1. Aia hoi kekahi, ma ka makahiki kanaonokumamaiwa o ke au o na lunakanawai maluna iho o ka poe kanaka o Nepai, hoi mai la o Nepai, ke keiki a Helamana, i ka aina o Zarahemela, mai ka aina akau mai;

2. No ka mea, ua kaahele ae la oia mawaena o na kanaka e noho ana ma ka aina akau, a hai aku la i ka olelo a ke Akua ia lakou, a wanana aku la i na mea he nui ia lakou;

3. A hoomalau mai la lakou i kana mau olelo a pau, a hiki ole ia ia ke noho mawaena o lakou, aka, hoi hou mai la oia i kona aina i hanau ai.

4. A ua ike oia i na kanaka ma ka noho hewa weliweli ana, a i kela poe powa Gadianatona e noho ana ma ka noho hookolokolo; ua lalau wale i ka mana a me ka noho luna ana ma ka aina; e waiho ana i na kauoha a ke Akua, a, aole pololei iki imua ona; e hoopono ole ana i na keiki a kanaka;

5. E hoohewa ana i ka poe pono no ko lakou pono; e hookuu ana i ka poe hewa a me ka poe hihia me ka hoopai ole, no ko lakou kala; a menei hou, e hoomau ana ma ka oihana ma ke poo o ke aupuni, e noho alii ai a e hana ai e like me ko lakou mau makemake, e hiki ia lakou ke loaa ka waiwai a me ka hanohano o ko ke ao nei; a eia hoi, e hiki ia lakou me ka oluolu loa ke moekolohe, a aihue, a pepehi a make loa, a hana e like me ko lakou makemake iho.

6. Ano, ua hiki mai keia ino nui maluna iho o ko Nepai poe, iloko o na makahiki he kakaikahi wale no; a ia Nepai i ike ai ia mea, ua hu ae la kona naau me ke kaumaha iloko ona; a pane aku la oia iloko o ka ehaeha o kona uhane,

7. Ina ua hiki iaʻu ke loaa koʻu mau la, ma na la o koʻu kupunakane o Nepai i hele mua mai ai mailoko mai o ka aina o Ierusalema, ina ua hiki iaʻu ke olioli pu me ia ma ka aina i olelo mua ia ai; ia wa ua oluolu kona poe kanaka e noi ia aku, a onipaa e malama i na kauoha a ke Akua, a lohi e alakai ia aku e hana hewa; a ua wikiwiki e hoolohe mai i na olelo a ka Haku;

8. He oiaio, ina o koʻu mau la kekahi ma ia mau la, alaila, ua olioli koʻu uhane ma ka pono o koʻu poe hoahanau.

9. Aka hoi, ua hookuu ia mai au o keia mau la no koʻu, a e hoopiha ia mai koʻu naau me ke kaumaha, no ka hewa nei o koʻu poe hoahanau.

10. Aia hoi, maluna ae o kekahi hale kiai ia, ma ka aina o Nepai, ma ke alaloa e hiki ai i kahi kuai nui, ma ke kulanakauhale o Zarahemela; nolaila, ua hookulou iho la o Nepai ia ia iho maluna ae o ka hale kiai ma kona kihapai, a ua kokoke no hoi ua hale kiai nei i ka puka kihapai e hiki aku ai mai ke alaloa aku.

11. A eia kekahi, e maalo ana kekahi mau kanaka, a ike ae la lakou ia Nepai, ia ia e ninini ana i kona uhane i ke Akua maluna ae o ka hale kiai, a holo aku la lakou a hai ae la i na kanaka i ka mea a lakou i ike ai, a houluulu paapu mai la na kanaka, e hiki ia lakou ke ike i ke kumu o ka uwe nui ana me neia no ka hewa o na kanaka.

12. Ano, ia Nepai i ala ai, ike aku la oia i ka lehulehu o na kanaka i houluulu ia mai.

13. A eia kekahi, oaka ae la oia i kona waha, a i aku la ia lakou, Aia hoi, no ke aha la oukou i houluulu mai ai ia oukou iho? I hai aku anei au ia oukou no ko oukou mau hewa?

14. He oiaio, no koʻu pii ana maluna ae o koʻu hale kiai, i hiki iaʻu ke ninini aku i koʻu uhane i kuu Akua, no ke kaumaha nui loa o koʻu naau, a no ko oukou mau hewa ia?

15. A no koʻu uwe ana a kanikau ana, ua houluulu mai oukou ia oukou iho, a ke kahaha nei; he oiaio, a he kumu nui ko oukou e kahaha ai; he oiaio, a he mea e pono ai no oukou e kahaha, no ko oukou haawi ia ana aku, i loaa ai i ke diabolo ka mana nui maluna iho o ko oukou mau naau;

16. He oiaio, pehea la i hiki ai ia oukou ke ae aku i ka hoowalewale ana o ka mea nana e imi nei e hoolei aku i ko oukou poe uhane ilalo, i ka popilikia mau loa a me ka poino pau ole;

17. E, e mihi oukou, e mihi oukou! No ke aha la oukou e make ai? E huli mai oukou, e huli mai oukou i ka Haku ko oukou Akua. No ke aha la oia i haalele ai ia oukou?

18. No ko oukou hoopaakiki ana i ko oukou mau naau ia; he oiaio, aole oukou i hoolohe mai i ka leo o ke kahuhipa maikai; he oiaio, ua hoonaukiuki oukou ia ia e huhu ku e ia oukou.

19. A, aia hoi, ma kahi o ka houluulu ana ia oukou, ke ole oukou e mihi, aia hoi, e hoopuehu aku auanei oia ia oukou, i lilo ai auanei oukou i ai na na ilio a me na holoholona hihiu.

20. E! Pehea la oukou i hiki ai ke hoopoina iho i ko oukou Akua i kela la hookahi ana i hoopakele mai ai ia oukou?

21. Aka hoi, no ka loaa ka waiwai ia mea, e mahalo ia ai e na kanaka, he oiaio, a i hiki ia oukou ke loaa ke gula a me ke kala. A ua kau aku oukou i ko oukou mau naau maluna iho o ka waiwai a me na mea lapuwale o ko ke ao nei, a no keia mau mea ke pepehi kanaka nei oukou, a powa, a aihue, a hoike wahahee i hewa ai ko oukou hoalauna, a hana aku i kela ano keia ano o ka hewa;

22. A no keia mea e iho mai auanei ka poino maluna iho o oukou, ke ole oukou e mihi. No ka mea, ina aole oukou e mihi, aia hoi, o kela kulanakauhale, a me keia mau kulanakauhale nui a pau no hoi, a puni, ma ka aina o ko kakou hooilina, e lawe ia aku, i ole ai auanei he kuleana ko oukou iloko o ia mau wahi, no ka mea, aole ka Haku e haawi ae ia oukou i ka ikaika, me ia i hana ai mamua aku nei, e ku paa imua o ko oukou poe enemi.

23. No ka mea, penei wahi a ka Haku, Aole au e hoike aku i ka poe hewa i koʻu ikaika, i kekahi mamua o kekahi, koe wale no ka poe e mihi i ko lakou mau hewa, a e hoolohe mai i kaʻu mau olelo; ano hoi, ke makemake nei au e ike oukou, e oʻu poe hoahanau, e aho no auanei ko Lamana poe mamua o oukou, ke ole oukou e mihi;

24. No ka mea hoi, ua nui loa aku ko lakou pono mamua o ko oukou; no ka mea, aole lakou i lawehala me ke ku e aku i kela ike nui i loaa ai ia oukou; nolaila, e aloha auanei ka Haku ia lakou; he oiaio, e hooloihi ae oia i ko lakou mau la a e hoomahuahua ae i ka lakou poe hua, oia, oiai oukou e hoopau loa ia ai, ke ole oukou e mihi;

25. He oiaio, auwe oukou no kela mea hoopailua i hiki mai ai mawaena o oukou; a ua hoopili aku oukou ia oukou iho ia mea, he oiaio, i kela poe malu i hoonohonoho ia e Gadianatona;

26. He oiaio, e hiki mai auanei ka poino ia oukou, no ia haaheo a oukou i ae aku ai e komo ae iloko o ko oukou mau naau, o ka mea ia i hookiekie ae ai ia oukou maluna ae o ka mea ku pono no ko oukou waiwai nui loa;

27. He oiaio, auwe oukou no ko oukou hewa a mau mea hoopailua.

28. A ke ole oukou e mihi, e make auanei oukou; he oiaio, e lawe ia aku ko oukou mau aina, mai o oukou aku, a e anai loa ia ae oukou mai ka ili aku o ka honua.

29. Aia hoi, aole au i olelo aku e hiki mai auanei keia mau mea, ma oʻu iho, no ka mea, aole ma oʻu iho aʻu i ike ai i keia mau mea; aka hoi, ua ike au he oiaio keia mau mea, no ka mea, ua hoike mai ka Haku ke Akua ia mau mea iaʻu; nolaila, ke hoike aku nei au e hiki mau auanei ia mau mea.