1. Alaila, e ko ai ka mea i palapala ia. E oli oe, e ka mea pa, ka mea i hanau ole; e oli i ke oli, a e hooho nui aku, e ka mea hapai ole i ke keiki; no ka mea, he nui aku na keiki a ka mea i neoneo, mamua o na keiki o ka wahine i mare ia, wahi a ka Haku.

2. E hoakea aku i kahi o kou halelewa, a e hoopalahalaha hoi lakou i na paku o kou mau wahi e noho ai; mai aua, e hooloihi aku i kou mau kaula, a e hooikaika i kou mau makia;

3. No ka mea, e poha aku auanei oe ma ka lima akau a ma ka lima hema; a e ili mai ka poe Genetile na kau poe hua, a e hoolilo i na kulanakauhale neoneo i wahi e noho ia iho ai.

4. Mai makau oe, no ka mea, aole oe e hilahila; mai hoopalaimaka hoi; no ka mea, aole oe e hoohilahila ia; no ka mea, e hoopoina no oe i ka hilahila o kou wa opiopio, a e hoomanao ole i ka hoino ia o kou wa opiopio, a e hoomanao hou ole hoi i ka hoino ia o kou noho wahine kane make ana.

5. No ka mea, o ka mea nana oe i hana, o kau kane, o ka Haku o na Lehulehu kona inoa; a o kou Hoolapanai, o ka Mea Hemolele ia o ka Iseraela; e kapa ia auanei oia, o ke Akua o ka honua a pau.

6. No ka mea, ua hea aku ka Haku ia oe, me he wahine la i haalele ia a kaumaha hoi ma ka uhane, a he wahine hoi o ka wa opiopio, i kou wa i hoolei ia ai, wahi a ke Akua ou.

7. No ka manawa uuku, ua haalele aku au ia oe; aka me na lokomaikai he nui loa, e hoiliili aku ai au ia oe.

8. I ka hu ana o ka huhu, huna no au i koʻu maka ia oe no kekahi minute; aka, me ke aloha mau loa, e lokomaikai aku ai au ia oe, wahi a ka Haku, kou Hoolapanai.

9. No ka mea, e like me na wai o Noa, pela no keia iaʻu, me au i hoohiki ai, aole e hoohalana hou na wai o Noa i ka honua, pela no wau i hoohiki ai, aole au e huhu aku ia oe.

10. No ka mea, e lilo auanei na mauna, a e hooneenee ia na puu; aka, aole e lilo aku koʻu lokomaikai mai ou aku, aole hoi e hooneenee ia ka berita a koʻu poe kanaka, wahi a ka Haku, ka mea i aloha mai ia oe.

11. E ka mea popilikia, i i hooleilei ia me ka makani ino, aole hoi i hooluolu ia! Aia hoi, e hoonoho no wau i kou mau pohaku me na pena maikai, a i kou mau kumu me na pohaku sapeiro.

12. A e hana no wau i kou mau puka makani noloko mai o na agate, a me kou mau pukapa noloko mai o na pohaku ula maikai loa, a me kou mau mokuna a pau no na pohaku maikai.

13. A e ao ia no hoi kau mau keiki a pau e ka Haku; a e nui loa auanei ka maluhia o kau mau keiki.

14. Ma ka pono no oe e hookumu ia ai, e mamao aku oe mai ka hookaumaha ia, no ka mea, aole oe e makau ana; a mai ka weliweli hoi, no ka mea, aole ia e hookokoke mai ia oe.

15. Aia hoi, e houluulu ku e io mai lakou ia oe, aole ma oʻu nei; o ka mea i houluulu ku e aku ia oe, e hoohaule ia auanei oia nou.

16. Aia hoi, naʻu no i hana i ka amara nana e puhi i ka lanahu maloko o ke ahi, a i hoopuka mai i mea hana no kana hana; a naʻu hoi i hana i ka mea hoomake e hoomake ai.

17. Aole e pomaikai kekahi mea hoeha i hana ia e ku e ia oe; a o na alelo a pau e ala mai e hoohewa ku e ia oe, nau no ia e hoohewa aku. Oia ka hooilina o na kauwa a ka Haku, a naʻu hoi ko lakou pono, wahi a ka Haku.