1. Ano, eia kekahi, ia Iesu i olelo mai ai i keia mau olelo, huli hou ae la ia i na kanaka, a oaka ae la i kona waha ia lakou, i ka i ana, Oiaio, he oiaio kaʻu e olelo aku nei ia oukou, Mai manao ino aku i manao ino ole ia mai oukou.

2. No ka mea, me ka manao a oukou e manao ino aku ai, pela hoi e manao ino ia mai ai oukou; a me ke ana a oukou e ana aku ai, pela no hoi e ana ia mai ai no oukou.

3. A no ke aha oe e nana aku ai i ka pula iki iloko o ka maka o kou hoahanau, aka aole noonoo iki i ke kaola iloko o kou maka iho?

4. A pehea la oe e olelo aku ai i kou hoahanau, E ho mai naʻu e unuhi i ka pula iki noloko mai o kou maka; a, aia ka he kaola iloko o kou maka iho?

5. E ka hookamani, e unuhi mua oe i ke kaola mailoko ae o kou maka iho; alaila oe e ike pono ai ke unuhi ae i ka pula iki maloko o ka maka o kou hoahanau.

6. Mai haawi aku i ka mea hoano na na ilio, aole hoi e hoolei aku i ka oukou mau momi imua o na puaa, o hehi lakou ia mau mea ilalo o ko lakou mau wawae, a e kepa mai hoi lakou a e moku oukou.

7. E noi, a e haawi ia na oukou; e imi a e loaa hoi ia oukou; e kikeke, a e wehe ia no oukou;

8. No ka mea, o kela mea keia mea e noi ana, e haawi ia ana nana; a o ka mea e imi ana, e loaa ana ia ia; a i ka mea kikeke, e wehe ia auanei nona.

9. Owai la ke kanaka o oukou e haawi aku i ka pohaku na kana keiki, ke noi mai ia i berena?

10. A i noi mai ia i ia, e haawi aku anei oia i nahesa nana?

11. Ina paha oukou ka poe hewa i ike i ka haawi aku i na makana maikai na ka oukou poe keiki, he oi nui aku ko oukou Makua ma ka lani ma ka haawi ana mai i na mea maikai na ka poe e noi aku ia ia?

12. Nolaila, o na mea a pau a oukou e makemake ai e hana ia mai ia oukou e na kanaka, oia ka oukou e hana aku ai ia lakou, no ka mea, pela no ka ke kanawai a me ka ka poe kaula.

13. E komo ae oukou ma ka puka pololei; no ka mea, he akea ka puka, a he palahalaha ke ala, e hiki aku ai i ka make, a nui wale ka poe i komo ilaila;

14. No ka mea, he pololei ka puka, a he ololi hoi ke ala e hiki aku ai i ke ola, a kakaikahi wale ka poe e loaa ia.

15. E malama oukou no na kaula hoopunipuni, e hele mai ana io oukou nei me ka aahu hipa, aka, maloko, he poe ilio hihiu hae lakou.

16. Ma ko lakou hua e ike ai oukou ia lakou; e ohi anei na kanaka i ka huawaina noluna mai o ke kakalaioa, a i na fiku hoi noluna mai o ka puakala?

17. Oia hoi, o na laau maikai a pau ua hua mai i ka hua maikai; aka, o ka laau ino ua hua mai no hoi ia i ka hua ino.

18. Aole e hiki i ka laau maikai ke hua mai i ka hua ino, aole hoi i ka laau ino ke hua mai i ka hua maikai.

19. O kela laau o keia laau e hua ole mai ana i ka hua maikai, ua kua ia oia ilalo, a ua kiola ia aku hoi ia iloko o ke ahi.

20. Nolaila hoi, ma ko lakou hua, e ike aku ai oukou ia lakou.

21. O ka poe e olelo mai ana iaʻu, E ka Haku, e ka Haku, aole e komo mai lakou a pau iloko o ke aupuni o ka lani; aka o ka mea e hana ana i ka makemake o koʻu Makua iloko o ka lani.

22. He nui ka poe e olelo mai ana iaʻu ia la, E ka Haku, e ka Haku, aole anei makou i wanana aku ma kou inoa? A i mahiki aku hoi i na uhane ino ma kou inoa? A i hana aku i na hana mana he nui ma kou inoa?

23. Alaila, e hai aku au ia lakou, Aole au i ike ia oukou, e haele oukou pela mai oʻu aku nei, e ka poe hana ino.

24. Nolaila, o ka mea lohe i keia mau olelo aʻu, a hana hoi ia mau mea, e hoohalike au ia ia i ke kanaka naauao, nana i kukulu i kona hale maluna o ka pohaku;

25. A haule mai la ka ua, a kahe mai la ka wai, a nou mai la ka makani, a pa mai ma ua hale la; aole nae ia i hiolo; no ka mea, ua hookumu ia oia maluna o ka pohaku.

26. A o ka mea lohe i keia mau olelo aʻu, a hana ole hoi ia mau mea, e hoohalike ia hoi ia i ke kanaka naaupo, nana i kukulu i kona hale maluna o ke one;

27. A haule mai la ka ua, a kahe mai la ka wai, a nou mai la ka makani, a pa ma ua hale nei; a hiolo iho la ia, a nani wale hoi kona hiolo ana.