1. Oiaio, he oiaio kaʻu e olelo aku nei ua makemake au e hana manawalea aku oukou i ka poe hune; aka e malama oukou, aole e hana wale aku i ko oukou manawalea imua o na kanaka, no ka ike ia mai e lakou; o loaa ole ia oukou ka uku ia mai e ko oukou Makua ma ka lani.

2. Nolaila, ia oukou e hana aku ai i ko oukou manawalea ana, mai hookani i ka pu imua o oukou, e like me ka ka poe hookamani e hana ai iloko o na halehalawai, a ma na alanui, i hoomaikai ia mai ai lakou e na kanaka. He oiaio kaʻu e olelo aku nei ia oukou, ua loaa ia lakou ko lakou uku.

3. Aka, ia oe e hana manawalea aku ai, mai hoike i kou lima hema i ka mea a kou lima akau i hana ai;

4. I nalo hoi kou manawalea ana; a o kou Makua e nana mai ana i kahi nalo, oia ke uku mai ia oe ma ke akea.

5. A i pule aku oe, ea, mai hana oe e like me ka poe hookamani, no ka mea, makemake lakou e pule ku ana ma na halehalawai, a ma na huina alanui, i ikea mai ai lakou e kanaka. He oiaio kaʻu e olelo aku nei ia oukou, ua loaa ia lakou ko lakou uku.

6. Aka ooe, i kau pule ana, e komo ae oe iloko o kou keena mehameha, a ia oe i papani aku ai i kou puka, e pule aku i kou Makua ina no ma kahi nalo; a o kou Makua e ike ana iloko o kahi nalo, oia ke uku mai ia oe ma ke akea.

7. Aka ia oukou e pule aku ai, mai kuawili aku i ka olelo, e like me ka poe kanaka e, no ka mea, ke manao nei lakou, no ka nui o ka lakou olelo ana, e hoolohe ia mai ai lakou.

8. Mai hoohalike me lakou, no ka mea, ua ike ko oukou Makua i na mea e pono ai oukou, mamua o ka oukou noi ana ia ia.

9. Nolaila, penei oukou e pule aku ai: E ko makou Makua iloko o ka lani, e hoano ia kou inoa.

10. E malama ia kou makemake ma ka honua nei, e like me ia i malama ia ma ka lani la.

11. E kala mai oe i ko makou mau lawehala ana, me makou e kala nei i ka poe i lawehala mai i ka makou.

12. Mai hookuu ia makou iloko o ka hoowalewale ia mai, aka e hoopakele no ia makou i ka ino.

13. No ka mea, nou ke aupuni, a me ka mana, a me ka hoonani ia, a mau loa aku. Amene.

14. No ka mea, ina e kala aku oukou i na hala o kanaka, e kala mai no hoi ko oukou Makua o ka lani i ko oukou;

15. Aka i ole oukou e kala aku i na hala o kanaka, aole no hoi e kala mai ko oukou Makua i ko oukou hala.

16. A eia hou, a i hookeai oukou, mai hoino i ko oukou maka e like me ka poe hookamani, no ka mea, ke hoinoino la lakou i ko lakou maka, i ike ia mai e na kanaka ka lakou hookeai ana. He oiaio kaʻu e olelo aku nei ia oukou, ua loaa ia lakou ko lakou uku.

17. Aka, i hookeai oe, e poni i kou poo, a e holoi i kou maka;

18. I ike ole ia kau hookeai ana e na kanaka, aka, i ikea ia e kou Makua ina no ma kahi nalo; a o kou Makua, ka mea i ike i kahi nalo, oia ke uku mai ia oe ma ke akea.

19. Mai hoahu oukou i ka waiwai no oukou iho ma ka honua, kahi i ino ai i ka mu a me ka popo, kahi e wawahi mai ai na aihue e aihue ai;

20. Aka, e hoahu ae oukou i ka waiwai no oukou iho ma ka lani, kahi e ino ole ai i ka mu a me ka popo, kahi e wawahi ole mai na aihue e aihue ai.

21. No ka mea, ma kahi e waiho ai i ko oukou waiwai, malaila pu no hoi ko oukou naau.

22. O ka maka no ko ke kino kukui; nolaila, ina he maikai kou maka, e piha auanei kou kino a pau i ka malamalama.

23. Aka, ina he ino kou maka, e piha auanei kou kino a pau i ka pouli. Nolaila, ina e lilo ka malamalama iloko ou i pouli, nani wale ka nui o ua pouli la!

24. Aole no e hiki i ke kanaka ke malama i na haku elua, no ka mea, e inaina ia i kekahi, a e aloha aku hoi i kekahi; a i ole ia, e hoopili aku ia i kekahi me ka hoowahawaha i kekahi. Aole e hiki ia oukou ke malama pu i ke Akua a me ka mamona.

25. Ano, eia kekahi, ia Iesu i olelo mai ai i keia mau olelo, nana mai la oia ma ka poe umikumamalua ana i wae mai ai, a i mai la oia ia lakou: E hoomanao i na olelo aʻu i olelo aku ai. No ka mea hoi, o oukou no ka poe aʻu i wae aku ai e lawelawe aku i keia poe kanaka. Nolaila, ke i aku nei au ia oukou, mai manao iki oukou no ko oukou ola, i ka oukou mea e ai ai, aole hoi i ka oukou mea e inu ai; aole hoi no ko oukou kino, i ka oukou mea e aahu ai. Aole anei i oi aku ke ola mamua o ka ai, a o ke kino mamua o ke kapa?

26. E nana aku i na manu o ka lewa, no ka mea, aole lakou e lulu hua, aole hoi e oki ai, aole no hoi e hoahu ae iloko o na halepapaa; ke hanai mai la nae ko oukou Makua o ka lani ia lakou. Aole anei i oi aku ko oukou maikai i ko lakou?

27. Owai la ka mea o oukou e hiki ma ka manao ana ke hooloihi aku i kona kiekie i hookahi kubita?

28. A no ke aha oukou e manao ai i ke kapa? E noonoo i na lilia o ke kula, i ko lakou ulu ana; aole lakou i hana, aole hoi i milo;

29. A ke olelo aku nei nae au ia oukou, o Solomona i kona nani a pau, aole ia i kahiko like ia me kekahi o ia mau mea.

30. Nolaila, ina pela ke Akua e hoonani mai ai i ka nahelehele ina no ma ke kula i keia la, a i ka la apopo e hoolei ia ai iloko o ka umu, pela no oia e hoaahu mai ai ia oukou, ina aole o oukou paulele kapekepeke.

31. Nolaila hoi, mai manao iki, me ka i ana, Heaha ka kakou mea e ai ai? A Heaha ka kakou mea e inu ai? A Heaha ko kakou mea e aahu ai?

32. No ka mea, ua ike ko oukou Makua o ka lani, he pono ke loaa ia oukou ia mau mea a pau.

33. Aka, e imi e oukou mamua i ke aupuni o ke Akua, a me kana pono, a e pau ua mau mea la i ka haawi ia mai ia oukou.

34. Nolaila, mai manao iki aku no ka la apopo, no ka mea, na ka la apopo e manao iho no na mea nona iho. Ua lawa ka la no ka ino ona iho.