1. A eia kekahi, ia Iesu i olelo mai ai i keia mau olelo, olelo pakahi mai la oia i kana poe haumana, me ka i ana ia lakou: Heaha ka oukou e makemake mai nei iaʻu mahope aku o koʻu hele ana i ka Makua la?

2. A olelo aku la lakou a pau, koe ekolu: Ke makemake nei makou mahope iho o ko makou ola ana i ke ola o kanaka, e pau ko makou hana ana, ma ka mea au i kahea mai ai ia makou, i hele emo ole aku ai makou iou la, iloko o kou aupuni.

3. A i mai la oia ia lakou: Pomaikai oukou, no ko oukou noi ana i keia mau mea iaʻu; nolaila, mahope iho o ke kanahikukumamalua o ko oukou mau makahiki, e hele mai oukou ioʻu nei ma koʻu aupuni, a me au nei e loaa ia oukou ka maha.

4. A ia ia i olelo mai ai ia lakou, huli ae la oia i na mea ekolu, a i mai la ia lakou: Heaha la ko oukou makemake aʻu e hana aku ai no oukou, iaʻu e hele aku ai i ka Makua la?

5. A kaumaha iho la lakou ma ko lakou mau naau, no ka mea, aole lakou i aa e olelo aku ia ia i ka mea a lakou i makemake ai.

6. A i mai la oia ia lakou: Aia hoi, ua ike au i ko oukou mau manao, a ua makemake oukou i ka mea a Ioane, kuu mea aloha, ka mea i noho pu me au ma koʻu oihana, mamua o koʻu kaulia ana e ka poe Iudaio, i makemake mai ai iaʻu;

7. Nolaila, pomaikai nui ae oukou, no ka mea, aole loa oukou e hoao i ka make, aka, e ola no oukou e ike i na hana a pau a ka Makua, i na keiki a kanaka a hiki aku i ka wa e pau loa ai na mea i ka hooko ia, e like me ka makemake o ka Makua, i ka wa aʻu e hele mai ai iloko o koʻu nani, me na mana o ka lani;

8. A, aole loa oukou e auamo i na eha o ka make; aka, i ka wa aʻu e hele mai ai ma koʻu nani, e hoomalule ia oukou ma ka imo ana o ka maka, mai ka palaho i ka palaho ole; alaila, e hoopomaikai ia oukou ma ke aupuni o koʻu Makua.

9. A eia hou, aole e loaa ia oukou ka eha oiai oukou e noho ana ma ka io, aole hoi kaumaha, koe wale iho no na hala o ko ke ao nei; a o keia a pau kaʻu e hana ai no ka mea a oukou i makemake mai ai iaʻu, no ka mea, ua makemake oukou e kai mai oukou i na uhane o na kanaka ioʻu nei, oiai ka honua e ku ana;

10. A no keia mea e loaa auanei ia oukou ka piha o ka olioli; a e noho iho auanei oukou ma ke aupuni o koʻu Makua; he oiaio, e piha auanei ko oukou olioli, e like me ka Makua i haawi mai ai iaʻu i ka piha o ka olioli; a e like auanei oukou me au nei, a ua like hoi owau nei me ka Makua; a o ka Makua me au nei hookahi maua;

11. A ke hoike aku nei ka Uhane Hemolele no ka Makua a me au nei; a ke haawi nei ka Makua i ka Uhane Hemolele i na keiki a kanaka, noʻu nei.

12. A eia kekahi, ia Iesu i olelo mai ai i keia mau olelo, hoopa mai la oia i kela mea i keia mea o lakou me kona manamana lima, koe na mea ekolu wale no, ka poe e kali ana, alaila, hele aku la ia.

13. A, aia hoi, ua hoohamama ia ae la na lani, a ua lawe ia aku la lakou iluna iloko o ka lani, a ike ae la a lohe ae la i na mea e hiki ole ai ke pane ae.

14. A papa ia lakou aole e ekemu aku; aole hoi i haawi ia ia lakou ka mana, e hiki ia lakou ke ekemu aku i na mea a lakou i ike ai a i lohe ai;

15. A ina paha iloko o ke kino lakou, a i ole, iwaho o ke kino paha, aole lakou i ike, no ka mea, i ka ike ana iho o lakou ua like me ka hoopahaohao ia ana o lakou, i hoomalule ia ai lakou mai keia kino io, i ka noho palaho ole ana, i hiki ia lakou ke ike i na mea o ke Akua.

16. Aka, eia kekahi, lawelawe hou ae la lakou ma ka ili o ka honua; aole nae lakou i lawelawe no na mea a lakou i lohe ai a i ike ai, no ke kauoha i haawi ia mai ai ia lakou ma ka lani.

17. Ano, ina he palaho paha, a he palaho ole paha, mai ka la aku o ko lakou hoopahaohao ia ana, aole au i ike;

18. Aka, eia kaʻu i ike, e like me ka mooolelo i haawi ia mai, hele aku la lakou ma ka ili o ka aina, a lawelawe ae la i na kanaka a pau, a e hookomo ana i ka poe a pau i manaoio ma ka lakou hai olelo ana i ka ekalesia; e bapetizo ana ia lakou; a o ka poe a pau i bapetizo ia, loaa iho la ia lakou ka Uhane Hemolele;

19. A ua hoolei ia lakou iloko o ka halepaahao e ka poe aole no ka ekalesia, aka ua hiki ole i na halepaahao ke hoopaa ia lakou, no ka mea, ua nahaha ia ia mau mea iwaena konu.

20. A ua hoolei ia lakou iloko o na lua ma ka honua, aka hahau aku la lakou i ka honua me ka olelo a ke Akua, a ua hoopakele ia lakou ma o kona mana la mailoko mai o na hohonu o ka honua; a, nolaila, ua hiki ole ke eli ia na lua e lawa ai ke hoopaa ia lakou.

21. A ekolu ko lakou hoolei ia ana iloko o ka umu ahi, a loaa ole ia lakou kekahi poino.

22. A elua ko lakou hoolei ia ana iloko o ka lua holoholona hihiu; a, aia ka, paani ae la lakou me na holoholona, e like me ke keiki me kekahi keikihipa ai waiu, a loaa ole ia lakou kekahi poino.

23. A eia kekahi, pela lakou i hele aku ai mawaena o ka poe kanaka a pau o Nepai, a hai ae la i ka euanelio o Kristo i na kanaka a pau maluna iho o ka ili o ka aina; a ua hoohulihia lakou i ka Haku, a ua hui pu ia me ka ekalesia o Kristo, a pela i hoopomaikai ia ai ka poe kanaka o ua hanauna la, e like me ka olelo a Iesu.

24. Ano, ke hoopau nei owau, o Moramona, i kaʻu olelo ana no keia mau mea, no kekahi manawa.

25. Aia hoi, ua aneane au e kakau i na inoa o ua poe la, ka poe e hoao ole loa i ka make, aka papa mai la ka Haku, nolaila, ke kakau ole nei au ia mau mea, no ka mea, ua huna ia ia mau mea mai ko ke ao nei ae.

26. Aka hoi, ua ike au ia lakou, a ua lawelawe mai lakou iaʻu;

27. A, aia hoi, mawaena auanei lakou o ka poe Genetile, a e hoomaopopo ole ana ka poe Genetile ia lakou.

28. Mawaena auanei no hoi lakou o ka poe Iudaio, a e hoomaopopo ole ka poe Iudaio ia lakou.

29. A e hiki mai auanei keia, i ka wa a ka Haku e manao ai he pono ma kona naauao, e lawelawe aku lakou i na ohana a pau o ka Iseraela i hoopuehu ia, a i ko na aupuni a pau, a me na ohana, a i na olelo a me na kanaka, a e lawe mai noloko mai o lakou io Iesu la i na uhane he nui wale, i ko ai ko lakou makemake, a no ka mana o ke Akua iloko o lakou i ka hoomaopopo ana aku;

30. A me he mau anela la lakou o ke Akua, a ina e pule aku lakou i ka Makua ma ka inoa o Iesu, ua hiki ia lakou ke hoike mai ia lakou iho i kela kanaka keia kanaka a lakou i makemake ai;

31. Nolaila, e hana ia auanei na hana nui a kupanaha e lakou, mamua o ka la nui e hiki mai ana, i ka wa a na kanaka a pau e ku maoli ai imua o ka noho hookolokolo o Kristo;

32. He oiaio, mawaena o ka poe Genetile e hana ia ai auanei he hana nui a kupanaha e lakou, mamua o ua la hookolokolo la.

33. A ina ua loaa ia oukou na palapala hemolele a pau, e hoike ana i ka mooolelo o na hana kupanaha a pau a Kristo, alaila, e ike oukou, e like me na olelo a Kristo, e hiki io mai ua mau mea nei e pono ai.

34. A auwe ka mea e hoolohe ole i na olelo a Iesu, a i ka ka poe no hoi ana i wae mai ai a hoouna aku ai mawaena o lakou, no ka mea, o ka mea e hookipa ole ana i na olelo a Iesu, a me na olelo a ua poe la ana i hoouna ai, e hookipa ole ana lakou ia ia; a nolaila, e hookipa ole ia lakou ma ka la hope;

35. A e aho no lakou ina aole lakou i hanau ia mai. No ka mea, ke manao nei anei oukou ua hiki ia oukou ke pakele i ka hoopai o ke Akua i hoonaukiuki ia, ka mea i hehi ia ilalo o na wawae o na kanaka, i hiki mai ai ke ola ma ia mea?

36. Ano hoi, me au i olelo aku ai no ua poe la a ka Haku i wae mai ai, he oiaio, na mea ekolu, ka poe i lawe ia ae iluna iloko o na lani, ua ike ole au ina paha ua hoomaemae ia lakou mai ka palaho ae i ka palaho ole.

37. Aka hoi, mahope mai o kaʻu kakau ana, ua ninau aku au i ka Haku, a ua hoike mai la oia iaʻu, he mea e pono ai ke hoomalule ia ko lakou mau kino, i ole ia, e hoao lakou i ka make e pono ai;

38. Nolaila, i ole ai lakou e hoao i ka make, ua hoomalule ia ko lakou mau kino, i ole ai lakou e ike i ka eha, aole hoi i ke kaumaha, koe wale no no na hala o ko ke ao nei.

39. Ano, aole e like keia hoomalule ia ana me ka mea e hiki mai ana ma ka la hope; aka, ua hoomalule ia mai lakou, a ua hiki ole ia Satana ke loaa ka mana maluna iho o lakou, i hiki ole ai ia ia ke hoowalewale mai ia lakou, a ua hoomaemae ia lakou ma ka io, a ua hemolele lakou, a ua hiki ole i na mana o ka honua nei ke hoopaa ia oukou ;

40. A pela lakou e noho ai a hiki aku i ka la hookolokolo o Kristo; a ma ia la e loaa ai ia lakou ka hoomalule nui ana, a e hookipa ia ae iloko o ke aupuni o ka Makua e puka hou ole aku mawaho, aka e noho mau loa pu iho me ke Akua ma na lani.