1. Ano eia kekahi, ia Nepai i olelo aku ai i keia mau olelo, aia hoi kekahi poe he mau lunakanawai, no ka poe hana malu hoi o Gadianatona, a ua huhu lakou, a hea aku lakou me ke ku e ia ia, i ka i ana i na kanaka, No ke aha la oukou e lalau ole nei i keia kanaka a kai mai ia ia, i hoohewa ia aku ai oia e like me ka hewa ana i hana ai.

2. No ke aha la oukou e ike nei i keia kanaka, a e lohe nei ia ia e hoino mai ana i keia poe kanaka, a i ko kakou kanawai?

3. No ka mea, aia hoi, ua olelo aku o Nepai ia lakou no ka ino o ko lakou kanawai; he oiaio, ua nui na mea a Nepai i olelo aku ai i hiki ole ai ke palapala ia iho; a, aohe oia i olelo kekahi mea e ku e ana i na kauoha a ke Akua.

4. A ua huhu ua poe lunakanawai la ia ia no kana olelo maopopo ana ia lakou no ka lakou mau hana malu o ka pouli; aole nae lakou i aa e kau mai i ko lakou mau lima iho maluna ona; no ka mea, ua makau lakou i na kanaka, o kahea auanei lakou nei me ke ku e ia lakou la;

5. Nolaila, kahea ae la lakou i na kanaka, i ka i ana, No ke aha la oukou e ae aku nei i keia kanaka e hoino mai ia kakou? No ka mea, aia hoi, ke hoohewa mai nei oia i keia poe kanaka a pau, i ka anai loa ia ana; he oiaio, a e lawe ia auanei keia mau kulanakauhale nui o kakou mai o kakou aku, i kuleana ole ko kakou iloko o ia mau wahi.

6. Ano, ke ike nei kakou he mea hiki ole loa keia; no ka mea, ua ikaika kakou, a he mau kulanakauhale nui ko kakou; nolaila, aole e hiki i ko kakou poe enemi ke loaa ka mana maluna iho o kakou.

7. A eia kekahi, pela lakou i hookonokono ai i na kanaka e huhu mai ia Nepai, a hoala ai i na paio mawaena o lakou; no ka mea, aia kekahi poe e hea ana, E waiho wale i keia kanaka, no ka mea, he kanaka pono ia, a e hiki io mai auanei kela mau mea ana i olelo mai ai, ke ole kakou e mihi;

8. He oiaio, aia hoi e hiki mai auanei na hoopai a pau maluna iho o kakou ana i hoike mai ai ia kakou; no ka mea, ua ike kakou ua hoike pololei mai oia ia kakou no ko kakou mau hala. A, aia hoi, he nui ia mau mea; a ke ike nei oia i na mea a pau e loohia mai auanei maluna o kakou, e like me ia i ike ai no ko kakou mau hala;

9. He oiaio, a aia hoi, ina aole oia he kaula ina ua hiki ole ia ia ke hoike mai no kela mau mea.

10. A eia kekahi, o kela poe kanaka, ka poe i imi iho e pepehi mai ia Nepai, ua koi ia aku no ko lakou makau, i kau ole mai ai lakou i ko lakou mau lima maluna iho ona. Nolaila, hoomaka hou oia e olelo aku ia lakou, i ka ike ana ua loaa ia ia ka oluolu ma na maka o kekahi poe, a no ia mea, makau iho la ke koena o lakou.

11. Nolaila, ua koi ia oia e olelo hou aku ia lakou, i ka i ana, Aia hoi, e koʻu poe hoahanau, aole anei oukou i heluhelu ua haawi mai la ke Akua i ka mana i kekahi kanaka, ia Mose, e hahau maluna o na wai o ke Kai Ula, a kaawale ae la ia mau mea i o a i o, a hele mai la ka Iseraela, o lakou no ko kakou poe kupuna, mawaena ma ka aina maloo, a popoi ae la na wai maluna iho o na puali o ko Aigupita, a ale iho la ia lakou?

12. Ano hoi, ina i haawi mai ke Akua i ua kanaka nei i ka mana me neia, alaila, no ke aha la oukou e hoopaapaa nei mawaena o oukou iho, a i ae aole oia i haawi mai iaʻu i ka mana i ike ai au no na hoopai e hiki mai ana maluna iho o oukou ke ole oukou e mihi?

13. Aka hoi, aole o kaʻu mau olelo wale no ka oukou e hoole nei, aka ke hoole mai nei no hoi oukou i na olelo a pau i olelo ia ai e ko oukou poe kupuna, a me na olelo no hoi i olelo ia mai ai e ua kanaka nei, o Mose, ka mea nona ka mana nui i haawi ia mai ai ia ia; he oiaio, i na olelo ana i olelo mai ai no ka hiki ana mai o ka Mesia.

14. He oiaio, aole anei oia i hoike mai, e hele mai auanei ke Keiki a ka Akua? A me ia i kau ai iluna i ka nahesa keleawe ma ka waonahele, pela no auanei e kaulia ai i luna ka mea e hele mai ana.

15. A o ka poe a pau i nana aku i ua nahesa la e ola no lakou, pela no hoi o ka poe a pau e nana aku ana i ke Keiki a ke Akua, me ka manaoio, a me ka uhane mihi, e hiki ke ola, oia, a hiki aku i kela ola e mau loa aku ana.

16. Ano hoi, aole o Mose wale no ka i hoike mai no keia mau mea, aka o na kaula hemolele a pau, mai kona mau la a hiki mai i na la o Aberahama.

17. He oiaio, ike ae la o Aberahama no kona hiki ana mai, a ua hoopiha ia me ka olioli, a hauoli iho la.

18. He oiaio, a ke i aku nei au ia oukou, aole o Aberahama wale no ka i ike no ua mau mea nei, aka, he nui na mea mamua aku o na la o Aberahama i kahea ia mamuli o ka aoao o ke Akua; he oiaio, mamuli o ka aoao o kana Keiki; a o keia i hoike ia mai ai ia mea i na kanaka, i na tausani makahiki he nui mamua o kona hiki ana mai, i hiki mai ai ka hoolapanai ana hoi ia lakou.

19. Ano, ke makemake nei au e ike oukou, ua nui na kaula mahope mai o na la o Aberahama, i hoike mai ai no ua mau mea nei; he oiaio, aia hoi, hoike wiwo ole mai ke kaula Zenosa; a no ia mea ua pepehi ia oia a make.

20. A o Zenoka hoi, a o Eziasa no hoi, a o Isaia no hoi, a me Ieremia, (o Ieremia no ua kaula la nana i hoike mai no ka anai ia ana o Ierusalema.) Ano, ke ike nei kakou ua anai ia o Ierusalema e like me na olelo a Ieremia. No ia mea, ea, no ke aha la e hele ole mai ai ke Keiki a ke Akua, e like me kana wanana?

21. Ano, e hoole anei oukou i ka anai ia ana o Ierusalema? E olelo anei oukou aole i pepehi ia na keikikane a Zedekia, o lakou a pau, koe o Muleka wale no? He oiaio, aole anei oukou i ike aia no na hua a Zedekia pu me kakou, a ua kipaku ia mai, mailoko mai o ka aina o Ierusalema? Aka hoi, aole o keia wale no.

22. Ua kipaku ia mai ko kakou kupunakane o Lehi mailoko mai o Ierusalema, no kona hoike ana no ua mau mea nei. O Nepai hoi kekahi, nana i hoike mai no ua mau mea nei, a aneane ko kakou poe kupuna a pau hoi, a hiki loa i keia manawa; he oiaio, ua hoike lakou no ka hiki ana mai o Kristo, a ua nana imua, a ua hauoli ma kona la e hiki mai ana.

23. A aia hoi, o ke Akua no ia, a oia pu kekahi me lakou, a ua hoike mai oia ia ia iho ia lakou, i hoolapanai ia ai lakou e ia; a hoonani aku la lakou ia ia, no ka mea e hiki mai ana.

24. Ano, i ko oukou ike ana i keia mau mea, a hiki ole ke hoole mai ia mau mea, ke ole wahahee oukou, nolaila, ma keia mea ua hana hewa oukou, no ka mea, ua hoomalau oukou i keia mau mea a pau, me na mea hoike he nui loa nae a lakou i loaa ai; he oiaio, ua loaa ia oukou na mea a pau, na mea ma ka lani, a me na mea a pau ma ka honua nei no hoi, me he hoike la, o kela mau mea he oiaio.

25. Aka hoi, ua hoomalau mai oukou i ka oiaio, a kipi mai la i ko oukou Akua hemolele; a i keia manawa hoi, ma kahi o ka hoahu ana no oukou iho ka waiwai ma ka lani, kahi e popo ole ai kekahi mea, kahi e komo ole ai kekahi mea pelapela, e hoahu ana oukou no oukou iho i ka inaina no ka la hookolokolo;

26. He oiaio, i keia manawa hoi e oo ana oukou, no ko oukou mau pepehi kanaka ana, a me ko oukou moekolohe a hana ino, no ka make mau loa; he oiaio, a ke ole oukou e mihi, e hoea koke mai ia ia oukou;

27. He oiaio, aia hoi ia ma ko oukou mau puka komo ano; he oiaio, e hele aku oukou i ka noho hookolokolo, a e imi; aia hoi, ua pepehi loa ia ko oukou lunakanawai, a ke moe la oia iloko o kona koko; a ua pepehi ia ae oia e kona kaikaina, ka mea e imi ana e noho ma ka noho hookolokolo.

28. A, aia hoi, no ko oukou poe hui malu laua a elua, o ko lakou mea nana i hookumu, oia o Gadianatona, a me ka mea ino hookahi e imi nei e make na uhane o na kanaka.