1. A eia kekahi, hoomaka ae la ka mokuahana mawaena o na kanaka, a kaawale ae la lakou i o a i o, a hele ae la i ko lakou mau ala, e haalele ana ia Nepai oia wale no, ia ia e ku ana maweana konu o lakou.

2. A eia kekahi, hele aku la o Nepai i kona hale iho, e noonoo ana i na mea a ka Haku i hoike mai ai ia ia.

3. A eia kekahi, ia ia e noonoo ana pela, ua hoopoho nui ia ka manao no ka hewa o ka poe kanaka o ko Nepai, a me ka lakou mau hana malu o ka pouli, a me ko lakou mau pepehi kanaka ana, a mau powa ana, a i kela ano keia ano o na hala, a eia kekahi, ia ia e noonoo ana pela ma kona naau, aia hoi, pae mai la kekahi leo ia ia, i ka i ana:

4. Pomaikai oe, e Nepai, no kela mau mea au i hana ai; no ka mea, ua ike au ua hai aku oe me ka molowa ole i ka olelo aʻu i haawi aku ai ia oe, i keia lahuikanaka. A ua makau ole oe ia lakou, a ua imi ole oe i kou ola iho, aka ua imi mai i koʻu makemake, a e malama mai i kaʻu mau kauoha.

5. Ano, no ka hana ana i keia me ka molowa ole loa, aia hoi, e hoopomaikai aku au ia oe no ka wa pau ole; a e hoolilo aku au ia oe i ikaika ma ka olelo a ma ka hana, ma ka manaoio; he oiaio, e hana ia auanei na mea a pau ia oe e like me kau olelo, no ka mea, aole oe e noi mai i ka mea e ku e ana i koʻu makemake.

6. Aia hoi, ooe no o Nepai, a owau no ke Akua. Aia hoi, ke hai aku nei au ia oe, imua o koʻu poe anela, he mana auanei kou maluna iho o keia lahuikanaka, a e hahau iho auanei i ka honua me ka wi, a me ka mai ahulau, a me ka luku, e like me ka hewa o keia lahuikanaka.

7. Aia hoi, ke haawi aku nei au ia oe i ka mana, a o ka mea au e sila ai ma ka honua, e sila ia hoi oia ma ka lani: a o ka mea au e hookuu ai ma ka honua, e hookuu ia hoi oia ma ka lani; a pela kou mana mawaena o keia lahuikanaka.

8. A pela hoi, ina e olelo ae oe i keia luakini, E nahae ia mawaena, e hana ia auanei ia.

9. A ina e olelo ae oe i keia mauna, E hoohiolo ia oe a e lilo i laumania, e hana ia auanei ia.

10. Aia hoi, ina e olelo ae oe, Na ke Akua keia lahuikanaka e hahau mai, e hiki io mai auanei ia.

11. Ano hoi, ke kauoha aku nei au ia oe e hele aku a e hai aku i keia lahuikanaka, Penei wahi a ka Haku ke Akua, oia no ka Mea Mana loa, ina aole oukou e mihi, e hahau ia oukou, a hiki i ka luku loa ia ana.

12. Eia hoi kekahi, i ka wa a ka Haku i olelo mai ai i keia mau olelo ia Nepai, ku iho la oia, aole oia i hoi aku i kona hale iho, aka hoi, hoi ae la oia i na poe kanaka i hele liilii a puni ma ka ili o ka aina, a hoomaka ae la e hai aku ia lakou i ka olelo a ka Haku, i olelo e ia mai ai ia ia no ko lakou luku ia ana, ke ole lakou e mihi.

13. Ano hoi, me ua hana mana nui la pu a Nepai i hana ai i ka hai ana aku ia lakou no ka make o ka lunakanawai nui, hoopaakiki iho la nae lakou i ko lakou mau naau, a hoolohe ole mai i na olelo a ka Haku;

14. Nolaila, hai aku la o Nepai ia lakou i ka olelo a ka Haku, i ka i ana: Ina aole oukou e mihi, penei wahi a ka Haku, e hahau ia oukou a hiki i ka luku loa ia ana.

15. A eia kekahi, ia Nepai i hai aku ai ia lakou i ka olelo, aia hoi, hoopaakiki iho la nae lakou i ko lakou mau naau, a, aole i hoolohe mai i kana mau olelo; nolaila, hoino ku e mai la lakou ia ia, a imi iho la e kau mai i ko lakou mau lima maluna iho ona, i hiki ia lakou ke hoolei aku ia ia iloko o ka halepaahao.

16. Aka hoi, me ia pu ka mana o ke Akua, a ua hiki ole ia lakou ke hopu mai ia ia, e hoolei ia ia iloko o ka halepaahao, no ka mea, ua kaili ia oia e ka Uhane, a hali ia ae la maiwaena aku o lakou.

17. A eia kekahi, pela oia i hele aku ai ma ka Uhane, ia poe aku ia poe aku, e hai ana i ka olelo a ke Akua, a hiki i ka wa i hai ia aku ai ia e ia ia lakou a pau, a hoouna ia aku la ia mawaena o ka poe kanaka a pau.

18. A eia kekahi, aole lakou i hoolohe mai i kana mau olelo; a hoomaka ia na paio, a no ia mea mokuahana lakou ia lakou iho, a hoomaka ae la e luku kekahi i kekahi me ka pahikaua.

19. A pela i pau ai ka makahiki kanahikukumamakahi o ke au o na lunakanawai maluna iho o ka poe kanaka o Nepai.