1. Ano, eia kekahi, ma ka makahiki kanawalukumamaono, e noho mau ana ko Nepai poe iloko o ka hewa, he oiaio, iloko o ka hewa nui, oiai i eu ikaika ko Lamana poe e malama i na kauoha a ke Akua, e like me ke kanawai o Mose.

2. A eia kekahi, ma keia makahiki, aia kekahi kanaka, o Samuela, he Lamana, i hele mai iloko o ka aina o Zarahemela, a hoomaka ae la e hai olelo aku i na kanaka. A eia kekahi, hai olelo aku la oia i na la he nui wale, i ka mihi i na kanaka, a hookuke ae la lakou ia ia iwaho, a aneane oia e hoi aku i kona aina iho.

3. Aka hoi, hiki mai la ka leo o ka Haku io na la, i hoi hou mai ai oia, a e wanana mai i na kanaka i kela mea keia mea i komo iloko o kona naau.

4. A eia kekahi, aole lakou i ae mai ia ia e komo iloko o ke kulanakauhale; nolaila, hele aku la ia a pii ae la maluna iho o ka pa olaila, a o aku la i kona lima a hea ae la me ka leo nui, a wanana ae la i na kanaka i na mea a ka Haku i hookomo mai ai iloko o kona naau;

5. A i ae la oia ia lakou, Aia hoi, owau, o Samuela, he Lamana, ke olelo aku nei i na olelo a ka Haku e hookomo mai nei iloko o koʻu naau; a, aia, hoi, ua hookomo mai oia iloko o koʻu naau e i aku i keia poe kanaka, ke kau mai la ka pahikaua o ka hoopai maluna iho o keia poe kanaka; aole e hala ana na haneri makahiki eha ke ole haule mai ka pahikaua o ka hoopai, maluna iho o keia poe kanaka;

6. He oiaio, ke kali la ka luku kaumaha i keia poe kanaka, a e hiki io mai ana ia maluna iho o keia poe kanaka, a, aole e hiki i kekahi mea ke hoola i keia poe kanaka, ke ole ia ka mihi a me ka manaoio i ka Haku o Iesu Kristo, ka mea e hele io mai auanei i ke ao nei, a e hoopilikia ia oia ma na mea he nui wale, a e pepehi ia a make auanei no kona poe kanaka.

7. Aia hoi, ua hai mai la kekahi anela a ka Haku ia mea iaʻu, a lawe mai la ia i na mea olioli i koʻu uhane. A, aia hoi, ua hoouna ia mai au io oukou la e hai aku ia mea ia oukou no hoi, i hiki ia oukou ke loaa na mea olioli; aka hoi, aole oukou e hookipa mai iaʻu,

8. Nolaila, penei wahi a ka Haku, no ka paakiki o na naau o ka poe kanaka o ko Nepai, ina aole lakou e mihi, naʻu e lawe ae i kaʻu olelo mai o lakou aku, a e kaili ae au i kuu Uhane mai o lakou aku, a aole au e hoomanawanui hou ia lakou, a e hoohuli ae au i na naau o ko lakou poe hoahanau e ku e aku ia lakou;

9. A, aole e hala aku na haneri makahiki eha, mamua o koʻu kena ana ae e hahau ia aku lakou; he oiaio, e hoopai aku au ia lakou me ka pahikaua, a me ka wi, a me ke ahulau;

10. He oiaio, e hoopai aku au ia lakou ma koʻu huhu wela, a aia kekahi poe o ka ha o ka hanauna, ka poe e ola ana o ko oukou poe enemi, e ike i ko oukou luku loa ia ana; a e hiki io mai auanei keia, ke ole oukou e mihi, wahi a ka Haku; a e hoopai ae ua poe la o ka ha o ka hanauna i ka luku loa ana ia oukou.

11. Aka, ina e mihi oukou a e hoi hou i ka Haku i ko oukou Akua, e hoohuli ae au i koʻu huhu mai o oukou aku, wahi a ka Haku; he oiaio, penei wahi a ka Haku, Pomaikai lakou, ka poe e mihi a huli mai ioʻu nei, aka poino na mea e mihi ole ana;

12. He oiaio, auwe keia kulanakauhale nui o Zarahemela nei; no ka mea hoi, no ka poe pono i hookoe ia ai oia; he oiaio, auwe ua kulanakauhale nui nei, no ka mea, ke ike nei au, wahi a ka Haku, e hoopaakiki ana na mea he nui loa, he oiaio, o ka hapa nui loa o ko ua kulanakauhale nui nei i ko lakou mau naau e ku e mai iaʻu, wahi a ka Haku.

13. Aka pomaikai lakou ka poe e mihi ana, no ka mea, naʻu lakou e hookoe aku. Aka hoi, ina aole no ka poe pono e noho la ma ua kulanakauhale nui nei, aia hoi, ina ua kena ae au i ke ahi e haule iho mailoko mai o ka lani, a hoopau loa aku ia wahi.

14. Aka hoi, no ka pono o ka poe pono, i hookoe ia ia. Aka hoi, e hiki mai ana ka manawa, wahi a ka Haku, ia oukou e hookuke mai ai i ka poe pono maiwaena aku o oukou, alaila e oo oukou no ka luku ia ana; he oiaio, auwe ua kulanakauhale nui nei, no na hewa a me na mea hoopailua iloko ona;

15. He oiaio, a auwe ke kulanakauhale o Gideona, no na hewa a me na mea hoopailua iloko ona;

16. He oiaio, a auwe na kulanakauhale a pau ma ka aina a puni, i noho ia ai e ko Nepai poe, no na hewa a me na mea hoopailua iloko o ia mau wahi;

17. A, aia hoi, e hiki mai auanei no ka poino maluna iho o ka aina, wahi a ka Haku o na Lehulehu, no ko ka poe kanaka e noho la ma ka aina; he oiaio, ko lakou hewa a me na mea hoopailua.

18. A e hiki mai auanei keia, wahi a ka Haku o na Lehulehu, he oiaio, ko kakou Akua nui a oiaio, o ka mea nana e huna iho i na waiwai iloko o ka honua, e loaa hou ole ai ia mau mea ma ia hope aku, no ka nui o ka poino o ka aina, ke ole ia he kanaka pono, a e huna iho ia mea i ka Haku;

19. No ka mea, ua makemake au, wahi a ka Haku, e huna iho lakou i ko lakou mau waiwai iaʻu; a e hoopoino ia ka poe i huna ole i ko lakou mau waiwai iaʻu; no ka mea, aole e huna ana kekahi i ko lakou mau waiwai iaʻu, ke ole ka poe pono; a o ka mea nana e huna ole i kona mau waiwai iaʻu, ua hoopoino ia no ia, a me ka waiwai no hoi, aole e hiki i kekahi ke hoopakele ia mea no ka poino o ka aina.

20. A e hiki mai no auanei ka la e huna ai lakou i ko lakou mau waiwai, no ka mea, ua kau aku lakou i ko lakou mau naau maluna iho o ka waiwai; a no ko lakou kau ana i ko lakou mau naau maluna iho o ko lakou waiwai, e huna iho no au i ko lakou mau waiwai, i ka wa a lakou e hee aku ai imua o ko lakou poe enemi, no ka mea, aole lakou i huna iho ia mau mea iaʻu; e hoopoino ia lakou, a me ko lakou mau waiwai no hoi; a ma ia la e hahau ia ai lakou, wahi a ka Haku.

21. E nana mai oukou, e na kanaka o keia kulanakauhale nui, a e hoolohe mai i kaʻu mau olelo; he oiaio, e hoolohe mai i na olelo a ka Haku e olelo aku nei; no ka mea hoi, ke i aku nei oia ua hoopoino ia oukou no ko oukou waiwai, a ua hoopoino ia no hoi ko oukou waiwai, no ka mea, ua kau aku oukou i ko oukou mau naau maluna iho o ia mau mea, a ua hoolohe ole i na olelo a ka mea nana oukou i haawi mai ia mau mea.

22. Aole oukou i hoomanao aku i ka Haku ko oukou Akua, ma na mea ana i hoopomaikai ai ia oukou, aka, ke hoomanao mau nei oukou i ko oukou waiwai, aole e aloha aku i ka Haku, i ko oukou Akua no ia mau mea; he oiaio, aole i maliu aku ko oukou mau naau i ka Haku, aka ke pehu nei me ka haaheo nui i ke kaena ana, a i ka haanui ana, i na paonioni ana, i na paio, i ka lokoino, i na hoomaau ana, a me na pepehi kanaka, a i na ano a pau o na hala.

23. No keia mea, ua kauoha mai la ka Haku i hiki mai ai ka poino maluna iho o ka aina, a maluna iho o ko oukou waiwai no hoi; a o keia mea no na hala o oukou;

24. He oiaio, auwe keia poe kanaka, no keia manawa i hiki mai ai, a oukou e hookuke mai nei i na kaula, a hoomaewaewa mai nei ia lakou, a nou mai i na pohaku ia lakou, a pepehi mai ia lakou a make, a hana mai i na ano a pau o ka ino ia lakou, e like me lakou o ka wa kahiko i hana ai.

25. Ano ia oukou i kamailio ai, ke i ae nei oukou, Ina o ko makou mau la pu kekahi ma na la o ko makou poe kupuna o ka wa kahiko, aole makou i pepehi pu i ka poe kaula a make; aole makou i hailuku mai ia lakou, a hookuke mai ia lakou mawaho.

26. Aia hoi, ua ino loa aku oukou mamua o lakou; no ka mea, me ka Haku e ola nei, ina e hiki mai kekahi kaula mawaena o oukou, a hai aku ia oukou i ka olelo a ka Haku, ka mea e hoike mai ana no ko oukou mau lawehala a mau hewa, e huhu oukou ia ia, a hookuke mai ia ia mawaho, a imi aku i na hana ana a pau e pepehi mai ia ia; he oiaio, e olelo no oukou he kaula wahahee ia, a he lawehala ia, a no ke diabolo, no ka mea, ke hoike aku nei oia ua ino na hana a oukou.

27. Aka hoi, ina e hele mai kekahi kanaka mawaena o oukou, a e i ae, E hana aku i keia, aole he hewa malaila; e hana aku i kela, aole oukou e pilikia; he oiaio, e olelo ae oia, e hele mamuli o ka haaheo o ko oukou mau naau; he oiaio, e hele mamuli o ka haaheo o ko oukou mau maka, a e hana aku i ka mea a ko oukou naau i makemake ai; a ina e hele mai kekahi kanaka iwaena o oukou a e olelo ae i keia, e hookipa ae no oukou ia ia, a e i ae he kaula no ia;

28. He oiaio, e hookiekie no oukou ia ia iluna, a e haawi ae oukou ia ia i kauwahi o ko oukou waiwai; e haawi aku no oukou ia ia i kauwahi o ko oukou gula, a i kauwahi o ko oukou kala, a e hoaahu iho no oukou ia ia me ke kapa kumukuai nui; a no kana olelo ana ae i na olelo hoomalimali ia oukou, me ka i ana ae ua malu na mea a pau, alaila aole oukou e hoohewa ae ia ia.

29. E ka hanauna hewa a kekee; ka poe paakiki a ai oolea, pehea ka loihi e manao ai oukou e hookuu mai ka Haku ia oukou; he oiaio, pehea ka loihi e hookuu mai oukou ia oukou iho e alakai ia aku e na mea alakai naaupo a makapo; he oiaio, pehea ka loihi e koho aku ai oukou i ka pouli mamua o ka malamalama;

30. He oiaio, aia hoi, ua hoaa ia ka huhu o ka Haku ano e ku e ia oukou; aia hoi, ua hoopoino mai la oia i ka aina, no ko oukou hewa;

31. A, aia hoi, e hiki mai ana ka manawa e hoopoino ai oia i ko oukou waiwai, i lilo ia i mea pahee, i hiki ole ia oukou ke paa iho ia mau mea; a ma na la o ko oukou ilihune aole e hiki ia oukou ke paa iho ia mau mea;

32. A ma na la o ko oukou ilihune, e hea aku oukou i ka Haku; a makehewa ko oukou hea ana, no ka mea, ua hiki mai ko oukou hooneoneo ia ana ia manawa maluna iho o oukou, a ua hana paa i ko oukou luku ia ana; alaila, e uwe aku a e aoa aku oukou ma ia la, wahi a ka Haku o na Lehulehu. Alaila e kanikau oukou a e i ae,

33. Ina ua mihi au, a aole pepehi i na kaula, a hailuku ia lakou, a hookuke aku ia lakou mawaho; he oiaio, ma ia la, e olelo ae oukou, Ina ua hoomanao kakou i ka Haku, i ko kakou Akua, ma ka la ana i haawi mai ai ia kakou i ko kakou waiwai, alaila, aole no ia mau mea i lilo i pahee, i nalowale aku ai ia mau mea ia kakou; no ka mea hoi, ua lilo aku la ko kakou waiwai mai o kakou aku.

34. Aia hoi, ke waiho aku nei kakou i kahi mea paahana maanei, a ma ia la ae ua lilo ia; a, aia ka, ua lawe ia aku na pahikaua a kakou mai o kakou aku, ma ka la a kakou i imi aku ai ia mau mea no ke kaua.

35. He oiaio, ua huna iho kakou i ko kakou mau waiwai, a ua pahee aku ia mau mea mai o kakou aku, no ka poino o ka aina.

36. Ina ua mihi kakou ma ka la i hiki mai ai ka olelo a ka Haku ia kakou; no ka mea hoi, ua hoopoino ia ka aina, a ua lilo na mea a pau i pahee, a ua hiki ole ia kakou ke paa ia mau mea.

37. Aia hoi, ua hoopuni ia kakou e na daimonio, he oiaio, ua hoopuni ia kakou a puni e na anela o ka mea i imi e hoopoino mai i ko kakou mau uhane. Aia hoi, ua nui na hala o kakou. E ka Haku, aole anei e hiki ia oe ke hoohuli ae i kou huhu mai o kakou aku? A o keia no auanei ka oukou olelo ma ua mau la la.

38. Aka hoi, ua hala aku ko oukou mau la o ka noho hoao ana; ua hoopanee aku oukou i ka la o ko oukou ola, a hiki i ka wa i hala aku ai ka manawa pono no ka wa pau ole, a ua hana paa ia ko oukou luku ia ana; he oiaio, no ka mea, ua imi oukou i na la a pau o ko oukou ola ana, no ka mea i hiki ole ai ia oukou ke loaa; a ua imi oukou i ka pomaikai ma ka hana hewa ana, a e ku e ana ia mea i ke ano o kela pono aia no ia iloko o ko kakou Poo Nui a Mau Loa.

39. E na kanaka o ka aina, ina oukou e hoolohe mai i kaʻu mau olelo. A ke pule nei au i hoohuli ia ae ka huhu o ka Haku mai o oukou aku, a i mihi oukou a e hoola ia.