1. Eia hoi kekahi, i ka wa a Nepai i olelo aku ai i keia mau olelo, holo ae la kekahi poe kanaka e ku ana mawaena o lakou i ka noho hookolokolo; he oiaio, he mau mea elima ka i hele; a i ae la lakou mawaena o lakou iho, me lakou i holo ai,

2. Aia hoi, e ike oiaio kakou ano, ina he kaula keia kanaka, a ua kauoha ae ke Akua ia ia e wanana mai i na mea kupanaha me neia ia kakou. Aole kakou i manaoio ua kauoha mai oia peia; he oiaio, aole kakou i manaoio he kaula ia; aka hoi, ina he oiaio keia mea ana i i mai ai no ka lunakanawai nui, ua make oia, alaila e manaoio kakou he oiaio na olelo e ae, ana i olelo mai ai.

3. A eia kekahi, holo ae la lakou ma ko lakou ikaika, a komo ae la iloko i ka noho hookolokolo; a, aia hoi, ua haule iho la ka lunakanawai nui i ka honua, a moe iho la ia iloko o kona koko.

4. Ano hoi, ia lakou i ike ai i keia, ua pihoihoi nui loa lakou, a hina iho la i ka honua; no ka mea, ua manaoio ole lakou i na olelo a Nepai i olelo aku ai, no ka lunakanawai nui;

5. Aka, ano ia lakou i ike ai manaoio iho la lakou, a hiki mai ka eehia maluna iho o lakou, o hiki mai auanei na hoopai a pau a Nepai i olelo aku ai, maluna iho o na kanaka; nolaila, haalulu ae la lakou, a ua hina iho i ka honua.

6. Ano, ia wa koke no i pepehi ia ai ka lunakanawai nui; ua hou malu ia e kona kaikaina; a mahuka ae la oia, a holo ae la na kauwa, a hai aku la i na kanaka, e hooho ana i ka leo pepehi kanaka mawaena o lakou.

7. Aia hoi, hoakoakoa ae la na kanaka ia lakou iho i kahi o ka noho hookolokolo; a, aia hoi, me ka pihoihoi nui ko lakou ike ana i ua mau kanaka la elima i hina i ka honua.

8. Ano hoi, ua ike ole na kanaka no ke akoakoa paapu ana o na kanaka ma ke kihapai o Nepai; nolaila, i ae la lakou mawaena o lakou iho: O lakou nei no ka poe i pepehi iho i ka lunakanawai, a ua hahau mai ke Akua ia lakou, i hiki ole ai ia lakou ke mahuka aku mai o kakou aku.

9. A eia kekahi, lalau iho la lakou ia lakou la, a hikii ia lakou la, a hahao aku la ia lakou iloko o ka halepaahao. A ua hoouna ia aku kekahi olelo hoolaha a puni, ua pepehi ia ka lunakanawai, a ua hopu ia na mea pepehi, a hahao ia iloko o ka halepaahao.

10. A eia kekahi, ia la ae, hoakoakoa ae la na kanaka ia lakou iho e uwe a e hookeai, ma ka hoolewa ana o ka lunakanawai nui, ka mea i pepehi ia.

11. A pela no hoi ua poe lunakanawai la, ka poe i ku ma ke kihapai o Nepai, a lohe i kana mau olelo, o lakou pu i akoakoa no hoi ma ke kanu kupapau.

12. A eia kekahi, ninaninau ae la lakou mawaena o na kanaka, i ka i ana: Ai la ihea ua mau mea la elima i hoouna ia mai ai e ninau aku no ka lunakanawai nui ina paha ua make oia? A pane aku la lakou, a i aku la: No keia mau mea elima a oukou i olelo mai nei na oukou i hoouna, aole makou i ike; aka, aia no elima, o lakou ka poe pepehi kanaka, ua hahao ia e makou iloko o ka halepaahao.

13. A noi ae la na lunakanawai e kai ia mai lakou; a ua kai ia mai lakou, a, aia hoi, o lakou no na mea elima i hoouna ia aku; aia hoi, ninaninau ae la na lunakanawai ia lakou e ike no ia hana, a hai aku la lakou ia lakou la i na mea a pau a lakou i hana ai, i ka i ana:

14. Holo aku la makou a hiki i kahi hookolokolo, a ia makou i ike ai i na mea a pau, me ka Nepai i hoike mai ai, ua pihoihoi makou, a hina iho la makou i ka honua; a ia makou i pohala ae ai ma ko makou pihoihoi ae, aia hoi, hahao mai lakou nei ia makou iloko o ka halepaahao.

15. Ano, no ka pepehi ia ana o ua kanaka nei, aole makou i ike i ka mea nana ia i hana, a o keia wale no ka makou i ike: holo ae la makou a hiki e like me ko oukou makemake, a, aia ua make ka oia e like me na olelo a Nepai.

16. Ano, eia kekahi, wehewehe ae la na lunakanawai i ka mea i na kanaka, a hea ae la me ke ku e ia Nepai, i ka i ana: Aia hoi, ua ike makou ua ae like o ua Nepai nei me kekahi mea e pepehi i ka lunakanawai, alaila, i hiki ia ia ke hai mai ia mea ia makou, i hiki ia ia ke hoohuli mai ia makou i kona manaoio, e hiki ia ia ke hookiekie ae ia ia iho i kanaka nui, wae ia e ke Akua, a he kaula hoi;

17. Ano hoi, e huai ae makou i ke ano a ua kanaka nei, a nana e hai mai i kona hewa a e hoike mai ia makou i ka mea nana i pepehi i ua lunakanawai nei.

18. A eia kekahi, ua hookuu ia ua mau mea la elima ma ka la o kona kanu ia ana. Aka hoi, papa aku la lakou i na lunakanawai ma na olelo a lakou la i olelo ku e mai ai ia Nepai, a hoopaapaa ae la me kela mea keia mea o lakou, a hoohoka aku la lakou ia lakou la.

19. Kena ae la nae lakou la e hopu ia o Nepai, a hikii ia mai a kai ia aku imua o na kanaka, a hoomaka lakou e niele mai ia ia ma na ano he nui, e hiki ia lakou ke hoohihia mai ia ia, e hiki ia lakou ke hoohewa mai ia ia e make;

20. I ka i ana ia ia, Ua hui pu oe; owai la keia kanaka nana i hana mai i keia pepehi ana? Ano, e hai mai oe ia makou, a e hoopuka mai i kou hewa, ea, eia no ke kala; a e hookuu ola no hoi makou ia oe ina e hai mai oe ia makou, a e hoopuka mai i ke kuikahi au i hana ai me ia.

21. Aka, i aku la o Nepai ia lakou, E na mea naaupo, ka poe i okipoepoe ole ia o ka naau, ka poe makapo, a poe kanaka ai oolea hoi, ke ike nei anei oukou i ka loihi o ka hookuu ana o ka Haku ko oukou Akua ia oukou, e hele ma ko oukou aoao hewa nei?

22. E, ko oukou mea e pono ai e hoomaka e aoa a e uwe, no ka luku nui e kali nei i keia manawa ia oukou, ke ole oukou e mihi.

23. Aia hoi, ke i mai nei oukou ua kuikahi au me kekahi kanaka, nana e pepehi aku ia Seezorama, i ko kakou lunakanawai nui. Aka hoi, ke i aku nei au ia oukou, ua olelo ia keia no koʻu hoike ana ia oukou, e hiki ia oukou ke ike no keia mea; he oiaio, i mea hoike ia oukou, ua ike au no na hewa a me na mea hoopailua mawaena o oukou.

24. A no kuu hana ana i keia, ke i mai nei oukou ua kuikahi au me kekahi kanaka e hana i keia; he oiaio, no koʻu hoike ana aku ia oukou i keia hoailona, ua huhu oukou iaʻu, a ke imi nei e hoopau mai i kuu ola.

25. Ano hoi, e hoike aku no au i kekahi hoailona hou, a e ike ina paha ma keia mea hoi oukou e imi ai e hoopau mai iaʻu.

26. Aia hoi, ke i aku nei au ia oukou, e hele oukou i ka hale o Leanatuma, oia no ke kaikaina o Seezorama, a e i aku ia ia:

27. Ua kuikahi anei o Nepai, ka mea e kaena ana me he kaula la, ka mea nana e wanana nei i ka ino nui no keia lahuikanaka, me oe, a ma ia mea ua pepehi olua ia Seezorama, oia no kou kaikuaana?

28. A eia hoi, e i mai auanei oia ia oukou, Aole.

29. A na oukou e olelo aku ia ia, Ua pepehi anei oe i kou kaikuaana?

30. A e ku malie oia me ka makau, a e ike ole i ka mea e olelo mai. A, aia hoi, e hoole mai oia ia oukou; a e hana oia me he mea la ua kahaha oia; aka, e hai mai nae oia ia oukou ua hala ole oia.

31. Aka hoi, na oukou e huli aku ia ia, a e loaa ia oukou ke koko ma na kihi o kona koloka.

32. A ia oukou e ike ai i keia, na oukou e i aku, No hea mai keia koko? Aole anei makou i ike o keia no ke koko o kou kaikuaana?

33. Alaila, e haalulu oia, a e mae kona maka, me he mea la ua hiki ae ka make maluna iho ona.

34. Alaila, na oukou e i aku, No keia makau a me keia mae i hiki mai ai maluna o kou maka, aia hoi, ke ike nei makou ua hewa oe.

35. Alaila e hiki ae ka makau nui ae maluna iho ona; alaila e hai mai oia ia oukou, aole hoi e hoole hou mai ua hana oia i keia pepehi ana.

36. Alaila e i mai oia ia oukou, ua ike ole wau nei la, o Nepai, no ia mea, ke ole i haawi ia mai ia iaʻu e ka mana o ke Akua. Alaila, e ike oukou he kanaka pono wau, a ua hoouna ia mai au ia oukou mai ke Akua mai.

37. A eia kekahi, hele lakou a hana aku la, e like me ka Nepai i i aku ai ia lakou. A, aia hoi, o na olelo ana i i aku ai, ua oiaio; no ka mea, e like me na olelo, hoole mai la oia; a e like me na olelo, hooia mai la oia.

38. A kai ia oia e hooiaio mai o ka mea pepehi io no oia, a ua hookuu ia ae na mea elima; a o Nepai no hoi.

39. A aia no kekahi poe o ko Nepai i manaoio ae i na olelo a Nepai; a aia no kekahi poe no hoi i manaoio ae, no ka hoike o na mea elima, no ka mea, ua hoohuli ia lakou oiai lakou ma ka halepaahao.

40. Ano, aia kekahi poe mawaena o ko Nepai, ka poe i olelo he kaula no o Nepai;

41. A aia kekahi poe e olelo ana, Aia hoi, he akua no oia, no ka mea, ina aole oia he akua, ina ua hiki ole ia ia ke ike i na mea a pau. No ka mea hoi, ua hai mai oia i na manao o ko kakou mau naau, a ua hai mai no hoi i na mea ia kakou; a ua hoike mai no hoi oia ia kakou i ka mea nana i pepehi maoli i ko kakou lunakanawai nui.