1. Ano hoi, eia kekahi, lohe ae la na kanaka a pau o ka aina i keia mau olelo; a hoike ae la no ia mea. A mahope mai o keia mau olelo ua hamau ko ka aina no na hora he nui wale;

2. No ka mea, no ka nui o ka pihoihoi o na kanaka, hooki iho la lakou i ka pihe ana a me ka aoa ana no ka make o ko lakou poe hanauna i luku ia; nolaila, ua hamau ko ka aina a puni no na hora he nui.

3. A eia kekahi, pae hou mai la kekahi leo i na kanaka, a lohe ae la na kanaka a pau, a hoike ae la no ia mea, i ka i ana:

4. O oukou, e ka poe kanaka o keia mau kulanakauhale i hiolo, he poe mamo hoi na Iakoba; he oiaio, he poe no ko ka hale o Iseraela, nani na manawa aʻu i houluulu ai ia oukou, e like me ka houluulu ana a ka moa i kana ohana keiki malalo iho o kona mau eheu, a ua hanai aku ia oukou.

5. A, eia hou, nani na manawa aʻu i makemake ai e houluulu mai ia oukou, e like me ka houluulu ana a ka moa i kana ohana keiki malalo iho o kona mau eheu; he oiaio, o oukou, e ka poe kanaka o ka hale o Iseraela, ka poe i haule; he oiaio, o oukou, e ka poe kanaka o ka hale o Iseraela, ka poe e noho la ma Ierusalema, me he mea la ua haule oukou; he oiaio, nani na manawa aʻu i makemake ai e houluulu ia oukou, e like me ka houluulu ana a ka moa i kana ohana keiki, aole nae oukou i makemake mai.

6. E ko ka hale o Iseraela e, ka poe aʻu i hookoe aku ai, nani na manawa aʻu e houluulu mai ai ia oukou, e like me ka houluulu ana a ka moa i kana ohana keiki malalo iho o kona mau eheu, ina e mihi oukou a e hoi mai iaʻu me ka manao paa o ka naau.

7. Aka i ole, e ko ka hale o Iseraela e, e lilo na wahi a oukou i noho ai i neoneo, a hiki aku i ka wa o ka hooko ia ana o ka berita i ko oukou poe kupuna.

8. Ano, eia kekahi, mahope iho o ka lohe ana o na kanaka i keia mau olelo, aia hoi, hoomaka ae la lakou e uwe a aoa hou aku no ka make o ko lakou poe hanauna a me na makamaka.

9. A eia kekahi, pela i hala aku ai na la ekolu. A ma ke kakahiaka ia, a puehu aku la ka pouli mai ka ili aku o ka aina, a oki iho la ka haalulu ana o ka honua, a oki iho la ka nahaha ana o na pohaku, a me na uhu weliweli ana, a hala aku la na wawa ino a pau;

10. A pili pu hou ae la ka honua, i ku ai ia; oki iho la ka pihe ana, a me ka uwe ana, a me ke kupinai ana o ka poe kanaka i hoola ia; a lilo iho la ko lakou uwe ana i olioli, a me ko lakou pihe ana i hilinai ana a i hoalohaloha ana i ka Haku ia Iesu Kristo, ko lakou Mea e Ola ai.

11. A hiki i keia wa ua ko na palapala hemolele, i olelo ia ai e ka poe kaula.

12. A o ka poe kanaka i oi aku ma ka pono, oia ka poe i hoola ia, a o lakou no ka poe i hookipa i na kaula, a hailuku ole ia lakou; a o lakou ka poe i hookahe ole i ke koko o ka poe hoano, oia ka poe i hookoe ia;

13. A ua hookoe ia lakou, aole i hoopoho ia iho a kanu ia iho iloko o ka honua; a aole lakou i make i ka hohonu o ke kai; a aole hoi lakou i puhi ia i ke ahi, aole hoi i haule kekahi mea maluna iho o lakou a pepe a make; a aole lakou i kaikai ia aku iloko o ka puahiohio; aole hoi lakou i hoopio ia e ka ohu o ka uahi a o ka pouli.

14. Ano, o ka mea heluhelu, e hoomaopopo mai oia; o ka mea ia ia na palapala hemolele, e huli iho oia ia mau mea, a e nana a e ike ina aole o keia mau make a me na luku ana a pau ma ke ahi, a ma ka uahi, a ma na makani ino, a ma na puahiohio, a ma ka hamama ana o ka honua i loaa lakou, a me keia mau mea a pau, i ka hooko ana i na wanana a kekahi poe he nui o ka poe kaula.

15. Aia hoi, ke i aku nei au ia oukou, he oiaio, he nui ka poe i hoike mai no ua mau mea nei ma ka hiki ana mai o Kristo, a ua pepehi ia ae a make no ko lakou hoike ana aku no ua mau mea nei;

16. He oiaio, hoike mai la ke kaula Zenosa no ua mau mea nei, a o Zenoka hoi ka i olelo mai no ua mau mea nei, no ka mea, hoike nui mai la laua no makou, ka poe i koe o ka lakou poe hua.

17. Aia hoi, hoike mai la no hoi ko makou kupuna kane o Iakoba no kekahi koena o ka poe hua a losepa. A, aia hoi, aole anei makou ke koena o ka poe hua a Iosepa? A o keia mau mea i hoike mai ai no makou, aole anei ia mau mea i kakau ia maluna iho o na papa keleawe a ko makou kupuna kane o Lehi i lawe mai ai mailoko mai o Ierusalema?

18. A eia kekahi, ma ka pau ana o ka makahiki kanakolukumamaha, aia hoi, e hoike aku au ia oukou, o ka poe kanaka o Nepai i hookoe ia mai, a me ka poe no hoi a pau i kapa e ia mamua o ko Lamana, ka poe i hookoe ia mai, ua loaa mai ia lakou na mea lokomaikai nui i hoike ia mai ai ia lakou, a me na mea pomaikai nui i ninini ia mai maluna iho o ko lakou mau poo, a i ka wa mahope koke mai o ka pii ana o Kristo iloko o ka lani, hoike oiaio mai la oia ia ia iho ia lakou;

19. E hoike mai ana i kona kino ia lakou, a e lawelawe mai ana ia lakou; a e haawi ia aku auanei he mooolelo o kana hana ana. Nolaila, no keia wa ke hoopau aku nei au i kaʻu mau olelo.