1. A eia kekahi, ia Iesu i olelo mai ai i ua mau olelo nei ia Nepai, a i ka poe i hea ia, (ano, he umikumamalua ka nui o ka poe i hea ia, a i loaa ka mama a me ka oihana e bapetizo,) a, aia hoi, hohola mai la oia i kona lima i na kanaka, a hea mai la ia lakou, i ka i ana: Pomaikai oukou, ke hoolohe mai oukou i na olelo a ua poe umikumamalua nei, aʻu i wae aku ai maiwaena mai o oukou e lawelawe aku ia oukou, a e lilo i poe kauwa na oukou; a ia lakou wau i haawi aku ai i ka mana, i bapetizo aku ai lakou ia oukou me ka wai, a mahope iho o ko oukou bapetizo ia ana me ka wai, aia hoi, e bapetizo aku au ia oukou me ke ahi a me ka Uhane Hemolele; nolaila, pomaikai oukou, ina e manaoio mai oukou iaʻu, a e bapetizo ia aku, mahope iho o ko oukou nana ana iaʻu, a ike ana ke ola nei wau.

2. A eia hou, pomaikai loa lakou ka poe e manaoio mai ana ma ka oukou mau olelo, no ko oukou hoike ana ua nana mai oukou iaʻu, a ua ike oukou ke ola nei owau. He oiaio, pomaikai ka poe e manaoio auanei i ka oukou mau olelo, a e iho ilalo iloko o na hohonu o ka haahaa, a e bapetizo ia; no ka mea, e hoolauna ia aku auanei lakou me ke ahi a me ka Uhane Hemolele, a e loaa auanei ke kala ia ana o ko lakou mau hala.

3. He oiaio, pomaikai ka poe i haahaa ma ka uhane, ka poe i hele mai ioʻu nei, no ka mea, no lakou ke aupuni o ka lani.

4. A eia hou, pomaikai ka poe a pau e u ana, no ka mea, e hooluolu ia aku lakou;

5. A pomaikai ka poe akahai, no ka mea, e lilo auanei ka honua ia lakou.

6. A pomaikai ka poe a pau i pololi a makewai no ka pono; no ka mea, e hoomaona ia lakou me ka Uhane Hemolele.

7. A pomaikai ka poe i aloha aku, no ka mea, e aloha ia mai lakou.

8. A pomaikai ka poe a pau i maemae ma ka naau, no ka mea, e ike lakou i ke Akua.

9. A pomaikai ka poe uwao a pau, no ka mea, e i ia ae lakou he poe keiki na ke Akua.

10. A pomaikai ka poe a pau i hana ino ia mai no koʻu inoa, no ka mea, no lakou ke aupuni o ka lani.

11. A e pomaikai ana no oukou, ke hoino mai na kanaka ia oukou, a e hoomaau mai hoi, a noʻu nei e olelo wahahee mai ai ia oukou i na mea ino a pau,

12. No ka mea, e loaa ia oukou ka hauoli nui a e olioli nui hoi, no ka mea, he nui ka uku no oukou ma ka lani; pela lakou i hoomaau aku ai i ka poe kaula mamua o oukou.

13. Oiaio, he oiaio kaʻu e olelo aku nei ia oukou, ke haawi aku nei au ia oukou e lilo i paakai no ka honua; aka, ina e pau auanei ka liu o ka paakai, pehea la e liu ia ai ka honua? Aohe o ka paakai mea e pono ai ma ia hope, e kiola wale ia iwaho, a e hehi ia malalo iho o na wawae o na kanaka.

14. Oiaio, he oiaio kaʻu e olelo aku nei ia oukou, ke haawi aku nei au ia oukou e lilo i malamalama o keia poe kanaka. O ke kulanakauhale i ku ma kahi kiekie aole ia e nalowale.

15. Aia hoi, ke hoa aku nei anei na kanaka i ke kukui a waiho aku ia mea malalo iho o ke poi? Aole, aka ma kahi e kau ai o ke kukui, a e haawi ana ia i ka malamalama i ka poe a pau iloko o ka hale;

16. Nolaila, e hoakaka aku oukou i ko oukou malamalama imua o keia poe kanaka, i ike mai ai lakou i ka oukou hana maikai ana, a i hoonani aku ai i ko oukou Makua i ka lani.

17. Mai manao oukou i hele mai nei au e hoopau i ke kanawai a me ka ka poe kaula. Aole au i hele mai nei e hoopau, aka e hooko;

18. No ka mea, he oiaio kaʻu e olelo aku nei ia oukou, aole i lilo aku kahi huna aole hoi kahi lihi iki mai ke kanawai ae, aka iloko oʻu ua hooko ia mai ia mea a pau.

19. Aia hoi, ua haawi aku au ia oukou i ke kanawai a me na kauoha a koʻu Makua, i manaoio mai ai oukou iaʻu, a i mihi ai oukou i ko oukou mau hewa, a hele mai ioʻu nei me ka naau pepe a me ka uhane akahai. Aia hoi, ia oukou na kauoha imua o oukou, a ua ko iho la no ke kanawai;

20. Nolaila, e hele mai oukou ioʻu nei, a e hoola ia aku oukou; no ka mea, he oiaio kaʻu e olelo aku nei ia oukou, ina aole oukou e malama i kaʻu mau kauoha, aʻu i kauoha aku ai ia oukou i keia manawa, aole loa oukou e komo mai iloko o ke aupuni o ka lani.

21. Ua lohe oukou ua olelo ia mai e ka poe o ka wa kahiko, a ua palapala ia no hoi imua o oukou, Mai pepehi kanaka oe; a o ka mea e pepehi i ke kanaka, e lilo ana ia i ka hoohewa ia e ke Akua.

22. Aka, eia kaʻu e olelo aku nei ia oukou, o ka mea e huhu aku i kona hoahanau, e lilo ana ia i kona hoohewa ana. O ka mea e olelo ae i kona hoahanau, E, Raka, e lilo ia i mea no ka aha hookolokolo; a o ka mea e olelo aku, E, ka lapuwale, e lilo ia i mea no ke ahi o gehena;

23. Nolaila, ina e hele mai oukou ioʻu nei, a e makemake paha e hele mai ioʻu nei, a i manao he mea ka kou hoahanau e ku e ia oe,

24. E hele aku i kou hoahanau la, a e hoolaulea mua ia i kou hoahanau, alaila, e hele mai ioʻu nei me ka manao ikaika o ka naau, a naʻu oukou e hookipa aku.

25. E hoolaulea koke aku oe i kou hoa ku e, oiai oe me ia ma ke alanui, o hopu aku oia ia oe i kekahi manawa, a e hoolei ia aku oe iloko o ka halepaahao.

26. Oiaio, he oiaio kaʻu e olelo aku nei ia oe, aole loa oe e puka e mai iwaho olaila, a pau ae la ka senine hope i ka uku ia e oe. A oiai oe iloko o ka halepaahao, e hiki anei ia oe ke uku aku i hookahi senine? Oiaio, he oiaio kaʻu e olelo aku nei ia oukou, aole.

27. Aia hoi, ua palapala ia e ka poe o ka wa kahiko, Mai moekolohe oe:

28. Aka, eia kaʻu e olelo aku nei ia oukou, o ka mea e nana ana i ka wahine, e kuko hewa aku ia ia, ua moekolohe no oia ia manawa ma kona naau.

29. Aia hoi, ke haawi aku nei au i kauoha ia oukou, i ae ole aku oukou i kekahi o ua mau mea nei e komo iloko o ko oukou naau;

30. No ka mea, e aho no oukou e hoole ia oukou iho i keia mau mea, ma na mea a oukou e hapai ai i ko oukou kea, mamua o ko oukou hoolei ia ana iloko o gehena.

31. Ua palapala ia, o ka mea hoohemo i kana wahine, e haawi aku oia nana i ka palapala no ka hemo ana.

32. Oiaio, he oiaio kaʻu e olelo aku nei ia oukou, o ka mea e hoohemo wale i kana wahine, ke ole ia no ka foranikationa, nana no ia e hoomoekolohe aku; a o ka mea e mare i ua wahine hemo la, ua moekolohe no ia.

33. A eia hou i palapala ia, Mai hoohiki wahahee oe, aka, e hooko aku oe no ka Haku i kau mea i hoohiki ai.

34. Aka oiaio, he oiaio kaʻu e olelo aku nei ia oukou, mai hoohiki iki; aole ma ka lani, no ka mea, o ko ke Akua noho alii ia;

35. Aole hoi ma ka honua, no ka mea, o kona keehana wawae ia;

36. Aole hoi oe e hoohiki ma ke poo, no ka mea, aole e hiki ia oe ke hoolilo i kekahi oho i eleele, aole hoi i keokeo;

37. Aka, penei ka oukou kamailio ana o ka ae, he ae ia; o ka ole, he ole ia; no ka mea, o ka mea i oi aku i keia, he ino ia.

38. Aia hoi, ua palapala ia, He maka no ka maka, a he niho no ka niho.

39. Aka, eia kaʻu e olelo aku nei ia oukou, mai hoopai aku oe i ka ino, aka o ka mea nana oe e papai mai ma kou papalina akau, e haliu aku oe ia ia ma kekahi.

40. A ina e kahihi wale aku kekahi kanaka ia oe ma ke kanawai, a e lawe i kou kapa komo, e ho hou aku no hoi ia ia i kou aahu.

41. A o ka mea e koi mai ia oe e hele i hookahi mile, e hele pu me ia i elua.

42. O ka mea e noi mai ia oe, e haawi aku naua, a o ka mea e noi e lawe lilo ole i kau mea, mai kaii ae oe.

43. Aia ua palapala ia no hoi, E aloha aku i kou hoalauna, a e inaina aku i kou enemi;

44. Aka hoi, eia kaʻu e olelo aku nei ia oukou, e aloha aku i ko oukou poe enemi, e hoomaikai aku hoi i ka poe kuamuamu mai ia oukou, e hana lokomaikai aku hoi i ka poe inaina mai ia oukou, a e pule aku hoi i ka poe e hana ino mai ia oukou, a hoomaau mai ia oukou;

45. I lilo ai oukou i poe keiki na ko oukou Makua i ka lani; no ka mea, nana no i hoopuka mai i kona la maluna o ka poe ino a me ka poe maikai;

46. Nolaila, o ua mau mea la o ka wa kahiko, na mea malalo iho o ke kanawai iloko oʻu, ua ko a pau loa.

47. Ua hoopau ia aku na mea kahiko, a ua lilo na mea a pau i hou;

48. Nolaila, ke makemake nei au i hemolele oukou e like me au nei, a me ka hemolele o ko oukou Makua ma ka lani.