1. Ano, eia kekahi, hoi aku la ka poe kanaka o Nepai i ko lakou mau aina iho, ma ka makahiki iwakaluakumamaono, o kela kanaka keia kanaka, me kona ohua, me kona mau pua a mau ohana holoholona, me konamau lio a me kona mau bipi, a me na mea a pau a lakou.

2. A eia kekahi, aole i pau ka lakou ai i ka ai ia e lakou; nolaila, lawe pu ae la lakou me lakou i na mea a pau a lakou i hoopau ole ai, i ko lakou hua liilii a pau o kela ano o keia ano, a me ko lakou gula, a me ko lakou kala, a me ko lakou mau mea maikai a pau, a hoi aku la lakou i ko lakou mau aina iho a i ko lakou mau hooilina, ma ka akau a ma ka hema, ma ka aina akau a ma ka aina hema no hoi.

3. A haawi ae la lakou i ua poe powa la, ka poe i komo iloko o kekahi berita e noho me ka maluhia, o ka poe hui, ka poe e makemake ana e noho he poe Lamana, i ka aina, e like me ko lakou nui, i loaa ai ia lakou, me ka lakou mau hana, na mea e ola ai; a pela lakou i hookupaa ai i ka maluhia ma ka aina a pau.

4. A hoomaka ae la lakou e pomaikai a mahuahua nui ae; a hala ae la na makahiki iwakaluakumamaono a me ka hiku, a ua nui no ka pololei ma ka aina; a ua hana iho la lakou i ko lakou mau kanawai mamuli o ka pololei a me ka pono.

5. Ano, aohe mea ma ka aina a puni e keakea mai ana i na kanaka mai ka holomua mau ana, ke ole lakou e haule iloko o ka hala.

6. Ano, na Gidigidoni, a me ka lunakanawai Lakoneusa, a me kela poe i hoonoho ia i poe luna, i hookupaa i keia maluhia nui ma ka aina.

7. A eia kekahi, he nui wale na kulanakauhale i kukulu hou ia, a he nui wale na kulanakauhale kahiko i hana hou ia;

8. A he nui na alanui i hoomakaukau ia, a me na kuamoo i hana ia, e alakai aku ana ia kulanakauhale aku ia kulanakauhale aku, a ia aina aku ia aina aku, a ia wahi aku ia wahi aku.

9. A pela i hala aku ai ka makahiki umikumamawalu, a he maluhia mau ko na kanaka.

10. Aka, eia kekahi, ma ka makahiki iwakaluakumamaiwa, hoomaka ae la kekahi mau hoopaapaa ana mawaena o na kanaka; a ua hookiekie ia ae kekahi poe ma ka haaheo a me na kaena ana, no ko lakou waiwai nui loa, he oiaio, i ka hoomaau nui ana;

11. No ka mea, he nui loa na mea kalepa ma ka aina, a me na loio no hoi he nui wale, a me na luna.

12. A hoomaka ae la na kanaka e hookoa ia ma na papa, e like me ko lakou waiwai, a me ko lakou pomaikai ma ka hoonaauao ia ana; he oiaio, ua naaupo kekahi poe no ko lakou ilihune, a loaa iho la i kekahi poe ke ao nui ia ana no ko lakou waiwai;

13. Ua hookiekie ia kekahi poe iluna ma ka haaheo, a o kekahi poe e ae hoi ua haahaa loa; a hoihoi ae kekahi poe i ke kuamuamu no ke kuamuamu, oiai kekahi poe i loaa ai ke kuamuamu, a me ka hoomaau ia ana, a me na ano a pau o ka hoopilikia ia ana, aole hoi e huli ae a kuamuamu hou aku, aka ua haahaa a mihi imua o ke Akua;

14. A pela i loaa ai ka noho ewaewa ana ma ka aina a puni, a hoomaka ae la ka ekalesia e hiolo; he oiaio, a ma ka makahiki kanakolu hiolo ka ekalesia ma ka aina a puni, koe wale no mawaena o kekahi poe he kakaikahi o ko Lamana, he poe i hoohuli ia i ka manaoio oiaio; a, aole lakou e haalele mai ia mea, no ka mea, ua paa lakou me ka onipaa, a me ka naueue ole, e ae ana me ka ikaika a pau e malama i na kauoha a ka Haku.

15. Ano, o ke kumu o keia hewa o na kanaka, eia ia, he mana nui ko Satana, i ka hooeueu ana i na kanaka e hana aku i na ano a pau o ka hewa, a i ka hoohaakei ana ia lakou me ka haaheo, e hoowalewale ana ia lakou e imi i ka mana, a me ka noho luna ana, a me ka waiwai, a me na mea lapuwale o ke ao nei.

16. A pela o Satana i alakai aku ai i na naau o na kanaka, e hana aku i na ano a pau o ka hewa; nolaila, he mau makahiki uuku wale no ko lakou i loaa ai ka maluhia.

17. A pela i ka hoomaka ana o ka makahiki kanakolu, ua hookuu ia mai na kanaka no kekahi manawa loihi, e hali ia i o a ia nei ma na hoowalewale o ke diabolo, kahi ana i makemake ai e hali ia lakou, a e hana i kela hewa keia hewa ana i makemake ai ia lakou; a pela ma ka hoomaka ana o keia ke kanakolu makahiki, e noho ana lakou ma ka hewa weliweli.

18. Ano, aole lakou i hana hewa naaupo, no ka mea, ike iho la lakou i ka makemake o ke Akua no lakou; no ka mea, ua ao ia aku ia mea ia lakou; nolaila, kipi hookuli aku la lakou i ke Akua.

19. Ano, ma na la ia o Lakoneusa, ke keiki a Lakoneusa, no ka mea, pani iho la o Lakoneusa i ka hakahaka o kona makuakane a hoomalu iho la i na kanaka ia makahiki.

20. A hoomaka ae la na kanaka e uluhia mai ka lani mai, a ua hoouna ia aku la mawaena o na kanaka ma ka aina a puni, e hai ana a e hoike wiwo ole ana no na hewa a me na hala o na kanaka, a e hoike ana ia lakou no ka hoolapanai ana a ka Haku e hana ai auanei no kona poe kanaka; oia hoi ma kekahi mau olelo e ae, ke alahouana o Kristo; a hoike wiwo ole aku lakou no kona make a me na popilikia.

21. Ano, he nui loa na kanaka i huhu nui loa, no ua poe la nana i hoike mai i keia mau mea; a o ua poe huhu la, he poe lunakanawai nui ka nui o lakou, a me kekahi poe i noho e mamua he poe kahuna nui a me na loio; he oiaio, ua huhu mai la ka poe loio a pau, i kela poe nana i hoike mai i keia mau mea.

22. Ano, aole kekahi loio, aole hoi lunakanawai, aole hoi kahuna nui, i hiki ke loaa ka mana e hoohewa aku i kekahi mea e make, ke ole i kakauinoa ia ko lakou hoohewa ia ana e ke kiaaina o ka aina.

23. Ano, he nui wale na mea o ua poe la nana i hoike aku ai no na mea e pili ana ia Kristo, i hoike wiwo ole aku ai, a ua lawe ia aku lakou a pepehi malu ia e na lunakanawai, i hiki ole aku ka ike no ko lakou make i ke kiaaina la o ka aina, a hiki aku i ka wa mahope iho o ko lakou make.

24. Ano hoi, ua ku e keia i na kanawai o ka aina, e pepehi ia kekahi kanaka a make, ke ole loaa ia lakou ka mana mai ke kiaaina mai o ka aina;

25. Nolaila, hiki mai la kekahi hoopii i ka aina o Zarahemela, i ke kiaaina la o ka aina, e ku e ana i ua poe lunakanawai nei, ka poe i hoohewa ae i na kaula a ka Haku i ka make, aole mamuli o ke kanawai.

26. Ano, eia kekahi, ua hopu ia lakou a kai ia ae imua o ka lunakanawai, e hookolokolo ia no ka hewa nui a lakou i hana ai, e like me ke kanawai i haawi ia mai ai e na kanaka.

27. Ano, eia kekahi, he nui wale na makamaka a me na hanauna ko ua poe lunakanawai la; a o ke koena, he oiaio, aneane pau loa na loio a me na kahuna nui, ua houluulu ae la ia lakou iho i kahi hookahi, a hui pu iho la me na hanauna o ua poe lunakanawai la, ka poe e hookolokolo ia mamuli o ke kanawai;

28. A komo iho la lakou iloko o kekahi berita kekahi me kekahi, he oiaio, iloko o ua berita la i haawi ia mai ai e ka poe o ka wa kahiko, a o ua berita la ua haawi ia mai a lawelawe ia mai e ke diabolo, e hui pu e ku e mai i ka pono a pau;

29. Nolaila, hui pu iho la lakou e ku e mai i ka poe kanaka o ka Haku, a komo iho la iloko o kekahi berita e hoopau mai ia lakou, a e hoopakele ae i ua poe la, ka poe i hana i ka pepehi kanaka, mai ke apo ae o ka hoopai ana, ka mea e aneane ana e lawelawe ia aku mamuli o ke kanawai.

30. A aa mai la lakou i ke kanawai a me na pono o ko lakou aina; a hana berita lakou, kekahi me kekahi, e pepehi mai i ke kiaaina; a e hoonoho i alii maluna iho o ka aina, i kuokoa ole ai ka aina ma ia hope iho, aka e noho malalo iho o na alii.