1. A eia kekahi, kauoha mai la oia ia lakou, e palapala iho i na olelo a ka Makua i haawi mai ai ia Malaki, ana e hai mai ai ia lakou. A eia kekahi, mahope iho o ka palapala ia ana o ia mau mea, wehewehe mai la oia ia mau mea. A eia na olelo ana i hai mai ai ia lakou, i ka i ana, peneia wahi a ka Makua ia Malaki: Aia hoi, e hoouna auanei au i koʻu elele, a nana e hoomakaukau i koʻu alanui imua oʻu, a e hiki wawe mai auanei ka Haku, a oukou e imi nei i kona luakini, oia ka elele o ka berita, o ka mea a oukou e olioli nei; aia hoi, e hele mai auanei ia, wahi a ka Haku o na Lehulehu.

2. Aka, owai ke hoomanawanui i ka la o kona hiki ana mai? A owai hoi ke kupaa i kona ike ia ana? No ka mea, ua like ia me ke ahi o ka mea hoohehee, a me ka sopa o ka mea hoomaemae.

3. A e noho ia me he mea hoohehee a me ka hoomaemae i ke kala; a e hoomaemae ia i na keiki a Levi, a e holoi ia lakou e like me ke gula a me ke kala, i mohai aku ai lakou i ka mohai iloko o ka pono i ka Haku.

4. Alaila, e oluolu ka mohai ana o ka Iuda a me ka Ierusalema i ka Haku, e like me ia i na la kahiko, a i na makahiki mamua.

5. A e hele aku no au a kokoke io oukou la e hooko i ke kanawai; a e lilo au i hoike hikiwawe e ku e aku i ka poe anaana, a me na moekolohe, a i na mea hoohiki wahahee, a me ka poe hooluhi hewa i ka mea hoolimalima ma kana uku, a i ka wahinekanemake, a me ke keiki makua ole, a i ka mea hoohuli ae i ka malihini, aole hoi makau iaʻu, wahi a ka Haku o na Lehulehu.

6. No ka mea, owau no ka Haku, aole au lauwili; nolaila, e na mamo o Iakoba, aole oukou i hoopau ia.

7. Mai na la mai o ko oukou poe kupuna, ua haalele oukou i koʻu mau kanawai, a ua malama ole ia mau mea. E hoi hou mai oukou ioʻu nei, a e hoi hou aku au io oukou la, wahi a ka Haku o na Lehulehu. Aka, olelo mai la oukou, Ma ke aha makou e hoi hou aku ai?

8. E hao anei ke kanaka i ke Akua? Aka, ua hao mai oukou iaʻu. Aka, ke ninau mai nei oukou, Ma ke aha ka makou i hao aku ai ia oe? Ma na hapaumi o ka waiwai, a me na mohai.

9. Ua hoopoino ia oukou me ka poino, no ka mea, ua hao mai oukou iaʻu, o keia lahuikanaka a pau.

10. E lawe mai i na waiwai hapaumi a pau iloko o ka hale ahu waiwai, i ai iloko o koʻu hale, a hoao mai oukou iaʻu ma ia mea, wahi a ka Haku o na Lehulehu, i wehe ai paha au i na puka o ka lani, a e ninini iho i ka pomaikai ia oukou, a loaa ole kahi nui kupono e malama ai ia mea.

11. A no oukou au e papa aku ai i ka mea hokai, a i hoopau ole ai ia i ka hua o ko oukou aina; aole hoi e hoolei mai ko oukou kumuwaina, i kona hua mamua o ka wa pono ma na mala, wahi a ka Haku o na Lehulehu.

12. A e kapa mai auanei na lahuikanaka a pau ia oukou, he pomaikai, no ka mea, he aina oluolu auanei oukou, wahi a ka Haku o na Lehulehu.

13. Ua oolea ka oukou mau olelo ku e mai iaʻu, wahi a ka Haku. Ke olelo mai nei nae oukou, penei, Heaha ka makou i olelo ku e ai ia oe?

14. Ua olelo oukou, ua makehewa ke malama i ke Akua, a heaha hoi ka pomaikai i ko kakou malama ana i ka mea ana i kauoha mai ai, a i ka hele kaumaha hoi imua o ka Haku o na Lehulehu.

15. A, ano ke kapa nei kakou i ka poe hookiekie, he pomaikai; he oiaio, ua kukulu ia ae iluna ka poe hana ino; he oiaio, ua hoopakele ia hoi ka poe i hoao i ke Akua.

16. Alaila, o ka poe i makau i ka Haku, kamailio pinepine pu iho la lakou kekahi i kekahi, a haliu mai la ka Haku, a hoolohe mai la; a ua kakau ia ka buke hoomanao imua ona no lakou, no ka poe i makau i ka Haku, a hoomanao hoi i kona inoa.

17. Noʻu auanei lakou, wahi a ka Haku o na Lehulehu, i ka la aʻu e ahu iho ai i kuu mau momi; a e hoola au ia lakou, e like me ka hoola ana o ke kanaka i kana keiki nana ia i malama.

18. Alaila, e hoi hou mai oukou a e hoomaopopo iwaena o ka poe pono a o ka poe hewa, iwaena hoi o ka mea malama i ke Akua, a o ka mea malama ole ia ia.