1. A he oiaio kaʻu e olelo aku nei ia oukou, ke haawi aku nei au ia oukou i hoailona, i ike ai oukou i ka wa e aneane ai ke ko ana o ia mau mea, e houluulu ana au i koʻu koe kanaka mai ko lakou hoopuehu loihi ia ana, e ko ka hale o Iseraela, a e hookupaa hou aku au i koʻu Ziona mawaena o lakou.

2. Eia ka mea aʻu e haawi aku ai ia oukou i hoailona, no ka mea, he oiaio kaʻu e olelo aku nei ia oukou, i ka wa o keia mau mea aʻu e hai aku nei ia oukou, a me na mea aʻu e hai aku ai ma neia hope aku noʻu iho, a ma ka mana o ka Uhane Hemolele hoi, ka mea e haawi ia mai ia oukou e ka Makua, i ka wa e hoike ia aku ai ka poe Genetile, i ike lakou no keia lahuikanaka he poe i koe o ko ka hale o Iakoba, a no keia poe kanaka oʻu, e hoopuehu ia aku auanei e lakou;

3. Oiaio, he oiaio kaʻu e olelo aku nei ia oukou, i ka wa e hoike ia aku ai keia mau mea ia lakou e ka Makua, a e hoopuka ia ai e ka Makua, mai o lakou mai ia oukou,

4. No ka mea, he mea naauao ia i ka Makua e hookupaa ia aku lakou ma keia aina, a e kukulu ia i lahuikanaka kuokoa ma ka mana o ka Makua, i hiki mai ai keia mau mea mai ia lakou mai i kekahi koena o ka oukou poe hua, i ko ai ka berita a ka Makua, ana i hana berita ai me kona poe kanaka, e ko ka hale o Iseraela;

5. Nolaila, i ka wa a keia mau hana, a me na hana e hana ia ai ma neia hope aku mawaena o oukou, e puka mai ai mai ka poe Genetile mai i ka oukou poe hua, ka poe e emi ana iloko o ka hoomaloka no na lawehala;

6. No ka mea, pela e pono ai i ka Makua e puka mai auanei ia mea mai ka poe Genetile mai, i hoike aku ai oia i kona mana i ka poe Genetile, no keia mea, e hiki i ka poe Genetile, ina e hoopaakiki ole lakou i ko lakou mau naau, ke mihi a hele mai ioʻu nei, a e bapetizo ia ma koʻu inoa, a e ike i na kumu oiaio o koʻu ao ana, i helu pu ia ai lakou mawaena o koʻu poe kanaka, e ko ka hale o Iseraela;

7. A i ka wa e hiki mai ai keia mau mea, i hoomaka kau poe hua e ike i keia mau mea, he hoailona auanei ia ia lakou, i ike ai lakou ua hoomaka ka hana o ka Makua ano, ma ka hooko ana i ka berita ana i hana mai ai i ka poe kanaka no ko ka hale o Iseraela.

8. A i ka wa e hiki mai ai ia la, e pani na alii i ko lakou mau waha; no ka mea, e ike lakou i ka mea i hai ole ia aku ia lakou; a e noonoo pono lakou i ka mea a lakou i lohe ole ai.

9. No ka mea, ma ia la, noʻu nei e hana aku no ka Makua i kekahi hana, a he hana nui a kupaianaha auanei ia mawaena o lakou; a aia auanei kekahi poe mawaena o lakou e manaoio ole ia mea, ina e hai aku kekahi kanaka ia mea ia lakou.

10. Aka hoi, aia ma kuu lima auanei ke ola o kaʻu kauwa; nolaila, aole lakou e hoeha aku ia ia, e hoomainoino ia nae oia ma o lakou la. E hoola aku nae au ia ia, no ka mea, e hoike aku au ia lakou ua oi aku koʻu naauao mamua o ka maalea o ke diabolo.

11. Nolaila, e hiki mai ana keia, o ka mea e manaoio ole mai i kaʻu mau olelo, owau no o Iesu Kristo no, ka mea a ka Makua e kauoha aku ai ia ia e hoopuka aku i ka poe Genetile, a e haawi aku auanei ia ia i ka mana, nana e hoopuka aku ia mau mea i ka poe Genetile, (a e hana ia auanei ia e like me ka Mose i olelo mai ai,) e hooki ia aku auanei lakou maiwaena aku o koʻu poe kanaka, ka poe o ka berita;

12. A o koʻu poe kanaka, ka poe koena o ko ka hale o Iakoba, mawaena auanei lakou o ka poe Genetile, he oiaio, mawaena konu o lakou la, me he liona la mawaena o na holoholona o ka ululaau, me he liona opio la mawaena o na pua hipa, ka mea nana e hahi iho a e nahaehae liilii, ina e hele oia mawaena, aole i hiki i kekahi ke hoopakele.

13. E hapai ia aku ko lakou lima maluna iho o ko lakou poe ku e mai, a e hooki ia aku ko lakou poe enemi a pau.

14. He oiaio, auwe ka poe Genetile, ke mihi ole lakou, no ka mea, e hiki mai ana keia ma ia la, wahi a ka Makua, e hooki aku au i kou poe lio mailoko aku ou, a e anai aku au i kou mau kaakaua,

15. A e hooki aku au i na kulanakauhale o kou aina, a e hoohiolo aku ilalo i kou mau wahi paa a pau;

16. A e hooki aku au i na hoopiopio mailoko aku o kou lima, aole ou poe kilo hou ma ia hope aku;

17. A e hooki aku au i na kii kalai ia ou, a me kou mau kii akua maiwaena konu aku ou; a e hoomana hou ole aku oe i na hana a kou mau lima,

18. A e uhuki aku au i na ululaau maiwaena konu aku ou; pela hoi au e anai aku ai i kou mau kulanakauhale.

19. A e hiki mai ana keia, o na wahahee, a me na hoopunipuni, a me na paonioni, a me na paio, a me na hana maalea a na kahuna pule hoopunipuni, a me na moekolohe, e hoopau ia aku auanei ia mau mea.

20. No ka mea, e hiki mai keia, wahi a ka Makua, ma ua la la, o na mea e mihi ole a hele ole mai i kaʻu Keiki punahele la, e hooki aku au ia lakou maiwaena aku o koʻu poe kanaka, e ko ka hale o Iseraela;

21. A e hooko aku au i ka hoopai a me ka inaina maluna iho o lakou e like me ia maluna iho o ko na aina e, i ka mea a lakou i lohe ole ai.

22. Aka, ina e mihi lakou, a e hoolohe mai i kaʻu mau olelo, a hoopaakiki ole i ko lakou mau naau, e hookupaa aku au i koʻu ekalesia mawaena o lakou, a e komo mai auanei lakou i ka berita, a e helu pu ia mawaena o keia, ke koena o Iakoba, ia lakou wau i haawi aku ai i keia aina i hooilina no lakou,

23. A e kokua auanei lakou i koʻu poe kanaka, ke koena o ko Iakoba; a me ka poe a pau no hoi o ko ka hale o Iseraela, ka poe e hele mai ana i hiki ai ia lakou ke kukulu i kekahi kulanakauhale, e kapa ia ana ka Ierusalema Hou;

24. Alaila, e kokua no lakou i koʻu poe kanaka, i houluulu ia mai ai lakou, ka poe i hoopuehu ia aku maluna iho o ka ili a pau o ka aina, iloko o ka Ierusalema Hou.

25. Alaila, e iho mai ai ka mana o ka lani mawaena o lakou; a owau no hoi kekahi mawaena konu;

26. Alaila, e hoomaka ka hana a ka Makua, ma ua la la i ka wa e hai ia aku ai keia euanelio mawaena o ke koena o keia poe kanaka. He oiaio kaʻu e olelo aku nei ia oukou, ma ua la la e hoomaka no ka hana a ka Makua mawaena o ka poe i hoopuehu ia aku a pau o koʻu poe kanaka; he oiaio, o na ohana i nalowale, a ka Makua i alakai aku ai mailoko aku o Ierusalema.

27. He oiaio, e hoomaka auanei no ka hana mawaena o ka poe i hoopuehu ia aku a pau o koʻu poe kanaka, me ka Makua, e hoomakaukau ai i ke ala i hiki ai ia lakou ke hele mai ioʻu nei, i hiki ia lakou ke kahea mai i ka Makua ma koʻu inoa;

28. He oiaio, alaila e hoomaka ai ka hana, me ka Makua, mawaena o na lahuikanaka a pau, i ka hoomakaukau ana i ke ala, e hiki ai kona poe kanaka ke houluulu ia i ka aina o ko lakou hooilina.

29. A e puka aku auanei lakou mai na lahuikanaka aku a pau; a e hele ole aku auanei lakou me ka awiwi, aole hoi me ka auhee; no ka mea, e hele aku au imua o lakou, wahi a ka Makua, a o ko lakou kiai hope no hoi au.