1. Ano, eia kekahi, ia Iesu i pii aku ai iloko o ka lani, puhee aku la na kanaka, a lawe ae la kela kanaka keia kanaka i kana wahine a me kana mau keiki, a hoi aku la i kona wahi iho.

2. A ua kui koke aku ka lono, iwaena o na kanaka, mamua o ka poeleele ana, ua ike na kanaka ia Iesu, a ua lawelawe mai la oia ia lakou, a e hoike mai ana no hoi oia ia ia iho ia la ae i na kanaka;

3. He oiaio, ia po a ao hoi ua kui aku ka lono no Iesu; a no ka nui o ka hoouna ana aku o lakou i na kanaka, he nui ka poe, he oiaio, he nui loa ka poe i hana ikaika ia po a ao, i hiki aku ai lakou, ia la ae, i kahi a Iesu e hoike mai ai ia ia iho i na kanaka.

4. A eia kekahi, ma ia la ae, i ka wa a na kanaka i akoakoa ai i kahi hookahi, aia hoi, o Nepai a me kona kaikaina ana i ho¬ala mai ai mai ka make mai, o Timoteo kona inoa, a me kana keiki no hoi, o Iona kona inoa, a Matoni no hoi, a me Matoniha, kona kaikaina, a me Kumena, a me Kumenonahi, a me Ieremia, a me Semanona, a me Iona, a me Zedekia, a me Isaia; ano oia na inoa o ka poe haumana a Iesu i wae mai ai. A eia kekahi, hele aku la lakou a ku iho la mawaena o na kanaka.

5. A, aia hoi, no ka lehulehu loa o na kanaka, kauoha aku la lakou e hookaawale ia aku lakou la iloko o na mahele he umikumamalua.

6. A ao aku la ka poe umikumamalua i na kanaka; a, aia hoi, kauoha aku la lakou i na kanaka e kukuli iho ma ka ili o ka honua, a e pule aku i ka Makua, ma ka inoa o Iesu.

7. A pule aku la na haumana no hoi i ka Makua, ma ka inoa o Iesu. A eia kekahi, ala ae la lakou a lawelawe aku la i na kanaka.

8. A ia lakou i lawelawe aku ai i ua mau olelo la a Iesu i olelo mai ai-aole e loli iki ana mai na olelo ae a Iesu i olelo mai ai ia lakou-aia hoi, kukuli hou iho la lakou, a pule aku la i ka Makua ma ka inoa o Iesu;

9. A pule aku la lakou no ka mea a lakou i makemake loa ai; a makemake aku la lakou e haawi ia mai ka Uhane Hemolele ia lakou.

10. A ia lakou i pule aku ai pela, iho iho la lakou i ke kapa o ka wai, a hahai mai la na kanaka ia lakou.

11. A eia kekahi, iho iho la o Nepai iloko o ka wai, a ua bapetizo ia.

12. A pii mai la oia mailoko mai o ka wai a hoomaka ae la e bapetizo aku. A bapetizo aku la oia i ua poe la a pau a Iesu i wae mai ai.

13. A eia kekahi, ia lakou a pau i bapetizo ia ai, a ua pii mai la mailoko mai o ka wai, haule mai la ka Uhane Hemolele maluna o lakou, a ua hoopiha ia mai lakou me ka Uhane Hemolele, a me ke ahi.

14. Aia hoi, ua hoopuni ia mai lakou a puni me he ahi la; a iho mai la ia mai ka lani mai, a ike mai la ka lehulehu ia mea, a ke hoike aku la; a iho mai la na anela mailoko mai o ka lani, a lawelawe mai la ia lakou.

15. A eia kekahi, oiai na anela e lawelawe ana i ka poe haumana, aia hoi, hiki mai la o Iesu a ku iho la mawaena konu, a lawelawe mai la ia lakou.

16. A eia kekahi, olelo mai la oia i na kanaka, a kauoha mai la ia lakou e kukuli hou lakou ilalo ma ka honua, a i kana poe haumana no hoi e kukuli iho ma ka honua.

17. A eia kekahi, ia lakou a pau i kukuli iho ai ma ka honua, kauoha mai la oia i kana poe haumana e pule lakou.

18. Aia hoi, hoomaka ae la lakou e pule; a pule aku la lakou ia Iesu, e kapa ana ia ia o ko lakou Haku a me ko lakou Akua.

19. A eia kekahi, hele aku la o Iesu maiwaena konu aku o lakou, a hele iki aku la mai o lakou aku, a kulou iho la oia i ka honua, a i ae la ia:

20. E ka Makua, ke hoalohaloha aku nei au ia oe, no kou haawi ana mai i ka Uhane Hemolele i keia poe aʻu i wae aku ai; a no ko lakou manaoio ana mai iaʻu, koʻu wae ana ia lakou noloko mai o ko ke ao nei.

21. E ka Makua e, ke pule aku nei au ia oe, e haawi mai oe i ka Uhane Hemolele i ka poe a pau e manaoio ana i ka lakou nei mau olelo.

22. E ka Makua e, ua haawi mai oe ia lakou nei i ka Uhane Hemolele, no ko lakou manaoio ana iaʻu, a ke ike mai nei oe ua manaoio mai lakou iaʻu, no ka mea, ke lohe nei oe ia lakou, a ke pule nei lakou iaʻu; a ke pule nei lakou iaʻu, no ka mea, owau pu me lakou.

23. Ano, e ka Makua e, ke pule aku nei au ia oe no lakou, a no ka poe a pau no hoi e manaoio ana ma ka lakou nei mau olelo, i manaoio mai ai lakou iaʻu, i noho au iloko o lakou me oe, e ka Makua, iloko oʻu, i hookahi kakou.

24. A eia kekahi, ia Iesu i pule aku ai pela i ka Makua, hele mai la oia i kana poe haumana la, aia hoi, hoomau iho la lakou, me ka hooki ole, e pule aku ia ia; aole lakou i hoonui i na olelo, no ka mea, ua haawi ia mai ia lakou ka mea a lakou e pule aku ai, a ua hoopiha ia mai lakou me ka makemake.

25. A eia kekahi, hoopomaikai mai la o Iesu ia lakou, me lakou i pule aku ai ia ia, a maliu oluolu mai la kona maka, a alohi mai la ka malamalama o kona maka ia lakou, a, aia, ua keokeo lakou e like me ka maka, a me na aahu no hoi o Iesu; a, aia hoi, oi aku la ke keokeo o ia mau mea mamua o ke keokeo a pau, he oiaio, aole loa he mea ma ka honua nei i like ke keokeo me ke keokeo o ia mau mea.

26. A i mai la o Iesu ia lakou: E pule, aole nae lakou i hooki i ka pule ana.

27. A huli hou ae la oia mai o lakou ae, a hele iki aku la, a kulou iho la oia i ka honua; a pule hou aku la oia i ka Makua, i ka i ana:

28. E ka Makua, ke hoalohaloha aku nei au ia oe no kou hoomaemae ana i ua poe la aʻu i wae aku ai, no ko lakou manaoio, a ke pule aku nei au no lakou, a no ka poe no hoi e manaoio ana ma ka lakou nei mau olelo, i hoomaemae ia ai lakou iloko oʻu, ma o ka manaoio la i ka lakou nei mau olelo, e like me lakou nei i hoomaemae ia ai iloko oʻu.

29. E ka Makua e, aole au e pule ana no ko ke ao nei, aka no ua poe la au i haawi mai ai iaʻu noloko mai o ko ke ao nei, no ko lakou manaoio, i hoomaemae ia mai ai lakou iloko oʻu, i noho au iloko o lakou e like me oe, e ka Makua, iloko oʻu, i hookahi kakou, i hoonani ia mai ai au iloko o lakou.

30. A ia Iesu i olelo mai ai i keia mau olelo, hele hou mai la ia i kana poe haumana la, a, aia hoi, e pule onipaa ana lakou, me ka hooki ole, ia ia; a maliu oluolu hou mai la oia ia lakou; aia hoi, ua keokeo lakou, e like me Iesu.

31. A eia kekahi, hele iki hou aku la oia, a pule aku la i ka Makua;

32. A ua hiki ole i ka alelo ke olelo mai i na olelo ana i pule aku ai, aole hoi e hiki ke palapala ia e kanaka na olelo ana i pule aku ai.

33. A lohe ae la ka lehulehu, a ke hoike aku la, a ua wehe ia na naau o lakou, a hoomaopopo iho la lakou ma ko lakou mau naau i na olelo ana i pule aku ai.

34. Aka hoi, no ka nui a kupaianaha o na olelo ana i pule aku ai, ua hiki ole ke palapala ia ia mau mea, aole hoi e hiki ke ekemu ia aku e kanaka.

35. A eia kekahi, ia Iesu i hoopau ai i kana pule ana, hele hou mai la oia i ka poe haumana la, a i mai la ia lakou: Aole loa au i ike i ka manaoio nui me keia, mawaena o ka poe Iudaio a pau; nolaila, ua hiki ole iaʻu ke hoike aku ia lakou i na hana mana nui me neia, no ko lakou manaoio ole.

36. He oiaio kaʻu e olelo aku nei ia oukou, aole loa kekahi o lakou i ike i na mea me oukou i ike ai; aole hoi lakou i lohe i na mea nui me oukou i lohe ai.