1. Aka hoi, e hoike aku au ia oukou aole lakou i hoonoho i alii maluna iho o ka aina; aka ma ua makahiki hookahi nei, he oiaio, ka makahiki kanakolu, hoopau ae la lakou ma ka noho hookolokolo, he oiaio, pepehi ae la i ka lunakanawai nui o ka aina a make loa.

2. A ua mokuahana na kanaka kekahi i kekahi; a hookaawale ae la lakou kekahi mai kekahi ae, iloko o na ohana, kela kanaka keia kanaka mamuli o kona ohana, a me kona hanauna a poe makamaka: a pela lakou i hoopau ai i ke aupuni o ka aina.

3. A hoonoho ae la kela ohana keia ohana i alii, a i luna maluna iho o lakou; a pela lakou i lilo ai i mau ohana, a me na luna o na ohana.

4. Ano hoi, aole kekahi kanaka mawaena o lakou, ke ole he ohana nui kona a me na pilikana a me na makamaka he nui wale; nolaila, lilo iho la ko lakou mau ohana i nui loa.

5. Ano, ua hana ia keia a pau aole nae he mau kaua mawaena o lakou i keia manawa; a ua hiki mai la keia hewa a pau maluna iho o na kanaka, no ko lakou hookuu ana ia lakou iho i ka mana o Satana;

6. A ua hoopau ia aku na hooponopono ana o ke aupuni, no ka hui malu pu ana o na makamaka a me na hanauna o ua poe la, ka poe i pepehi mai i ka poe kaula.

7. A ma o lakou la i hiki mai ai kekahi paio nui ma ka aina, a o ka poe pono nui ae o na kanaka, ua aneane lilo nae lakou a pau i poe hewa; he oiaio, he kakaikahi wale no na kanaka pono mawaena o lakou.

8. A pela i hala ole aku ai na makahiki eono, mahope mai o ka huli ana ae o ka nui loa o na kanaka mai ko lakou pono i ka pono ole, e like me ka ilio i kona luai iho, a e like hoi me ka puaa i kona haluku ana iloko o ke kiolepo.

9. Ano, houluulu iho la ua poe hui malu nei, ka poe i lawe mai i ka hewa nui me neia maluna iho o na kanaka, ia lakou iho i kahi hookahi, a hoonoho ae la maluna ae o lakou i kekahi kanaka a lakou i kapa aku ai o Iakoba;

10. A kapa ae la lakou ia ia ko lakou alii; nolaila, lilo iho la oia i alii maluna iho o ua poe hui hewa nei; a o kekahi mea nui ia nana i hoopuka mai i kona leo e ku e i ka poe kaula, ka poe i hoike mai no Iesu.

11. A eia kekahi, aole o lakou ikaika ma ka heluna e like me na ohana o na kanaka, ka poe i hoohui pu ia, na na luna nae o lakou i hana iho i na kanawai, o kela mea keia mea e like me kona ohana; aka hoi, he poe kanaka pono ole lakou, he poe enemi nae; aka, ua hoohui pu ia lakou ma ka inaina aku i ua poe la, ka poe i komo iloko o ka berita e hoopau mai i ka noho aupuni ana;

12. Nolaila, i ka ike ana o Iakoba ua lehulehu loa ko lakou poe enemi mamua o lakou la, a oia no ke alii o ua poe hui la, nolaila, kena ae la oia i kona poe kanaka e hee aku lakou iloko o na wahi ma ka akau loa o ka aina, a malaila e kukulu iho ai i aupuni no lakou iho, a hiki i ka wa e hoohui ia ai lakou me na mea haalele ku e, (no ka mea, ua olelo hoomalimali ae la ia ia lakou e nui ana na mea ku e,) a e lilo lakou i ikaika kupono e kaua mai me na ohana o na kanaka; a hana iho la lakou pela.

13. A no ka wikiwiki o ko lakou hele ana, aole hiki lakou ke keakea ia aku, a hiki i ka wa a lakou i hele loa ai i loaa ole ai lakou i na kanaka. A pela i pau ai ka makahiki kanakolu; a pela hoi ka noho ana o ka poe kanaka o Nepai.

14. A eia kekahi, ma ka makahiki kanakolukumamakahi, ua mahele ia lakou ma na ohana, o kela kanaka keia kanaka mamuli o kona ohana, hanauna a poe makamaka; ua hooholo nae lakou i ka ae like, i ole ai lakou e hele e kaua ku e kekahi me kekahi; aka aole lakou i hui pu ia ma ko lakou mau kanawai, a me ko lakou ano o ka hoomalu ana, no ka mea, ua hoonoho ia ia mau mea mamuli o na manao o kela poe alii a poe luna o lakou. Aka hoonoho iho la lakou i na kanawai ikaika loa, i ole lawehala aku kekahi ohana i kekahi, a no ia mea, loaa iho la ia lakou ka maluhia ma kekahi mau mea ma ka aina; aka hoi, ua hoohuli ia ae la ko lakou mau naau mai ka Haku ae, ko lakou Akua, a hailuku mai la lakou i ka poe kaula, a hookuke mai ia lakou nei maiwaena mai o lakou.

15. A eia kekahi, ua hoea mai imua o Nepai na anela, a me ka leo o ka Haku no hoi, nolaila, ua ike aku la i na anela, a he ike maka no ia, a ua haawi ia mai ka mana ia ia i ike oia no ka oihana o Kristo, a he ike maka no hoi, no ko lakou hoi wawe ana mai ka pono aku i ko lakou hewa a mau mea hoopailua;

16. Nolaila, no kona kaumaha no ka paakiki o ko lakou mau naau, a me ka pouli o ko lakou hoomaopopo ana, hele aku la ia mawaena o lakou ma ua makahiki nei, a hoomaka ae la e hoike wiwo ole aku, no ka mihi a me ke kala ia ana o na hala ma o ka manaoio la i ka Haku o Iesu Kristo.

17. A lawelawe aku la oia i na mea he nui ia lakou; a ua hiki ole ke kakau ia ia mau mea a pau loa, a, o kekahi hapa o ia mau mea aole e lawa pono, nolaila; aole palapala ia ia mau mea ma keia buke. A lawelawe aku la o Nepai me ka ikaika a me ka mana nui.

18. A eia kekahi, huhu mai la lakou ia ia, no ka mea, he mana nui loa ae kona mamua o ko lakou, no ka mea, he mea hiki ole ia lakou ke hoomalau mai i kana mau olelo, no ka mea, no ka nui o kona manaoio ma ka Haku o Iesu Kristo, lawelawe mai la na anela ia ia i kela la i keia la;

19. A ma ka inoa o Kristo i mahiki ai oia i na daimonio a me na uhane haukae; a hoala ae la no ia i kona kaikaina mai ka make mai, mahope iho o kona hailuku ia ana, a pepehi ia ana a ma¬ke loa e na kanaka;

20. A ike mai la na kanaka ia mea, a hoike aku la no ia mea, a ua huhu mai ia ia no kona mana; a hana aku la no hoi oia i na hana mana e ae he nui wale, ma ke alo o na kanaka, ma ka inoa o Iesu.

21. A eia kekahi, hala aku la ka makahiki kanakolukumamakahi, a he uuku wale no ka poe i hoohuli ia mai i ka Haku; aka, o ka poe a pau i hoohuli ia, hoike io ae la lakou i na kanaka, ua kau mai maluna iho o lakou ka mana a me ka Uhane o ke Akua, iloko o Iesu Kristo, ka mea a lakou i manaoio aku ai.

22. A o ka poe a pau nona na daimonio i mahiki ia aku ai mai o lakou aku la, a i hoola ia mai ko lakou mai a me ko lakou nawaliwali, hoike io aku la lakou i na kanaka, ua lawelawe ia mai lakou e ka Uhane o ke Akua, a ua hoola ia; a hoike aku Ia lakou i na hoailona no hoi, a hana aku la i kekahi mau hana mana mawaena o na kanaka.

23. Pela i hala aku ai ka makahiki kanakolukumamalua no hoi. A hea aku la o Nepai i na kanaka ma ka hoomaka ana o ka makahiki kanakolukumamakolu; a hai aku la oia ia lakou i ka mihi a me ke kala ia ana o na hala.

24. Ano, ke makemake nei au ia oukou e hoomanao hoi, aohe kekahi mea i kai ia ae i ka mihi, i bapetizo ole ia me ka wai;

25. Nolaila, ua hoolilo ia aku kekahi poe kanaka e Nepai, i keia oihana, i bapetizo ia aku me ka wai ka poe a pau e hele mai ana io lakou la, a o keia me he mea hoike la a mea hooiaio imua o ke Akua, a i na kanaka, ua mihi iho la lakou a loaa iho la ke kala ia ana o ko lakou mau hala.

26. A he nui na mea ma ka hoomaka ana o ua makahiki nei, i bapetizo ia i ka mihi; a pela i hala aku ai ka hapa nui o ka makahiki.