1. A, eia kekahi, ma ka hope o ka makahiki umikumamawalu, ua hoomakaukau iho ua poe koa la o na powa, no ke kaua, a hoomaka ae la e iho, a e puka mai mai na puu mai, a mailoko mai o na kuahiwi, a o ka waonahele, a me ko lakou mau wahi paa, a me ko lakou mau wahi malu a hoomaka ae la e noho ae ma na aina, ma ka aina hema, a ma ka aina akau no hoi, a hoomaka ae la e noho ae ma na aina a pau i haalele ia e ko Nepai poe, a me na kulanakauhale i waiho neoneo ia.

2. Aka hoi, aole holoholona hihiu, aole hoi mea e pepehi ai, ma ua mau aina la i haalele ia aku e ko Nepai poe, a, aole holoholona hihiu no ka poe powa koe wale no ma ka waonahele.

3. A ua hiki ole i ka poe powa ke ola, koe ma ka waonahele wale no, no ka nele i ka ai ole; no ka mea, ua waiho neoneo ko Nepai poe i ko lakou mau aina, a ua houluulu mai la i na pua holoholona o lakou, a me ko lakou mau ohana holoholona, a me ko lakou waiwai, a ma ka puuluulu hookahi lakou.

4. Nolaila, ua hiki ole i ka poe powa ke hao mai a e loaa ka ai, ke ole pii mai ma ke kaua akea i ko Nepai poe; a ma ka puuluulu hookahi ko Nepai poe, a ua lehulehu loa a ua hoahu iho la no lakou iho i ka ai, a me na lio, a me na bipi, a me na pua holoholona o kela ano keia ano, i hiki ia lakou ke ola no na makahiki ehiku, a ma ua manawa nei ua lana ko lakou manao e anai loa aku i ka poe powa, mai ka ili aku o ka aina. A pela i hala aku ai ka makahiki umikumamawalu.

5. A eia kekahi, ma ka makahiki umikumamaiwa, ike iho la o Gidianahi he mea e pono ai nona e pii mai e kaua mai i ko Nepai poe, no ka mea, aole he ala no lakou e ola ai, ke ole e hao mai, a powa, a pepehi kanaka mai.

6. A aa ole lakou e hoopalahalaha ae ia lakou iho ma ka ili o ka aina, e hiki ia lakou ke hooulu ae i ka hua liilii, o hiki aku ko Nepai poe maluna iho o lakou, a luku aku ia lakou; nolaila, kauoha ae la o Gidianahi i na puali kaua ona, ma ua makahiki nei e pii mai lakou e kaua ku e i ko Nepai poe.

7. A eia kekahi, pii mai la lakou e kaua; a ma ka malama eono ia; a, aia hoi, ua nui a weliweli ka la a lakou i pii mai ai e kaua; a ua kakoo ia lakou mamuli o ke ano o ka poe powa; a he ili keikihipa ko lakou a puni ko lakou mau puhaka, a ua hooluu ia lakou iloko o ke koko; a ua amu ia na poo o lakou; a he pale-poo ko lakou maluna o lakou; a nui a weliweli no ke ano o na puali kaua o Gidianahi, no ko lakou kahiko ia ana, a no ko lakou hooluu ia ana iloko o ke koko.

8. A eia kekahi, i ka wa a ka poe kaua o ko Nepai poe i ike aku ai i ke ano o ka poe kaua o Gidianahi, ua hina iho la lakou a pau i ka honua, a hookiekie ae la i ko lakou hea ana i ka Haku, i ko lakou Akua, e hookoe mai oia ia lakou, a e hoopakele mai ia lakou mailoko mai o na lima o ko lakou poe enemi.

9. A eia kekahi, i ka wa a na puali kaua o Gidianahi i ike mai ai i keia, hoomaka ae la lakou e hooho me ka leo nui, no ko lakou olioli; no ka mea, ua kuhi iho la lakou ua hina iho ko Nepai poe no ka makau, no ka weliweli o ko lakou poe kaua;

10. Aka ma keia mea ua kuhihewa lakou, no ka mea, aole ko Nepai poe i makau aku ia lakou, aka makau iho la lakou i ko lakou Akua, a noi aku la ia ia no ka hoomalu ana; nolaila, i ka wa a na puali kaua o Gidianahi i naholo kiki mai ai maluna o lakou nei, ua makaukau lakou nei e halawai me lakou; he oiaio, ma ka ikaika o ka Haku lakou i halawai ai me lakou la;

11. A hoomaka ae la ke kaua ma keia malama eono; a nui a weliweli no ua kaua la; he oiaio, a nui a weliweli ka luku ma ia kaua, aole i ike e ia mamua ka luku nui me neia mawaena o ka poe kanaka a pau o Lehi, mai ka wa mai ana i haalele ai ia Ierusalema.

12. A me na olelo hooweliweli a me na hoohiki paa a Gidianahi i hana ai, aia ka, lanakila aku nae ko Nepai poe maluna o lakou, a hee aku la lakou la imua o lakou.

13. A eia kekahi, kena ae la o Gidigidoni i kona poe kaua, e alualu aku ia lakou a hiki aku i na palena o ka waonahele, a aole lakou e hookoe i kekahi mea e haule ana iloko o ko lakou mau lima ma ke ala; a pela lakou i alualu ai ia lakou la, a luku aku la ia lakou la a hiki i na palena o ka waonahele, oia, a hiki i ka wa a lakou i hooko ai i ke kauoha o Gidigidoni.

14. A eia kekahi, o Gidianahi, ka mea i ku a kaua me ka makau ole, ua alualu ia aku ia ia i hee aku ai; a ua maluhiluhi oia no ka nui o kona kaua ana, a loaa aku la ia a pepehi ia a make. A oia no ka hopena o Gidianahi, ka powa.

15. A eia kekahi, hoi hou ae la na puali kaua o ko Nepai i ko lakou wahi maluhia. A eia kekahi, hala aku la ua makahiki umikumamaiwa nei, a aole hele hou mai ka poe powa e kaua; aole hoi lakou i hele hou mai ma ka makahiki iwakalua;

16. A ma ka makahiki iwakaluakumamakahi hoi aole lakou i pii mai e kaua, aka pii mai la lakou ma kela aoao keia aoao e hoopuni i ka poe kanaka o Nepai; no ka mea, manao iho la lakou ina e alalai mai lakou la i ka poe kanaka o Nepai, mai ko lakou mau aina ae, a e hoopuni mai ia lakou ma kela aoao keia aoao, a ina e hooki mai lakou la ia lakou mai ko lakou mau pono owaho, alaila, e hiki ia lakou la ke kena mai ia lakou, e hookuu aku ia lakou iho, e like me ko lakou la makemake.

17. Ano, ua hoonoho ae la lakou i luna hou no lakou iho, a o Zemanariha kona inoa; nolaila, na Zemanariha i hooponopono i keia hoopuni ana.

18. Aka hoi, he mea pomaikai keia no ko Nepai poe; no ka mea, he mea hiki ole i ka poe powa ke hoopuni loihi loa mai me ka hoopilikia mai i ko Nepai poe, no ka nui o ka lakou ai a lakou i hoahu iho ai,

19. A no ka hapa o ka ai mawaena o ka poe powa; no ka mea hoi, aole o lakou mea o ka io holoholona wale no e ai ai, a ma ka waonahele lakou i loaa ai ua io holoholona nei.

20. A eia kekahi, ua kakaikahi na holoholona hihiu ma ka waonahele, a no ia nele aneane ka poe powa e make i ka pololi.

21. A e hele mau ana ko Nepai poe mawaho ma ke ao a ma ka po, a e haule ana maluna iho o ko lakou poe kaua, a e ooki aku ana ia lakou ma na tausani a ma na umi o na tausani.

22. A no ia mea, i makemake ai ka poe kanaka o Zemanariha, e haalele i ko lakou manao, no ka luku nui ana i kau mai ai maluna o lakou ma ka po a ma ke ao.

23. A eia kekahi, kena ae la o Zemanariha i kona poe kanaka, e haalele mai lakou i ka hoopuni ana, a e hele aku iloko o na wahi loihi loa aku o ka aina, ma ka akau.

24. Ano, ua ike o Gidigidoni i ko lakou manao, a i ka ike ana i ko lakou nawaliwali no ka nele i ka ai ole, a me ka luku nui i hana ia mawaena o lakou, nolaila, hoouna ae la oia i kona poe kaua i ka po, a alalai aku la i ke ala a lakou i kuemi hope aku ai, a hoonoho iho la i kona poe kaua ma ke ala a lakou i hee aku ai;

25. A o keia ka lakou nei i hana ai i ka po, a hele aku la ma ko lakou ala ma o aku o ka poe powa, a no ia mea, ma ia la ae, i ka wa a ka poe powa i hoomaka ai i ko lakou hele, ua halawai lakou me na puali kaua o ko Nepai, ma ko lakou alo a ma ko lakou hope no hoi.

26. A o ka poe powa ma ka hema, ua alalai ia no hoi lakou i ko lakou mau wahi e hee aku ai. A ua hana ia aku keia mau mea a pau mamuli o ke kauoha a Gidigidoni.

27. A he nui na tausani i haawi mai ia lakou iho i poe pio i ko Nepai poe; a ua pepehi ia ke koena o lakou a make;

28. A ua hopu ia ko lakou luna, o Zemanariha, a li ia aku maluna o kahi laau, he oiaio, ma ka welau ona, a make loa ia. A ia lakou i li aku ai ia ia a make loa ia, kua iho la lakou i ka laau i ka honua, a hea aku la me ka leo nui, i ka i ana:

29. Na ka Haku e hoola mai i kona poe kanaka ma ka pono a ma ka hemolele o ka naau, e hiki ia lakou ke kua aku i ka honua i ka poe a pau e imi ana e luku mai ia lakou no ka mana a me na hui pu malu ana, he oiaio, e like me ua kanaka nei i kua ia i ka honua.

30. A hauoli iho la lakou a hea hou aku la me ka leo hookahi, i ka i ana: Na ke Akua o Aberahama, a me ke Akua o Isaaka, a me ke Akua o lakoba, e hoomalu mai i keia poe kanaka ma ka pono, i na manawa a pau a lakou e hea aku ai ma ka inoa o ko lakou Akua no ka hoomalu ana.

31. A eia kekahi, hooho aku la lakou a pau, me he mea hookahi la, ma ka memele ana a hoolea ana i ko lakou Akua, no ka mea nui ana i hana mai ai no lakou, i ka malama ana mai ia lakou mai ka haule ana iloko o na lima o ko lakou poe enemi;

32. He oiaio, hea aku la lakou, Hosana i ke Akua Kiekie Loa; a hea aku la lakou, E hoomaikai ia aku ka inoa o ka Haku, ke Akua Mana Loa, ke Akua Kiekie Loa.

33. A ua hu ko lakou mau naau me ka olioli, me ke kulu ana o ka waimaka he nui, no ka lokomaikai nui o ke Akua i ka hoopakele ana ia lakou mailoko mai o na lima o ko lakou poe enemi; a ua ike lakou no ko lakou mihi a me ko lakou haahaa, i hoopakele ia ai lakou mai ka luku mau loa ia ana ae.