Ka Buke A Helamana

1. Ano hoi, eia kekahi, ma ka makamua o ka makahiki kanaha o ke au o na lunakanawai maluna iho o ka poe kanaka o Nepai, hoomaka ae kekahi hihia nui mawaena o ka poe kanaka o Nepai.

2. No ka mea hoi, ua make aku la o Pahorana, a hele aku la i ke ala o ko ka honua a pau; nolaila, hoomaka ae la ka paio nui no ka mea nona ka noho hookolokolo mawaena o na hoahanau, ka poe keiki a Pahorana.

3. Ano, eia no ko lakou mau inoa, ka poe i paio no ka noho hookolokolo, ka poe hoi nana i hooeu aku i na kanaka e paio: o Pahorana, o Paanaki, a me Pakumeni.

4. Ano, aole lakou nei wale no ka poe keikikane a pau a Pahorana, (no ka mea, he nui kana mau keiki,) aka o lakou nei no ka poe i paio no ka noho hookolokolo; nolaila, ua mahele lakou i na kanaka i mau mahele ekolu.

5. Aka hoi, eia kekahi, ua wae ia ae o Pahorana ma o ka leo la o kanaka e lilo i lunakanawai nui, a i kiaaina hoi, maluna iho o ka poe kanaka o Nepai.

6. A eia kekahi, o Pakumeni ia ia i ike ai ua hiki ole ia ia ke loaa ka noho hookolokolo, hui pu ae la oia me ka leo o kanaka.

7. Aka hoi, ua huhu loa o Paanaki, a me kela hapa o na kanaka, ka poe i makemake ia ia e lilo i kiaaina no lakou; nolaila, ua anehe oia e hoomalimali aku i ua poe la e ala ae, ma ke kipi ana i ko lakou poe hoahanau.

8. A eia kekahi, ia ia i aneane ai e hana i keia, aia hoi, ua hopu ia oia, a ua hookolokolo ia aku e like me ka leo o na kanaka, a hoohewa ia e make; no ka mea, ua ala ae la oia ma ke kipi, a imi ae la e hoopau mai i ke kuokoa ana o na kanaka.

9. Ano, i ka wa a ua poe la, ka poe i makemake ai i kiaaina oia no lakou, i ike mai ai ua hoohewa ia aku oia e make, ua huhu lakou, a, aia hoi, hoouna ae la lakou i kekahi kanaka, o Kisakumena, i ka noho hookolokolo o Pahorana, a pepehi ae la ia Pahorana me ia i noho ai maluna iho o ka noho hookolokolo.

10. A ua alualu ia aku oia e na kauwa a Pahorana; aka hoi, no ka mahuka kiki o Kisakumena, aole i hiki i kekahi kanaka ke loaa ia.

11. A hele ae la oia i ua poe la nana ia i hoouna mai, a komo iho la lakou a pau iloko o kahi berita, he oiaio, e hoohiki ana ma ka Mea mau loa nana lakou i hana, aole lakou e hai aku i kekahi kanaka ua pepehi ae o Kisakumena ia Pahorana;

12. Nolaila, aole i ikea o Kisakumena mawaena o ka poe kanaka o Nepai, no ka mea, ua hoano e ia oia i ka wa ana i pepehi ae ai ia Pahorana. A hui pu ae la o Kisakumena, a me kona poe, ka poe i hana berita pu me ia, mawaena o na kanaka, mamuli o ke ano i hiki ole ai ke loaa lakou a pau; aka, o ka poe a pau i loaa ua hoohewa ia aku e make.

13. Ano hoi, ua koho ia ae la o Pakumeni, mamuli o ka leo o na kanaka, e lilo i lunakanawai nui a i kiaaina, maluna iho o na kanaka, e noho luna ma ka hakahaka o kona kaikuaana o Pahorana; a ua like ia me kona kuleana. A ua hana ia keia a pau, ma ka makahiki kanaha o ke au o na lunakanawai; a pau ae la no ia.

14. A eia kekahi, ma ka makahiki kanahakumamakahi o ke au o na lunakanawai, ua houluulu ae la ko Lamana poe i ka poe koa he lehulehu i hiki ole ke helu ia, a kahiko ae la ia lakou me na pahikaua, a me na pahikaua pokole, a me na kakaka, a me na pua, a me na pale-poo, a me na pale-umauma, a me kela ano keia ano o na pale-kino a pau;

15. A iho hou mai la lakou e hiki ia lakou ke hoouka mai i ko Nepai poe. A ua alakai ia mai lakou e kekahi kanaka, o Korianatuma kona inoa; a he mamo ia na Zarahemela; a he mea ku e oia mailoko mai o ko Nepai poe; a he kanaka nunui a ikaika hoi oia;

16. Nolaila, o ke alii o ko Lamana poe, o Tubalota kona inoa, oia ke keiki a Amorona, e manao ana oia o Korianatuma, he kanaka ikaika no oia, ua hiki ke kupaa imua o ko Nepai poe, no kona ikaika a me kona akamai nui, a ma ka hoouna ana mai ia ia nei, e loaa auanei ia ia la ka mana maluna iho o ko Nepai poe;

17. Nolaila, hookonokono ae oia ia lakou e huhu, a houluulu ae la oia i na puali ona, a hoonoho iho la oia ia Korianatuma i alihi kaua no lakou, a kena ae la ia lakou e iho aku ilalo i ka aina o Zarahemela, e kaua mai i ko Nepai poe.

18. A eia kekahi, no ka nui o ka paio a me ka nui o ka pilikia ma ke aupuni, aole lakou i hoonoho i na kiai lawa pono ma ka aina o Zarahemela; no ka mea, ua manao iho la lakou aole i aa ko Lamana poe e komo mai mawaena konu o na aina o lakou e hoouka mai i kela kulanakauhale nui o Zarahemela.

19. Aka eia kekahi, hele mai la o Korianatuma ma ke alo o kona poe lehulehu loa, a hiki mai la maluna iho o ko ke kulanakauhale, a no ka emo ole loa o ko lakou hele ana, aole o ko Nepai poe manawa e houluulu ai i na puali o lakou;

20. Nolaila, ooki ae la ilalo o Korianatuma i ka poe kiai ma ka puka o ke kulanakauhale, a hele ae la me kona poe kaua a pau iloko o ke kulanakauhale, a pepehi ae la lakou i kela mea keia mea i ku e aku ia lakou, a loaa iho la ia lakou ke kulanakauhale a pau.

21. A eia kekahi, hee ae la o Pakumeni, oia no ka lunakanawai nui, imua o Korianatuma, a hiki i na pa o ke kulanakauhale. A eia kekahi, hahau ae la o Korianatuma ia ia ma ka pa, a make aku la ia. A pela i pau ai na la o Pakumeni.

22. Ano, ia Korianatuma i ike ai ua loaa ia ia ke kulanakauhale o Zarahemela, a ua hee aku ko Nepai poe imua o lakou, a ua pepehi ia, a ua hopu ia, a ua hahao ia iloko o ka halepaahao, a ua loaa ia ia ka wahi ikaika loa ma ka aina a puni, hooikaika ia iho la kona naau, a no ia mea, liuliu iho la oia e hele ae e ku e i ko ka aina a pau.

23. Ano, aole oia i noho ma ka aina o Zarahemela, aka, hele ae la oia me ka poe koa he nui, i ke kulanakauhale o Momona; no ka mea, o kona manao paa ia e hele ae a e ooki mai i kona ala mawaena me ka pahikaua, e hiki ia ia ke loaa na wahi ma ka akau o ka aina;

24. A me ka manao ana aia mawaena konu o ka aina ko lakou ikaika nui loa, nolaila, hele ae la oia, e haawi ole ana ia lakou i ka manawa e houluulu mai ai ia lakou iho, koe wale no na puulu liilii; a ma keia ano lakou la i haule mai ai maluna iho o lakou nei a ooki mai la ia lakou nei ilalo i ka honua.

25. Aka hoi, haawi mai la keia hele ana o Korianatuma ma mawaena konu o ka aina, i ka pomaikai nui ia Moroniha maluna o lakou, me ka nui loa nae o ko Nepai poe i pepehi ia mai;

26. No ka mea hoi, ua manao o Moroniha aole ko Lamana poe i aa e komo mai mawaena konu o ka aina, aka, e hoouka mai lakou la i na kulanakauhale a puni ma na palena, me lakou la i hana mai ai mamua aku; nolaila, ua kena ae la o Moroniha i na puali ikaika o lakou e malama i kela mau wahi a puni ma na palena.

27. Aka hoi, aole i makau ko Lamana poe me ia i makemake ai, aka, ua hele mai lakou mawaena konu o ka aina, a ua hoopio mai i ke kulanakauhale nui, oia no ke kulanakauhale Zarahemela, a hele ae la mawaena o na wahi nui o ka aina, me ka luku ana i na kanaka me ka luku nui, i na kane, i na wahine, a me na keiki no hoi, me ka loaa ana na kulanakauhale he nui a me na wahi paa he nui.

28. Aka, ia Moroniha i ike ai i keia mea, hoouna koke ae la oia ia Lehi me kekahi poe e alai ia lakou, mamua o ko lakou hiki ana i ka aina Momona.

29. A pela oia i hana ai; a alai ae la oia ia lakou, mamua o ko lakou hiki ana i ka aina o Momona, a hoouka aku la oia ia lakou, a hoomaka ae la lakou e hee ae ihope i ka aina o Zarahemela.

30. A eia kekahi, alai ae la o Moroniha ia lakou i ko lakou hee hope ana, a hoouka aku la ia lakou, a lilo ae la ia i kaua me ke kahe nui ana o ke koko; he oiaio, ua nui loa ka poe i pepehi ia, a mawaena o ka poe i pepehi ia, ua loaa no hoi o Korianatuma.

31. Ano hoi, ua hiki ole i ko Lamana poe ke hee ae i kela ala keia ala; aole ma ka akau, aole hoi ma ka hema, aole ma ka hikina, aole ma ke komohana, no ka mea, ua hoopuni ia lakou ma na aoao a pau e ko Nepai poe;

32. A pela i hoolei mai ai o Korianatuma i ko Lamana poe mawaena konu o ko Nepai poe, a no ia mea, maloko lakou o ka mana o ko Nepai poe, a ua pepehi ia aku oia iho, a hookuu mai la ko Lamana poe ia lakou iho iloko o na lima o ko Nepai poe.

33. A eia kekahi, loaa hou mai la ia Moroniha ke kulanakauhale o Zarahemela, a kena ae la i ko Lamana poe, ka poe i hoopio ia aku e hele aku mawaho o ka aina me ka maluhia.

34. A pela i pau ai ka makahiki kanahakumamakahi o ke au o na lunakanawai.