1. Ano, eia kekahi, ia Iesu i hai mai i keia mau mea, wehewehe mai la oia ia mau mea i na kanaka, a wehewehe mai la oia i na mea a pau ia lakou i na mea nui a me na mea uuku no hoi.

2. A i mai la oia: O keia mau olelo hemolele i loaa ole ai ia oukou, oia ka ka Makua i kauoha mai ai iaʻu e haawi aku ia oukou, no ka mea, he mea naauao ia ia, e haawi ia aku ua mau mea nei i na hanauna e hiki mai ana.

3. A wehewehe mai la oia i na mea a pau, oia, mai kinohi a hiki aku i ka wa ana e hele mai ai ma kona nani; he oiaio, i na mea a pau e hiki mai ana maluna iho o ka ili o ka honua, a hiki aku i ka manawa e hehee wale ai na kumu mua i ka wela loa o ke ahi, a e owili pu ia ka honua me he pepa la, a e hala aku na lani a me ka honua;

4. A hiki loa aku i ka la nui hope, i ka wa e ku aku ai na kanaka a pau, a me na ohana a pau, o ko na aupuni a me na olelo a pau imua o ke Akua, e hookolokolo ia no ka lakou mau hana, ina paha he maikai ia mau mea, ina paha he ino;

5. Ina he maikai ia mau mea, i ke alahouana o ke ola mau loa; a ina he ino ia mau mea, i ke alahouana o ka poino, i kau like ia laua, kekahi ma kekahi lima, a kekahi hoi ma kekahi lima, e like me ke aloha, a me ka pololei, a me ka hemolele iloko o Kristo, mamua oia o ka hoomaka ana o ke ao nei.

6. Ano, aole e hiki ke palapala ia ma keia buke, ka hapahaneri o na mea a Iesu i ao oiaio mai ai i na kanaka;

7. Aka hoi, aia no iloko o na papa a Nepai ka hapa nui o na mea ana i ao mai ai i ka poe kanaka;

8. A o keia mau mea kaʻu i palapala ai, oia ka hapa uuku o na mea ana i ao mai ai i ka poe kanaka; a ua palapala aku au ia mau mea me ka manao, e lawe hou ia mai ia mau mea i keia poe kanaka, mai ka poe Genetile mai, e like me na olelo a Iesu i olelo mai ai.

9. A ia lakou e loaa ai keia, a he mea e pono ai e loaa mua ia ia lakou, e hoao i ko lakou manaoio, a ina paha e manaoio lakou i ua mau mea nei, alaila, e hoike ia aku auanei na mea nui ae ia lakou.

10. A ina paha aole lakou e manaoio i ua mau mea nei, alaila, e aua ia auanei na mea nui ae mai o lakou aku i ko lakou hoohewa ia ana.

11. Aia hoi, ua aneane au e kakau iho ia mau mea a pau i kahakaha ia ai maluna iho o na papa a Nepai, aka, papa mai la ka Haku ia mea, i ka i ana, E hoao aku au i ka manaoio o koʻu poe kanaka;

12. Nolaila, ke kakau nei owau, o Moramona, i na mea i kauoha ia mai ai iaʻu e ka Haku. Ano, ke hoopau aku nei owau, o Moramona, i kaʻu mau olelo, me ka hoomaka e kakau i na mea i kauoha ia mai ai iaʻu;

13. Nolaila, ke makemake nei au e ike oukou, ua ao oiaio mai la ka Haku i ka poe kanaka, no na la ekolu; a mahope mai o ia wa, hoike pinepine mai la oia ia ia iho ia lakou, a wawahi pinepine ae la i ka berena, a hoopomaikai iho la ia mea a haawi mai la ia mea ia lakou.

14. A eia kekahi, ao mai la oia, a lawelawe mai la i na keiki a ka poe kanaka i olelo e ia ai mamua, a wehe mai la ia i na alelo o lakou, a olelo ae la lakou i ko lakou mau makuakane i na mea nui a kupanaha, he oiaio, i na mea i oi aku mamua o kana i hoike mai ai i na kanaka, a wehe mai la i ko lakou mau alelo i hiki ai ia lakou ke ekemu ae.

15. A eia kekahi, mahope mai o kona pii ana iloko o ka lani, i ka lua o ka manawa ana i hoike mai ai ia ia iho ia lakou, a ua hele aku la i ka Makua la, mahope mai o ka hoola ana i ko lakou poe mai a pau, a me ko lakou poe oopa, a o ka hookaakaa ana i na maka o ko lakou poe makapo, a o ka hoohamama ana i na pepeiao o ka poe kuli, a i hana i na ano a pau o ka hoola mawaena o lakou, a hoola ae la i kekahi kanaka mai ka make mai, a hoike mai la i kona mana ia lakou, a pii ae la i ka Makua la;

16. Aia hoi, ia la ae, hoakoakoa mai la na kanaka ia lakou iho i kahi hookahi, a ike aku la lakou a lohe ae la no hoi i ua poe keiki nei; he oiaio, oaka ae la na keiki uuku i ko lakou mau waha, a hai ae la i na mea kupanaha; a o na mea a lakou i hai ae ai ua papa ia, i ole ai kekahi kanaka e kakau ia mau mea.

17. A eia kekahi, hoomaka ae la ka poe haumana a Iesu i wae mai ai, ma ia hope iho e bapetizo aku, a e ao aku i ka poe a pau i hele mai io lakou la; a o ka poe a pau i bapetizo ia ma ka inoa o Iesu, ua hoopiha ia mai me ka Uhane Hemolele.

18. A he nui no ka poe o lakou i ike a i lohe hoi i na mea hiki ole ke ekemu ia, aole hoi ku i ke kanawai ke kakau ia aku;

19. A ao aku la lakou, a lawelawe hoi kekahi i kekahi; a hoohui pu ia ka lakou mau mea a pau mawaena o lakou, e hana ana kela kanaka keia kanaka me ka pololei, kekahi me kekahi.

20. A eia kekahi, hana iho la lakou i na mea a pau, me Iesu i kauoha mai ai ia lakou.

21. A o ka poe i bapetizo ia ma ka inoa o Iesu, ua kapa ia lakou, ka ekalesia a Kristo.