1. A eia kekahi, ma ua makahiki la, aia hoi, haawi ae la o Nepai i ka noho hookolokolo, i kekahi kanaka o Kezorama kona inoa.

2. No ka mea, me ko lakou mau kanawai a me ko lakou poe hoomalu i hoonoho ia ai ma ka leo o no kanaka, a ua oi aku ka nui o ka poe e koho ino ana mamua o ka poe e koho maikai ana, nolaila, e oo ana lakou no ka luku, no ka mea, o na kanawai ua lilo iho la i ino;

3. He oiaio, aole o keia wale no; he poe kanaka ai oolea lakou, a aole e hiki ia lakou ke hoomalu ia e ke kanawai aole hoi e ka hoopono, ke ole ia i ko lakou luku ia ana.

4. A eia kekahi, ua luhi iho la o Nepai no ko lakou hala; a haawi ae la oia i ka noho hookolokolo, a lawe ae la maluna iho ona e hai aku i ka olelo a ke Akua i ke koena a pau o kona mau la, a o kona kaikaina o Lehi no hoi, i ke koena a pau o kona mau la;

5. No ka mea, hoomanao iho la laua i na olelo a ko laua makuakane i olelo mai ai ia laua.

6. A eia na olelo ana i olelo mai ai: Aia hoi, e kaʻu mau keiki, ke makemake nei au e hoomanao olua e malama i na kauoha a ke Akua; a ke makemake nei au e hai aku olua i na kanaka i ua mau olelo nei, aia hoi, ua haawi aku au ia olua i na inoa o na kupuna mua o kakou, na mea i hele mai ai mailoko mai o ka aina o Ierusalema; a o keia kaʻu i hana ai, e hiki ia olua i ka wa a olua e hoomanao ai i ko olua mau inoa, ke hoomanao ia laua; a ia olua e hoomanao ai ia laua, e hiki ia olua ke hoomanao i ka laua mau hana; a ia olua e hoomanao ai i ka laua mau hana, e hiki ia olua ke ike ua olelo ia, a palapala ia no hoi, ua maikai ia mau mea;

7. Nolaila, e kaʻu mau keiki, ke makemake nei au ia olua e hana aku i ka mea maikai, i olelo ia ai auanei no olua, a palapala ia ai no hoi, me ia i olelo ia ai a palapala ia ai no laua.

8. Ano, e kaʻu mau keiki, aia hoi, he mea hou kaʻu e makemake nei ia olua, o ua makemake nei eia no ia: i hana ole ai olua i keia mau mea, i mau mea e kaena aku ai olua, aka i hana ai olua i keia mau mea e hoahu ae no olua iho i ka waiwai ma ka lani, he oiaio, i mau loa, a i mae ole ai; he oiaio, i loaa ai ia olua kela haawina maikai loa o ke ola mau loa, ka mea a kakou i manao ai me ke kumu pono ua haawi ia mai i ko kakou poe kupuna.

9. E hoomanao, e hoomanao, e kaʻu mau keiki, i na olelo a ke alii Beniamina i olelo mai ai i kona poe kanaka; he oiaio, e hoomanao aole kekahi ala e ae, aole hoi kekahi mea o ke kanaka e hiki ai ke hoola ia, ma o ke koko kala hala ana la wale no o Iesu Kristo, ka mea nana e hele mai ana; he oiaio, e hoomanao e hele mai ana oia e hoolapanai mai i ko ke ao nei.

10. A e hoomanao hoi i na olelo a Amuleka i olelo ae ai ia Zezeroma, ma ke kulanakauhale o Amoniha; no ka mea, i ae la oia ia ia, E hele io mai auanei ka Haku e hoolapanai mai i kona poe kanaka; aka, aole oia e hele mai e hoolapanai mai ia lakou iloko o ko lakou mau hala, aka i hoolapanai mai ia lakou mai ko lakou mau hala ae.

11. A he mana no kona i haawi ia mai mai ka Makua mai, e hoolapanai mai ia lakou mai ko lakou mau hala ae, no ka mihi; nolaila, ua hoouna mai la oia i kona mau anela e hai mai i na olelo no na kanawai o ka mihi, na mea e lawe ana i ka mana o ka Mea Hoolapanai, i ka hoola ana i na uhane o lakou.

12. Ano, e kaʻu mau keiki, e hoomanao, e hoomanao, maluna iho o ka pohaku o ko kakou Mea Hoolapanai, oia no o Kristo, ke Keiki a ke Akua, olua e kukulu iho ai i ko olua kahua e pono ai, i mana ole ai ke diabolo i ka wa ana e hoouna mai ai i kona mau makani ikaika; he oiaio, i kona mau pua ma ka puahiohio; he oiaio, i ka wa a kona hua hekili a pau a me kona makani ino e nou mai ai maluna iho o olua, i mana ole ai ia maluna iho o olua, e kauo iho ia olua ilalo i ke awawa o ka pilikia nui a me ka poino pau ole, no ka pohaku maluna iho ona oukou i kukulu ia ai, oia no he kahua oiaio, he kahua ina e kukulu iho na kanaka malua iho ona, aole e hiki ia lakou ke hina.

13. A oia na olelo a Helamana i ao mai ai i kana mau keiki; he oiaio, ao mai la oia ia laua i na mea he nui i palapala ole ia, a me na mea he nui no hoi i palapala ia.

14. A hoomanao iho la laua i kana mau olelo; a nolaila, hele ae la laua, me ka malama ana i na kauoha a ke Akua, e ao aku i ka olelo a ke Akua mawaena o ka poe kanaka a pau o Nepai, me ka hoomaka ana ma ke kulanakauhale o Momona;

15. A mailaila aku i ke kulanakauhale o Gida; a mai ke kulanakauhale o Gida aku i ke kulanakauhale o Muleka;

16. A mai kekahi kulanakauhale aku i kekahi, a pau loa ko laua kaahele ana iwaena o ka poe kanaka o Nepai, ka poe e noho ana ma ka aina hema; a mailaila aku iloko o ka aina o Zarahemela, mawaena o ko Lamana poe.

17. A eia kekahi, hai aku la laua me ka mana nui, a hoohoka aku la laua i na mea he nui o ua poe ku e la, ka poe i hele aku mai ko Nepai poe aku, a hele mai la lakou a hai mai la i ko lakou mau hewa, a ua bapetizo ia i ka mihi, a hoi koke mai la i ko Nepai poe, e hoao iho e hooponopono mai i na lawehala a lakou i hana ai ia lakou.

18. A eia kekahi, hai olelo aku la o Nepai laua me Lehi i ko Lamana poe me ka mana a me ka makaukau nui, no ka mea, he mana a he makaukau ko laua i haawi ia mai ai ia laua e hiki ia laua ke olelo; a ua haawi ia mai hoi ia laua i ka mea e pono ai no laua ke olelo aku;

19. Nolaila, olelo aku la laua me ke kahaha nui mai o ko Lamana poe, i ka hoomaopopo ia ana o lakou, a ua bapetizo ia i ka mihi ewalu tausani o ko Lamana poe, ka poe e noho ana ma ka aina o Zarahemela a e kokoke ana a puni, a ua hoomaopopo ia no ka hewa o na mooolelo a ko lakou poe kupuna.

20. A eia kekahi, naue aku la o Nepai laua me Lehi mailaila aku e hele i ka aina o Nepai.

21. A eia kekahi, ua hopu ia mai laua e kekahi poe koa o ko Lamana, a hahao ia laua iloko o ka halepaahao; he oiaio, iloko o ua halepaahao hookahi la a Amona a me kona poe hoahanau i hahao ia ai e na kauwa a Limai.

22. A mahope iho o ko laua hahao ia ana iloko o ka halepaahao i na la he nui me ka ai ole, aia hoi, hele mai la lakou iloko o ka halepaahao e hopu mai ia laua, e hiki ia lakou ke pepehi mai ia laua a make.

23. A eia kekahi, ua hoopuni ia ae la o Nepai laua me Lehi me he mea la e ke ahi, a, aole lakou i aa e kau mai i ko lakou mau lima maluna iho o laua, no ka makau, o wela auanei lakou. Aka hoi, aole i wela o Nepai laua me Lehi; a me he mea la e ku ana laua mawaena konu o ke ahi, a ua wela ole.

24. A ia laua i ike ai ua hoopuni ia laua a puni me kekahi kia ahi a ua wela ole mai laua ia mea, hooikaika ia iho la ko laua mau naau.

25. No ka mea, ua ike laua ua aa ole ko Lamana poe e kau mai i ko lakou mau lima maluna iho o laua; aole hoi lakou i aa e hookokoke mai ia laua, aka ku iho la me he mea la he poe leo ole no ke kahaha.

26. A eia kekahi, ku iho la o Nepai laua me Lehi, a hoomaka ae la e olelo aku ia lakou, i ka i ana, Mai makau, no ka mea, aia hoi, o ke Akua no ia nana oukou i hoike i keia mea kupanaha, ma ia mea, ua hoike aku ia oukou, ua hiki ole ia oukou ke kau mai i ko oukou mau lima maluna iho o maua e pepehi loa mai ia maua.

27. Aia hoi, ia laua i olelo aku ai i ua mau olelo nei, haalulu nui loa iho la ka honua, a haalulu ae la na paia o ka halepaahao, me he mea la e aneane ana ia mau mea e hiolo iho i ka honua; aka hoi, aole nae ia mau mea i hiolo iho. A, aia hoi, o ka poe iloko o ka halepaahao, no ko Lamana lakou, a me na mea ku e i haalele mai i ko Nepai poe.

28. A eia kekahi, ua uhi ia lakou me kahi ao panopano, a hiki ae la ka makau weliweli, a eehia maluna iho o lakou.

29. A eia kekahi, pae mai la kekahi leo me he mea la maluna ae ia o ke ao panopano, i ka i ana, E mihi oukou, e mihi oukou, a mai imi hou e pepehi i kaʻu mau kauwa, aʻu i hoouna aku ai ia oukou e hai aku i na olelo maikai.

30. A eia kekahi, ia lakou i lohe ai i keia leo, a ike aku la aole ia he leo o ka hekili; aole hoi ia he leo o ka wawa nui; aka hoi, he leo malie ia, o ka oluolu loa, me he mea la he hawanawana ia, a hou iho la ia iloko loa o ka naau.

31. A me ka oluolu nae o ka leo, aia hoi, ua haalulu nui loa ka honua, a naueue hou ae la na paia o ka halepaahao, me he mea la e hiolo iho ana i ka honua, a, aia hoi, o ke ao panopano ka mea i uhi iho ia lakou, aole ia i puehu aku.

32. Aia hoi, pae hou mai la ka leo, i ka i ana, E mihi oukou, e mihi oukou, no ka mea, ua kokoke mai ke aupuni o ka lani; a mai imi hou e pepehi i kaʻu mau kauwa. A eia kekahi, haalulu hou iho la ka honua, a naueue ae la na paia;

33. A pae hou mai la no hoi ka leo i ke kolu o ka manawa, a olelo mai la i na olelo kupaianaha i hiki ole ke ekemu ia ae e kanaka; a naueue hou ae la na paia, a haalulu iho la ka honua me he mea la e kaawale ana.

34. A eia kekahi, ua hiki ole i ko Lamana poe ke holo aku, no ke ao panopano i uhi ai ia lakou; he oiaio, a ua oni ole no hoi lakou, no ka makau i hiki ae ai maluna iho o lakou.

35. Ano, aia kekahi mawaena o lakou he Nepai ma ka hanau ana, no ka ekalesia o ke Akua oia mamua, aka ua ku e a haalele aku.

36. A eia kekahi, huli ae la oia, a aia hoi, ike mai la oia mawaena o ke ao panopano i na maka o Nepai laua me Lehi; a, aia hoi, alohi nui loa laua, e like me na maka o na anela. A ike mai la oia e leha ana laua i ko laua mau maka i ka lani; a e ku ana laua me he mea la e kamailio aku ana, a e hookiekie ana i ko laua mau leo i kekahi mea a laua i ike aku ai.

37. A eia kekahi hea ae la ua kanaka nei i ka lehulehu, i huli ai lakou a nana. A, aia hoi, ua haawi ia ae he mana ia lakou, i huli ae lakou a nana mai; a ike mai la lakou i na maka o Nepai laua me Lehi.

38. A i ae la lakou i ua kanaka la, Aia hoi, heaha la ke ano o keia mau mea a pau? A owai la ka mea a keia mau kanaka e kamailio pu nei?

39. Ano, o ko ke kanaka inoa o Aminidaba ia. A i aku la o Aminadaba ia lakou, ke kamailio nei laua me na anela o ke Akua.

40. A eia kekahi, i ae la ko Lamana poe ia ia, Heaha ka makou e hana ai, e hoonee ia aku ua ao panopano nei i uhi ole mai ia mea ia makou?

41. A i aku la o Aminadaba ia lakou, E mihi oukou e pono ai, a e hea aku i ka leo, a e loaa ia oukou ka manaoio ia Kristo, ka mea i ao ia aku ia oukou e Alama, a me Amuleka, a me Zezeroma; alaila, e hoonee ia aku ia i uhi ole mai ia oukou.

42. A eia kekahi, hoomaka ae la lakou a pau e hea aku i ka leo o ka mea nana i hoohaalulu mai i ka honua; he oiaio, hea aku la lakou a hiki i ka wa i hoopuehu ia ai ke ao panopano.

43. A eia kekahi, ia lakou i alawa ae ai i na maka o lakou a puni, a ike ae la ua hoopuehu ia aku ke ao panopano mailuna aku o lakou, a, aia hoi, ike ae la lakou ua hoopuni ia ae a puni, he oiaio, o kela mea keia mea, me kekahi kia ahi.

44. A o Nepai a me Lehi mawaena konu laua o lakou; he oiaio, ua hoopuni ia ae lakou a puni; he oiaio, me he mea la lakou mawaena konu o kekahi ahi e lapalapa ana, aole nae ia i hoeha mai ia lakou, aole hoi ia i ai aku i na paia o ka halepaahao; a ua hoopiha ia lakou me ia olioli hiki ole ke hai ia aku a piha i ka nani.

45. Aia hoi, iho mai la ka Uhane Hemolele o ke Akua mai ka lani mai, a komo ae la iloko o na naau o lakou, a ua hoopiha ia ae la lakou me he ahi la, a ua hiki ia lakou ke olelo aku i na olelo kupanaha.

46. A eia kekahi, pae mai la kekahi leo ia lakou, he oiaio, he leo oluolu me he mea la he hawanawana ia, i ka i ana,

47. He maluhia, he maluhia ia oukou, no ko oukou manaoio i koʻu mea aloha nui ia, a mai ka hookumu ia ana mai o ke ao nei ia.

48. Ano ia lakou i lohe ai i keia, leha ae la lakou i ko lakou mau maka me he mea la e ike aku i kahi a ka leo i pae mai ai; a, aia hoi, ike aku la lakou i ka hamama ana o na lani; a iho mai la na anela mailoko mai o ka lani, a lawelawe mai la ia lakou.

49. A ua aneane ekolu haneri paha ka poe i ike a i lohe i ua mau mea nei; a ua kauoha ia ae lakou e hele aku a e kahaha ole, aole hoi lakou e kanalua.

50. A eia kekahi, hele aku la lakou a lawelawe ae la i na kanaka, e hai aku ana mawaena o na wahi e kokoke ana a puni, i na mea a pau a lakou i lohe ai a i ike ai, a ua hoohuli ia ka nui loa o ko Lamana poe e lakou, no ka nui o na mea e hooiaio ana, a lakou i loaa ai;

51. A o ka poe a pau i hoohuli ia, waiho iho la lakou ilalo i ko lakou mau mea kaua, a me ko lakou inaina hoi, a me ka mooolelo a ko lakou poe kupuna.

52. A eia kekahi, haawi ae la lakou i ko Nepai poe, i ko lakou mau aina hooilina.