1. A eia kekahi, ma ka makahiki kanalimakumamaha, ua nui na ku e ma ka ekalesia, a he paio hoi kekahi mawaena o na kanaka, a no ia mea, ua nui ke koko i hookahe ia;

2. A o ka poe kipi ua pepehi ia a make loa, a hooauhee ia aku hoi iwaho o ka aina, a hele aku la lakou i ke alii la o ko Lamana poe.

3. A eia kekahi, hoao ae la lakou e hookonokono aku i ko Lamana poe e kaua mai i ko Nepai poe; aka hoi, ua makau nui loa ko Lamana poe, a aole lakou e hoolohe ae i na olelo a ua poe ku e la.

4. Aka eia kekahi, ma ka makahiki kanalimakumamaono o ke au o na lunakanawai, ua pii aku kekahi poe ku e mai ko Nepai aku i ko Lamana poe la; a o lakou nei me kela poe e ae ua pomaikai i ka hookonokono ana ia lakou e huhu mai i ko Nepai poe; a e hoomakaukau ana lakou ia makahiki a pau no ke kaua.

5. A i ka makahiki kanalimakumamahiku, iho mai la lakou i ko Nepai poe e kaua, a hoomaka ae la lakou i ka hana o ka make; he oiaio, a ma ka makahiki kanalimakumamawalu o ke au o na lunakanawai, loaa aku la ia lakou ka aina o Zarahemela; he oiaio, a me na aina a pau no hoi, a hiki aku i ka aina e kokoke ana i ka aina o Momona;

6. A ua hooauhee ia mai ko Nepai poe, a me na puali o Moroniha, a hiki aku iloko o ka aina o Momona;

7. A malaila lakou i kukulu iho ai i na pa kaua e ku e i ko Lamana poe, mai ke kai komohana, a hiki i ka hikina; o ko ka la hookahi hele ana ia no kekahi o ko Nepai, ma ka palena a lakou i hana paa ai a i hoonoho ai na puali o lakou, e hoomalu aku i ko lakou aina akau.

8. A pela ua loaa i ua poe ku e la o ko Nepai poe, me ke kokua o kekahi poe koa lehulehu o ko Lamana poe, ka aina hooilina o ko Nepai poe ma ka aina hema. A ua hana ia keia a pau ma na makahiki kanalimakumamawalu a iwa o ke au o na lunakanawai.

9. A eia kekahi, ma ka makahiki kanaono o ke au o na lunakanawai, pomaikai iho la o Moroniha a me na puali ona i ka loaa ana na wahi he nui o ka aina; he oiaio, loaa hou iho la ia lakou na kulanakauhale he nui i haule iho ai iloko o na lima o ko Lamana poe.

10. A eia kekahi, ma ka makahiki kanaonokumamakahi o ke au o na lunakanawai, pomaikai ae la lakou i ka loaa hou ana ka hapalua o ko lakou hooilina a pau.

11. Ano, ua hiki ole mai keia lilo nui o ko Nepai poe, a me ka luku nui mawaena o lakou, ina aole no ko lakou hewa a me ka lakou hana ino mawaena o lakou; he oiaio, a mawaena no hoi ia o ka poe i hookohukohu no ka ekalesia o ke Akua lakou;

12. A no ka haaheo o ko lakou mau naau ia, no ko lakou waiwai nui loa, he oiaio, no ko lakou hooluhi hewa ana i ka poe hune ia mea, e aua ana i ka lakou ai i ka poe pololi, e aua ana i ko lakou kapa i ka poe kapa ole, a e papai ana i ko lakou poe hoahanau haahaa ma ka papalina, e hoomaewaewa ana i na mea laa, e hoole ana i ka uhane o ka wanana a i ka uhane o ka hoikeana, e pepehi kanaka ana, e powa ana, e wahahee ana, e aihue ana, e moekolohe ana, e ala ana ma na paio nui, a e mahuka aku ana iloko o ka aina o Nepai, mawaena o ko Lamana poe;

13. A no keia ko lakou hewa nui, a me ko lakou kaena ana ma ko lakou ikaika iho, ua waiho ia ae lakou i ko lakou ikaika iho; nolaila, aole lakou i hoopomaikai ia aku, aka ua hoopilikia ia ae a hahau ia ae, a hooauhee ia ae imua o ko Lamana poe, a hiki i ka wa i aneane lilo aku ai ko lakou mau aina a pau.

14. Aka hoi, hai ae la o Moroniha i na mea he nui wale i na kanaka, no ko lakou hewa, a hai ae la o Nepai laua me Lehi no hoi, o laua no na keiki a Helamana, i na mea he nui wale i na kanaka; he oiaio, a wanana ae la i na mea he nui ia lakou no na hala o lakou, a me na mea e hiki mai maluna iho o lakou ke ole lakou e mihi i ko lakou mau hewa.

15. A eia kekahi, mihi iho la lakou, a ia lakou i mihi ai, hoomaka iho la lakou e hoopomaikai ia mai;

16. No ka mea, ia Moroniha i ike ai ua mihi lakou, aa aku la oia e alakai ae ia lakou mai ia wahi aku ia wahi aku, a mai ia kulanakauhale aku ia kulanakauhale aku, a hiki i ka wa a lakou i loaa hou iho ai ka hapalua o ko lakou waiwai, a me ka hapalua o ko lakou mau aina a pau.

17. A pela i pau ai ka makahiki kanaonokumamakahi o ke au o na lunakanawai.

18. A eia kekahi, ma ka makahiki kanaonokumamalua o ke au o na lunakanawai, ua hiki ole ia Moroniha ke loaa hou na aina hooilina mai ko Lamana poe mai;

19. Nolaila, haalele aku la lakou i ko lakou manao e loaa ke koena o ko lakou mau aina, no ka mea, no ka lehulehu loa o ko Lamana poe, ua lilo i mea hiki ole i ko Nepai poe ke loaa ka mana hou maluna iho o lakou; nolaila, hoohana ae la o Moroniha i kona mau puali a pau i ka malama ana i kela mau wahi ana i lawe hou mai ai.

20. A eia kekahi, no ka lehulehu loa o ko Lamana poe, ua weliweli ko Nepai poe, o hoopio ia mai auanei lakou, a e hahi ia mai ilalo, a e pepehi loa ia mai, a e anai ia mai;

21. He oiaio, hoomaka ae la lakou e hoomanao i na wanana a Alama, a me na olelo hoi a Mosia; a ike iho la lakou he poe kanaka ai oolea lakou, a ua hoowahawaha aku la lakou i na kauoha a ke Akua;

22. A ua hoololi ae la a hahi iho la lakou malalo iho o ko lakou mau kapuai wawae, i na kanawai o Mosia, oia hoi na kanawai a ka Haku i kauoha mai ai ia ia e haawi ae i na kanaka; a pela lakou i ike ai ua lilo ko lakou mau kanawai i ino, a ua lilo iho la lakou i poe kanaka hewa, a ua hewa lakou e like me ko Lamana poe.

23. A no ko lakou hala, ua hoomaka ae la ka ekalesia e emi iho; a hoomaka iho la lakou e manaoio ole i ka Uhane o ka wanana, a i ka Uhane o ka hoikeana; a ua haka pono mai na hoopai o ke Akua ia lakou ma ka maka.

24. A ike aku la lakou ua lilo iho la lakou i nawaliwali, e like me ko lakou poe hoahanau, ko Lamana poe, a e hoopakele hou ole mai ana ka Uhane o ka Haku ia lakou; he oiaio, ua haalele mai ia ia lakou, no ka mea, aole e noho ana ka Uhane o ka Haku iloko o na luakini hemolele ole;

25. Nolaila, hooki mai la ka Haku e hoopakele mai ia lakou ma kona mana kupaianaha a keu loa, no ka mea, ua haule iho lakou iloko o ka noho hoomaloka a hewa weliweli: a ike aku la lakou ua lehulehu loa ko Lamana poe mamua o lakou, a ke ole e hoopili aku lakou i ka Haku i ko lakou Akua, e make loa lakou me ka hiki ole ke pale ae.

26. No ka mea, ua ike lakou ua like ka nui o ka ikaika o ko Lamana poe me ko lakou ikaika, he kanaka no he kanaka. A pela lakou i haule iho ai iloko o keia lawehala nui; he oiaio, pela lakou i lilo ai i poe nawaliwali, no ko lakou lawehala ana, ma na makahiki aohe he nui.