1. Ano, eia kekahi, ua akoakoa na kanaka he lehulehu ma kahi hookahi, o ka poe kanaka o Nepai, a puni ka luakini ma ka aina o Momona; a e haohao ana a e kahaha ana kekahi me kekahi, a e hoike ana kekahi i kekahi i ka loli kupanaha nui i hiki mai ai;

2. A e kamailio ana no hoi lakou no keia Iesu Kristo, ka mea nona ka hoailona i haawi ia mai no kona make.

3. A eia kekahi, oiai lakou e kamailio ana pela kekahi me kekahi, lohe ae la lakou i kekahi leo, me he mea la ua pae mai la ia mailoko mai o ka lani; a alawa ae la lakou i ko lakou mau maka i o a ia nei, no ka mea, hoomaopopo ole lakou i ka leo a lakou i lohe ai; a, aole ia he leo kalakala, aole hoi he leo nui; aka hoi, he leo uuku ia, hou mai la nae ia i ka poe i lohe, iwaena konu, a, aole kekahi wahi o ko lakou kino i hoohaalulu ole ia e ia; he oiaio, hou mai la ia ia lakou iloko loa, a hoowela mai la i na naau o lakou.

4. A eia kekahi, lohe hou aku la lakou i ka leo, a hoomaopopo ole lakou ia mea;

5. A lohe hou aku la lakou i ke kolu o ka manawa i ka leo, a hoohakahaka aku la i ko lakou mau pepeiao e lohe ia mea; a malaila na maka o lakou i kahi o ke kupinai; a haka pono aku la i ka lani, kahi o ka leo i pae mai ai;

6. A, aia hoi, i ke kolu o ka manawa hoomaopopo aku la lakou i ka leo a lakou i lohe ai; a i mai la ia ia lakou:

7. E nana mai i kaʻu Keiki punahele, iloko ona aʻu i olioli loa ai, iloko ona aʻu i hoonani ai i koʻu inoa, e hoolohe oukou ia ia.

8. A eia kekahi, ia lakou i hoomaopopo ai, leha hou ae la lakou i ko lakou mau maka i ka lani; a, aia hoi, ike aku la lakou i kekahi kanaka e iho mai ana mailoko mai o ka lani; a ua hoaahu ia oia i ka aahu keokeo, a iho iho la ia a ku iho la mawaena konu o lakou, a alawa ae la na maka o na kanaka a pau ia ia, a aa ole lakou e oaka ae i na waha o lakou, aole hoi kekahi i kekahi, a ike ole iho la i ke ano o ia mea, no ka mea, manao iho la lakou he anela ia i ikea e lakou.

9. A eia kekahi, hohola mai la ia i kona lima, a olelo mai la i na kanaka, i ka i ana:

10. Aia hoi, owau no o Iesu Kristo, ka mea a ka poe kaula i hoike aku ai e hele mai ana i ke ao nei;

11. A, aia hoi, owau no ka malamalama a me ke ola o ke ao nei; a ua inu iho la au noloko o kela apu awaawa a ka Makua i haawi mai ai iaʻu, a ua hoonani aku i ka Makua ma ka lawe ana maluna iho oʻu i na hala o ko ke ao nei, a ma ia mea wau i ae aku ai i ka makemake o ka Makua ma na mea a pau, mai kinohi mai.

12. A eia kekahi, ia Iesu i olelo mai ai i ua mau olelo nei, hina iho la ka poe kanaka a pau i ka honua, no ka mea, hoomanao iho la lakou ua wanana ia mawaena o lakou, e hoike ana o Kristo ia ia iho ia lakou mahope iho o kona pii ana i ka lani.

13. A eia kekahi, olelo mai la ka Haku ia lakou, i ka i ana:

14. E ala, a e hele mai ioʻu nei, e hiki ia oukou ke hou mai i ko oukou mau lima iloko o koʻu aoao, a e hiki no hoi ia oukou ke haha mai i na wahi o na kui ma koʻu mau lima, a ma koʻu mau wawae, i ike oukou owau no ke Akua o ka Iseraela, a o ke Akua o ko ka honua a pau, a ua pepehi ia mai a make no na hala o ko ke ao nei.

15. A eia kekahi, hele aku la na kanaka, a hou aku la i ko lakou mau lima iloko o kona aoao, a haha aku la i na wahi o na kui ma kona mau lima, a ma kona mau wawae; a o keia ka lakou i hana ai, e hele pakahi ana, a hiki i ka wa a lakou a pau i hele aku ai, a ike aku la me ko lakou mau maka iho, a haha aku la me ko lakou mau lima, a ike oiaio iho la a hoike aku la, oia no ia, ka mea i palapala ia mai ai e ka poe kaula e hele mai ana.

16. A ia lakou a pau i hele aku ai a ike aku ai no lakou iho, hea ae la lakou me ka lokahi o ka manao, i ka i ana:

17. Hosana! E hoomaikai ia aku ka inoa o ke Akua Kiekie Loa! A hina iho la lakou ma na wawae o Iesu, a hoomana aku la ia ia.

18. A eia kekahi, olelo mai la oia ia Nepai, (no ka mea, aia no o Nepai mawaena o na kanaka,) a kauoha mai la oia ia ia e hele ae.

19. A ala ae la o Nepai a hele aku la, a kulou iho la oia imua o ka Haku, a honi aku la i kona mau wawae.

20. A kauoha mai la ka Haku ia ia, e ala ae oia. A ala ae la ia a ku iho la imua ona.

21. A i mai la ka Haku ia ia, Ke haawi aku nei au ia oe i ka mana e bapetizo aku i keia poe kanaka, i ka wa aʻu e pii hou ai i ka lani.

22. A hea hou mai la ka Haku i na mea e ae, a i mai la no hoi ia lakou pela; a haawi mai la oia ia lakou i ka mana e bapetizo aku. A i mai la oia ia lakou: Ma keia ano oukou e bapetizo aku ai; aole hoi na hoopaapaa mawaena o oukou.

23. He oiaio kaʻu e olelo aku nei ia oukou, o ka mea e mihi ana i kona mau hewa ma o ka oukou mau olelo la, a makemake mai e bapetizo ia ma kuu inoa, ma keia ano e bapetizo aku ai ia ia, aia hoi, e iho ilalo kekahi o oukou me ia a e ku iloko o ka wai, a ma kuu inoa e bapetizo aku ai ia ia.

24. Ano hoi, eia na olelo e olelo aku ai, e hea ana ia ia ma ka inoa, i ka i ana:

25. Mamuli o ka mana i haawi ia mai iaʻu e Iesu Kristo, ke bapetizo aku nei au ia oe iloko o ka inoa o ka Makua, a o ke Keiki, a o ka Uhane Hemolele. Amene.

26. Alaila e hookomo iho ia ia iloko o ka wai, a e puka hou mai mailoko mai o ka wai.

27. A mamuli o keia ano oukou e bapetizo aku ai ma koʻu inoa, no ka mea hoi, he oiaio kaʻu e olelo aku nei ia oukou, o ka Makua, a me ke Keiki, a me ka Uhane Hemolele, hookahi no lakou; a owau no iloko o ka Makua, a o ka Makua iloko oʻu, a o ka Makua me aʻu nei, ua hookahi maua.

28. A e like me kaʻu i kauoha aku ai ia oukou, pela oukou e bapetizo aku ai. A aole hoi na hoopaapaa ana mawaena o oukou, e like me ia mamua aku nei; aole hoi na hoopaapaa ana mawaena o oukou no na mea nui o koʻu ao ana, e like me ia mamua aku nei;

29. No ka mea, oiaio, he oiaio kaʻu e olelo aku nei ia oukou, o ka mea ia ia ka uhane paio, aole noʻu nei ia, aka no ke diabolo, oia no ka makua o ka paio, a ke hooeueu la oia i na naau o na kanaka e paio me ka huhu, kekahi me kekahi.

30. Aia hoi, aole keia koʻu ao ana, e hooeueu aku i na naau o na keiki a kanaka me ka huhu, kekahi e ku e i kekahi; aka eia koʻu ao ana, e hoopau ia aku na mea e like me ia.

31. Aia hoi, oiaio, he oiaio kaʻu e olelo aku nei ia oukou, e hai aku no au ia oukou i kuu ao ana.

32. A eia kuu ao ana, a o ke ao ana ia a ka Makua i haawi mai ai iaʻu; a ke hoike aku nei au no ka Makua, a ke hoike mai la ka Makua noʻu, a ke hoike mai nei ka Uhane Hemolele no ka Makua a me aʻu, a ke hoike aku nei au e kauoha ana ka Makua i na kanaka a pau, ma kela wahi keia wahi, e mihi a e manaoio mai iaʻu;

33. A o ka mea i manaoio mai iaʻu, a i bapetizo ia aku, e hoola ia auanei oia; a o lakou no ka poe e loaa ai ke aupuni o ke Akua.

34. A o ka mea i manaoio ole mai iaʻu, a i bapetizo ole ia aku, e hoohewa ia auanei oia.

35. Oiaio, he oiaio kaʻu e olelo aku nei ia oukou, o keia no koʻu ao ana; a ke hoike aku nei au no ia mea mai ka Makua mai; a o ka mea e manaoio ana iaʻu, e manaoio ana oia i ka Makua no hoi; a e hoike aku no ka Makua ia ia noʻu; no ka mea, e hoalauna oia ia ia me ke ahi a me ka Uhane Hemolele;

36. A pela ka Makua e hoike aku ai noʻu; a e hoike aku no ka Uhane Hemolele ia ia no ka Makua a me au; no ka mea, o ka Makua, a me au nei, a me ka Uhane Hemolele, hookahi makou.

37. A ke i hou aku nei au ia oukou, e mihi oukou e pono ai, a e lilo me he keiki uuku la, a e bapetizo ia aku ma koʻu inoa, a i ole ia, aole loa e hiki ia oukou ke loaa keia mau mea.

38. A ke i hou aku nei au ia oukou e mihi oukou e pono ai, a e bapetizo ia aku ma koʻu inoa, a e lilo me he keiki uuku la, a i ole ia, aole loa e hiki ia oukou ke loaa ke aupuni o ke Akua.

39. Oiaio, he oiaio kaʻu e olelo aku nei ia oukou, o keia no koʻu ao ana; a o ka mea e kukulu ana maluna o keia mea, e kukulu ana oia maluna iho o koʻu pohaku; a e lanakila ole na ipuka o ka po maluna ona.

40. A o ka mea e hai aku ana i ka mea i oi aku, a i ole, i ka mea i emi mai i keia, a e hookupaa aku ia mea no koʻu ao ana, no ka ino mai ia, a ua kukulu ole ia maluna iho o koʻu pohaku, aka e kukulu ana oia maluna iho o ke kahua one, a e hamama ana na ipuka o ka po e loaa ka mea o ia ano, i ka wa e hiki mai ai ka wai, a e nou mai ai ka makani maluna iho ona.

41. Nolaila, e hele aku i keia poe kanaka, a e hai aku i na olelo aʻu i olelo aku ai, i ko na welau o ka honua.