Mokuna 15
1. Ano, eia kekahi, ia Iesu i hoopau mai ai i keia mau olelo, alawa ae la oia i kona mau maka i o a ia nei maluna o na kanaka, a olelo mai la ia lakou, Aia hoi, ua lohe oukou i na mea aʻu i ao aku ai mamua o koʻu pii ana i koʻu Makua la; nolaila, o ka mea e hoomanao ana i keia mau olelo aʻu, a hana hoi ia mau mea, oia kaʻu e hookiekie ae iluna ma ka la hope.
2. A eia kekahi, ia Iesu i olelo mai ai i keia mau olelo, ike oia e kahaha ana kekahi poe, a haohao iho la i ka mea ana e olelo mai ai no ke kanawai o Mose; no ka mea, hoomaopopo ole iho la lakou i ka olelo, Ua hala aku la na mea kahiko, a ua lilo na mea a pau i hou.
3. A i mai la oia ia lakou, Mai kahaha no kaʻu olelo aku ia oukou, Ua hala aku la na mea kahiko, a ua lilo na mea a pau i hou.
4. Aia hoi, ke olelo aku nei au ia oukou, ua ko ke kanawai haawi ia mai ai ia Mose.
5. Aia hoi, owau no ka mea nana i haawi aku i ke kanawai, a owau no hoi ka mea nana i hana berita aku me koʻu poe kanaka, ka Iseraela; nolaila, ua ko ke kanawai ma oʻu nei, no ka mea, ua hele mai au e hooko i ke kanawai; nolaila, ua pau ae la ia.
6. Aia hoi, aole au e hoopau ana i ka ka poe kaula, no ka mea, o na mea a pau i ko ole ma oʻu nei, he oiaio, ke olelo aku nei au ia oukou, e ko auanei ia mau mea a pau loa.
7. A no kaʻu olelo ana aku ia oukou, Ua hala aku la na mea kahiko, aole au e hoopau aku i na mea i olelo ia no na mea e hiki mai ana.
8. No ka mea, o ka berita aʻu i hana aku ai me koʻu poe kanaka, aole ia i ko a pau loa; aka o ke kanawai i haawi ia mai ai ia Mose, ua pau iloko oʻu nei.
9. Aia hoi, owau no ke kanawai, a me ka malamalama; e nana mai oukou iaʻu, a e hoomau a hiki i ka hopena, a e ola auanei oukou, no ka mea, e haawi aku no au i ke ola mau loa i ka mea e hoomau ana a hiki i ka hopena.
10. Aia hoi, ua haawi aku au i na kauoha ia oukou; nolaila, e malama i kaʻu mau kauoha. A oia no ka ke kanawai a me ka ka poe kaula, no ka mea, hoike oiaio mai la lakou noʻu.
11. Ano, eia kekahi, ia Iesu i olelo mai ai i keia mau olelo, olelo mai la oia i ua poe umikumamalua la ana i wae mai ai:
12. O oukou no kaʻu poe haumana; a he malamalama oukou i keia poe kanaka, he koena lakou no ko ka hale o Iosepa.
13. Aia hoi, eia no ka aina o ko oukou hooilina; a ua haawi mai la ka Makua ia mea ia oukou.
14. Aole i haawi mai ka Makua i kauoha i kekahi manawa iaʻu, e hai aku au ia mea i ko oukou poe hoahanau ma Ierusalema;
15. Aole no hoi i haawi mai ka Makua i kekahi manawa i kauoha iaʻu, e hai aku au ia lakou no na ohana e ae o ka hale o Iseraela, ka poe a ka Makua i alakai aku ai mailoko aku o ka aina.
16. Eia ka ka Makua i kauoha mai ai iaʻu, e hai aku au ia lakou:
17. He poe hipa e ae no kaʻu; aole no keia pa; he pono hoi e alakai mai au ia lakou, a e lohe no auanei lakou i koʻu leo; a hookahi auanei pa hipa, a he kahuhipa hookahi hoi.
18. Ano, no ka ai oolea a me ka hoomaloka, hoomaopopo ole mai la lakou i kaʻu olelo; nolaila, ua kauoha ia mai au e ka Makua, aole e olelo hou aku no keia mea ia lakou.
19. Aka, he oiaio, ke olelo aku nei au ia oukou, ua kauoha mai la ka Makua iaʻu, a ke hai aku nei au ia mea ia oukou, ua hookaawale ia ae oukou maiwaena aku o lakou no ko lakou hewa; nolaila, no ko lakou hewa, ko lakou ike ole no oukou.
20. A he oiaio, ke olelo hou aku nei au ia oukou, ua hookaawale aku ka Makua i na ohana e ae mai o lakou ae; a no ko lakou hewa, ko lakou ike ole no lakou la.
21. A he oiaio kaʻu e olelo aku nei ia oukou, o oukou no ka poe aʻu i olelo aku ai, He poe hipa e ae no kaʻu, aole no keia pa; he pono hoi noʻu e alakai mai ia lakou, a e lobe auanei lakou i koʻu leo; a hookahi auanei pa hipa, a me ke kahuhipa hookahi hoi.
22. A hoomaopopo ole mai lakou iaʻu, no ka mea, manao iho la lakou o ka poe Genetile ia poe; no ka mea, aole lakou i hoomaopopo, e hoohuli ia mai auanei ka poe Genetile ma ka lakou hai olelo ana;
23. A aole lakou i hoomaopopo mai iaʻu, i kaʻu olelo ana, e lohe auanei lakou i koʻu leo; a aole lakou i hoomaopopo mai iaʻu, aole e lohe ana ka poe Genetile i kekahi manawa i koʻu leo; aole hoi au e hoike aku iaʻu iho ia lakou, ke ole ma o ka Uhane Hemolele la wale no.
24. Aka hoi, ua lohe oukou i kuu leo, a ike mai no hoi iaʻu; a o oukou no kaʻu poe hipa, a ua helu pu ia oukou mawaena o ka poe a kuu Makua i haawi mai ai iaʻu.