1. Ano, eia kekahi, e like me ko makou mooolelo, a ua ike makou ua oiaio ko makou mooolelo, no ka mea hoi, na kekahi kanaka pono i kakau iho i ka mooolelo; no ka mea, hana io aku la oia i na hana mana he nui wale ma ka inoa o Iesu; a aole kekahi kanaka i hiki ke hana aku i kekahi hana mana ma ka inoa o Iesu, ke ole oia i hoomaemae ia a pau loa mai kona hewa aku.

2. Ano, eia kekahi, ina aole helu hewa ia e ua kanaka nei ma ka helu ana i ko makou manawa, ua hala aku la ka makahiki kanakolukumamakolu.

3. A hoomaka ae la na kanaka e nana aku me ka iini nui no ka hoailona i haawi ia mai ai e ke kaula o Samuela, ka Lamana; he oiaio, no ka manawa e hiki mai ai ka poeleele no na la ekolu maluna iho o ka ili o ka aina.

4. A hoomaka ae la na kanalua nui ana a me na hoopaapaa ana mawaena o na kanaka, me na hoailona nae he nui wale i haawi ia mai.

5. A eia kekahi, ma ka makahiki kanakolukumamaha, ma ka malama mua, ma ka la eha o ia malama, ea mai la kekahi makani ino loa; aole i ike e ia mamua kekahi e like me ia ma ka aina a puni;

6. A he manawa ino a weliweli no hoi; a he hekili weliweli, a hoohaalulu iho la ia mea i ka honua a puni, me he mea la ua aneane ia e kaawale ae mawaena;

7. A ua nui loa na uila ikaika, i ike e ole ia mamua kona like ma ka aina a puni.

8. A pau aku la ke kulanakauhale o Zarahemela i ke ahi;

9. A poho iho la ke kulanakauhale o Moroni iloko o na hohonu o ke kai, a ua make i ke kai na kamaaina ona;

10. A ua kaikai ia aku ka honua maluna iho o ke kulanakauhale o Moroniha, a ma kahi o ia kulanakauhale, lilo ae la i mau¬na nui;

11. A aia ma ka aina hema he luku nui a weliweli.

12. Aka hoi, ua nui loa aku ka luku nui a weliweli ma ka aina akau; no ka mea, aia hoi, ua hoano e ia ka ili a pau o ka aina, no ka makani ino, a me na puahiohio, a me ka hekili ana, a me ka uila ana, a me ka haalulu nui loa ana o ka honua a pau;

13. A ua wawahi ia na alaloa, a o na alanui laumania ua hoopau ia ka maikai, a he nui na wahi mania i lilo i apuupuu:

14. A he nui na kulanakauhale nui a kaulana i poho iho, a he nui hoi i pau i ke ahi, a he nui hoi i hoohaalulu ia a hiolo iho la na hale olaila i ka honua, a pepehi ia aku kolaila poe a make loa, a waiho neoneo ia ia mau wahi;

15. A ua koe no kekahi mau kulanakauhale, aka ua nui loa ka poino olaila, a he nui ka poe iloko o ia mau wahi i pepehi ia;

16. A o kekahi poe ua kaikai ia aku ma ka puahiohio; a o kahi a lakou i hele aku ai, aole kekahi kanaka i ike, eia wale no ka lakou i ike ai ua kaikai ia aku lakou la;

17. A pela i lilo ai ka ili o ka honua a pau i ino, no na makani ino, a me ka hekili ana, a me ka uila ana, a me ka haalulu ana o ka honua.

18. A, aia hoi, ua nahaha na pohaku iwaena konu; a ua naha ia mau mea maluna iho o ka ili o ka honua a pau, a ua loaa ia mau mea ma na apana nahaha, a ma na nakaka, a ma na mawae, maluna iho o ka ili a pau o ka aina.

19. A eia kekahi, i ka wa i oki ai na hekili, a me na uila, a me ka makani ikaika, a me ka ino, a me na haalulu ana o ka honua; no ka mea hoi, hoomau no ia mau mea ekolu hora paha; a ua olelo ia e kekahi poe ua loihi aku ka manawa; aka, ua hana ia nae ua mau mea nui a weliweli nei iloko o na hora ekolu paha; alaila hoi, he pouli maluna iho o ka ili o ka aina.

20. A eia kekahi, he pouli aaki maluna iho o ka ili a pau o ka aina, i hiki i kolaila, ka poe i haule ole iho, ke haha aku i ka ohu o ka pouli;

21. A, ua hiki ole ke hoomalamalama, no ka pouli, aole hoi kukui, aole hoi lamaku; aole hoi i hiki ke hoa ia aku ke ahi me ko lakou puapua wahie a maloo loa, no ia mea i hiki ole ke loaa kahi malamalama iki;

22. A ua ike ole ia aku kekahi malamalama, aole hoi ahi, aole hoi olinolino iki, aole ka la, aole hoi ka mahina, aole hoi na hoku, no ka mea, ua nui loa na ohu o ka pouli maluna iho o ka ili o ka aina.

23. A eia kekahi, hoomau iho la ia no na la ekolu, i ike ole ia aku kekahi malamalama; a ua nui no ka pihe ana, a me ka aoa ana, a me ka uwe mau ana mawaena o na kanaka a pau; he oiaio, nui no na uhu ana o na kanaka, no ka pouli a me ka luku nui i hiki mai ai maluna iho o lakou.

24. A ma kekahi wahi ua lohea lakou e hea ana, me ka i ana ae, E! Ina ua mihi kakou mamua o keia la nui a weliweli, alaila, ina ua hookoe ia mai ko kakou poe hoahanau, a aole lakou i puhi ia iloko o kela kulanakauhale nui, o Zarahemela.

25. A ma kekahi wahi e aku ua lohea lakou e hea aku ana a e uwe ana, i ka i ana: Ina ua mihi kakou mamua o keia wa nui a weliweli, a aole hoi i pepehi a hailuku aku i ka poe kaula, a hookuke aku ia lakou iwaho; alaila, ina ua hookoe ia mai la ko kakou poe makuwahine, a me ka kakou poe kaikamahine maikai, a me ka kakou poe keiki, aole i kanu ia iloko o kela kulanakauhale nui, o Moroniha; a pela ua nui a weliweli na aoa ana o na kanaka.