1. A eia kekahi, ma ka makahiki kanahakumamalua o ke au o na lunakanawai, mahope iho o ko Moroniha hookupaa hou ana i ka maluhia mawaena o ko Nepai poe a me ko Lamana poe, aia hoi, aohe mea e noho ma ka noho hookolokolo; nolaila, hoomaka hou ae la he paio mawaena o na kanaka no ka mea nana e noho ma ka noho hookolokolo.

2. A eia kekahi, ua wae ia ae o Helamana, oia no ke keiki a Halamana, e noho i ka noho hookolokolo, mamuli o ka leo o na kanaka;

3. Aka hoi, hoohalua ae la o Kisakumena, nana i pepehi ia Pahorana, e pepehi mai ia Helamana no hoi; a ua kokua ia oia e kona poe, ka poe i komo iloko o ka berita i ike ole ai kekahi mea i kona ino;

4. No ka mea, aia kekahi Gadianatona he mea i akamai loa ma na olelo he nui, a ma kona maalea, e hana i ka hana malu o ka pepehi kanaka a me ka powa; nolaila, lilo iho la oia i pookela no ka poe o Kisakumena;

5. Nolaila, hoomalimali ae la oia ia lakou, a me Kisakumena no hoi, ina e hoonoho iho lakou ia ia ma ka noho hookolokolo, e ae aku oia i na mea i hui ia me kona poe e hoonoho ia i poe mana a i poe luna mawaena o ka poe kanaka; nolaila, imi mai la o Kisakumena e pepephi mai ia Helamana.

6. A eia kekahi, ia ia i hele ae ai i ka noho hookolokolo, e pepehi mai ia Helamana a make, aia hoi, o kekahi o na kauwa a Helamana, mawaho oia ma ka po, a ua loaa ia ia ma o ka hoopahaohao ana la ka ike no kela mau manao kuka i hooholo ia ae e keia poe e pepehi ia Helamana.

7. A eia kekahi, halawai ae la oia me Kisakumena, a haawi aku la oia i hoailona ia ia; no ia mea, ua hoike ae la o Kisakumena ia ia i ka mea ana i makemake ai, e makemake ana ia ia nei e alakai ae ia ia i ka noho hookolokolo, e hiki ia ia ke pepehi loa ia Helamana;

8. A i ka wa e ke kauwa a Halamana i ike ai i ka naau a pau o Kisakumena, a me ke ano o kona manao e pepehi kanaka, a i ka manao paa no hoi ia o na mea a pau i hui ia i kona poe e pepehi kanaka, a e powa, a e loaa ka mana, (a o keia no ko lakou manao kuka malu, a me ko lakou hui pu ana,) olelo ae la ke kauwa a Helamana ia Kisakumena, Ea, e hele kaua i ka noho hookolokolo.

9. Ano, hoolealea nui loa keia ia Kisakumena, no ka mea, ua manao oia e hooko aku auanei oia i kona mea i manao ai; aka hoi, ia laua e hele ana i ka noho hookolokolo, hou ae la ke kauwa a Helamana ia Kisakumena i ka puu wai, a haule iho la oia a make aku la me ka uhu ole. A holo ae la oia a hai mai ia Helamana i na mea a pau ana i ike aku ai, a i lohe ai, a i hana ai.

10. A eia kekahi, hoouna ae la o Helamana e hopu aku i ua poe powa a pepehi kanaka malu nei, e pepehi ia aku ai lakou mamuli o ke kanawai.

11. Aka hoi, ia Gadianatona i ike ai aole o Kisakumena i hoi aku, hopohopo iho la oia o pepehi ia aku oia, nolaila, kena ae la oia i kona poe e hahai ae ia ia. A mahuka aku la lakou mawaho o ka aina ma kekahi ala huna, iloko o ka waonahele; a ia Helamana i hoouna aku ai e hopu aku ia lakou la, aole e hiki ke loaa lakou la ma ka huli ana.

12. A e olelo hou ia aku auanei no ua Gadianatona nei. A pela i pau ai ka makahiki kanahakumamalua o ke au o na lunakanawai maluna iho o ka poe kanaka o Nepai.

13. Aia hoi, ma ka hopena o keia buke, e ike auanei oukou ua lilo ua Gadianatona nei i mea e hoohiolo ai, he oiaio, a aneane i ka anai loa ia ana o ka poe kanaka Nepai.

14. Aia hoi, aole au i olelo no ka hopena o ka buke a Helamana, aka, no ka hopena o ka buke a Nepai kaʻu e olelo nei, ua lawe mai au i ka mooolelo a pau mailaila mai, oia kaʻu i kakau ai.