1. A oiaio, he oiaio kaʻu e olelo aku nei ia oukou, he poe hipa e ae kaʻu, aole no keia aina; aole hoi no ka aina o Ierusalema; aole hoi ma na wahi o ua aina la a puni, kahi aʻu i hele ai e lawelawe.

2. No ka mea, o ka poe aʻu e olelo nei, o lakou no ka poe i lohe ole i koʻu leo a hiki i keia manawa; aole hoi au i hoike aku iaʻu iho ia lakou i kekahi manawa.

3. Aka, ua loaa iaʻu he kauoha na ka Makua mai, e hele aku auanei au io lakou la, a e lohe auanei lakou i kuu leo, a e helu pu ia mawaena o kaʻu poe hipa, i hookahi pa, a i hookahi hoi kahuhipa; nolaila, e hele aku ana au e hoike aku iaʻu iho ia lakou.

4. A ke kauoha aku nei au ia oukou, e palapala iho oukou i keia mau olelo, mahope iho o koʻu hele ana aku, ina paha koʻu poe kanaka ma Ierusalema, ka poe i ike mai iaʻu, a i launa pu me au ma koʻu lawelawe ana, e noi ole i ka Makua ma koʻu inoa, i loaa ai ia lakou ka ike no oukou ma o ka Uhane Hemolele la, a me na ohana e ae no hoi, ka poe i ike ole ia e lakou, alaila e malama ia ua mau olelo nei a oukou e palapala ai, a e hoike ia aku auanei i ka poe Genetile, a ma o ka piha ana la o ka poe Genetile, e hiki i ke koena o ka lakou poe hua ka poe e hoopuehu ia aku auanei maluna o ka ili o ka honua nei, no ko lakou hoomaloka, ke kai ia mai iloko, a ke kai ia mai i ka ike iaʻu, i ko lakou Mea Hoolapanai.

5. Alaila, e houluulu mai au ia lakou mai na kihi eha mai o ka honua; alaila hoi, e hooko aku au i ka berita a ka Makua i hana aku ai i ka poe kanaka a pau o ka hale o Iseraela.

6. A pomaikai ka poe Genetile, no ko lakou manaoio mai iaʻu, iloko a ma o ka Uhane Hemolele la, ka mea e hoike ana ia lakou noʻu nei a no ka Makua.

7. Aia hoi, no ko lakou manaoio mai iaʻu, wahi a ka Makua, a no ka hoomaloka o oukou, e ko ka hale o Iseraela, ma na la mahope e hiki no ka oiaio i ka poe Genetile la, i hoike ia aku ai auanei ka nui o keia mau mea ia lakou.

8. Aka auwe, wahi a ka Makua, i ka poe Genetile hoomaloka, no ka mea, me ko lakou hele mai nae maluna o ka ili o keia aina, a hoopuehu aku i koʻu poe kanaka, ka poe o ko ka hale o Iseraela; a hoolei ia aku koʻu poe kanaka o ko ka hale o Iseraela, maiwaena aku o lakou, a hahi ia ilalo o na wawae e lakou;

9. A no na lokomaikai o ka Makua i ka poe Genetile, a me na hoopai no hoi o ka Makua maluna o koʻu poe kanaka, o ko ka hale o Iseraela, oiaio, he oiaio kaʻu e olelo aku nei ia oukou, mahope iho o keia mau mea a pau, a kuu aku au i koʻu poe kanaka o ko ka hale o Iseraela, e hahau ia, a e hoopilikia ia, a e luku ia, a e hoolei ia ae maiwaena aku o lakou, a e inaina ia e lakou, a e lilo i kuamuamu ia a i hua olelo ino mawaena o lakou.

10. A pela i kauoha mai ai ka Makua e olelo aku au ia oukou, ma ia la i ka wa e lawehala mai ai ka poe Genetile i koʻu euanelio, a e hookiekie ia iluna ma ka haaheo o ko lakou mau naau, maluna ae o ko na aina a pau, a maluna ae o na kanaka a pau o ka honua holookoa, a e hoopiha ia me na ano a pau o na wahahee, a o na hoopunipuni, a o na kolohe, a me na ano a pau o na hookamani, a me na pepehi kanaka, a me na hana maalea a na kahuna pule hoopunipuni, a me na moekolohe, a o na hana hoopailua malu; a ina e hana auanei lakou i ua mau mea la a pau, a hoomalau mai i koʻu euanelio mana a pololei, aia hoi, wahi a ka Makua, e lawe aku au i koʻu euanelio mana a pololei maiwaena aku o lakou;

11. Alaila, e hoomanao au i kaʻu berita aʻu i hana aku ai i koʻu poe kanaka, e ko ka hale o Iseraela, a e lawe no au i koʻu euanelio io lakou nei;

12. A e hoike aku au ia oe, e ko ka hale o Iseraela, aole o ka poe Genetile mana auanei maluna o oukou, aka, e hoomanao au i kaʻu berita ia oukou, e ko ka hale o Iseraela, a e hiki mai oukou i ka ike i koʻu euanelio mana a pololei.

13. Aka, ina e mihi ka poe Genetile, a hoi hou mai ioʻu nei, wahi a ka Makua, aia hoi, e helu pu ia auanei lakou mawaena o koʻu poe kanaka, e ko ka hale o Iseraela;

14. A, aole au e ae aku i koʻu poe kanaka, ko ka hale o Iseraela, e hele aku mawaena o lakou, a e hahi ia lakou ilalo, wahi a ka Makua.

15. Aka, ina aole lakou e huli mai iaʻu, a e hoolohe mai i koʻu leo, e ae aku no au, he oiaio, e ae aku au i koʻu poe kanaka, e ko ka hale o Iseraela, i hele aku ai lakou mawaena o lakou la, a e hahi ia lakou la ilalo, a e like auanei lakou me ka paakai i lilo kona liu, aohe ona mea e pono ai ma ia hope, e kiola wale ia iwaho, a e hehi ia malalo iho o na wawae o koʻu poe kanaka, e ko ka hale o Iseraela.

16. Oiaio, he oiaio kaʻu e olelo aku nei ia oukou, pela ka Makua i kauoha mai ai iaʻu, e haawi aku au i keia poe kanaka, i keia aina no ko lakou hooilina.

17. Alaila e hooko ia ai na olelo a ke kaula, a Isaia, e olelo ana:

18. E hookiekie auanei kou poe kiai i ko lakou leo; me ka leo auanei lakou e hookani pu ai, no ka mea, e alikealike auanei ko lakou ike ana, i ka wa a ka Haku e hoihoi hou mai ai ia Ziona.

19. E hookani olioli, e olioli pu oukou, e na wahi neoneo o Ierusalema, no ka mea, ua hoomaha mai ka Haku i kona poe kanaka, ua hoolapanai oia ia Ierusalema.

20. Ua hoike ka Haku i kona lima Hemolele imua o na maka o na lahuikanaka a pau; a e ike auanei na kukulu a pau o ka honua i ka hoola ana o ke Akua.