1. Ano, eia kekahi, ma ka makahiki kanahakumamakolu o ke au o na lunakanawai, aohe paio mawaena o ka poe kanaka Nepai, he haaheo uuku wale no ma ka ekalesia, he kumu no ia no na ku e uuku mawaena o na kanaka, a ua hooponopono ia keia mau mea ma ka hopena o ka makahiki kanahakumamakolu.

2. Aohe no he paio mawaena o na kanaka ma ka makahiki kanahakumamaha; aohe no he nui ka paio ma makahiki kanahakumamalima.

3. A eia kekahi, ma ke kanahakumamaono, he oiaio, ua nui ka paio a me na ku e he nui; ma ua mau mea nei he nui loa ka poe i haalele mai i ka aina o Zarahemela, a hele aku la iloko o ka aina akau, e noho ai ma ka aina;

4. A hele loihi loa ae la lakou, a hiki aku la lakou i na moanawai nui, a me na muliwai he nui;

5. He oiaio, a hoolaha ae la lakou iloko o na wahi a pau o ka aina, iloko o kela wahi keia wahi i hooneanea ole ia, a i hoonele ole ia ka ululaau, no ka nui o na kamaaina i noho e mamua ma ka aina.

6. Ano, aohe wahi o ka aina i oneanea, koe o kahi laau ole wale no; aka, no ka nui o ka anai ia ana o na kanaka, ka poe i noho mua ma ka aina ua kapa ia o oneanea.

7. Ua uuku ka laau ma ka ili o ka aina, lilo iho la nae ka poe kanaka i hele aku, i poe akamai ma ka hana ana i ka lepo pipili; nolaila, kukulu iho la lakou i na hale lepo pipili, a iloko o ua mau hale la lakou i noho ai.

8. A eia kekahi, mahuahua ae la lakou a hoolaha aku la, a hele aku la mai ka aina hema i ka aina akau, a kawowo aku la a hoomaka ae la e uhi i ka ili o ka honua a pau, mai ke kai hema, i ke kai akau, mai ke kai komohana, i ke kai hikina.

9. A noho iho la na kanaka ma ka aina akau, iloko o na halelole, a iloko o na hale lepo pipili, a kuu aku la lakou i kela laau keia laau i ulu ai maluna iho o ka aina, e ulu loa ia, i loaa ai ia lakou mahope ka laau e kukulu iho i ko lakou mau hale, he oiaio, i ko lakou mau kulanakauhale, a i ko lakou mau luakini, a i ko lakou mau hale pule, a i ko lakou mau hale laa, a i kela ano i keia ano o ko lakou mau hale.

10. A eia kekahi, no ke kakaikahi loa o ka laau ma ka aina akau, hoouna aku la lakou he nui wale ma na moku;

11. A pela lakou i kokua ai i na kanaka ma ka aina akau, i kukulu iho ai lakou i na kulanakauhale he nui, mailoko mai o ka laau a me ka lepo pipili no hoi.

12. A eia kekahi, he lehulehu ka poe kanaka o Amona, no ko Lamana poe lakou ma ka hanau ana, i hele aku iloko o ua aina nei.

13. Ano, he nui na mooolelo i kakau ia no na hana ana a keia poe kanaka, e na mea he nui wale o ua poe kanaka nei, a ua maikai a nui loa hoi, e pili ana ia lakou;

14. Aka hoi, aole i hiki i ka hapa-haneri o na hana ana a ua poe kanaka nei, he oiaio, o ka mooolelo o ko Lamana poe, a o ko Nepai poe, a me ko lakou mau kaua, a me na paio, a me na ku e, a me ka lakou hai olelo ana, a me ka lakou mau wanana, a me ko lakou mau moku, a me ka lakou kapili ana i na moku, a me ka lakou kukulu ana i na luakini, a i na hale pule, a me ko lakou mau hale laa, a me ko lakou pono, a me ko lakou hewa, a me ko lakou pepehi kanaka ana, a me ko lakou powa ana, a me ko lakou hao ana, a me kela ano keia ano o na mea hoopailua a moe kolohe, ke hookomo ia iloko o ua buke nei;

15. Aka hoi, he nui na buke a he lehulehu na mooolelo o kela ano keia ano, a ua kakau ia ka nui o ia mau mea e ko Nepai poe;

16. A ua haawi ia mai ia mau mea mai kekahi hanauna aku i kekahi, e ko Nepai poe, a hiki i ka wa a lakou i haule iho ai iloko o ka lawehala ana, a i pepehi ia ai, powa ia ai, a alualu ia ai, a kipaku ia ai, a luku ia ai, a hoopuehu ia ai, maluna o ka ili o ka honua, a hui pu ia ai me ko Lamana poe a kapa hou ole ia ai ko Nepai poe, e lilo ana i poe ino, a i poe hihiu a i poe hae, he oiaio, e lilo ana i ko Lamana poe.

17. Ano, ke hoi hou nei au i koʻu mooolelo iho; nolaila, o kaʻu i olelo aku ai ua hala ia mahope iho o na paio nui, a me na haunaele, a me na kaua, a me na ku e mawaena o ka poe kanaka o Nepai.

18. Pau ae la ka makahiki kanahakumamaono o ke au o na lunakanawai.

19. A eia kekahi, ua nui nae na paio i keia manawa ma ka aina, he oiaio, ma ka makahiki kanahakumamahiku, a i ka makahiki kanahakumamawalu no hoi;

20. Aka hoi, ua noho iho la o Helamana ma ka noho hookolokolo me ka hoopono a me ka pololei; he oiaio, ua hoolohe ae la oia e malama i na olelo kupaa, a me na hoopono, a me na kauoha a ke Akua; a hana mau aku la oia i ka mea i pono imua o ke Akua; a hele ae la oia mahope o na aoao o kona makuakane, a hoopomaikai ia ae la oia ma ka aina.

21. A eia kekahi, he mau keikikane elua kana. A haawi ae la oia i ka makahiapo i ka inoa o Nepai, a i ka muli i ka inoa o Lehi. A hoomaka ae la laua e ulu ae ma ka Haku.

22. A eia kekahi, hoomaka ae la na kaua a me na paio e hooki, ma kekahi mau mea, mawaena o ka poe kanaka o ko Nepai, ma ka hopena o ka makahiki kanahakumamawalu o ke au o na lunakanawai maluna iho o ka poe kanaka o Nepai.

23. A eia kekahi, ma ka makahiki kanahakumamaiwa o ke au o na lunakanawai, ua hookupaa ia ka maluhia mau ma ka aina, koe wale no na hui pu malu ana o Gadianatona, ka powa, i hookupaa ai, ma na wahi noho nui ia ai o ka aina, a i ike ole ia ai ia manawa e ka poe e malama aupuni ana; nolaila, aole i hoopau loa ia ia mau mea mailoko aku o ka aina.

24. A eia kekahi, ma ua makahiki hookahi nei, ua nui ka pomaikai ma ka ekalesia, a ua hoohui mai na tausani ia lakou iho i ka ekalesia, a ua bapetizo ia i ka mihi;

25. A no ka mahuahua nui o ka ekalesia, a no ka nui o na me pomaikai i ninini ia mai ai maluna iho o na kanaka, ua nui loa aku ka pihoihoi o ka poe kahuna nui a me na kumu.

26. A eia kekahi, pomaikai iho la ka hana a ka Haku ma ka bapetizo a ma ka hui ana i na mea he nui wale i ka ekalesia o ke Akua, he oiaio, i na umi o na tausani.

27. Pela kakou i ike ai ua aloha mai ka Haku i ka poe a pau e kahea aku ana, ma ka oiaio o ko lakou mau naau, i kona inoa hemolele;

28. He oiaio, pela kakou i ike ai ua hamama ae la ka puka o ka lani i na mea a pau, i ka poe i manaoio ma ka inoa o Iesu Kristo, oia no ke Keiki a ke Akua;

29. He oiaio, ke ike nei kakou o ka mea nana e lalau aku i ka olelo a ke Akua, ka mea ola a mana, ka mea e mahele aku i ka maalea a pau, a me na pahele, a me na hoopunipuni o ke diabolo, a e alakai mai i ke kanaka o Kristo ma kekahi ala pololei a ololi i kela aoao o ke awawa o ka poino, i hoomakaukau ia ai e ale iho i ka poe hewa,

30. A e hoopae aku i ko lakou poe uhane, he oiaio, i ko lakou poe uhane make ole ma ka lima akau o ke Akua, ma ke aupuni o ka lani, e noho pu me Aberahama, a me Isaaka, a me Iakoba, a me ko kakou poe kupuna hemolele a pau, i puka hou ole aku ai mawaho.

31. A ma ua makahiki nei he hauoli mau ana ma ka aina o Zarahemela, a ma na wahi e kokoke ana a puni, ma ka aina a pau i noho ia ai e ko Nepai poe.

32. A eia kekahi, he maluhia a me ka olioli nui loa ana ma ke koena o ka makahiki kanahakumamaiwa; he oiaio, a he maluhia mau a me ka olioli nui loa ana ma ka makahiki kanalima o ke au o na lunakanawai.

33. A he maluhia no hoi, i ka makahiki kanalimakumamakahi o ke au o na lunakanawai, koe wale no ka haaheo i hoomaka e komo iloko o ka ekalesia; aole iloko o ka ekalesia o ke Akua, aka, iloko o na naau o na kanaka, ka poe i hookohukohu no ka ekalesia o ke Akua lakou;

34. A ua hookiekie ia lakou iluna ma ka haaheo, i ka hoomaau ae i na mea he nui o ko lakou poe hoahanau. Ano, he mea ino nui keia, a he kumu no ia e loaa ai i ka poe haahaa o kanaka na hoomaau mai a nui, a e auhele mawaena o ka popilikia nui;

35. Aka hoi, ua hooke ai a pule pinepine lakou, a mahuahua mau ka ikaika o ko lakou haahaa, me ka onipaa ma ka manaoio ia Kristo, i ka hoopiha ana i ko lakou mau uhane me ka olioli a me ka mea e oluolu ai, he oiaio, i ka hoomaemae ia ana a me ka hoolaa ia ana o ko lakou mau naau, a e hiki mai ana keia hoolaa ia ana no ko lakou haawi ana i na naau o lakou i ke Akua.

36. A eia kekahi, pau ae la ka makahiki kanalimakumamalua ma ka maluhia no hoi, koe wale no o ka haaheo nui loa i komo iloko o na naau o na kanaka; a no ko lakou waiwai nui loa ia, a me ko lakou pomaikai ma ka aina, a ulu ae la ia maluna iho o lakou, ia la aku ia la aku.

37. A eia kekahi, ma ka makahiki kanalimakumamakolu o ke au o na lunakanawai, make aku la o Helamana, a hoomaka ae la kana makahiapo-kane, o Nepai, e noho alii ma kona hakahaka. A eia kekahi, hoopiha ae la ia i ka noho hookolokolo me ka hoopono a me ka pololei; he oiaio, malama aku la oia i na kauoha a ke Akua, a hele ae la ma na aoao o kona makuakane.