1. Ano hoi, ke i aku nei au ia oukou, i ka wa i manao ia he pono e ka Haku, ma kona naauao, no keia mau olelo e hiki aku i ka poe Genetile, e like me kana olelo, alaila, e ike oukou o ka berita a ka Makua i hana mai ai me ka poe mamo a Iseraela, no ko lakou hoihoi hou ia ana i ko lakou aina hooilina, e hoomaka ana ia ia manawa e hooko ia;

2. A e ike no hoi oukou e hooko ia auanei na olelo a pau loa a ka Haku, i olelo ia ai e ka poe kaula hemolele; a he mea e pono ole ai no oukou ke olelo, ua hoopanee ka Haku i kona hiki ana mai i ka poe mamo a Iseraela;

3. A he mea e pono ole ai ia oukou ke manao wale iloko o ko oukou mau naau, ua makehewa na olelo i olelo ia ai, no ka mea hoi, e hoomanao no ka Haku i kana berita, ana i hana mai ai i kona poe kanaka no ka hale o lseraela.

4. A ia oukou e ike ai i keia mau olelo e puka mai ana mawaena o oukou, alaila, he mea e pono ole ai ko oukou keehi hou ana i na hana a ka Haku, no ka mea, aia no ka pahikaua a kona hoopai ma kona lima akau, a, aia hoi, ma ia la, ina e keehi oukou i kana hana ana, e kena oia e loaa koke oukou ia mea.

5. Auwe ka mea e keehi ana i na hana ana a ka Haku; he oiaio, auwe ka mea e hoole ana ia Kristo a me kana mau hana;

6. He oiaio, auwe ka mea e hoole ana i ka hoike ana a ka Haku, a e olelo ae, E hana hou ole ana ka Haku ma o ka hoike ana la, aole hoi ma o ka wanana la, aole hoi ma o na haawina la, aole hoi ma o na olelo e la, aole ma o na hoola ana la, aole hoi ma o ka mana la o ka Uhane Hemolele;

7. He oiaio, auwe ka mea e olelo ana ma ia la, i mea e loaa ai ka waiwai, aole e hiki ke hana ia kekahi hana mana e Iesu Kristo; no ka mea, o ka mea e hana ana i keia, e lilo auanei ia e like me ke keiki o ka make, ka mea aole nona ke aloha, e like me ka olelo a Kristo.

8. He oiaio, a he mea e pono ole ai no oukou ke hoowahawaha hou ae, aole hoi keehi, aole hoi hoomaewaewa ae i ka poe Iudaio, aole hoi kekahi o ke koena o ko ka hale o Iseraela, no ka mea hoi, ke hoomanao nei ka Haku i kana berita ia lakou, a e hana mai oia ia lakou e like me ka mea ana i hoohiki mai ai;

9. Nolaila, he mea e pono ole ai ia oukou ke manao ua hiki ia oukou ke hoohuli ae i ka lima akau o ka Haku i ka hema, i hana ole mai ai oia i ka hoopono ma ka hooko ana i ka berita ana i hana mai ai i ko ka hale o Iseraela.