1. Ano, eia kekahi, ma ka makahiki umikumamaono mai ka hiki ana mai o Kristo, loaa mai la ia Lakoneusa, ke kiaaina o ka aina, kekahi episetole mai ka luna a kiaaina hoi o ua poe powa hui nei; a eia na olelo i palapala ia, i ka i ana:

2. E Lakoneusa, e ke kiaaina maikai a kiekie o ka aina, aia hoi, ke palapala aku nei au i keia episetole ia oe, a ke haawi aku nei au ia oe i ka mahalo nui loa no kou naueue ole, a no ka naueue ole o kou poe kanaka, ma ka malama ana i ka mea a oukou i manao ai o ko oukou pono a kuokoa ana; he oiaio, ke kupaa nei oukou ma ka pono, me he mea la ua kokua ia oukou ma ka li¬ma o kekahi Akua, ma ka hoomalu ana i ko oukou kuokoa ana, a me ko oukou waiwai, a me ko oukou aina, oia hoi na mea a oukou i kapa iho ai pela.

3. A he mea menemene ia i koʻu manao, e Lakoneusa kiekie e, kou naaupo a me ka haakei me neia, i manao ai ua hiki ia oukou ke ku imua o na kanaka koa he nui wale me neia, ka poe i hoomalu ia e au, ka poe e ku nei i keia manawa me ko lakou mau mea kaua, a ke kali nei, me ka iini nui, no ka olelo, e iho ilalo maluna o ko Nepai poe a luku aku ia lakou.

4. A ua ike au i ko lakou uhane pio ole, ua hoao aku au ia lakou ma kahi o ke kaua, a ua ike i ko lakou inaina mau loa aku ia oukou, no ka nui o na lawehala a oukou i hana mai ai ia lakou, nolaila, ina e iho ilalo lakou e ku e ia oukou, e luku loa aku lakou ia oukou;

5. Nolaila, ua palapala aku au i keia episetole, e sila ana ia mea me koʻu lima iho, me ka manao ana i kou pomaikai, no kou naueue ole ma ka mea au i manao ai he pololei, a me kou uhane ikaika ma kahi o ke kaua;

6. Nolaila, ke palapala aku nei au ia oe me ka makemake e haawi mai oe i ko oukou mau kulanakauhale, i ko oukou mau aina, a me ko oukou mau hooilina, no koʻu poe kanaka, e aho ia mamua o ko lakou hoopai ana ia oukou me ka pahikaua, a i hiki mai ka luku maluna iho o oukou;

7. A i ole ia, ma na olelo e ae, e hookuu mai ia oukou iho ia makou, a e hui pu me makou, a e lilo i poe ike i ka makou mau hana malu, a e lilo i poe hoahanau no makou, i like pu oukou me makou; aole i poe kauwa na makou, aka i poe hoahanau no makou, a poe hui ma ko makou waiwai a pau.

8. A, aia hoi, ke hoohiki aku nei au ia oe, ina e hana oukou i keia, me kekahi hoohiki paa, aole oukou e luku ia; aka ina aole oukou e hana i keia, ke hoohiki aku nei au ia oe, me ka hoohiki paa, i ka hala ana o ka malama okoa mai ka la apopo aku, e kena aku no au i koʻu poe kaua e iho ilalo e ku e ia oukou, aole lakou e kaohi aku i ko lakou lima, aole hoi e hookoe, aka e luku aku no ia oukou, a e hoohaule iho i ka pahikaua maluna iho o oukou, a hiki aku i ka wa e lilo ai oukou i ole.

9. Aia hoi, owau no o Gidianahi; a owau no ke kiaaina o keia poe hui malu o Gadianatona; a o ua poe hui nei, a me na hana a lakou ua ike au he pono; a mai ka wa kahiko mai ia mau mea, a ua haawi ia mailalo mai ia makou.

10. A ke palapala aku nei au i keia episetole ia oe, e Lakoneusa, a ke lana nei koʻu manao e haawi mai oukou i ko oukou mau aina, a me ko oukou mau hooilina, me ka hookahe ole i ke koko, i loaa ai i koʻu poe kanaka nei ko lakou mau pono a me ka noho alii ana, ka poe i haalele aku ia oukou, no ko oukou hewa ma ka aua ana mai o lakou aku i ko lakou mau pono o ka noho alii ana; a ke ole oukou e hana i keia, e hoopai aku au no na poino o lakou. Owau no o Gidianahi.

11. Ano, eia kekahi, ia Lakoneusa i loaa ai keia episetole, ua kahaha nui loa iho la ia, no ka wiwo ole o Gidianahi, ma ke koi ana i na aina o ko Nepai poe, a ma ka hooweliweli ana no hoi i na kanaka, a me ka hoopai ana no na poino o ua poe la i loaa ole ai ka poino, i ole lakou i hoopoino ia lakou iho, ma ka hele ana i kela poe powa hewa a ino loa.

12. Ano hoi, o ua Lakoneusa nei, ke kiaaina, he kanaka pono ia, a ua hiki ole ke hoomakau ia mai ma ke koi ana a me na olelo hooweliweli o kahi powa; nolaila, aole oia i hoolohe aku i ka episetole o Gidianahi, ke kiaaina o ka poe powa, aka kauoha ae la ia i kona poe kanaka e hea aku i ka Haku no ka ikaika, no ka manawa a ka poe powa e iho mai ai ilalo, e ku e mai ia lakou;

13. He oiaio, hoouna ae la ia i olelo hoolaha mawaena o na kanaka a pau, e houluulu mai i ko lakou poe wahine, a me ka lakou poe keiki, i ko lakou mau pua holoholona, a me ko lakou mau ohana holoholona, a me ko lakou waiwai a pau, koe wale no ko lakou aina, i kahi hookahi.

14. A kena ae la oia e kukulu ia na wahi paa a puni lakou, a o ka ikaika olaila e nui loa aku ia. A kena ae la ia e hoonoho ia na puali kaua, o ko Nepai poe a o ko Lamana poe no hoi, o ka poe a pau i helu pu ia mawaena o ko Nepai poe, i poe kiai a puni, e kiai mai ia lakou, a e hoomalu mai ia lakou mai ka poe powa mai i ke ao a i ka po;

15. He oiaio, i aku la oia ia lakou, Me ka Haku e ola nei, ina aole oukou e mihi i ko oukou mau hewa a pau, a e hea aku i ka Haku, aole loa oukou e hoopakele ia mai, mailoko mai o na lima o ua poe powa la o Gadianatona.

16. A no ka nui loa a kupanaha hoi o na olelo a me na wanana a Lakoneusa, hiki mai la ka makau maluna iho o ka poe kanaka a pau, a hooikaika iho la lakou e like me ka hiki ia lakou, e hana aku e like me na olelo a Lakoneusa.

17. Ano, eia kekahi, hoonoho mai la o Lakoneusa i na kapena nui maluna o na puali kaua a pau o ko Nepai, e hoomalu iho ia lakou i ka manawa a ka poe powa e iho mai ai mailoko mai o ka waonahele e ku e mai ia lakou.

18. Ano, o ka mea kiekie loa mawaena o ka poe kapena a pau, a o ka alihi kaua nui hoi o na puali kaua a pau o ko Nepai ua hoonoho ia, a o Gidigidoni kona inoa.

19. Ano, he mea maa mau mawaena o ko Nepai poe a pau, e wae aku no na kapena nui o lakou, koe wale no na manawa hewa o lakou, i kekahi mea nona ka Uhane o ka hoikeana, a wanana no hoi; nolaila, he kaula nui o ua Gidigidoni nei mawaena o lakou, a he kaula hoi ka lunakanawai nui.

20. Ano, i ae la na kanaka ia Gidigidoni, E pule aku i ka Haku, a e pii ae kakou ma na mauna, a iloko o ka waonahele, i hiki ia kakou ke haule iho maluna o ka poe powa a e luku aku ia lakou, ma ko lakou aina iho.

21. Aka, i aku la o Gidigidoni ia lakou, Na ka Haku e hoole mai; no ka mea, ina e pii ku e aku kakou ia lakou, e haawi mai no ka Haku ia kakou iloko o ko lakou mau lima; nolaila, e hoomakaukau aku kakou ia kakou iho iwaena konu o ko kakou mau aina, a e houluulu aku kakou i ko kakou poe kaua i kahi hookahi, a, aole kakou e hele aku e ku e ia lakou, aka e kali no kakou a hiki i ka wa e hele mai ai lakou e ku e mai ia kakou; nolaila, me ka Haku e ola nei, ina e hana aku kakou i keia, e haawi mai oia ia lakou iloko o ko kakou mau lima.

22. A, eia kekahi, ma ka makahiki umikumamahiku, ma ka hopena o ka makahiki, ua laha aku la ka olelo kukala a Lakoneusa mawaena o ka ili a pau o ka aina, a ua lawe ae la lakou i ko lakou mau lio, a me ko lakou mau kaakaua, a me ko lakou mau bipi, a me na pua holoholona a pau o lakou, a me na ohana holoholona o lakou, a me ko lakou hua liilii, a me ko lakou waiwai a pau, a hele ae la ma na tausani, a ma na umi o na tausani, a hiki i ka wa i hele aku ai lakou a pau i kahi i koho ia ai, e houluulu ai lakou, e hoomalu aku ia lakou iho mai ko lakou poe enemi ae.

23. A o ka aina o Zarahemela a me ka aina Momona no ka aina i koho ia ai; he oiaio, i ka palena aia mawaena o ka aina Momona a me ka aina o Neoneo;

24. A he nui na tausani kanaka e kapa ia ko Nepai poe, ka poe i houluulu ia lakou iho i kahi hookahi ma ua aina nei. Ano, kauoha aku la o Lakoneusa ia lakou e houluulu ia lakou iho i kahi hookahi ma ka aina hema, no ka nui loa o ka poino maluna iho o ka aina akau;

25. A kukulu pa-kaua iho la lakou no lakou iho no ka pale ana i ko lakou poe enemi; a noho iho la lakou i ka aina hookahi, a i ka puuluulu hookahi, a ua makau lakou i na olelo i olelo ia mai ai e Lakoneusa, a mihi iho la lakou i ko lakou mau hewa; a pule aku la lakou i ka Haku, i ko lakou Akua, e hoopakele mai oia ia lakou, i ka manawa a ko lakou poe enemi e iho mai ai, e kaua mai ia lakou.

26. A ua kaumaha nui loa iho la lakou no ko lakou poe enemi. A kena ae la o Gidigidoni ia lakou e hana i na mea kaua, o kela ano keia ano, i ikaika lakou me na mea kahiko kaua, a me na pale-lima, a me na pale-kaua, mamuli o ke ano o kona ao ana aku.