1. Ano, eia kekahi, hala aku la ka makahiki kanaiwakumamakahi; a he mau haneri makahiki eono ia mai ka wa mai a Lehi i haalele aku ai ia Ierusalema; a o ka makahiki ia e noho ana o Lakoneusa i lunakanawai nui a i kiaaina hoi maluna iho o ka aina.

2. A ua hele aku la o Nepai, ke keiki a Helamana, mailoko aku o ka aina o Zarahemela, me ka haawi ae i kauoha i kana keiki, ia Nepai, oia no kana keikikane hiapo, no na papa keleawe, a me na mooolelo i malama e ia, a me kela mau mea i malama laa ia mai ka haalele ana mai o Lehi ia Ierusalema;

3. Alaila, hele aku la oia mailoko aku o ka aina, a o kahi ana i hele aku ai, aole kanaka i ike; a na kana keiki o Nepai i malama i na mooolelo ma kona hakahaka, he oiaio, i ka mooolelo o keia lahuikanaka.

4. A eia kekahi, ma ka makamua o ka makahiki kanaiwakumamalua, aia hoi, hoomaka ae la na wanana a ka poe kaula e hooko loa ia; no ka mea, hoomaka ae la na ouli a me na hana mana nui loa aku e hana ia mawaena o na kanaka.

5. Aka, ua hoomaka kekahi poe e olelo ae, ua hala ka manawa no na olelo e hooko ia ai, i olelo ia e Samuela, ka Lamana.

6. A hoomaka ae la lakou e hauoli maluna iho o ko lakou poe hoahanau, i ka i ana, Aia hoi, ua hala aku ka manawa, a ua ko ole na olelo a Samuela; nolaila, o ko oukou hauoli a me ko oukou manaoio no ia mea, ua makehewa no ia.

7. A eia kekahi, hoohaunaele nui loa ae la lakou mawaena o ka aina; a hoomaka ae la ka poe manaoio e kaumaha loa, o ko ole mai paha ua mau mea la i olelo ia ai.

8. Aka hoi, kiai onipaa iho la lakou no kela la, a me kela po, a me kela la, i lilo ai auanei me he la hookahi la, me he mea la aole no he po, i ike ai lakou aole makehewa ko lakou manaoio ana.

9. Ano, eia kekahi, ua hookaawale ia ae kekahi la e ka poe hoomaloka, i luku ia ai ua poe la a pau, ka poe i manaoio i kela mau mooolelo, ke hiki ole mai ka hoailona i haawi ia mai e Samuela, ke kaula.

10. Ano, eia kekahi, ia Nepai, ke keiki a Nepai, i ike ai i keia hewa o kona poe kanaka, ua kaumaha loa kona naau.

11. A eia kekahi, hele aku la oia mawaho a kulou iho la oia ilalo ma ka lepo, a hea ikaika aku la i kona Akua, no kona poe kanaka; he oiaio, no ua poe la e aneane ana e luku ia no ko lakou manaoio i na mooolelo a ko lakou poe kupuna.

12. A eia kekahi, hea ikaika aku la ia i ka Haku, a pau ae la ka la; a, aia hoi, pae mai la ka leo o ka Haku io na la, i ka i ana:

13. E hookiekie ae oe i kou poo a e hoolana hoi i kou naau, no ka mea, ua kokoke mai ka manawa, a ma keia po e haawi ia aku ai ka hoailona, a ma ka la apopo e hele mai ai au iloko o ke ao nei, e hoike aku i ko ke ao nei e hooko aku no au i na mea a pau aʻu i kauoha aku ai e olelo ia aku ma na waha o koʻu poe kaula hemolele.

14. Aia hoi, ke hele mai nei au i koʻu poe ponoi, e hooko i na mea a pau aʻu i hoike aku ai i na keiki a kanaka, mai ka hookumu ia ana mai o ke ao nei, a e hana i ka makemake o ka Makua, a o ke Keiki; a ka Makua no hoi, noʻu nei, a o ke Keiki, no kuu io. Aia hoi, ua kokoke mai ka manawa, a i keia po e haawi ia aku ai ka hoailona.

15. A eia kekahi, ua ko iho la na olelo i hiki mai ai ia Nepai, e like me ko lakou i olelo ia; no ka mea hoi, ma ka napoo ana o ka la, aole he poeleele; a hoomaka ae la na kanaka e pihoihoi, no ka mea, aole poeleele i ka wa i hiki mai ai ka po.

16. A he nui loa ka poe i manaoio ole e mamua i na olelo a ka poe kaula, i hina i ka honua, a lilo iho la me he mea la ua make lakou, no ka mea, ike iho la lakou ua lilo ka manao kuka o ka luku, a lakou i hooholo ai no ka poe i manaoio ma ka olelo a na kaula i mea ole, no ka mea, ua kokoke mai no ka ouli i haawi ia mai;

17. A hoomaka ae la lakou e hoomaopopo e ike koke i ke Keiki a ke Akua e pono ai; he oiaio, o ka poe kanaka a pau maluna iho o ka ili o ka honua a puni, mai ke komohana a i ka hikina, ma ka aina akau a ma ka aina hema no hoi, no ka pihoihoi nui loa ana, hina iho la lakou i ka honua;

18. No ka mea, ua ike lakou ua hoike mai ka poe kaula no ua mau mea nei no na makahiki he nui wale, a ua kokoke mai ano, ka ouli i haawi e ia mai ai mamua; a hoomaka ae la lakou e makau no ko lakou hewa a me ko lakou hoomaloka.

19. A eia kekahi, aole he poeleele ia po a ao, aka ua malamalama ia me he mea la ua awakea. A eia kekahi, puka hou mai la ka la ia kakahiaka ae, e like me kona maa mau, a ike iho la lakou o ka la no ia a ka Haku e hanau ia mai ai, no ka ouli i haawi ia mai ai.

20. A ua hiki io mai la no ia, he oiaio, na mea a pau, kela mea keia mea, e like me na olelo a na kaula.

21. A eia hoi kekahi, ike ia mai la kekahi hoku hou, e like me ka olelo.

22. A eia kekahi, ma ia hope iho, hoomaka ae la na wahahee ana e hoouna ia ae mawaena o na kanaka, e Satana, e hoopaakiki iho i ko lakou mau naau, i mea i manaoio ole ai lakou ma kela mau ouli a mau mea kupanaha a lakou i ike ai; aka me keia mau wahahee ana a mau hoopunipuni ana, ua manaoio nae ka nui loa o na kanaka, a ua hoohuli ia mai i ka Haku.

23. A eia kekahi, hele aku la o Nepai mawaena o na kanaka, a me na mea e ae he nui wale no hoi, e bapetizo ana i ka mihi, a ma ia mea, ua kala nui ia na hala. A pela i hoomaka hou ai na kanaka e loaa ka maluhia ma ka aina;

24. A, aole no na paio, koe he poe kakaikahi wale no i hoomaka e hai aku, me ka hoao ana e hooiaio ma o na palapala hemolele la, aole ia he mea e pono hou ai e malama i ke kanawai o Mose. Ano, ma keia mea kuhihewa iho la lakou, no ka hoomaopopo ole i na palapala hemolele.

25. Aka, eia kekahi, ua hoohuli koke ia lakou, a ua hoomaopopo ia lakou no ke kuhihewa o lakou, no ka mea, ua hoike ia mai la ia lakou aole i ko ke kanawai i keia manawa, a e hooko ia ia e pono ai ma kela lihi keia lihi; he oiaio, hiki mai la ka olelo io lakou la e hooko ia ia e pono ai; he oiaio, aole e lilo aku kahi huna, aole hoi kahi lihi iki, a pau loa ae la ia i ka hooko ia; nolaila, ma keia makahiki hookahi, ua kai ia mai la lakou e ike i ko lakou lalau, a hai mai la no i ko lakou mau hewa.

26. A pela i hala aku ai ka makahiki kanaiwakumamalua, me ka lawe ana mai i na lono hauoli i na kanaka no na hoailona i hiki mai ai, e like me na olelo o ka wanana a ka poe kaula hemolele a pau.

27. A eia kekahi, hala aku la no hoi ka makahiki kanaiwakumamakolu me ka maluhia, koe wale no ko Gadianatona poe powa, ka poe i noho ma na mauna, na lakou i hoopilikia i ka aina; no ka mea, no ka ikaika loa o ko lakou mau wahi paa a me ko lakou mau wahi malu, ua hiki ole i na kanaka ke lanakila maluna iho o lakou; nolaila, nui ko lakou pepehi kanaka ana, a luku ana mawaena o na kanaka.

28. A eia kekahi, ma ka makahiki kanaiwakumamaha, hoomaka ae la lakou e mahuahua nui loa aku, no ka mea, he nui loa na mea ku e o ko Nepai poe i holo aku io lakou la, a he mea ia i hookaumaha nui aku ai i kela poe o Nepai e noho ana ma ka aina;

29. A he kumu hoi no ke kaumaha nui mawaena o ko Lamana poe; no ka mea, he nui na keiki a lakou i ulu ae a hoomaka ae la e mahuahua ikaika ma na makahiki, i kuokoa ai lakou, a ua alakai ia aku e kekahi poe o ko Zorama, ma na wahahee ana a lakou, a ma na olelo hoomalimali ana a lakou, e hui me ua poe powa la o Gadianatona;

30. A pela i hoopilikia pu ia ai ko Lamana poe no hoi, a hoomaka ae la e emi iho ma ko lakou manaoio a me ka pono, no ka hewa o ka hanauna hou.