1. A eia kekahi, i ka wa i pau ai ka makahiki kanaonokumamalua o ke au o na lunakanawai, ua hiki mai keia mau mea a pau, a ua lilo iho la ka hapa nui o ko Lamana poe, i poe kanaka pono, a, oi aku la ko lakou pono mamua o ko ko Nepai poe, no ko lakou naueue ole, a me ko lakou onipaa ma ka manaoio.

2. No ka mea hoi, ua nui wale ka poe o ko Nepai i lilo iho i poe paakiki, a i palaka, a i ino loa, a hoomalau mai lakou i ka olelo a ke Akua, a me ka haiolelo ana a me ka wanana ana a pau i hiki mai ai mawaena o lakou.

3. Aka hoi, ua loaa i ko ka ekalesia ka olioli nui, no ka huli ana o ko Lamana poe; he oiaio, no ka ekalesia o ke Akua, i hoonohonoho ia mawaena o lakou la. A launa ae la lakou kekahi me kekahi, a ua hauoli kekahi me kekahi, a ua nui ka olioli.

4. A eia kekahi, he nui na mea o ko Lamana poe i iho mai ilalo iloko o ka aina o Zarahemela, a hai ae la i ka poe kanaka o Nepai i ke ano o ko lakou huli ana, a kauleo ae la hoi ia lakou nei i ka manaoio a me ka mihi;

5. He oiaio, a he nui na mea i hai aku me ka mana a makaukau, i ka hoohaahaa ana i na mea he nui o lakou nei ilalo iloko o ka haahaa loa, e lilo ae i poe hahai haahaa i ke Akua a me ke Keikihipa.

6. A eia kekahi, he nui na mea o ko Lamana poe i hele aku i ka aina akau; a hele aku la no hoi o Nepai laua me Lehi iloko o ka aina akau, e haiolelo aku i na kanaka. A pela i pau ai ka makahiki kanaonokumamakolu.

7. A, aia hoi, he maluhia ma ka aina a puni, a hele ae la ko Nepai poe iloko o kela wahi keia wahi o ka aina a lakou i makemake ai, ina mawaena o ko Nepai poe a ina paha mawaena o ko Lamana poe.

8. A eia kekahi, hele ae la no hoi ko Lamana poe i kahi a lakou i makemake ai, ina mawaena o ko Lamana poe, a ina paha mawaena o ko Nepai poe; a pela lakou i launa pu ai me ke keakea ole ia kekahi me kekahi, e kuai mai a e kuai aku, a e loaa ka waiwai, e like me ko lakou makemake.

9. A eia kekahi, lilo iho la lakou i poe waiwai loa, o ko Lamana poe a me ko Nepai poe hoi; a ia lakou ke gula a nui loa, a me ke kala, a me kela ano keia ano o na mea maikai i eli ia ai, ma ka aina hema, a ma ka aina akau no hoi.

10. Ano, o ka aina hema ua kapa ia aku ia o Lehi, a o ka aina akau ua kapa ia aku ia o Muleka, oia mamuli o na keiki a Zedekia; no ka mea, kai mai la ka Haku ia Muleka iloko o ka aina akau, a ia Lehi hoi iloko o ka aina hema.

11. A, aia hoi, ma keia mau aina elua ua nui loa ke gula o kela ano keia ano a pau, a o ke kala, a o ka mea maikai i eli ia o kela ano keia ano; a he poe kanaka hana akamai no hoi, ka poe i hana i kela ano i keia ano o na mea i eli ia, a hoomaemae ae la ia mea; a pela lakou i lilo ai i poe waiwai.

12. Hooulu ae la lakou i na hua liilii a nui loa, ma ka akau a ma ka hema no hoi; a ulu nui loa ae la lakou ma ka akau a ma ka hema hoi. A hoolaha ae la lakou a mahuahua ikaika loa ma ka aina. A hoolaha ae la lakou i na pua a me na ohana holoholona he nui wale, he oiaio, i na mea kupalu ia he nui loa.

13. Aia hoi, hana aku la a wili lope na wahine o lakou, a hana iho la i kela ano keia ano o ka lole, o ka ie wili makalii ia, a me ka lole o kela ano keia ano, e kahiko ai i ko lakou olohelohe. A pela i hala aku ai ka makahiki kanaonokumamaha ma ka maluhia.

14. A ma ka makahiki kanaonokumamalima, ua loaa ia lakou no hoi ka olioli nui a me ka maluhia; he oiaio, ka hai olelo nui ana, a me na wanana he nui wale no na mea e hiki mai ana. A pela i hala aku ai ka makahiki kanaonokumamalima.

15. A eia kekahi, ma ka makahiki kanaonokumamaono o ke au o na lunakanawai, aia hoi, ua pepehi loa ia o Kezorama ma kekahi lima i ike ole ia, ia ia i noho ai maluna iho o ka noho hookolokolo. A eia kekahi, ma ia makahiki no, o kana keiki, ka mea i hoonoho ia ai e na kanaka ma kona hakahaka, ua pepehi loa ia no hoi. A pela i pau ai ka makahiki kanaonokumamaono.

16. A i ka makamua o ka makahiki kanaonokumamahiku, hoomaka ae la na kanaka e mahuahua hou ma ka hewa loa.

17. No ka mea hoi, ua hoopomaikai loihi mai ka Haku ia lakou me ka waiwai o ko ke ao nei, ua hookonokono ole ia lakou e huhu, e kaua, aole hoi e hookahe i ke koko; nolaila, hoomaka ae la lakou e kau aku i ko lakou mau naau maluna iho o ko lakou waiwai; he oiaio, hoomaka ae lakou e imi aku e loaa ka waiwai, i hiki ia lakou ke hookiekie ia iluna kekahi maluna ae o kekahi; nolaila, hoomaka ae la lakou e pepehi kanaka malu, a e powa, a e hao wale, i loaa ai ia lakou ka waiwai.

18. Ano hoi, o ua poe pepehi kanaka la a me ka powa he poe lakou i hoohui ia e Kisakumena a me Gadianatona. Ano, eia kekahi, he nui wale na mea mawaena o ko Nepai poe no ko Gadianatona. Aka hoi, ua oi aku ka nui o lakou mawaena o ka poe ino o ko Lamana poe. A ua kapa ia aku lakou o ko Gadianatona poe powa a pepehi kanaka;

19. A o lakou no ka poe i pepehi i ka lunakanawai nui o Kezorama, a me kana keiki, oiai ma ka noho hookolokolo; a, aia hoi, aole lakou i loaa.

20. Ano, eia kekahi, i ka wa a ko Lamana poe i ike ai aia he poe powa mawaena o lakou, ua kaumaha nui loa lakou; a hana lakou me ko lakou ikaika a pau, e hoopau loa aku ia lakou la mai ka ili aku o ka honua.

21. Aka hoi, hookonokono ae la o Satana i na naau o ka hapa nui o ko Nepai poe, a hui ae la lakou me ua poe powa la, a komo ae la lakou iloko o na berita o lakou la, a me na hoohiki o lakou la, e hoomalu e hoopakele lakou kekahi i kekahi, i kela wahi pilikia i keia wahi pilikia a lakou e hoonoho ia ai, i ole ai lakou e hoopilikia ia no na pepehi kanaka o lakou, a me na powa ana o lakou, a me na aihue ana o lakou.

22. A eia kekahi, ia lakou na hoailona o lakou, he oiaio, na hoailona malu o lakou, a me na olelo malu o lakou; a o keia mea i hiki ai ia lakou ke hoomaopopo he hoahanau ka mea i komo ai iloko o na berita, i ole ai kona hoahanau e hoopilikia ia no kela hewa keia hewa ana e hana ai, e kona hoahanau, aole hoi e ka poe i hui ia ae i kona poe, ka poe i hoohiki i keia berita;

23. A pela e hiki ai ia lakou ke pepehi kanaka, a powa, a aihue, a moekolohe, a hana i kela ano i keia ano o ka hewa, e ku e ana i na kanawai o ko lakou aina, a i na kanawai hoi o ko lakou Akua;

24. A o ka mea o lakou i hui ia ae me ko lakou poe, nana e hoike aku i ko ke ao nei no ka lakou mau hewa a me ko lakou mau mea hoopailua, e hookolokolo ia oia, aole mamuli o na kanawai o ko lakou aina, aka, mamuli o na kanawai o ko lakou hewa, i haawi ia ae ai e Gadianatona a me Kisakumena.

25. Ano hoi, o keia mau hoohiki a mau berita malu, oia na mea a Alama i kauoha mai ai i kana keiki, i hele ole aku ai i ko ke ao nei, o lilo auanei ia mau mea i kumu e kai iho ai i na kanaka ilalo i ka anai loa ia ana.

26. Ano hoi, aole i hiki aku ua mau hoohiki a mau berita malu la io Gadianatona la mai na mooolelo aku i haawi ia ai ia Helamana; aka hoi, ua hahao ia iloko o ka naau o Gadianatona, e kela mea hookahi nana i hoowalewale i ko kakou mau kupuna mua e ai i ka hua i papa ia;

27. He oiaio, o ua mea hookahi la nana i kuka pu ai me Kaina, ina e pepehi loa oia i kona kaikaina, ia Abela, aole loa ia mea e ikea e ko ke ao nei. A kuka pu iho la oia me Kaina a me ka poe hahai ia ia, mai ia manawa mai.

28. A o ua mea hookahi la no hoi nana i hahao iloko o na naau o na kanaka, e kukulu iho i halepakui i lawa ke kiekie no lakou e hiki aku ai i ka lani. A o ua mea hookahi la ia nana i alakai aku i ka poe kanaka, ka poe i hele mai mai ua halepakui la mai iloko o keia aina; ka mea i hoolaha ae i na hana o ka pouli a o ka hoopailua, maluna iho o ka ili a pau o ka aina, a kauo iho la oia i na kanaka ilalo i ka anai loa ia ana, a i kekahi gehena mau loa;

29. He oiaio, o ua mea hookahi la ia nana i hahao iho iloko o ka naau o Gadianatona, e hoomau i keia manawa i ka hana o ka pouli, a o ka pepehi kanaka malu; a ua hoopuka mai oia ia mea mai ka makamua o kanaka, a hiki wale mai i keia manawa.

30. A, aia hoi, oia no ke kumu o ka hewa a pau loa. A, aia hoi, ke hoomau la oia i kana mau hana o ka pouli a o ka pepehi kanaka malu, a ke haawi ae la i ko lakou mau mea kuka, a me ko lakou mau hoohiki, a me ko lakou mau berita, a me ko lakou mau kumumanao o ka hewa weliweli, mai kekahi hanauna aku i kekahi hanauna, e like me ka mea i hiki ai ke loaa ka mana maluna o na naau o na keiki a kanaka.

31. Ano hoi, ua loaa ia ia ka mana nui maluna iho o na naau o ko Nepai poe; he oiaio, a ua lilo iho la lakou i poe hewa loa; he oiaio, ua kapae ae la ka nui loa o lakou mawaho o ke ala o ka pono, a hahi iho la ilalo o na kapuai wawae o lakou i na kauoha a ke Akua, a huli ae la i ko lakou mau aoao iho, a kukulu iho la no lakou iho i na kii o ko lakou gula a me ko lakou kala.

32. A eia kekahi, hiki mai la keia mau hala a pau ia lakou, ma na makahiki aohe he nui, a ua hiki mai ka nui loa o ia mea ia lakou ma ka makahiki kanaonokumamahiku o ke au o na lunakanawai maluna iho o ka poe kanaka o Nepai.

33. A mahuahua ae la lakou ma na hala o lakou, ma ka makahiki kanaonokumamawalu no hoi, i ke kaumaha nui a me ka uwe ana o ka poe pono.

34. A pela kakou i ike ai ua hoomaka ko Nepai poe e emi iho iloko o ka hoomaloka, a e mahuahua ma na mea ino a me na mea hoopailua, oiai ko Lamana poe i hoomaka ai e mahuahua nui loa ma ka ike i ko lakou Akua; he oiaio, hoomaka ae la lakou e malama i kana mau kanawai a mau kauoha, a e hele ma ka oiaio a pololei imua ona.

35. A pela kakou i ike ai ua hoomaka ka Uhane o ka Haku e haalele ae i ko Nepai poe, no ka hewa a me ka paakiki o ko lakou mau naau.

36. A pela kakou i ike ai ua hoomaka ka Haku e ninini mai i kona Uhane maluna iho o ko Lamana poe, no ko lakou oluolu a makemake e manaoio i kana olelo.

37. A eia kekahi, imi ae la ko Lamana poe i ka poe powa o Gadianatona; a hai aku la lakou i ka olelo a ke Akua mawaena o ka poe hewa loa o lakou, a ua hoopau loa ia ua poe powa nei maiwaena aku o ko Lamana poe.

38. A eia kekahi, kukulu paa iho la ko Nepai poe ia lakou la a kokua ia lakou, e hoomaka ana ma ka poe hewa loa o lakou, a hiki i ka wa i uhi ai lakou i ka aina a pau o ko Nepai poe, a i hoowalewale ai i ka nui loa o ka poe pono, a iho ae la lakou e manaoio i ka lakou mau hana, a e loaa ko lakou waiwai pio, a e hui pu me lakou ma ko lakou mau pepehi kanaka malu a me ka hui pu ana.

39. A pela lakou i loaa ai ka hooponopono ana a pau o ke aupuni, a no ia mea, hahi iho la lakou malalo o na wawae o lakou, a papai ae, a haehae, a huli ae la i na kua o lakou i ka poe hune, a me ka poe akahai, a me ka poe haahaa e hahai ana i ke Akua.

40. A pela kakou i ike ai ma ka noho weliweli ana lakou, a e oo ana no ka luku mau loa.

41. A eia kekahi, pela i pau ai ka makahiki kanaonokumamawalu o ke au o na lunakanawai maluna iho o ka poe kanaka o Nepai.