1. A pela i hiki ai ia kakou ke ike i ka hoopunipuni a me ka naueue wale no hoi o na naau o na keiki a kanaka; he oiaio, ua hiki ia kakou ke ike na ka Haku ma kona lokomaikai nui loa, i hoalohaloha a hoopomaikai i ka poe a pau i paulele aku ia ia;

2. He oiaio, a ua hiki ia kakou ke ike ma ia manawa hookahi ana i hoopomaikai mai ai i kona poe kanaka; he oiaio, ma ka mahuahua o ko lakou mau kihapai, o ko lakou mau pua holoholona, a me ko lakou mau ohana holoholona, a ma ke gula, a ma ke kala, a ma na ano a pau o na mea maikai o ia hana aku ia hana aku, a o ke akamai hoi; e hookoe mai ana i ko lakou mau ola, a e hoopakele mai ana ia lakou mailoko ae o na lima o ko lakou poe enemi; e hoopalupalu ana i ka naau o na enemi o lakou, i ole ai lakou e kukala mai i na kaua e ku e ia lakou; he oiaio, a e hana ana i na mea a pau no ka maluhia a me ka pomaikai o kona poe kanaka; he oiaio, oia no ka manawa a lakou e hoopaakiki iho ai i ko lakou mau naau, a hoopoina i ka Haku i ko lakou Akua, a hahi ilalo iho o na wawae o lakou i ka Mea Hemolele; he oiaio, a o keia no ko lakou nanea, a me ko lakou pomaikai nui loa aku.

3. A pela kakou i ike ai, ina aole e paipai ka Haku i kona poe kanaka me na popilikia he nui wale, he oiaio, ina aole oia e hoopai mai ia lakou me ka make, a me ka weliweli, a me ka wi, a me na ano a pau o na ahulau, aole lakou e hoomanao ia ia.

4. E! Nani ka naaupo, a me ka lapuwale, a me ka ino, a me ke ano diabolo, a nani hoi ka wikiwiki e hana hewa, a lohi e hana pono, o na keiki a kanaka; he oiaio, wikiwiki e hoolohe ae i na olelo a ka mea ino, a e kau aku i ko lakou mau naau maluna iho o na mea lapuwale o ke ao nei;

5. He oiaio, nani ka wikiwiki e hookiekie ia iluna ma ka haaheo; he oiaio, nani ka wikiwiki e kaena, a e hana aku i na ano a pau o ka mea i hewa; a nani ka lohi o lakou e hoomanao i ka Haku, i ko lakou Akua, a e haliu i ka pepeiao i kana mau olelo ao; he oiaio, nani ka lohi e hele ma ko ka naauao mau alanui!

6. Aia hoi, aole o lakou makemake i ka Haku ko lakou Akua, nana lakou i hana mai, e hoomalu a e noho alii maluna iho o lakou, me kona lokomaikai nui a me kona aloha nae ia lakou; ke hoowahawaha aku nei lakou i kana mau olelo ao, a, aole o lakou makemake e lilo oia i mea alakai no lakou.

7. E! Nani ke ano ole o na keiki a kanaka; he oiaio, ua uuku iho lakou mamua o na huna lepo o ka honua.

8. No ka mea hoi, ke neenee la na huna lepo o ka honua i o a ia nei, i ka mahele ana a kaawale, ma ke kauoha a ko kakou Akua nui a mau loa;

9. He oiaio, aia hoi, ma o kona leo la e haalulu ai a naueue ai na puu a me na mauna;

10. A ma ka mana o kona leo ua hoohiolo ia ae, a lilo i laumania; he oiaio, e like me he awawa la;

11. He oiaio, ma ka mana o kona leo e naueue ai ka honua a pau;

12. He oiaio, ma ka mana o kona leo, e hooluliluli ia ai na kumu ona, a hiki iwaena konu;

13. He oiaio, a ina e olelo ae oia i ka honua, E nee aku, e nee aku no ia;

14. He oiaio, ina e olelo ae oia i ka honua, E hoi i hope oe, i hooloihi ia ai ka la no na hora he nui, e hana ia no;

15. A pela e like me kana olelo, e hoi ana ihope ka honua, a ua ikea e kanaka e ku malie ana ka la; he oiaio, aia hoi, pela ia no; no ka mea, he oiaio no o ka honua no ka i kaa ae, aole o ka la.

16. Aia hoi, ina e olelo ae oia i na wai o ka hohonu nui, E maloo oe, e hooko ia no.

17. Aia hoi, ina e olelo ae oia i keia mauna, E ala ae oe, a e hele ae a e haule maluna iho o kela kulanakauhale, i uhi ia ai ia, aia hoi, e hooko ia.

18. A, aia hoi, ina e huna ke kanaka i kekahi waiwai maloko o ka honua, a e olelo ae ka Haku, E hoopoino ia ia, no ka hewa o ka mea nana ia i huna, aia hoi, e hoopoino ia auanei no ia;

19. A ina e olelo ae ka Haku, E hoopoino ia oe, i loaa ole ai oe i kekahi kanaka mai keia manawa aku a mau loa aku, aia hoi, aole e loaa ana i kekahi kanaka ia mea ma ia hope aku a mau loa aku.

20. A, aia hoi, ina e olelo mai ka Haku i kekahi kanaka, No kou mau hala e hoopoino ia oe a mau loa aku, e hooko ia auanei ia.

21. A ina e olelo mai ka Haku, No kou mau hala, e hooki ia aku oe mai koʻu alo aku, e kauoha no oia e hana ia auanei no ia pela.

22. A auwe ka mea ia ia oia e olelo ae ai i keia, no ka mea, e olelo ia ia i ka mea nana e hana i ka hewa, aole oia e hiki ke hoola ia; nolaila, no keia mea, i hiki ai na kanaka ke hoola ia, ua hai ia mai ka mihi.

23. Nolaila, pomaikai lakou ka poe e mihi a hoolohe i ka leo o ka Haku o ko lakou Akua; no ka mea, o lakou nei no ka poe e hoola ia auanei.

24. A na ke Akua e ae mai, ma kona lokomaikai nui, i kai ia mai ai na kanaka i ka mihi a me na hana pono, i hiki ke hoihoi hou ia mai lakou i ka lokomaikai, no ka lokomaikai i ku i ka lakou mau hana.

25. A ua makemake au e hoola ia na kanaka a pau. Aka, ke heluhelu nei kakou, ma ka la nui hope, malaila no kekahi poe e hoolei ia aku ai mawaho; he oiaio, ka poe e hoolei ia aku ai mai ke alo aku o ka Haku;

26. He oiaio, ka poe e hookuu ia aku ai i ka noho poino pau ole ana, e hooko ana i na olelo e i ana, O ka poe i hana pono, e loaa ia lakou ke ola mau loa; a o ka poe i hana ino, e loaa ia lakou ka poino mau loa. A pela no ia. Amene.