1. A kauoha mai la o Iesu i kana poe haumana e lawe mai lakou i wahi berena a waina io na la.

2. A ia lakou i hele aku ai i wahi berena a waina, kauoha mai la oia i na kanaka e noho lakou ilalo ma ka honua.

3. A i ka wa i hiki ai ka poe haumana me ka berena a me ka waina, lalau iho la oia i ka berena, a wawahi ae la a hoopomaikai ae la ia mea; a haawi mai la i na haumana, a kauoha mai la e ai lakou.

4. A ia lakou i ai ai, a maona, kauoha mai la oia ia lakou e haawi aku i na kanaka.

5. A i ka wa a na kanaka i ai ai a maona, olelo mai la ia i ka poe haumana: Aia hoi, e hoolilo ia auanei kekahi mea mawaena o oukou, a e haawi aku no au ia ia i ka mana nana e wawahi i ka berena, a e hoopomaikai aku ia mea, a e haawi aku i ka poe kanaka o koʻu ekalesia, i ka poe a pau e manaoio a e bapetizo ia ma koʻu inoa.

6. A o keia ka oukou e malama mau ai, oia, me aʻu i hana ai, oia, me aʻu i wawahi ai i ka berena, a hoopomaikai ai ia mea, a haawi ai ia mea ia oukou.

7. A e hana oukou i keia me ka hoomanao mai i koʻu kino, aʻu i hoike aku ai ia oukou. A he mea hoike auanei ia i ka Makua, e hoomanao mau ana oukou iaʻu. A ina e hoomanao mau mai oukou iaʻu, e loaa no ia oukou koʻu Uhane e noho pu me oukou.

8. A eia kekahi, ia ia i olelo mai ai i keia mau olelo, kauoha mai la oia i kana poe haumana e lawe lakou i ka waina o ke kiaha, a e inu ia mea, a e haawi aku hoi lakou i na kanaka, i inu ai lakou ia mea.

9. A eia kekahi, hana iho la lakou pela, a inu iho la ia mea, a ua hoopiha ia; a haawi aku la lakou i na kanaka, a inu iho la lakou, a ua hoopiha ia lakou.

10. A i ka wa a ka poe haumana i hana aku ai i keia, olelo mai la o Iesu ia lakou: Pomaikai oukou no keia mea a oukou i hana ai, no ka mea, o keia no ka hooko ia ana o kaʻu mau kauoha, a e hoike ana keia mea i ka Makua, e ae ana oukou e hana i ka mea aʻu i kauoha aku ai ia oukou.

11. A e hana mau oukou i keia i ka poe i mihi a i bapetizo ia ma koʻu inoa; a e hana oukou i keia me ka hoomanao i koʻu koko, aʻu i hookahe aku ai no oukou, i hoike aku ai oukou i ka Makua, e hoomanao mau ana oukou iaʻu. A ina e hoomanao mau mai oukou iaʻu, e loaa ia oukou koʻu Uhane e noho pu me oukou.

12. A ke haawi aku nei au ia oukou i kauoha e hana oukou i keia mau mea. A ina e hana mau oukou i keia mau mea, pomaikai oukou, no ka mea, ua kukulu ia oukou maluna o koʻu pohaku.

13. Aka o ka mea mawaena o oukou e hana i ka mea oi aku, a i ka mea emi iho paha i ua mau mea nei, ua kukulu ole ia maluna o koʻu pohaku, aka ua kukulu ia maluna o ke kahua one; a i ka wa e haule mai ai ka ua, a e kahe mai ai ka wai, a e nou mai ai ka makani, a pa maluna o lakou, e haule auanei lakou, a ua hamama na ipuka o ka po me ka makaukau e hookipa ia lakou;

14. Nolaila, pomaikai oukou ina e malama oukou i kaʻu mau kauoha, a ka Makua i kauoha mai ai iaʻu e haawi aku au ia oukou.

15. Oiaio, he oiaio kaʻu e olelo aku nei ia oukou, e kiai a e pule mau oukou e pono ai, o hoowalewale ia mai oukou e ke diabolo, a e alakai ia aku oukou e ia.

16. A me au i pule aku ai mawaena o oukou, pela hoi oukou e pule mai ai iloko o koʻu ekalesia, mawaena o koʻu poe kanaka, ka poe i mihi a i bapetizo ia ma koʻu inoa. Aia hoi, owau no ka malamalama; ua hana au i kumu no oukou e hoohalike mai ai.

17. A eia kekahi, ia Iesu i olelo mai ai i ua mau olelo nei i kana poe haumana, huli hou ae la ia i na kanaka, a i aku la ia lakou:

18. Aia hoi, oiaio, he oiaio kaʻu e olelo aku nei ia oukou, e kiai a e pule mau oukou e pono ai, o komo oukou iloko o ka hoowalewale; no ka mea, ke makemake la o Satana e loaa oukou; e hiki ia ia ke kanana ia oukou e like me ka hua palaoa;

19. Nolaila, ea, e pule mau oukou e pono ai i ka Makua ma koʻu inoa;

20. A o ka mea a oukou e noi aku ai i ka Makua ma koʻu inoa, a ua pono, me ka manaoio e loaa ia oukou, aia hoi, e haawi ia mai ia ia oukou.

21. E pule mau oukou ma na ohana o oukou i ka Makua ma koʻu inoa, e hoopomaikai ia mai ka oukou poe wahine a me ka oukou poe keiki.

22. A, aia hoi, e halawai pinepine oukou i kahi hookahi, a, mai papa aku i kekahi kanaka i ka hele ana io oukou la, i ka wa a oukou e halawai ai i kahi hookahi, aka e ae aku oukou ia lakou e hele mai io oukou la, a e papa ole aku ia lakou;

23. Aka, e pule oukou no lakou, a e hoolei ole aku ia lakou mawaho; a ina paha e hele pinepine mai lakou io oukou la, alaila, e pule aku oukou i ka Makua, ma koʻu inoa, no lakou;

24. Nolaila, e hapai ae oukou i ko oukou malamalama iluna i alohi aku ai ia i ko ke ao nei. Aia hoi, owau no ka malamalama a oukou e hapai aku ai iluna-i ka mea a oukou i ike mai ai i hana ia e au. Aia hoi, ke ike nei oukou ua pule aku la au i ka Makua, a ua ike oukou a pau;

25. A ke ike nei oukou aole au i kauoha aku i kekahi o oukou e hele aku, aka, ua kauoha aku au e hele mai oukou ioʻu nei, i haha mai ai oukou a i ike ai hoi; pela no hoi oukou e hana aku ai i ko ke ao nei; a o ka mea e uhai i keia kauoha, e ae ana oia e alakai ia aku iloko o ka hoowalewale ia mai.

26. Ano, eia kekahi, ia Iesu i olelo mai ai i keia mau olelo, huli hou mai la ia i kona mau maka i kana poe haumana ana i wae mai ai, a olelo mai la ia lakou,

27. Aia hoi, oiaio, he oiaio kaʻu e olelo aku nei ia oukou, ke haawi aku nei au ia oukou i kekahi kauoha hou, alaila he pono noʻu ke hele aku i koʻu Makua, i hooko aku ai au i na kauoha e ae, ana i haawi mai ai iaʻu.

28. Ano hoi, eia ke kauoha aʻu e haawi aku nei ia oukou, Mai ae aku oukou me ka ike i kekahi mea, e ai i kuu io, a inu i kuu koko me ka pono ole, i ka wa a oukou e lawelawe aku ai ia mea;

29. No ka mea, o ka mea e ai ana a e inu ana i kuu io a me kuu koko me ka pono ole, e ai ana a e inu ana oia i ka hoohewa ia i kona uhane iho; nolaila, ina ua ike oukou ua kupono ole kekahi kanaka ke ai a ke inu i kuu io a i kuu koko, e papa aku oukou ia ia;

30. Aole nae oukou e hoolei aku ia ia mai o oukou aku, aka e lawelawe aku oukou ia ia, a e pule aku nona i ka Makua, ma koʻu inoa, a ina paha e mihi oia, a bapetizo ia ma koʻu inoa, alaila e hookipa oukou ia ia, a e lawelawe aku ia ia i kuu io a me kuu koko;

31. Aka ina e mihi ole oia aole loa ia e helu pu ia mawaena o koʻu poe kanaka, i hoopoino ole ai oia i koʻu poe kanaka, no ka mea, aia hoi, ua ike au i kaʻu poe hipa, a ua helu ia lakou;

32. Aole nae oukou e hoolei ia ia mawaho o ko oukou mau halehalawai, aole hoi ko oukou mau wahi e hoomana ai, no ka mea, e hoomau oukou e lawelawe aku i ka poe me neia; no ka mea, aole oukou i ike anoai e hoi mai lakou a e mihi, a e hele mai ioʻu nei me ka manao ikaika o ka naau, a e hoola aku au ia lakou, a e lilo oukou i poe e lawe mai ai i ke ola io lakou la.

33. Nolaila, e malama i keia mau olelo aʻu i kauoha aku ai ia oukou, i komo ole mai ai oukou malalo iho o ka hoohewa ia ana, no ka mea, auwe ka mea a ka Makua e hoohewa aku ai.

34. A ke haawi aku nei au i keia mau kauoha, no na hoopaapaa ana iwaena o oukou mamua. A pomaikai oukou ina aole no na hoopaapaa ana mawaena o oukou.

35. Ano, ke hele aku nei au i ka Makua la, no ka mea, he mea e pono ai e hele aku au i ka Makua la, no ko oukou pomaikai.

36. A eia kekahi, ia Iesu i hoopau ai i keia mau olelo, hoopa pakahi iho la oia me kona lima i kana poe haumana ana i wae mai ai, a pau loa ae la lakou i ka hoopa ia e ia, a olelo mai la ia lakou me ia i hoopa mai ai ia lakou;

37. A lohe ole ae la na kanaka i na olelo ana i olelo mai ai, nolaila, aole lakou i hoike no ia mea; aka hoike aku la ka poe haumana, ua haawi mai la oia i ka mana ia lakou e haawi aku i ka Uhane Hemolele. A e hoike aku no au ma neia hope aku he oiaio keia hoike ana.

38. A eia kekahi, ia Iesu i hoopa mai ai ia lakou a pau, hiki mai la kekahi ao a hoomalu mai la i na kanaka, i hiki ole ia lakou ke ike aku ia Iesu.

39. A oiai lakou i hoomalu ia, haalele mai la oia ia lakou, a pii aku la iloko o ka lani. A ike aku la ka poe haumana a hoike aku la ua pii hou ae la oia iloko o ka lani.