1. Ano, e koʻu poe hoahanau i aloha ia, aia hoi, ke hai aku nei au ia oukou ina aole oukou e mihi, e waiho ia auanei ko oukou mau hale i neoneo ia oukou;

2. He oiaio, ina aole oukou e mihi, e loaa auanei i ko oukou poe wahine ke kumu nui e uwe ai ma ka la a lakou i hanai waiu aku ai; no ka mea, e hoao auanei oukou e holo, a, aole wahi e pakele aku ai; he oiaio, auwe ka poe hapai keiki, no ka mea, kaumaha auanei lakou, a hiki ole ke holo; nolaila, e hahi ia lakou ilalo, a e haalele ia e make;

3. He oiaio, auwe keia poe kanaka i kapa ia ka poe kanaka o Nepai, ke ole lakou e mihi i ka wa a lakou e ike ai i keia mau hoailona a mau mea kupanaha, e hoike ia mai auanei ia lakou; no ka mea hoi, he lahuikanaka lakou i wae ia no ka Haku mamua; he oiaio, ua aloha mai oia i ka poe kanaka o Nepai, a ua paipai mai no hoi oia ia lakou; he oiaio, ma na la o ko lakou mau hala ua paipai mai oia ia lakou, no kona aloha ana mai ia lakou.

4. Aka hoi, e oʻu poe hoahanau, ua inaina mai oia i ko Lamana poe, no ka mea, ua hewa mau ka lakou mau hana; a o keia mea no ka hewa o na mooolelo a ko lakou poe kupuna. Aka hoi, ua hiki mai la ke ola ia lakou, ma o ka haiolelo ana la o ko Nepai poe; a no keia mea ua hooloihi mai ka Haku i ko lakou mau la.

5. A ke makemake nei au e ike aku oukou aia no ka nui o lakou ma ke ala pono o ka lakou hana, a ke hele pololei la lakou imua o ke Akua, a ke malama la lakou i kana mau kauoha, a me kona mau kanawai, a me kana mau olelo paa, e like me ke kanawai o Mose.

6. He oiaio, ke i aku nei au ia oukou, e hana ana ka nui o lakou i keia, a e hooikaika ana lakou, me ka hoomau molowa ole ana, e hiki ia lakou ke kai mai i ke koena o ko lakou poe hoahanau i ka ike i ka oiaio; nolaila, he nui no ka poe i hui pu ia me lakou i kela la i keia la.

7. Aia hoi, ua ike oukou no oukou iho, no ka mea, ua nana oukou ia mea, o ka poe a pau o lakou i kai ia mai i ka ike i ka oiaio, a e ike i na mooolelo hewa a ino loa a ko lakou poe kupuna, a i kai ia e manaoio i na palapala hemolele, he oiaio, i na wanana a ka poe kaula hemolele i kakau ia, ka mea e alakai ana ia lakou i ka manaoio ma ka Haku, a i ka mihi, a e lawe ana keia manaoio a mihi i ke ano hou o ka naau ia lakou;

8. Nolaila, o ka poe a pau i hiki mai i keia, ua ike oukou no oukou iho, ua naueue ole a onipaa ma ka manaoio, a ma ka mea nana lakou i hoolanakila mai.

9. A ua ike no hoi oukou ua kanu iho la lakou i ko lakou mau mea kaua, a ke makau la lakou e lawe hou ae ia mau mea, o hana hewa paha lakou; he oiaio, ua hiki ia oukou ke ike ke makau nei lakou i ka hana hewa; no ka mea hoi, e ae aku no lakou e hahi ia ilalo a e pepehi loa ia e ko lakou poe enemi, aole hoi e hoaka ae i na pahikaua a lakou e ku e ia lakou la; a o keia mea no ko lakou manaoio aku ia Kristo.

10. Ano, no ko lakou onipaa ana i ka wa a lakou i manaoio ai ma ka mea a lakou i manaoio ai; no ka mea, no ko lakou kupaa ana i ka wa a lakou i hoomalamalama ia ai, aia hoi, na ka Haku lakou e hoopomaikai mai a e hooloihi mai i ko lakou mau la, me ko lakou hala nae;

11. He oiaio, ina e emi iho lakou iloko o ka hoomaloka, e hooloihi mai nae ka Haku i ko lakou mau la a hiki mai ka manawa i olelo ia ai e ko kakou poe kupuna, a e ka kaula Zenosa hoi, a me na kaula e ae, no ka hoihoi hou ia ana o ko kakou poe hoahanau, ko Lamana poe, i ka ike i ka oiaio;

12. He oiaio, ke i aku nei au ia oukou, ma na la mahope, ua haawi ia mai na olelo pomaikai a ka Haku i ko kakou poe hoahanau, i ko Lamana poe; a me na popilikia nae he nui a lakou e loaa ai, a e hoa ia lakou i o ia nei maluna iho o ka ili o ka honua, a e alualu ia, a e hahau ia a e hoopuehu ia aku, me ka loaa ole kahi e pakele ai, e aloha mai auanei ka Haku ia lakou;

13. A ua like keia me ka wanana, e lawe ia auanei lakou i ka ike oiaio, oia no ka ike i ko lakou Mea Hoolapanai, a me ko lakou Kahuhipa nui a oiaio, a e helu pu ia mawaena o kana poe hipa.

14. Nolaila, ke i aku nei au ia oukou, e aho auanei ia no lakou mamua o oukou, ke mihi ole oukou.

15. No ka mea hoi, ina ua hoike ia aku na hana mana ia lakou i hoike ia mai ia oukou; he oiaio, i ka poe i emi iho iloko o ka hoomaloka no na mooolelo a ko lakou poe kupuna, ua hiki ia oukou ke ike no oukou iho, aole lakou i emi hou iho ma ia hope mai iloko o ka hoomaloka;

16. Nolaila, wahi a ka Haku, aole au e hoopau loa aku ia lakou, aka e hoihoi hou mai au ia lakou ioʻu nei, ma ka la o koʻu naauao, wahi a ka Haku.

17. Ano hoi, wahi a ka Haku, no ka poe kanaka o ko Nepai, ina aole lakou e mihi, a e haliu mai e hana i koʻu makemake, e anai loa aku au ia lakou, wahi a ka Haku no ko lakou hoomaloka, me na hana mana nae he nui aʻu i hana ai mawaena o lakou; a he oiaio me ka Haku e ola nei, e ko auanei keia mau mea, wahi a ka Haku.