1. Ano hoi, ke olelo aku nei au ia oukou, he mea e pono ai no oukou e imi i keia mau mea. He oiaio, he kauoha kaʻu e haawi aku nei ia oukou, e imi ikaika oukou i keia mau mea; no ka mea, ua nani na olelo a lsaia.

2. No ka mea, he oiaio, olelo mai la oia no na mea a pau no koʻu poe kanaka o ko ka hale o Iseraela, nolaila, he mea e pono ai nana e olelo aku hoi i ka poe Genetile.

3. A o na mea a pau ana i olelo mai ai, ua hiki mai, a e hiki mai ana, e like io me na olelo ana i olelo mai ai.

4. Nolaila e hoolohe mai i kaʻu mau olelo, e kakau i na mea aʻu i olelo aku ai ia oukou; a e like me ka manawa a me ka makemake o ka Makua, e hele aku auanei ia mau mea i ka poe Genetile.

5. A o ka mea e hoolohe ana i kaʻu mau olelo, a e mihi, a e bapetizo ia, oia ke hoola ia. E imi i ka ka poe kaula, no ka mea, he nui loa na mea e hoike mai ana no ua mau mea nei.

6. Ano, eia kekahi, ia Iesu i olelo mai ai i keia mau olelo, i hou mai la oia ia lakou, mahope iho o kona wehewehe ana ia lakou i na palapala hemolele a pau i loaa ai ia lakou, i mai la oia ia lakou: Aia hoi, he mau olelo hemolele e ae kaʻu e makemake nei ia oukou e palapala aku, a oukou i palapala ole ai.

7. A eia kekahi, i mai la oia ia Nepai: E lawe mai i ka mooolelo a oukou i malama ai.

8. A ia Nepai i lawe mai ai i na mooolelo, a waiho iho la ia mau mea imua ona, alawa ae la oia i kona mau maka ma ia mau mea, a i mai la:

9. He oiaio kaʻu e olelo aku nei ia oukou, kauoha aku la au i kaʻu kauwa ia Samuela, ka Lamana, e hoike aku oia i keia poe kanaka, ma ka la a ka Makua e hoonani mai ai i kona inoa iloko oʻu, he nui no ka poe hoano e ala ana mai ka make mai, a e ikea e na mea he nui wale, a e lawelawe aku ia lakou. A i mai la oia ia lakou: Aole anei pela?

10. A olelo aku la kana poe haumana ia ia, a i aku la: He oiaio, e ka Haku e, wanana mai la o Samuela e like me kau mau olelo, a ua ko mai la ia mau mea a pau.

11. A i mai la o Iesu ia lakou, Heaha la ko oukou mea i palapala ole ai i keia mea, ua ala mai la na mea hoano he nui a ikea e kekahi poe he nui wale, a lawelawe mai la ia lakou?

12. A eia kekahi, hoomanao iho la o Nepai ua palapala ole ia keia mea.

13. A eia kekahi, kauoha mai la o Iesu, e palapala ia ia mea; nolaila, ua palapala ia ia mea me ia i kauoha mai ai.

14. Ano, eia kekahi, ia Iesu i wehewehe mai ai i na palapala hemolele a pau a lakou i palapala ai i hookahi, kauoha mai la oia ia lakou, e ao aku lakou i na mea ana i wehewehe mai ai ia lakou.