1. Ano, eia kekahi, wanana aku la o Samuela, ka Lamana, i na mea e ae he nui loa aku i hiki ole ke palapala ia.

2. A, aia hoi, i aku la oia ia lakou, Aia hoi, ke haawi aku nei au i hoailona ia oukou; no ka mea, aia hala na makahiki hou elima, alaila e hiki mai ai ke Keiki a ke Akua e hoolapanai i ka poe a pau e manaoio aku ana ma kona inoa.

3. A, aia hoi, o keia kaʻu e haawi aku ai ia oukou i hoailona ma ka manawa o kona hiki ana mai; no ka mea hoi, ma ka lani auanei na malamalama nui, a no ia mea, ma ka po mamua o kona hiki ana mai aole he pouli, a e ikea auanei ia e kanaka me he mea la he ao ia;

4. Nolaila, hookahi la a me ka po, a me kekahi la hou, me he mea la hookahi la no ia, a aole no he po; a he hoailona auanei keia ia oukou; no ka mea, e ike no oukou i ka puka ana o ka la, a i kona napoo ana no hoi; nolaila, e ike auanei lakou me ka oiaio i elua la a me ka po; aole nae e hoopouli ia ka po; a o ka po ia mamua o kona hanau ana.

5. A, aia hoi, e ea mai kekahi hoku hou, he hoku a oukou i ike ole e ai mamua; a he hoailona hoi keia ia oukou.

6. A, aia hoi, aole o keia wale no; ma ka lani auanei na ouli a me na mea kupanaha he nui.

7. A e hiki mai keia, e pihoihoi auanei oukou a pau, a e kahaha, a e hina iho oukou i ka honua.

8. A eia kekahi, o ka mea e manaoio ma ke Keiki a ke Akua, e loaa no ia ia ke ola mau loa.

9. A, aia hoi, pela ka Haku i kauoha mai ai iaʻu, ma o kona anela la, i hele mai ai au a hai aku i keia mea ia oukou; he oiaio, ua kauoha mai la e wanana aku au ia mau mea ia oukou, he oiaio, ua i mai oia iaʻu, E hea aku i keia poe kanaka, e mihi a e hoomakaukau i ke alanui o ka Haku.

10. Ano, oiai hoi au he Lamana, a no kaʻu olelo ana aku ia oukou i na olelo a ka Haku i kauoha mai ai iaʻu, a no ke oolea o ia mea e ku e ana ia oukou, ua huhu mai oukou iaʻu, a ke imi nei e pepehi mai iaʻu, a ua hookuke mai iaʻu maiwaena mai o oukou.

11. A e lohe no oukou i kaʻu mau olelo, no ka mea, no keia mea ua pii ae au maluna o na pa o keia kulanakauhale, e hiki ia oukou ke lohe a ke ike i na hoopai o ke Akua e kali ana ia oukou no ko oukou mau hala, a i ike no hoi oukou i na kanawai o ka mihi;

12. A i ike no hoi oukou no ka hiki ana mai o Iesu Kristo, ke Keiki a ke Akua, ka Makua o ka lani a me ka honua, ka Mea Hana i na mea a pau, mai kinohi mai; a i ike i na hoailona o kona hiki ana mai, me ka manao e hiki ia oukou ke manaoio aku ma kona inoa.

13. A ina e manaoio oukou ma kona inoa, alaila e mihi no oukou i ko oukou mau hewa a pau, i hiki ia oukou ma ia mea ke loaa ke kala ia ana o ia mau mea ma o kona pono la.

14. A, eia hou, he hoailona hou kaʻu e haawi aku nei ia oukou; he oiaio, he hoailona o kona make;

15. No ka mea hoi, he oiaio e make ia e pono ai, i hiki mai ai ke ola; he oiaio, e pono nona, a e lilo ana i mea e pono ai nona e make, e lawe mai ai i ke alahouana o ka poe make, i hiki ai na kanaka ma ia mea ke lawe ia ae imua o ke alo o ka Haku;

16. He oiaio, aia hoi, e lawe mai ua make nei i ke alahouana, a e hoolapanai mai i na kanaka a pau mai ka make mua mai; kela make uhane no na kanaka a pau, ma o ka haule ana la o Adamu, i hooki ia mai ai mai ke alo ae o ka Haku, a manao ia me he make la, ma na mea kino a ma na mea uhane.

17. Aka hoi, e hoolapanai mai ke alahouana o Kristo i na kanaka, he oiaio, i na kanaka a pau, a e hoihoi hou mai ia lakou imua o ke alo o ka Haku;

18. He oiaio, a e lawe mai ia i ke kanawai o ka mihi, o ka mea e mihi, aole oia i kua ia ilalo a hoolei ia aku iloko o ke ahi; aka o ka mea e mihi ole, e kua ia ilalo a hoolei ia iloko o ke ahi, a e hiki hou mai maluna iho o lakou he make uhane, he oiaio, he make alua, no ka mea, e hooki hou ia aku lakou ma na mea e pili ana i ka pono;

19. Nolaila, ea, e mihi oukou, e mihi oukou, o hookuu aku oukou ia oukou iho, ma ko oukou ike ana i keia mau mea a hana ole ana, e komo malalo iho o ka hoohewa ia ana, a e kaualupeia oukou ilalo i keia make alua.

20. Aka hoi, me au i olelo aku ai ia oukou no kekahi hoailona hou, he hoailona o kona make, aia hoi, ma ua la la e make ai oia, e hoopouli ia ka la, a e hoole e haawi mai i kona malamalama ia oukou; a me ka mahina no hoi, a me na hoku; a, aole he malamalama maluna o ka ili o ua aina nei, oia, mai ka manawa o kona make ana, no na la ekolu, a hiki i ka manawa ana i ala hou ai mai ka make mai;

21. He oiaio, ma ka manawa ana e hookuu aku ai i ka uhane, e hekili ana a e uila ana no na hora he nui wale, a e haalulu a naueue ka honua, a o na pohaku maluna iho o ka ili o keia honua, aia no maluna ae o ka honua a malalo iho hoi, a oukou e ike nei i keia manawa he paa, a i ole ia, ua paa loa ka hapa nui, e nahaha auanei;

22. He oiaio, e nahaha auanei ia mau mea iwaena konu, e loaa mau ai ma ia hope aku he mau nakaka a he mawae, a ma na apana hoonahaha ia ai maluna o ka ili o ka honua a pau; he oiaio, maluna ae o ka honua a malalo iho no hoi.

23. A, aia hoi, e hiki mai na makani ino nui, a e hoohaahaa ia na mauna he nui wale, e like me he awawa la, a me na wahi he nui wale no hoi, i kapa ia ano he mau awawa, e lilo i mau mauna i kiekie loa.

24. A e nahaha ae na alanui he nui wale, a e lilo na kulanakauhale he nui i neoneo.

25. A e hoohamama ia na ilina he nui wale, a e hookuu mai i na mea he nui o ko ia mau wahi poe make; a e ike ia na mea hoano he nui wale e kekahi poe he nui.

26. Aia hoi, pela i olelo mai ai ka anela iaʻu; no ka mea, i mai la oia iaʻu, e ike ia aku na hekili a me na uila no na hora he nui loa;

27. A i mai la hoi oia iaʻu, i ka wa o ka hekili a me ka uila, a me ka makani ino, e hiki mai ai keia mau mea, a e uhi no hoi ka pouli i ka ili o ka honua a pau, no na la ekolu.

28. A i mai la ka anela iaʻu, e ike no kekahi poe he nui i na mea oi aku mamua o keia mau mea, i mea e hiki ai ia lakou ke manaoio e hiki mai ana keia mau ouli a me keia mau mea kupanaha, maluna iho o ka ili a pau o keia aina; i ole ai he kumu no ka hoomaloka, mawaena o na keiki a kanaka;

29. A o keia mea i hiki ai na mea manaoio ke hoola ia, a i hiki hoi ke hooili ia aku ka hoopai pono, maluna iho o ka poe manaoio ole; a ina e hoohewa ia aku hoi lakou, e lawe mai lakou maluna o lakou iho i ko lakou hoohewa ia ana iho.

30. Ano, e hoomanao, e hoomanao e oʻu poe hoahanau, o ka mea e make ana, e make ana oia ia ia iho; o ka mea e hana ana i ka hewa, e hana ana oia ia mea ia ia iho; no ka mea hoi, ua kaawale oukou; ua ae ia mai oukou e hana no oukou iho; no ka mea hoi, ua haawi mai la ke Akua ia oukou i ka ike, a ua hookuu mai la oia ia oukou;

31. Ua haawi mai la oia ia oukou i hiki ia oukou ke ike i ka maikai mai ka ino ae, a ua haawi mai la oia ia oukou i hiki ia oukou ke koho i ke ola, a i ole ia i ka make, a ua hiki ia oukou ke hana i ka pono a e hoihoi hou ia aku i ka mea i pono, oia hoi, e hoihoi hou ia mai ka mea pono ia oukou; a i ole ia, ua hiki ia oukou ke hana i ka ino, a e hoihoi hou ia aku ka mea i ino ia oukou.