1. Ano, eia kekahi, ua nui loa ka poe i lohe i na olelo a Samuela, ka Lamana, ana i olelo aku ai maluna ae o na pa o ke kulanakauhale. A o ka poe a pau i manaoio ma kana olelo, hele aku la a imi ae la ia Nepai; a ia lakou i puka ae ai a loaa ia, hai mai la lakou ia ia i ko lakou mau hewa aole i hoole, me ka makemake e bapetizo ia lakou i ka Haku.

2. Aka o ka poe a pau i manaoio ole i na olelo a Samuela, ua huhu lakou ia ia; a nou ae la lakou i na pohaku ia ia maluna ae o ka pa, a pana ae la no hoi ia ia i na pua he nui, ia ia i ku ai maluna o ka pa; aka, me ia pu ka Uhane o ka Haku, i hiki ole ai ke pa oia i na pohaku a lakou, aole hoi i ku i ka lakou mau pua.

3. Ano, ia lakou i ike ai i keia, i hiki ole ai ke pa a ke ku oia, ua nui loa na mea e ae i manaoio i kana mau olelo, a hele mai la lakou io Nepai la e bapetizo ia ai.

4. No ka mea, e bapetizo ana, e wanana ana, a e haiolelo ana o Nepai, e hea ana i ka mihi i na kanaka; e hoike ana i na hoailona a me na mea kupanaha; e hana ana i na hana mana mawaena o na kanaka, i hiki ia lakou ke ike e hiki koke io mai ana o Kristo;

5. E hai ana ia lakou no na mea e hiki koke io mai ana, i hiki ia lakou ke ike a hoomanao ma ka manawa o ka hiki ana mai o ia mau mea, ua hoike ia mai ia lakou mamua o ka hiki ana mai, me ka manao i hiki ia lakou ke manaoio; nolaila, o ka poe a pau i manaoio i na olelo a Samuela, hele ae la lakou io na la e bapetizo ia ai, no ka mea, hele mai la lakou e mihi ana a e hai ana i ko lakou mau hewa.

6. Aka, o ka nui loa o na kanaka, aole lakou manaoio i na olelo a Samuela; nolaila, ia lakou i ike ai ua hiki ole ke pa oia i ka lakou mau pohaku, aole hoi ku i ka lakou mau pua, hea ae la lakou i ko lakou poe kapena, i ka i ana, E lalau aku i ua kanaka la a nakinaki ia ia, no ka mea hoi, he daimonio kona; a no ka mana o ke diabolo iloko ona, aole i hiki oia ke pa a ke ku ia makou me ka makou mau pohaku a me ka makou mau pua; nolaila, e lalau aku ia ia a e nakinaki ia ia, a e kai aku ia ia.

7. A ia lakou i hele mai ai e kau mai i ko lakou mau lima maluna iho ona, aia hoi, lehei iho la oia mai ka pa aku, a holo ae la mailoko aku o ko lakou mau aina, he oiaio, i kona aina iho, a hoomaka ae la e haiolelo a e wanana ae mawaena o kona poe kanaka ponoi iho.

8. A, aia hoi, aole oia i lohe hou ia ma ia hope iho mawaena o ko Nepai poe; a pela ka noho ana o na kanaka.

9. A pela i pau ai ka makahiki kanawalukumamaono o ke au o na lunakanawai maluna iho o ka poe kanaka o Nepai.

10. A pela hoi i pau ai ka makahiki kanawalukumamahiku o ke au o na lunakanawai, o ka nui loa o na kanaka e noho ana ma ko lakou haaheo a hewa, a o ka hapa uuku o lakou e hele pololei ana imua o ke Akua.

11. A o ka noho ana no keia hoi, ma ka makahiki kanawalukumamawalu o ke au o na lunakanawai.

12. A ua uuku ke ano e ana ma ka noho ana o na kanaka, eia wale no, hoomaka ae la na kanaka e hoopaakiki loa ia aku ma ka hewa, a e hana nui a nui aku i na mea e ku e ana i na kauoha a ke Akua, ma ka makahiki kanawalukumamaiwa o ke au o na lunakanawai.

13. Aka, eia kekahi, ma ke kanaiwa makahiki o ke au o na lunakanawai, ua haawi ia na hoailona nui i na kanaka, a me na mea kupanaha hoi; a hoomaka ae la na olelo a na kaula e hooko ia;

14. A ikea na anela e na kanaka, e na kanaka naauao, a hai mai la ia lakou i na mea olioli o ka hauoli nui; pela ma ua makahiki nei i hoomaka ai na palapala hemolele e hooko ia.

15. Aka, hoomaka ae la nae na kanaka e hoopaakiki iho i ko lakou mau naau, koe wale no ka poe o lakou e manaoio nui ana, o ko Nepai poe, a me ko Lamana poe no hoi, a hoomaka ae la e hilinai aku ma ko lakou ikaika iho, a ma ko lakou naauao iho, i ka i ana:

16. Ua koho pololei paha lakou i kekahi mau mea, mawaena o na mea he nui wale me neia; aka hoi, ua ike kakou aole e hiki i keia mau hana nui a kupaianaha i olelo ia, ke hooko ia.

17. A hoomaka ae la lakou e hoopaapaa a e paio mawaena o lakou iho, i ka i ana:

18. Aole he mea ku i ka pololei i hiki mai ai kekahi mea e like me Kristo; ina pela, a oia no ke Keiki a ke Akua, ka Makua o ka lani a me ka honua, me ia i olelo ia ai, no ke aha la oia e hoike ole mai ai ia ia iho ia kakou, me ia i ka poe e noho ana ma Ierusalema?

19. He oiaio, no ke aha la oia e hoike ole mai ai ia ia iho ma keia aina, me ia hoi ma ka aina o Ierusalema?

20. Aka hoi, ua ike kakou he mooolelo hewa ia, i haawi ia mai ai ia kakou e ko kakou poe kupuna, e hoohuli mai ia kakou e manaoio i kekahi mea nui a kupanaha e hiki mai ana, aole nae mawaena o kakou, aka ma kekahi aina mamao loa aku, he aina a kakou i ike ole ai; nolaila, ua hiki ia lakou ke waiho aku ia kakou ma ka naaupo, no ka mea, ua hiki ole ia kakou ke ike aku me ko kakou mau maka he oiaio ia mau mea.

21. A na lakou, ma na hana maalea a pohihihi o ka mea ino, e hana i kekahi mea pohihihi nui, i hiki ole ai ia kakou ke hoomaopopo, i mea e hookauwa mai ai ia kakou ilalo i ka lakou mau olelo, a i poe kauwa hoi na lakou, no ka mea, ke hilinai nei kakou ia lakou e ao mai ia kakou i ka olelo; a pela lakou e waiho mai ai ia kakou ma ka naaupo, ina e hookuu aku kakou ia kakou iho ia lakou i na la a pau o ko kakou mau ola.

22. A he nui na mea e ae a na kanaka i manao wale ai iloko o ko lakou mau naau, he mau mea lapuwale a naaupo; a ua nui ko lakou kupikipikio, no ka mea, e hookonokono ana o Satana ia lakou e hana mau i ka hewa; he oiaio, hele aku la oia i o a ia nei, e hoolaha ana i na lono a me na paio maluna iho o ka ili a pau o ka aina, i hiki ia ia ke hoopaakiki iho i na naau o na kanaka e ku i ka mea i pono, a e ku e aku i ka mea e hiki mai ana;

23. A me na ouli a me na mea kupanaha i hana ia ai iwaena o ka poe kanaka o ka Haku, a me na hana mana he nui a lakou i hana ai, ua loaa nae ia Satana ka mana nui maluna iho o na naau o na kanaka, ma ka ili o ka aina a pau.

24. A pela i pau ai ka makahiki kanaiwa o ke au o na lunakanawai maluna iho o ka poe kanaka o Nepai.

25. A pela i pau ai ka buke a Helamana, mamuli o ka mooolelo a Helamana a me kana mau keikikane.