1. A eia kekahi, kauoha mai la oia i ka lehulehu e hooki aku lakou i ka pule ana, a me kana poe haumana no hoi. A kauoha mai la oia ia lakou e hooki ole lakou i ka pule ana ma ko lakou mau naau.

2. A kauoha mai la oia ia lakou e ala ae, a e ku iluna ma ko lakou mau wawae. A ala ae la lakou, a ku iho la ma ko lakou mau wawae.

3. A eia kekahi, wawahi berena hou ae la oia, a hoopomaikai iho la ia mea, a haawi mai la i ka poe haumana e ai.

4. A ia lakou i ai ai, kauoha mai la oia ia lakou e wawahi berena ae lakou, a e haawi ae i na kanaka.

5. A ia lakou i haawi aku ai i na kanaka, haawi mai la no hoi oia ia lakou i waina e inu, a kauoha mai la ia lakou e haawi aku lakou i na kanaka.

6. Ano, aohe he berena, aohe hoi he waina, i lawe ia mai e ka poe haumana, aole hoi e na kanaka;

7. Aka haawi oiaio mai la nae oia ia lakou i berena e ai ai, a i waina hoi e inu ai;

8. A i mai la oia ia lakou, o ka mea e ai ana i keia berena, e ai ana oia i koʻu kino no kona uhane, a o ka mea e inu ana i keia waina, e inu ana ia i koʻu koko no kona uhane, a, aole kona uhane e pololi hou, aole hoi makewai hou, aka e hoopiha ia oia.

9. Ano, i ka wa o na kanaka a pau i ai ai a i inu ai, aia hoi, ua hoopiha ia lakou me ka Uhane, a hea aku la lakou me ka leo hookahi, a hoonani aku la ia Iesu, a lakou i ike aku ai a i lohe ai no hoi.

10. A eia kekahi, ia lakou a pau i hoonani aku ai ia Iesu, i mai la oia ia lakou: Aia hoi, ke hoopau aku nei au i ke kauoha a ka Makua i kauoha mai ai iaʻu no keia poe kanaka, he koena hoi lakou o ko ka hale o Iseraela.

11. Ke hoomanao nei oukou ua olelo aku la au ia oukou: a i aku la, I ka wa e hooko ia ai na olelo a Isaia, aia hoi, ua palapala ia ia mau mea, aia no ia mau mea imua o oukou, nolaila, e huli ia mau mea.

12. Oiaio, he oiaio kaʻu e olelo aku nei ia oukou, i ka wa e hooko ia ai ia mau mea, alaila ka hooko ia ana o ka berita a ka Makua i hana mai ai i kona poe kanaka, e ko ka hale o Iseraela.

13. Alaila, e houluulu ia mai ai na koena, ka poe e hoopuehu ia aku auanei ma ka ili o ka honua nei, mai ka hikina mai, a mai ke komohana mai, a mai ka hema mai, a mai ka akau mai; a e lawe ia mai lakou i ka ike no ka Haku ko lakou Akua, nana lakou i hoolapanai mai.

14. A ua kauoha mai la ka Makua iaʻu e haawi aku au ia oukou i keia aina, no ko oukou hooilina.

15. A ke i aku nei au ia oukou, ina e mihi ole ka poe Genetile, mahope iho o ka pomaikai e loaa ai ia lakou, mahope iho hoi o ko lakou hoopuehu ana aku i koʻu poe kanaka;

16. Alaila, e hele aku oukou ka poe koena o ko ka hale o Iakoba, mawaena o lakou; a mawaena konu auanei oukou o lakou, ka poe nui loa; a mawaena auanei oukou o lakou, me he liona la mawaena o na holoholona o ka ululaau, a me he liona opio la mawaena o na pua hipa, nana, ke hele oia mawaena, e hahi ilalo a haehae aku a liilii, a aole e hiki i kekahi ke hoopakele.

17. E hapai ia kou lima maluna iho o kou poe ku e mai, a e hooki ia aku kou poe enemi a pau.

18. A e houluulu mai au i koʻu poe kanaka i kahi hookahi, me he kanaka la i houluulu ai i kona mau pua palaoa iloko o kahi hehi;

19. No ka mea, e hoolilo aku au i koʻu poe kanaka, ka poe a ka Makua i hana berita mai ai, he oiaio, e hoolilo aku au i kou pepeiaohao i hao, a e hoolilo aku au i kou mau maiuu wawae i keleawe. A e kui iho oe a okaoka liilii i na kanaka he nui; a e hoolaa aku i ko lakou loaa no ka Haku, a i ko lakou waiwai i ka Haku o ka honua a pau. Aia hoi, owau no ka mea nana e hana ia mea.

20. A e hiki io mai auanei, wahi a ka Makua, e kau mai ka pahikaua a koʻu hoopai maluna ae o lakou ma ia la; a ke mihi ole lakou, e haule auanei ia maluna o lakou, wahi a ka Makua, he oiaio, maluna iho o na lahuikanaka a pau o ka poe Genetile.

21. A e hiki io mai auanei, e hookupaa aku au i koʻu poe kanaka, e ko ka hale o Iseraela.

22. Aia hoi, e hookupaa aku au i keia poe kanaka ma keia aina, i ka hooko ana i ka °berita aʻu i hana aku ai me ko oukou kupuna kane o Iakoba; a e lilo auanei ia i Ierusalema hou. A mawaena konu auanei o keia poe kanaka na mana o ka lani; he oiaio, e noho no au iwaena konu o oukou.

23. Aia hoi, owau no ka mea a Mose i olelo mai ai, i ka i ana: E hooku mai auanei ka Haku, ko oukou Akua, i kekahi kaula no oukou e like me au, mai ko oukou poe hoahanau ae, a e hoolohe oukou ia ia ma na mea a pau ana e olelo mai ai ia oukou. A e hiki mai keia, o ka mea e hoolohe ole i ua kaula la, e oki ia aku ia, mai kona poe kanaka aku.

24. He oiaio kaʻu e olelo aku nei, ua oiaio; a o na kaula a pau mai ia Samuela mai, a me ka poe e hahai ana mahope mai ona, ka poe a pau i olelo mai, ua hoike mai la noʻu.

25. Aia hoi, o oukou no na mamo o ka poe kaula; a no ko ka hale o Iseraela oukou; a no ka berita oukou a ka Makua i hana mai ai me ko oukou poe kupuna, me ka i ana ia Aberahama, Ma kau hua, e hoopomaikai ia aku auanei na ohana a pau o ka honua;

26. Ua hooku mua mai la ka Haku iaʻu no oukou, a hoouna mai la iaʻu e hoopomaikai aku ia oukou, i ka hoohuli ana mai i kela mea keia mea o oukou mai kona mau hala ae; a o keia, no ka mea, he poe keiki oukou a ka berita.

27. A mahope iho o ko oukou hoopomaikai ia ana, alaila, e hooko ana ka Makua i ka berita ana i hana mai ai me Aberahama, i ka i ana: Ma kau hua e hoopomaikai ia aku na ohana a pau o ka honua, ma ka ninini ana o ka Uhane Hemolele ma oʻu nei maluna iho o ka poe Genetile, a o keia pomaikai maluna iho o ka poe Genetile, e hoolilo no ia mea ia lakou i poe ikaika loa mamua o na mea a pau, ma ka hoopuehu ana aku i koʻu poe kanaka, e ko ka hale o Iseraela;

28. A e lilo auanei lakou i poe hahau i na kanaka o keia aina. Aka hoi, ia lakou e loaa ai kuu euanelio mana a pololei, alaila, ina e hoopaakiki ku e mai lakou i ko lakou mau naau iaʻu, e hoihoi hou aku no au i ko lakou mau hala maluna iho o ko lakou mau poo iho, wahi a ka Makua.

29. A e hoomanao no au i ka berita aʻu i hana aku ai me koʻu poe kanaka, a ua hana berita aku au me lakou, e houluulu mai au ia lakou i kahi hookahi, i koʻu manawa kupono; i haawi hou aku ai au ia lakou i ka aina o ko lakou poe kupuna, i hooilina no lakou, oia no ka aina o Ierusalema, oia no ka aina pomaikai no lakou no ka wa pau ole, wahi a ka Makua.

30. A eia kekahi, e hele mai ana ka manawa, e hai ia aku ai kuu euanelio mana a pololei ia lakou,

31. A e manaoio mai no lakou iaʻu, owau no o Iesu Kristo, ke Keiki a ke Akua, a e pule aku i ka Makua ma koʻu inoa.

32. Alaila e hookiekie no ko lakou poe kiai i ko lakou leo; a me ka leo lakou e hookani pu ai; no ka mea, e alikealike auanei ko lakou ike ana.

33. Alaila, e houluulu hou pu mai no ka Makua ia lakou, a e haawi aku ia lakou ia Ierusalema i aina hooilina no lakou.

34. Alaila e hookani olioli lakou-e olioli pu oukou, e na wahi neoneo o Ierusalema; no ka mea, ua hoomaha ka Makua i kona poe kanaka, ua hoolapanai oia ia Ierusalema.

35. Ua hoike ka Makua i kona lima hemolele imua o na maka o na lahuikanaka a pau; a e ike no na kukulu a pau o ka honua i ka hoola ana o ka Makua; a o ka Makua a me au hookahi maua.

36. Alaila e hooko ia ka mea i palapala ia: E ala, e ala hou a e aahu i kou ikaika, e Ziona; o komo i kou lole nani, e Ierusalema, ke kulanakauhale laa; no ka mea, ma keia wa aku aole e hele hou iloko ou, ka mea i okipoepoe ole ia a me ka haumia.

37. E lulu ia oe iho mai ka lepo ae; e ku iluna, a e noho ilalo, e Ierusalema; e wehe oe i na mea paa o kou ai, e ke kaikamahine pio o Ziona.

38. No ka mea, penei wahi a ka Haku, ua kuai aku oukou ia oukou iho no ka ole; a e hoolapanai ia auanei oukou me ke kala ole.

39. Oiaio, he oiaio kaʻu e olelo aku nei ia oukou, e ike koʻu poe kanaka i koʻu inoa; he oiaio, ma ia la e ike no lakou wau no ka mea e olelo ana.

40. Alaila, e i ae lakou, E, nani wale ma na mauna na wawae o ka mea e lawe mai ana i ka olelo maikai ia lakou, ka mea e hoolaha ana i ka malu; ka mea e lawe mai ana i ka olelo maikai o ka olioli ia lakou, ka mea e hoolaha ana i ke ola; ka mea e olelo ana ia Ziona, ke noho alii nei kou Akua!

41. Alaila e laha aku kekahi leo, E haalele oukou, e haalele oukou, e puka aku oukou mawaho olaila, mai hoopa aku i ka mea haumia; e puka aku oukou mailoko aku ona; e huikala ia oukou, e ka poe e halihali ana i na ipu o ka Haku.

42. No ka mea, aole oukou e puka aku me ka holo, aole hoi e hele me ka auhee; no ka mea, e hele no ka Haku imua o oukou, a o ke Akua o ka Iseraela auanei ko oukou kiai hope.

43. Aia hoi, e hana noiau auanei kaʻu kauwa, e hapai ia no hoi ia, a e hookiekie ia, a e kiekie loa auanei oia.

44. Me kekahi poe he nui i haohao ai ia oe; (ua oi aku ka hoomainoino ia ana o kona maka mamua o ko kekahi kanaka e ae, a o kona helehelena hoi mamua o ko na keiki a kanaka,)

45. Pela no oia e pipi ai i na lahuikanaka he nui loa; e pani na alii i ko lakou mau waha ia ia, no ka mea, e ike auanei lakou i ka mea i hai ole ia aku ia lakou a e noonoo pono lakou i ka mea a lakou i lohe ole ai.

46. Oiaio, he oiaio kaʻu e olelo aku nei ia oukou, e hiki oiaio mai ua mau mea nei a pau, me ka ka Makua i kauoha mai ai iaʻu. Alaila, e hooko ia ai keia berita a ka Makua i berita ai me kona poe kanaka; alaila, e hoonoho hou ia o Ierusalema me koʻu poe kanaka, a e lilo auanei ia i aina hooilina no lakou.