1. A eia kekahi, ua lohe ia kekahi leo mawaena o ko ka honua a pau maluna iho o ka ili o keia aina, e hea ana:

2. Auwe, auwe, auwe keia poe kanaka; auwe ko ka honua a pau, ke ole lakou e mihi, no ka mea, ke akaaka la ke diabolo, a ke hauoli la kona poe anela, no ka poe i pepehi ia o na keikikane a me na kaikamahine maikai a koʻu poe kanaka; a no ko lakou hewa a mau mea hoopailua i haule ai lakou.

3. Aia hoi, ua puhi au i kela kulanakauhale nui, o Zarahemela i ke ahi, a me kolaila poe.

4. A, aia hoi, naʻu i hoopoho iho i kela kulanakauhale nui, o Moroni, iloko o na hohonu o ke kai, a me kolaila poe e make i ke kai.

5. A, aia hoi, ua uhi aku la au i kela kulanakauhale nui, o Moroniha, me ka lepo, a me kolaila poe, e huna iho i ko lakou mau hewa a me ko lakou mea hoopailua mai koʻu maka aku, i hiki hou ole mai ai ke koko o ka poe kaula a me ka poe hoano, ma neia hope aku, ioʻu nei e ku e ia lakou.

6. A naʻu i hoopoho iho la i ke kulanakauhale o Gilegala, a i kolaila poe, e kanu ia iho iloko o ka hohonu o ka honua;

7. He oiaio, a me ke kulanakauhale o Oniha, a me kolaila poe, a me ke kulanakauhale o Mokuma, a me kolaila poe, a me ke kulanakauhale o Ierusalema, a me kolaila poe, a naʻu i kena aku i na wai e pii mai ma na hakahaka o ia mau wahi, e huna iho i ko lakou hewa a me na mea hoopailua mai koʻu maka aku, i pii hou ole mai ai ke koko o ka poe kaula a me ka poe hoano, ma neia hope aku, ioʻu nei e ku e ia lakou.

8. A, aia hoi, o ke kulanakauhale o Gidianadi, a me ke kulanakauhale o Gadiomana, a me ke kulanakauhale o Iakoba, a me ke kulanakauhale o Gimagimano, naʻu ua mau wahi nei i hoopoho iho, a hana aku la i na puu a me na awawa ma na hakahaka o ia mau wahi, a ua kanu iho au i kolaila poe iloko o na hohonu o ka honua, e huna iho i ko lakou hewa a me na mea hoopailua mai koʻu maka aku, i pii hou ole mai ai ke koko o ka poe kaula a me ka poe hoano, ma neia hope aku, ioʻu nei e ku e ia lakou.

9. A, aia hoi, o kela kulanakauhale nui, o Iakobugata, i noho ia ai e na kanaka o ke alii, o Iakoba, naʻu ia i kena e i puhi ia aku i ke ahi, no ko lakou mau hewa a me ka lakou hana ino, e kela ana ia i ka hewa a pau o ka honua a puni, no ko lakou pepehi kanaka malu ana a hui malu pu ana; no ka mea, o lakou no ka i hoopau aku i ka maluhia o koʻu poe kanaka, a me ka noho aupuni ana o ka aina; nolaila, kena ae la au e puhi ia aku lakou, e luku aku ia lakou mai koʻu maka aku, i pii hou ole mai ai ke koko o ka poe kaula a me ka poe hoano, ma neia hope aku, ioʻu nei e ku e ia lakou.

10. A, aia hoi, o ke kulanakauhale o Lamana, a me ke kulanakauhale o Iosa, a me ke kulanakauhale o Gada, a me ke kulanakauhale o Kisakumena, naʻu i kena i puhi ia aku ia mau wahi i ke ahi, a me kolaila poe, no ko lakou hewa ma ka hookuke ana aku i ka poe kaula iwaho, a hailuku ana i ua poe la, aʻu i hoouna aku ai e hai ia lakou no ko lakou hewa, a me ko lakou mau mea hoopailua;

11. A no ko lakou hookuke ana aku ia lakou nei a pau iwaho, i ole ai kekahi mea pono iwaena o lakou, hoouna iho la au i ke ahi ilalo a luku aku la ia lakou, i huna ia aku ai ko lakou hewa a me na hoopailua mai koʻu maka aku, i hea ole mai ai ioʻu nei ke koko o ka poe kaula a me ka poe hoano aʻu i hoouna aku ai mawaena o lakou, mai ka lepo mai e ku e ia lakou;

12. A nui wale na luku nui aʻu i kena ai e hiki aku maluna iho o keia aina, a maluna o keia poe kanaka, no ko lakou hewa a me ko lakou mau mea hoopailua.

13. E ka poe a pau i hookoe ia, no ka oi aku o ko oukou pono mamua o ko lakou, aole anei oukou e hoi hou mai ano ioʻu nei, a e mihi i ko oukou mau hewa, a e hoohuli ia ae, i hiki iaʻu ke hoola ia oukou?

14. Oiaio, he oiaio kaʻu e olelo aku nei ia oukou, ina e hele mai oukou ioʻu nei, e loaa auanei ia oukou ke ola mau loa. Aia hoi, ua kikoo ia aku kuu lima aloha ia oukou, a o ka mea e hele mai, naʻu ia e hookipa; a pomaikai ka poe i hele mai ioʻu nei.

15. Aia hoi, owau no o Iesu Kristo, ke Keiki a ke Akua. Naʻu i hana i na lani a me ka honua, a me ko lakou mau mea a pau e piha ai. Owau pu me ka Makua mai kinohi mai. Owau no iloko o ka Makua, a o ka Makua iloko oʻu; a iloko oʻu i hoonani ai ka Makua i kona inoa.

16. Hele ae la au i koʻu poe ponoi, a hookipa ole mai koʻu poe ponoi iaʻu. A ua ko iho la na palapala hemolele, no koʻu hiki ana mai.

17. A o ka poe a pau i hookipa mai iaʻu, ia lakou wau i haawi aku ai e lilo i poe keiki na ke Akua; a pela no hoi au i ka poe a pau e manaoio mai ma koʻu inoa, no ka mea hoi, ma oʻu nei i hiki mai ai ka hoolapanai, a iloko oʻu nei i ko ai ke kanawai o Mose.

18. Owau no ka malamalama a me ke ola o ke ao nei. Owau no o Alapa a Omega, ka mua a me ka hope.

19. A mai mohai hou mai iaʻu ma neia hope aku i ka hookahe ana i ke koko; he oiaio, e hoopau ia aku ko oukou mau mohai a me ko oukou mau alana kuni, no ka mea, aole au e hookipa mai i kekahi o ko oukou mau mohai a me ko oukou mau alana kuni;

20. A na oukou e haawi mai i mohai iaʻu, i ka naau pepe a i ka uhane mihi. A o ka mea e hele mai ioʻu nei me ka naau pepe a me ka uhane mihi, ia ia wau e bapetizo aku ai me ke ahi a me ka Uhane Hemolele, oia, e like me ko Lamana poe, no ko lakou manaoio mai iaʻu, i ka wa o ko lakou hoohuli ia ana, i bapetizo ia aku ai me ke ahi a me ka Uhane Hemolele, a ua ike ole lakou ia mea.

21. Aia hoi, ua hele mai au i ko ke ao nei e lawe mai i ka hoolapanai ana i ko ke ao nei, e hoola aku i ko ke ao nei mai ka hewa ae;

22. Nolaila, o ka mea e mihi a e hele mai ioʻu nei me he keiki uuku la, ia ia wau e hookipa ai; no ka mea, o ka poe me neia ke aupuni o ke Akua. Aia hoi, no ka poe me neia wau i waiho aku ai i kuu ola, a ua lawe hou ae ia mea; nolaila ea, e mihi, a e hele mai ioʻu nei, e ko na welau o ka honua, a e hoola ia aku.