia hoi, iaʻu i ike ai i na mea he nui o koʻu poe hoahanau e mihi io ana, a e hele mai ana i ka Haku i ko lakou Akua la, alaila, ua hoopiha ia koʻu uhane me ka olioli; alaila e hoomanao ana au i ka mea a ka Haku i hana mai ai noʻu; he oiaio, i kona hoolohe mai i kaʻu pule; he oiaio, alaila e hoomanao ana au i kona lima lokomaikai ana i o mai ai iaʻu;

11. He oiaio, a e hoomanao ana no hoi au i ka noho pio ana o koʻu poe makua; no ka mea, ua ike oiaio au na ka Haku lakou i hoopakele mai mailoko mai o ka noho luhi ana, a ma ua mea nei i hoonohonoho ai i kona ekalesia; he oiaio, o ka Haku ke Akua, ke Akua o Aberahama, ke Akua o Isaaka, a o ke Akua o Iakoba, nana i hoopakele mai ia lakou mailoko mai o ka noho luhi ana;

12. He oiaio, ua hoomanao mau au i ka noho pio ana o koʻu poe makua; a o kela Akua hookahi nana i hoopakele mai ia lakou mailoko mai o na lima o ko Aigupita poe, i hoopakele mai hoi ia lakou mailoko mai o ka noho luhi ana;

13. He oiaio, a na ua Akua hookahi la i hoonohonoho mai i kona ekalesia mawaena o lakou; he oiaio, a ua kahea mai ua Akua hookahi la iaʻu ma kekahi oihana hoano, e hai aku i ka olelo i keia poe kanaka, a ua haawi mai iaʻu i ka pomaikai nui, a ma ia mea ua piha au i ka olioli;

14. Aole nae au e olioli ana ma koʻu pomaikai iho wale no, aka ua piha nui ae au i ka olioli no ka pomaikai o koʻu poe hoahanau, ka poe i pii aku i ka aina o Nepai.

15. Aia hoi, ua hana nui loa iho la lakou, a ua hoohua ae i ka hua a nui; a e nani wale auanei ko lakou uku.

16. Ano, iaʻu e noonoo ana i ka pomaikai o koʻu poe hoahanau nei, ua kai ia aku kuu uhane, me he mea la e kaawale ana ia mai ke kino aku, no ka nui loa o koʻu olioli.

17. A, ano na ke Akua e ae mai i koʻu poe hoahanau nei, e noho iho lakou iloko o ke aupuni o ke Akua; he oiaio, a o kela poe a pau no hoi ka poe hua o ka lakou mau hana, i hele hou ole ai lakou iwaho no ke ao pau ole, aka i hoolea aku ai lakou ia ia a mau loa aku. A na ke Akua e ae mai e hana ia mai e like me kaʻu mau olelo, me aʻu e olelo nei. Amene.