1. Ano, eia kekahi, ma ka makahiki kanahikukumamalua o ke au o na lunakanawai, mahuahua ae la na paio, a no ia mea hiki mai na kaua a puni ka aina mawaena o ka poe kanaka a pau o Nepai.

2. A na ua poe powa hui malu nei i hana i keia hana o ka luku a me ka hewa. A mau ae la ua kaua nei a pau kela makahiki. A mau ae la no hoi ia ma ka makahiki kanahikukumamakolu.

3. A eia kekahi ma keia makahiki, hea aku la o Nepai i ka Haku, i ka i ana:

4. E ka Haku, mai hookuu mai oe i keia poe kanaka e luku ia me ka pahikauae aka, e ka Haku, e aho e kau ia ka wi ma ka aina, e hooeu ai ia lakou ma ka hoomanao i ka Haku i ko lakou Akua, a malia paha e mihi lakou a huli ae ia oe.

5. A pela no ia i hana ia, e like me na olelo a Nepai. A, aia he wi nui maluna o ka aina mawaena o ka poe kanaka a pau o Nepai. A pela ma ka makahiki kanahikukumamaha, mau ae la no ka wi, a oki iho la ka hana luku ma ka pahikaua, aka lilo iho la i ehaeha ma ka wi.

6. A mau ae la no hoi keia hana luku ma ka makahiki kanahikukumamalima. No ka mea, ua hahau ia ka honua i maloo loa ai ia, a hoohua ole mai i ka hua liilii ma ke kau hua; a ua hahau ia ka honua a puni, oia, mawaena o ko Lamana poe pela pu mawaena o ko Nepai poe, a ua hahau ia lakou a make lakou ma na tausani, ma na wahi hewa loa o ka aina.

7. A eia kekahi, ike iho la na kanaka ua kokoke lakou e make i ka wi, a hoomaka ae la lakou e hoomanao i ka Haku ko lakou Akua; a hoomaka lakou e hoomanao i na olelo a Nepai.

8. A hoomaka ae la na kanaka e noi ae i ko lakou poe lunakanawai nui a me ko lakou poe luna, e i mai lakou ia Nepai, Aia hoi, ke ike nei makou he kanaka oe no ke Akua, a nolaila e hea aku i ka Haku i ko makou Akua, e hoohuli ae oia mai o makou aku i keia wi, o ko auanei na olelo a pau au i olelo mai ai, no ko makou luku ia ana.

9. A eia kekahi, olelo mai la ka poe lunakanawai ia Nepai, e like me na olelo a pau i makemake ia. A eia kekahi, ia Nepai i ike ai ua mihi iho la ka poe kanaka, a e hoohaahaa ana ia lakou iho iloko o ke kapa ino, kahea hou aku la oia i ka Haku, i ka i ana:

10. E ka Haku, aia hoi, ke mihi nei keia poe kanaka; a ua kahili ae la lakou i ko Gadianatona poe hui maiwaena aku o lakou, a ua pio loa iho la lakou la, a ua huna iho la lakou i ko lakou mau mea kuka malu iloko o ka honua.

11. Ano, e ka Haku, no keia haahaa ana o lakou, e hoohuli ae anei oe i kou huhu, a e ae mai i pau kou huhu ma ka luku ia ana o ua poe kanaka hewa la, au i luku mai ai mamua iho nei?

12. E ka Haku, e hoohuli ae anei oe i kou huhu, he oiaio, i kou huhu wela, a e hooki mai i keia wi ma keia aina?

13. E ka Haku, e hoolohe mai anei oe iaʻu, a e kauoha mai i hana ia ai ia e like me kaʻu mau olelo, a e hoouna mai i ka ua maluna iho o ka ili o ka honua, i hiki ia ia ke hoohua mai i kona hua a me kona hua liilii, ma ke kau hua?

14. E ka Haku, ua hoolohe mai la no oe i kaʻu mau olelo iaʻu i olelo aku ai, e wi ka aina, i hooki ia ke ahulau o ka pahikaua; a ua ike au e hoolohe mai no oe, i keia manawa, i kaʻu mau olelo, no ka mea, ua i mai oe, Ina e mihi keia poe kanaka, naʻu no e hookoe aku ia lakou;

15. He oiaio, e ka Haku, a ke ike mai nei oe ua mihi iho la lakou, no ka wi, a no ke ahulau, a me ka luku ia ana i hiki mai ai maluna iho o lakou.

16. Ano, e ka Haku, aole anei oe e hoohuli ae i kou huhu, a e hoao hou ina paha e hookauwa aku lakou nau? A ina pela, e ka Haku, ua hiki no ia oe ke hoopomaikai mai ia lakou, e like me kau mau olelo au i olelo mai ai.

17. A eia kekahi, ma ka makahiki kanahikukumamaono, hoohuli ae la ka Haku i kona huhu mai o na kanaka aku, a kauoha ae la i ka ua e haule mai maluna iho o ka honua, a hoohua mai la ia i kona hua ma ke kau hua ona. A hoohua mai la no ia i kona hua liilii, ma ke kau hua liilii ona.

18. Aia hoi, hauoli iho la na kanaka, a hoonani aku la i ke Akua, a ua hoopiha ia ko ka ili o ka aina a pau me ka olioli ana; a, aole lakou i imi hou e pehehi mai ia Nepai, aka, manao iho la lakou ia ia me he kaula nui la, a he kanaka o ke Akua, me ka mana a makaukau nui i haawi ia mai ai ia ia mai ke Akua mai.

19. A, aia hoi, o Lehi, kona kaikaina, aole oia i emi iki mahope iho ona ma na mea e pili ana i ka pono.

20. A pela i hoomaka ai ka poe kanaka o Nepai e pomaikai hou ma ka aina, a hoomaka ae la e kukulu iho i na wahi neoneo o lakou, a hoomaka ae la e hoonui a hoolaha aku, a hiki ia lakou ke uhi i ka ili a puni o ka aina, ma ka akau a ma ka hema no hoi, mai ke kai komohana, a hiki aku i ke kai hikina.

21. A eia kekahi, pau ae la ka makahiki kanahikukumamaono ma ka maluhia. A hoomaka ae la ka makahiki kanahikukumamahiku ma ka maluhia; a laha ae la ka ekalesia ma na wahi a pau ma ka ili o ka aina; a ua hui ia ka nui o na kanaka o ko Nepai poe a me ko Lamana poe no hoi, ma ka ekalesia; a ua loaa ia lakou ka maluhia nui loa ma ka aina, a pela i pau ai ka makahiki kanahikukumamahiku.

22. A he maluhia no hoi ko lakou ma ka makahiki kanahikukumamawalu, koe he mau ku e uuku no na mea nui o ke ao ana i haawi ia mai ai e na kaula.

23. A ma ka makahiki kanahikukumamaiwa, hoomaka ae la na hoopaapaa nui ana. Aka eia kekahi, o Nepai laua me Lehi, a me na mea he nui wale o ko laua poe hoahanau, ka poe i ike no na mea nui oiaio o ke ao ana, e loaa ana na hoikeana i kela la i keia la, nolaila, hai aku la lakou i na kanaka, a no ia mea, hoopau iho la lakou i ko lakou la hoopaapaa ana ia makahiki hookahi no.

24. A eia kekahi, ma ka makahiki kanawalu o ke au o na lunakanawai maluna iho o ka poe kanaka o Nepai, aia kekahi poe o na mea haalele i ko Nepai poe, ka poe i hele aku i kekahi mau makahiki mamua iho nei i ko Lamana poe, a lawe maluna o lakou iho i ka inoa o ko Lamana poe; a me kekahi poe hoi he poe mamo io o ko Lamana, i hookonokono ia aku i ka huhu e lakou, oia hoi ua poe haalele la, nolaila hoomaka ae la lakou i ke kaua me ko lakou poe hoahanau.

25. A hana mai la lakou i ka pepehi kanaka a me ka powa; alaila, hee aku la lakou iloko o na mauna, a iloko o ka waonahele a me na wahi huna, e huna ana ia lakou iho i hiki ole ke loaa lakou, e loaa ana i kela la i keia la na mea hou e hui me lakou, me ka hele ana o na mea haalele io lakou la;

26. A pela ma kekahi manawa, he oiaio, ma kekahi mau makahiki aole he nui, lilo iho la lakou i poe powa hui he nui loa, a imi iho la lakou i na mea kuka malu a pau o Gadianatona; a pela lakou i lilo ai ka poe powa o Gadianatona.

27. Ano hoi, hana ino nui iho la ua poe powa nei, he oiaio, i ka luku nui ia ana mawaena o ka poe kanaka o Nepai, a mawaena no hoi o ka poe kanaka o Lamana.

28. A eia kekahi, he mea e pono ai e hooki ia aku keia hana luku; nolaila, hoouna aku la lakou i kekahi poe kaua o na kanaka ikaika iloko o ka waonahele, a maluna ae o na mauna e imi aku i ua poe powa hui nei, a e luku aku ia lakou.

29. Aka hoi, eia kekahi ma kela makahiki no ua hooauhee ia mai lakou a hiki iloko o ko lakou mau aina iho. A pela i pau ai ka makahiki kanawalu o ke au o na lunakanawai maluna iho o ka poe kanaka o Nepai.

30. A eia kekahi, ma ka makamua o ka makahiki kanawalukumamakahi, hele hou aku la lakou e ku e i ua poe powa hui nei, a luku aku la no i kekahi poe he nui; a luku ia mai no hoi lakou me ka luku nui;

31. A ua koi hou ia lakou e hoi mai mailoko mai o ka waonahele, a mailoko mai o na mauna, i ko lakou aina iho, no ka nui loa o ka helu o ua poe powa la i noho ma na mauna a me ka waonahele.

32. A pela i pau ai ua makahiki nei. A mahuahua ae la nae ka poe powa a lilo maoli i ikaika, a aa mai la lakou i ka poe kaua a pau o ko Nepai poe, a o ko Lamana poe no hoi; a ma o lakou la i hiki mai ai ka makau i na kanaka, maluna iho o ka ili a pau o ka aina;

33. He oiaio, no ka mea, hele mai la lakou i na wahi he nui o ka aina, a hana ae la i ka luku nui ia lakou nei; he oiaio, pepehi iho la i na mea he nui, a hali pio aku la i na mea e ae he nui wale iloko o ka waonahele; he oiaio, o ka nui loa oia ka lakou mau wahine a me ka lakou mau keiki.

34. Ano, o keia ino nui, ka mea i hiki mai ai i na kanaka no ko lakou hewa, hooeu hou ae la no ia ia lakou i ka hoomanao i ka Haku i ko lakou Akua.

35. A pela i pau ai ka makahiki kanawalukumamakahi o ke au o na lunakanawai.

36. A ma ka makahiki kanawalukumamalua, hoomaka hou ae la lakou e hoopoina iho i ka Haku i ko lakou Akua. A ma ka makahiki kanawalukumamakolu, hoomaka ae la lakou e mahuahua ikaika ma ka hewa. A ma ka makahiki kanawalukumamaha, aole lakou i hoomaikai i ko lakou mau aoao.

37. A eia kekahi, ma ka makahiki kanawalukumamalima, mahuahua ikaika lakou a ikaika loa ae la ma ko lakou haaheo, a ma ko lakou hewa; a pela lakou e oo hou ana no ka luku ia ana.

38. A pela i pau ai ka makahiki kanawalukumamalima.